خروج از مدینه

 

چوخ باخ گِلَن بو سروِ خرامانه فاطمه

گلمز داخی بو سرو ، بو بستانه فاطمه

 

باجی اَلی تبرّک اولور ، اوز اَلونله گَل

بیر شانه وور بو زلفِ پریشانه فاطمه

 

بوللم که کربلاده بو نازلی سکینه نون

تیترر الی آلاندا اله شانه فاطمه

 

بو خاطره یولار که بو زلفِ معنبری

ظلمیله شمرِ دون باتورور قانه فاطمه

 

یعقوب آتام ، مدینه دی کنعان ، سن باجیم

ایتدون روان بو یوسفی زندانه فاطمه

 

گل بیرده اوپ یوزیمدن او یوسف کیمی ، باجی

اولماز قیتماقیم داخی کنعانه فاطمه

 

بیر جام سو گتور منه ، بیر دم قوناقوام

ویرمزله کربلاده سو مهمانه فاطمه

 

قویما اطاقیمی دوتا توز ، چون خبر گلور

قارداشون ئولدی ، ایله عزاخانه فاطمه

 

ایتمه خضاب ، گیتمه طویا ، گییمه قرمزی

ساخلا عزا همیشه بو نالانه فاطمه

 

قرآنیمی گُتور اَله هر جمعه آخشامی

گیت روضهء پیمبرِ ذی شانه فاطمه

 

ایله دعا که بلکه یتم تیز مرادیمه

قربان ایدم بو جانیمی جانانه فاطمه

 

جدّیم خلیل تک اوز الیله بابام حسین

زینت ویرور ، منیم کیمی قربانه فاطمه

 

یاسینده آغلیانلارا قربان ویرور منی

منده اولام شفیع ، جوانانه فاطمه

 

فلک ایدر سنی مندن جدا ، خداحافظ

مریض جانوه اکبر فدا ، خداحافظ

 

مرحوم دخیل مراغه ای

منبع مجموعه کانالهای مدح و مرثیه