احوالات حضرت موسی ابن جعفر (ع)
آلدی قراریمی گینه بیر جلوهء نگار
صبریم ائوین یخیب داغیدیب ائتدی تار و مار
ارکانِ صبره ایله تزلزل سالوب پوزوب
نه خانه قویدی خانه نشینه نه بیر حصار
بی خانمان اولان دلِ سرگشته ی حزین
بیر خانهء امان تاپا بولمور دوتا قرار
بو وسعتیله قلبیم ائوی بس اولوبدی تنگ
گویا کی مَنجنیقدی هردم وئرور فشار
نه اهلِ دل وار ائتماقا اظهارِ دردِ دل
نه دیلده وار لیاقت اولا درده همجوار
بیر یر کی نه اوزونده نه اهلینده وار وفا
خیره غلطدی اولماق او یردن امیدوار
ای دل گر ایسته سن تاپاسان باش حیاتیدن
ئولدورمه اوز اوزون ، بو مکاندان ائله فرار
بیر یارِ همزبان کی سنه بو وطنده یوخ
بیهوده چکمه غصّه ، ائله غربت اختیار
گئتسن دیارِ غربته بغداده گئتگیلن
محبوبون اوردادی ، اورادی سن دییَن دیار
چوخ گزمه ، حبس خانه ی هارونی آل خبر
وار حاجتون اگر او یره ایله بیر گذار
باب الحوائج حضرتِ موسی بن جعفری
گور ایلیوبدولر نجه محبوس خوار و زار
نه سن ایشیتمیسن کی نجه حبس گاهیمیش
نه ذکرین ائیلیوب سنه بیر ذاکر ، آشکار
نه وار منیم دیلیمده او جرأت بیان ائدم
نه واردی قدرتی که قلم ایلیه نگار
امّا بو قدر وارکی ائله تو به توئیدی
تاریک اولوردی صبح و مسا لیل و هم نهار
گوندوز گئجه بولونمزیدی دوشمزیدی گون
مخصوصیدی امامه همان حبسگاهِ تار
بیر نوعیلن رطوبتیدی اول شهین یری
شرم ایلورم بیانینه عالِمدی کردگار
بو سوزدن آنلاسان ، ائله بیر صبر صاحبی
گه گه دیردی بیر منی بوردان ائدون کنار
آز قالدی محو ائده بو رطوبت وجودیمی
من بینوایه ایلمیون ظلمِ بی شمار
راوی دییر کی بیر گون او شه بامِ حبسده
گوردوم کی ایلشیب سارالوبدور او گلعذار
بسکه ضعیف اولوبدی وجودی اَسنده یل
صاق و صولا ائدر حرکت چون گُلِ بهار
واردور خبرده یدّی ایل ، اون یدّی ایل ، بش ایل
محبوس اولوب او نحویلن اول بزرگوار
مشغولیدی او مدّتِ عمرین عبادته
معبودینه ائدردی مناجات زار زار
آنّین قویاردی اکثرِ اوقات سجدیه
راز و نیاز ائدردی او سلطانِ تاجدار
هردم دییردی سن اوزون عالِمسن ای خدا
آیینه ی دلیمده منیم یوخدی هیچ غبار
سندن همیشه من اوزوم ایلردیم آرزو
بیله کنار گوشه ، بئله امن روزگار
آسوده بیر عبادت ائدیدیم خدا سنه
شکر ایلورم ئولونجه کی توفیقون اولدی یار
عذر ایسترم امامِ زمان ، یابن العسکری
ای ذولفقار صاحبی ای شاهِ تاجدار
آخرده بیله عابد و زاهد امامیلن
رفتار ائدیبدی گور نجه هارونِ نابکار
دوشدی بو فکره ائلیه مسموم او بی کسی
سِند لعینه ایلدی بو امری واگذار
مأمور ائدیب هلاک ائده موسی بن جعفری
بیر سینی اول خبیثه رُطَب وئردی سمّدار
تاپشوردی سعی قیل بولاری میل ائده تمام
ائتمه مُسامحه منی بو فکردن قوتار
آلدی همان رطب لری زندانه یوز قویوب
داخل اولوب حضورِ امامه او کین شعار
قویدی برابرینده یره ، باخدی بیر امام
تغییر تاپدی حالی چکوب آهِ شعله بار
تأکید ائدوب امامه او بی شرم و بی حیا
بیر نچّه دانه میل قیلوب دلده اضطرار
تهدیدیلن اولوب مُتعرّض دوباره دن
بیر باخدی حسرتیله او مظلومِ غم دچار
فرمایش ائتدی آز منی اینجیت بسیمدی بو
گَلدی اله مرامِ دلون ایله شرم و عار
بو نچّه دانه ظالم اوتان ئولدورر منی
ال چک گیلن داخی جیگریمده آلشدی نار
اول بی حیا ایاقه دوروب چیخدی حبسدن
قالدی امام او حالیله بی یار و غمگسار
قویدی خیالینه گئده بیرده مدینیه
اهل و عیالینی گوره او سیّدِ کبار
بو مقصدین مُسیّبه قیلدی بیان او شه
عرض ایلدی امامه کی ای شاهِ باوقار
بغداد هارا مدینه هارا یا کی سن هارا؟
چوخدور مسافتی وار اوزونده بو انکسار
مولای ، ثانیا" قاپیلار باغلیدور تمام
اطرافیده دوروبلا سراسر نگاهدار
سست ایلمه بویوردی امام اعتقادیوی
وار بیز ائمّه ده هامی بیر امره اقتدار
قیلدی اشاره کُنده و زنجیری آچیلدیلار
اعجازیلن مدینیه گئتدی او شهریار
یغدی مخدّراتینی اطرافینه تمام
بیر بیر وداع قیلدی کُباریله هم صِغار
اطفالینون چوخی یوخودیدی اویاتمادی
آهسته یوزلرندن اوپوب ائتدی اعتذار
اهلِ حرمدن هر بیری ایستیردی سس چکه
مانع اولوب ائدردی او شه امرِ اصطبار
چوخ تاپشوروردی ، چوخ اوجادان ناله ائتمیون
تا خلق ایچینده اولمیه بو مطلب انتشار
دشمنلریم ایشیتسه اگر بو قضیّه نی
اوغلوم رضانی ده توتوب ایلّله انزجار
تاپشوردی اهلِ بیتینی پروردگارینه
ائتدی مراجعت گینه بغداده اشکبار
بو ماجرانی بیله مُسیّب بیان ائدر
گئتدی امام او دمکی منی قویدی دلفکار
هارون سؤال ائتسه دیردیم کی نه دیوم
زنداندا بو خیالیله دورموشدوم انتظار
بیرده باخاندا گوردوم امام اوز یرینده دور
زنجیری اوز الیله گینه بوینونا وورار
دوتدی یوزون بویوردی مُسیّب سو وئر منه
یاندی جگرلریم دوشوب اندامیمه شرار
سو حاضر ائتدیم آلدی بیر آز میل ائدیب امام
سبز اولدی گُل جمالی توتوب قلبی اضطرار
بولدوم کی خاتمه تاپوب امری او سَرورین
حالیندن آشکاریدی گوردوم کی احتضار
قبلهء تمامِ اهلِ یقین ، دوندی قبلیه
قبله دوزَلدی هوله توشوب چرخِ کجمدار
ذکرِ شهادتِینی دیوب یومدی گوزلرین
گویلردی چکدی روحُ الاَمین بو وفاته جار
چیخدیم دیَر مسیّب او دم حبسگاهیدن
اولدوم روانه سرعتیله با غمِ هزار
هارونی گلدیم ایلدیم آگه قضیّه دن
خشنود اولوب او بحرِ ستم معدنِ شرار
امر ائتدی نعشی اوسته چکون اوز عباسینی
اولدی سُرور اوزیله اوزی عازمِ شکار
زنجیره باغلی حضرت موسی جنازه سی
اوچ گون قالوب او حالیله زنداندا خوار و زار
اوچ گون گئچوب قییتدی او بی دین شکاریدن
بیر حکم قیلدی فاطمه نی ائتدی داغدار
بیر نردبانی دورت نفر حمّالیلن بئله
زندانه گوندریب او جفاجوی کین شعار
تابوته باخ جنازیه باخ بیر حیایه باخ
تا حشر اولونجا اول گیلن ای چرخ ، شرمسار
باشدان ایاقدان اولدولا حامل جنازیه
سنگینیدور گوروبله ، اولوب یرده استوار
حمل ایلسونله ایستدیلر ممکن اولمادی
حیرتده قالدیلار کی خدایا نه سرّ وار
ردّ ایلیب عباسینی ناگه نه گوردیله
زنجیر گردنینده ائدوب جانینی نثار
زنجیرینی آچوب قوری یردن گوتوردیله
زندانیدن چیخاتدیلا خوار و ذلیل وار
بولمم نه نوعی گوردی امامین جنازه سین
تاب ائتمییب اولوبدی سلیمانه ناگوار
چوخ قهریلن آلوب اوزی غسل و کفن ائدیب
ائتدی زمانه ده اوزونه کسبِ افتخار
امر ایلدی حرملرینه دورمیون گَلین
بی کسدی نعشی اوسته آچون معجر و خِمار
یوخدور یانیندا آغلیانی بو غریب ئولوب
بیر آغلیون دویونجا ائدون ناله چون هَزار
بو رسمیدور پس ایندیکی هر بیر جنازه نون
اوستونده اهلِ بیتی خدا باشلارین آچار
قویمادی اشقیا نیه بس زینب آغلاسون؟
یانسین سیزیلداسین او زهرایه یادگار
گودالِ قتلگاهیده سلطانِ کربلا
دوشموشدی قان ایچینده او ساعت کی زخمدار
ایسّی قوم اوسته نعشی قالوب عور و بی کفن
نه غسل و نه حنوط نه تابوت و نه مزار
بو سهلدور کی قویمادی سعد اوغلی دفن اولا
فرمان وئریبدی لشکر اولوب آتلارا سوار
آت گزدیربله نعشِ حسین اوسته بر ملا
پامال ائدیبله گُل جسدین فرقهء شرار
یازما (شهاب) اشاره کفایتدی ساخلا ال
دم وورما ، بو یانار اودّا دفتر قلم یانار
یولداشلارین توَسّلیدی عمده مقصدی
یوخ طوله احتیاجی ، همین بسدی اختصار
باب الحوائج ایلر اوزی چاره دردیوه
عالِمدی هر کسون که دیلنده نه دردی وار.
مرحوم شهاب تبریزی
منبع مجموعه کانالهای مدح و مرثیه
با سلام