رد اثاث غارت 3112

رد اثاث غارت

 

ای کاش اولیدی گردش دور زمان خراب

آل رسولی ائتمدی بیر لحظه کامیاب

 

یئر وئردی آل حیدره بغض عنادیله

تا آلتی آی دمشقده بیر مسجد خراب

 

ئولدی ئولن قالان ساری گل تک سارالدیلار

آخر رقیه ایلمدی بو جفایه تاب

 

جان ویردی زحمتیله سوسوز ،آج خرابه ده

گلدی فغان و نالیه آل ابوتراب

 

شهر اهلی دگدی بیربیرینه آغلاشوب تمام

گوردی بو انقلابی یزید ائتدی اضطراب

 

قوخدی جلالینه یتیشه فتنه و زوال

نار بلا او نوعیله چکمیشدی التهاب

 

امر ائتدی خارج ائتدیله اولاد اطهری

بیر یاخشی منزل ایلدی تعیین و انتخاب

 

بیماریدن گوتوردیله زنجیر و کنده نی

هم بانوان ایچون وئریلوب معجر و نقاب

 

وئردی اجازه شاه شهیدین عزاسینه

بیمار سالدی شال عزا گؤزده اشک ناب

 

اوچ گون عزا دوتولدی حسینه جلالیله

قرآن اوخوندی مجمر عود اولدی هم گلاب

 

دوردیمجی گون چاغوردی امامی حضورینه

عرض ائتدی یاعلی ندی بو امریده صواب

 

رأیوز وطندی یا قالیسوز بو دیاریده؟

یوخدور ممانعت داخی ای شاه ذوالرقاب

 

ابن زیاده لعن ائلسون خالق جهان

شرمنده ایلدی منی سیزدن او کین مآب

 

گل آل بو کیسهٔ زری عفو ائتگلن منی

ایله بونی ئولنلریوه خون بها حساب

 

انعام و جایزه نقدر ایسته سن وئریم

تا قالماسین قیامته بو امر ناصواب

 

آلدی بو سؤز امامین الیندن قرارینی

آخدی عذاره گؤز یاشی چون لؤلؤ خوشاب

 

فرمایش ائتدی قلبیمی یاندیرما ای یزید

اولماز بو سؤزلریله سنه توبه و اناب

 

پیغمبرین چراغینی سن ائتموسن خموش

زلف بتوله خون حسین ائتموسن خضاب

 

وئرسن تمام عالمی اولماز عوض یقین

اکبر باشیندا بیر تله ای کان انقلاب

 

مین کیسه سیم و زر وئره سن التماسیله

ممکن دگول که اصغر آناسی اولا مجاب

 

الان باسوب اورک باشینا قانلی اونّوگون

لای لای دیور بالاسینا اوخشور آنام رباب

 

ئولدورموسن امیر ابوالفضل تک جواب

مثلین داخی چتین گؤره بو چرخ نُه قباب

 

بیر مشک سو بهانه سینه بیر جوت قولون وئروب

اولموشدی کربلاده بیزه بسکه قحط آب

 

لیلا ئولونجه وار یئری وا اکبرا دیه

ام البنین ئولونجه گرکدور اولا مصاب

 

سیم و زرین بیزیم یانیمیزدا یوخ ارزشی

دنیا مالیندان ائتمیشوخ اولدن اجتناب

 

سندن بو خواهشیم وار اگر ایلسون قبول

بیزدن اولار که غارت ائدوب لشکر عذاب

 

بعضیسی منحصردی اولاردان خانملارا

خلخال و گوشواره و دستبند زر ناب

 

بیگانه اللرینده اولار قالسا خوش دگول

رد ایلیه گرکدی او اسبابی شیخ و شاب

 

بیرده منی شهید ائلماق اولسا نیّتون

بیر شخص معتمد سن اوزون ایله انتخاب

 

بو باشسیز اهل بیتی یتورسون مدینیه

غربتده آخر عمه لریم اولدی دلکباب

 

بیرده گتور منه آتامون قانلی باشینی

ایلور وصاله یتماقا بو مرغ دل شتاب

 

بو سؤزلری یزید ائشیدوب اولدی شرمسار

وئردی امام ساجده چوخ لطفیله جواب

 

سنله بو کاروان گئده جاقدور مدینیه

سن قتلیدن امانیده سن ائتمه پیچ و تاب

 

امر ایلدی یزید منادی ائدوب ندا

غارت اولان اساسی گتورسونله اشقیا

 

امر ایلدی یزید منادی ائدوب ندا

غارت اولان اساسی گتورسونله اشقیا

 

بیربیر اساس عترت اطهاری گتدیلر

زرّین نقاب و معجر زرتاری گتدیلر

 

بیر بوخجا گتدی بیر نفر اشرار شامیدن

بوخجا آچیلدی ناله اوجالدی امامدن

 

بیر دوت مین اوخلی کوینگی گؤردی چکوب نوا

سسلندی وای یارالی سوسوز،باغریقان بابا

 

هرکس گوروب او کوینگی یؤل تاپدی مطلبه

بیربیر اوپوبله وئردیله آخرده زینبه

 

زینب باخوب او پیرهنه گلدی شیونه

بیردن ال آتدی زلفینه سسلندی وای منه

 

گورجک آناسی فاطمه نین کاردستینی

دولدوردی اشکیله او زمان چشم مستینی

 

گاهی دیردی وای حسین وای یانا یانا

گاهی دیردی دادیمه گل هارداسان آنا

 

اود ویردی قلب آل رسوله بو منظره

بیر جفت گوشواره قویولدی برابره

 

زینب او گوشواره لره باخدی برملا

سسلندی جان رقیّه قیزیم هارداسان بالا

 

عمه ن فدا اولیدی دل پاره پاره وه

گل صاحب اول وفالی قیزیم گوشواره وه

 

قلب ربابه بیر سبب چاره گتدیلر

ناگه او جَمعه بیر دانا گهواره گتدیلر

 

بیکس آناسی سسلدی اصغر وای آغلادی

گهواره نی گورنده دئدی لای لای آغلادی

 

گل سینمه اوغول علی لای لای دیوم سنه

سس وئر منه سوسوز بالا ناز ایلمه منه

 

بیر بوقجا گلدی بولدیله شیون اساسیدور

ناگه آچاندا گؤردیله اکبر لباسیدور

 

لیلا او دمده سسلدی ایوای جوان اوغول

قویدون عجب غریب آتاوی باغریقان اوغول

 

دائم منی او قانه باتان کاکل آغلادور

طوی دوتمادیم سنه،منی بو نسگل آغلادور

 

تازه جوان گورنده باخوب یانّام آغلارام

سالّام خیالیمه سنی اودلانّام آغلارام

 

بیر قانلی گوشواره گینه گتدی بیر نفر

آلدی او گوشواره نی بیمار خونجگر

 

یاده سالوب عروسین او دم گوش پاره سین

آغلار گؤزیله رد ائلدی گوشواره سین

 

گؤردی او گوشواره لری بینوا عروس

گلدی فغانه باشلادی نی تک نوا عروس

 

عرض ائتدی زینت ایستمیرم من وفالیام

قارداش،آتا، عم اوغلوم ئولوبدی عزالیام

 

قلبیم یانوب قرا چکیلوب طوی اتاقیمه

هیهات گوشواره سالام من قولاقیمه

 

من باشدان آچمارام داخی قاسم قراسینی

جانیم چیخونجا ساخلارام اکبر عزاسینی

 

دوران منیم نشاطیمی دؤندردی شیونه

قیزلار سزادی گر دیه لر بدقدم منه

 

طویدا فلک منیم بویادی قانه زلفیمی

تا وار حیاتیم ایلمرم شانه زلفیمی

 

سو گؤرسم آغلارام دیرم جان عم اوغلی وای

لب تشنه سو یانیندا وئرن جان عم اوغلی وای

 

ساخلار عزا (کریمی) اولار نوحه خوان منه

آغلار همیشه (ذاکر) شیرین زبان منه

 

روز جزا که لنگه دوشر کشتی عقول

لطفیله بو آتا بالانی ائتمروخ ملول

 

 ذاکر مراغه ای

رد اثاث غارت 3090

رد اثاث غارت

 

ایدوبدی عرض امامه او بی حیای دنی

گیچن گیچوب اولان اولدی علی بغیشله منی

 

او بیحیاده باخون حیله ائیله تلبیسه

امام محضرینه پول قویوبدی بر کیسه

 

دیدی گیچن گیچوب اوخشاتما گوز یاشون سیله

بونی اُلنلروه خونبها حساب ایله

 

ولیک بولمدی ویرسه تمام دنیانی

آناسی لیلیه باغلانماز اکبرین قانی

 

ائدردی پرده دالیندان او حاله لیلی نظر

اورکلنوب دئدی ایوای اوغول علی اکبر

 

نئجه اوغولسوز آنان تاب ایدر بو سودایه

اوغول گوزوندن ایراق پول ویرولّه لیلایه

 

مخدّرات بنی هاشم اولدولار مغموم

دایانا بولمدی عبّاس باجیسی کلثوم

 

دل آچدی دخت علی ایلدی یزیده خطاب

عتابیله دیدی ای بیحیای خانه خراب

 

اوتانموسان بولوسن هیچ نه خطّ ده یروسن

حسینی اُلدوروسن لیک خونبها وئروسن

 

زریله دولسا اگر سر به سر بو تحت سماء

محالیدور اولا عبّاس اللّرینه بها

 

عروسه ویرسه له دنیاجه زینت و زیور

اونون گوزینده اولار قاسمین بهاسی مگر

 

حسینیدن صورا زینب جهانی نیلیه جاق

سرشگی قانه دونوب خونبهانی نیلیه جاق

 

ربابه ویرسه له مالین تمام دنیانین

مگر حلال ائدر اوز اوغلی اصغرین قانین

 

دیمه که یرده او قانلار که توکموسن قالاجاق

جزا گونونده آتام سندن انتقام آلاجاق

 

بو سوزدن اولدی خجالت یزید بد فطرت

امام ساجده یوز دوتدی باشلادی صحبت

 

دئدی نه حاجتون اولسا دی من روا ائدرم

روای حاجتیله قلبیوی رضا ائدرم

 

امام نطقه گلوب سویلدی همان ساعت

سنه واریمدی بو گون یا یزید اوچ حاجت

 

ازل بودور آتامین باشینی زیارت ائدم

همان زیارتی سرمایۀ سعادت ایدم

 

ایکیمجسی منی اُلدورماق اولسا میلون اگر

معیّن ائت حرمه بر نفر امینِ سفر

 

علی عیالینه اولسون مواظب و همراه

جوار احمد مختاره گیتسون آل الله

 

اوچومجی کرب و بلاده سپاه بد فطرت

آتام اُلن گون ائدوبلر حرملری غارت

 

گرک بیزه اولونا ردّ اول غنیمت لر

نچونکه واردی اولاردا زنانه زینت لر

 

یزید سویلوب ازلکه سوزوندی امر محال

بر اوزگه شهره آتان باشین ایتمیشم ارسال

 

گورنمسن او باشی ای سلالۀ اطهار

قوتار بو صحبتی قیلما بو مطلبه اصرار

 

ولیک دلده سنون قتلوه یوخومدی نظر

سنیله یثربه گیتسون گرک مخدّره لر

 

بویوردی سیّد سجّاد کی ستم پیشه

ندور خیالون ائدرسن منه نه اندیشه

 

بئله گمان ائدوسن بولمورم منِ مغموم

که هاردا دور سر خونین سیّد مظلوم

 

همان او یر که او یردیدی رأس پاک امام

یوزین او منزله دوتدی امام ویردی سلام

 

سلام اولا سنه ای مکّه و منا اوغلی

سلام اولا سنه ای ختم انبیا اوغلی

 

هوایه قالخوب او دمده سر منیر امام

آتا باشی اوغولا ایلیوبدی ردّ سلام

 

سلام اولا سنه ای دستگیر اهل جفا

سلام اولا سنه یأبن خدیجه الکبری

 

یزید گوردی بو اعجازی اولدی شرمنده

دئدی امامه که ای ما سوا سنه بنده

 

تصادفات زمانیله اولما پژمرده

سنون که اولدی ایکی حاجتون برآورده

 

اوچومجی حاجتی تکرار ایلمه اصلا

سیزون خیاموز اولوب کربلاده چون یغما

 

سپاه کوفه و شام ایلیوبدولر غارت

هره برین آپاروب اهلشامدن قسمت

 

نقدر اولسا سنه سیم و زر غرض وئرّم

تمام غارت اولان مالوزه عوض وئرّم

 

جواب وئردی یزیده شهنشه بطحا

دگول منیم غرضیم مال دنیوی اصلا

 

دیار کرب و بلاده اولار که قوم لجاج

بیز اهلبیتیدن ایلوبله ظلمیله تاراج

 

اولاردا بر نچه زاد وار بیزه امانت دور

گرکدی ردّ اولا مختصّ آل عصمتدور

 

شریعت نبوی ده دگول بوامر روا

زنانه زینتی نامحرمین الینده قالا

 

مخدّرات حرم زیورینه نا محرم

تصاحب ایلسه تاب ایلمزلر آلعبا

 

آنام یانیندا علی قارداشیم چکر خجلت

سپاه شامده گر قالسا معجر لیلا

 

اوزاقدی غیرت عبّاسدن که کلثومین

اولا لباسنه صاحب سنان و شمر دغا

 

او کوینگیکه آنام فاطمه ایپین اَیروب

آتام او کوینگی گیمشدی روز عاشورا

 

ویریلمسه منه اول پاره پاره پیراهن

بر آه سردیله قیلّام هامی جهانی فنا

 

مدینه یوسفی گرگان شام الینده اُلوب

آتاسنا آپارام کوینگین گرک ایما

 

او معجریکه بی بیم زینبون باشندیدی

او معجری توخومشدی اوزی آنام زهرا

 

گرک او مقنعه هر یاندادور بو گون تاپولا

بتول قبرینه زینب گیدنده باشه سالا

 

ایوینده ساخلیا خولی آنام بویون باقین

اولار خجل آتاسندان  آتام ولیّ خدا

 

یزید گوردی که یوخ چاره عرض ائدوب گتورون

اولار که کرببلاده ائدوبدولر یغما

 

گلوبدی مجلسه بر ظالم الده گردن بند

بر آیریسی گتوروب بر قانا بلشمش عبا

 

بری گلوب گتوروب زینبون لباسلرین

اوجالدی پرده دالیندان فغان و واویلا

 

بری گلوب گتوروب پاره پاره بر کوینک

باخوب او کوینگه داد ایتدی زینب کبری

 

نه کوینک اوخلار ایدوب مثل خانۀ زنبور

سنان و تیغ مشبّک ائدوبدی سر تا پا

 

آخوبدی صاحبینون بسکه قانی قان قوریوب

ائدوب مُضرّج اوثوب عتیقی لخته دِماء

 

ایکی الیله وُروب باشینه خانم زبنب

دیدی حسین سنه بو بخت قاره جانی فدا

 

بو کوینگوندی وجودونده نَقدَر یارا وار؟

شل اولسون اللّری کیم بیر بئله وروبدی یارا

 

او دمده مجلسه پر شور رستخیز دوشوب

قیامت عالمی اول بزمده اولوب بر پا

 

بری گلوب گتوروب مشگینی ابوالفضلین

بر آیریسیگتوروب الده برجه قانلی لوا

 

قارشدی بربرینه فاطمیه لر یکسر

اوجاتدی اهلحرم بانگ وا ابوالفضلا

 

گتوردولر گلینون قانلو گوشواره لرین

شکسته دلدن ائدوب نی کیمی عروس نوا

 

مرحوم استاد حسینی سعدی زمان

منبع مجموعه کانالهای مدح و مرثیه

رد اثاث غارت 2305

رد اثاث غارت

 

یزید ایستدی آل رسولی محضرینه

گیوندوروبدی بیر اوزگه لباس سوزلرینه

 

دئدی که ابن زیادین یوزی قبیح اولسون

ایکی جهاندا گرفتار لعن و طعن اولسون

 

خدا عزیزه لرین خلق ایچینده خوار ائلدی

منی پیمبر حضورونده شرمسار ائلدی

 

قضا ایشیدی گئچوب دردوزی بیان ائلیون

منه خیالوزی بی واهمه عیان ائلیون

 

اگر بو شهریده قالساز بو جانه منّت وار

سیزه بو شهریده هر نوعی استراحت وار

 

مدینیه گئدوسوز چوخ چوخ استراحتیله

یولا سالوم سیزی هر قسم ناز و نعمتیله

 

امام سویلدی غربتده چکموشوق زحمت

مدینیه یولا سال بلکه بیر اولاخ راحت

 

و لیک شرطی بودور بو سوزیمی گوش ائده سن

بو التماسیمی مندن گرک قبول ائده سن

 

اگر چه بیزلره چوخ بیر بیوک جسارت اولوب

گرک اَله گله بیر نئچّه زاد که غارت اولوب

 

بیری عمامۀ اکبردی ارث خاصّ رسول

بیریسی معجر زینبدی یادگار بتول

 

اوچومجوسی آتامین پاره پاره پیرهنین

که سویدولار اونی صحراده قویدولار بدنین

 

یزید امر ائلدی ردّ غارته او زمان

اولوبدی واقعۀ کربلا او یئرده عیان

 

او دمده ساطع اولوب عطر پاک پیغمبر

که گلدی بیر نفر اَلده عمامۀ اکبر

 

آلوب عمامه سینی لیلی وفا پرور

دئدی اوغول سنه قربان آنان علی اکبر

 

دوزوم نئجه بو قدر جورِ کینیه سنسیز

اوغول آنان نئجه گئتسون مدینیه سنسیز

 

گلوب او بزمه او دم بیر خبیث شوم شیَم

نئجه دئیوم گتوروب پاره پاره علم

 

او بزمیده قورولوب ناگهان بیر اوزگه اساس

اوجالدی اهل حرمندن صدای واعبّاس

 

نه چکدیلر او زمان اهل بیت پیغمبر

که گلدی مجلسه گهوارۀ علی اصغر

 

آناسی سویلدی من بولمورم دئیوم آقا وای

و یا دئیوم آناسین چوللره سالان بالا وای

 

تمام اهل حرم چکدی ناله و شیون

گورنده شمر گلور اَلده قانلی پیراهن

 

دئدی علی قیزی گور ذلّتین اساسی بودور

دئ بیر گوروم منه سن پادشه لباسی بودور

 

او دمده زینب غمدیده مثل نالۀ نای

توکوب سرشکینی سسلندی وای قارداش وای

 

یتوردی ظلمونی اتمامه اول شرور لعین

بو ظلمودن ائلیوب کلّ عالمی غمگین

 

دئدی گتوردیله بیر نئچّه کیسه پول اول شوم

دئدی که آغلاما سن ای علی قیزی کلثوم

 

یقین ائله قضا امرینه رضا وئرّم

حسین قانینه بو نقدی خونبها وئرّم

 

دوتوب یزیده یوزون دخترِ ولیّ اله

ندور جواب بو ظلمه یزید روز جزاه

 

بو پول عوضدی مگر اشک دیدۀ تریمه

و یا که قانه باتان تار موی اکبریمه

 

ائدوب خطاب امامه یزید بد اختر

که اهل بیته مهیّادی تازه محمل لر

 

باخوب کجاوه لره دخت میر شاه عرب

دئدی ندندی حسین ئولموری باجون زینب؟

 

روادی سن اولاسان ایله قانیوه غلطان

مکان اولا منه قارداش کجاوۀ الوان

 

سزا دگول داخی الوان کجاوه بو زاره

ائدون آماندی بو محمل لر اورتوگون قاره

 

او دمده ایتدیله محمل لر اوتوگون قاره

یتوشدی حکم رحیل اهل بیت اطهاره

 

عروس فاطمه گلدی خرابیه اوزمان

رقیه قبرینه سالدی اوزینی ایتدی فغان

 

سسیمه ویرگله سس بلبل چمن باجی

ایاقه دورگیداخ آواره وطن باجی

 

گوزومده خاریدی سنسیزگورم چمن یوزینی

رقیه جان نجه سنسیزگوروم وطن یوزینی

 

اسوب سموم ستم غنچه گل کیمی سولدون

خرابه لرده قوری یرده بیکفن الدون

 

نظاره قیل نجه گورگلمیشم فغانه باجی

ایاقه دورگیدروخ سمت کربلایه باجی

 

خیال ایلمه کرببلاده غم چوخدور

یوزیوه ظلمیله ظلمی ووران داخی یوخدور

 

بو ظلملرکه اولوب یوخ داخی علاوه باجی

بو قدریاتما که آماده دورکجاوه باجی

 

خانملارین هاموسی گلدیلرنوایه اودم

که قوردولاراو مزاراسته حلقه ماتم

 

دیردی شوریله زینب مه مدینم وای

خرابه لرده الن نازنین رقیم وای

 

دوام ایتموری بو امره واردی سبب

بو قبری گورمیه جاقدورداخی بیبین زینب

 

غرض وداع ایدوب اول قبری اهلبیت حزین

تمامی دیده سی گریان تمامیسی غمگین

 

سوار اولوبدولا محملره گلوب بیرآز

که بیرطرفدن اوجالدی صدای ناله زار

 

باخاندا گوردیله اول بانوان باعفت

گلورفغانیله بیردسته قاره پوش عورت

 

دیوله ای حرم پاک خاندان رسول

عزیزدرگه حق دخترعزیزبتول

 

تانمادوخ سیزه بیز ترک احترام ایلدوق

ایشقلی گوندوزی آغلار گوزوزه شام ایلدوق

 

بیوردی زینب غمدیده ای زنان عرب

اگرچه قلبیمه سیزدن یتوبدی رنج و تعب

 

بو شهرشامی گرکدی بو گونده ترک ایلیم

که هرنه جورو جفا ایتموسوزگذشت ایلیم

 

بو محنتیم داخی آرام و صبریمی آلدی

سیزون ایچوزده منیم بیرامانتیم قالدی

 

غریبه دوراونون احوالینی رعایت ایدون

ثوابی چوخدی گودون قبرینی زیارت ایدون

 

سنون بو یرده اگر (رمزیا) سوزون چوخدی

ولیک شیعه لرین دلده طاقتی یوخدور

 

مرحوم رمزی تبریزی

منبع مجموعه کانالهای مدح و مرثیه

احوالات رد غارت 1326

احوالات رد غارت

 

دیار شامده برپا اولوب عزاخانه

دیمه عمارت عالی همان او ویرانه

 

خرابه نی دوشویوبلر اساس غم توکولوب

خرابه نون در و دیوارینه قرا چکلوب

 

بو فکریله که گئچن گونلره قصاص اولونا

دویونجا باش آچیلا شیونیله ساچ یولونا

 

دیریلره ویریلوب رسم ماتمیله اساس

گیوبله باشدان ایاقه تمام قاره لباس

 

مباد نسگل اولا قبرده گله درده

رقیه نون چکلوب قبرینه قرا پرده

 

بنا قویوبلار او گوندن که کون و امکانه

گورونمیوب ایله مجلس ایله عزاخانه

 

اوتوردی صدرده زینب دلنده ناله و داد

خرابه نین قاپوسین کسدی سیّد سجّاد

 

گلوبدی عالم معناده حضرت طه

یانیجا الده عمامه علی ولیّ خدا

 

همان حسن که جفائیله اودلانوب جگری

عزا دوتوبلا جوان اوغلونا اولوب خبری

 

یارالی قلبنی تیر جفائیله دلدی

اوغول دیه دیه بیر باش خرابیه گلدی

 

هامی بولر بو سوزی چونکه رسم عالمدور

تصور اولسا آیوق قلبه چوخ بُیوک غمدور

 

دیوم که یانمیان اشخاص قلبدن یانالار

علاقمند اولار عالمده قیزلارا آنالار

 

الی قابرقالاریندا دیلینده واویلا

گلوبدی زینبه سس ویرماقا خانم زهرا

 

زبانحالیله گویا دیردی آغلا قیزیم

یانوندا قمچی وُران یوخدی سینه داغلا قیزیم

 

سنوب قابرقام اگرچه بالا سسیم گلمور

ولیک ناله دن آشفته قلب دینجلمور

 

حزین سسیله نشان نالۀ جرس ویرّم

دِیَن زماندا حسین وای سسووه سس ویرّم

 

او مجلس عکسی سماواته منعکس اولدی

حسین سسیله حجابات و نه فلک دولدی

 

چکردی گویده ملک لر فغان و ناله و آه

ووراردی باشلارینا یرده اولیاءالله

 

بهشتده چکلوب جار کشف اولوب مطلب

حسینه شامده ماتم دوتوب خانم زینب

 

آچوبلا غرفه لری دوردولار تماشایه

اولاردا شور عزا سالدی خلد اعلایه

 

نجه عزا که مجسّم اولان زمان نظره

همان او مجلسین اوضاعی اود وُرار جگره

 

عزاده رسمیدی بیر روضه خوان اولار امّا

او مجلسین هاموسی روضه خواندی سرتاپا

 

توکوبله مجلسه شور و نشور اساسلرین

ئولنلرین سویولان اوخلانان لباسلرین

 

نجه لباس زبس اوخ ووروبلا قوم شرور

اولوب تمام مُشَبَّک چو خانۀ زنبور

 

اولوب مقدمۀ داده کاشف مطلب

اسیرلر شرفی فاطمه قیزی زینب

 

یارالی قارداشنون کوینکین آرایه قویوب

دِیَر شل اولسون او اللر که بو لباسی سویوب

 

بو قدر کیم وُرولوبدور بو کوینگه پیکان

دگوب وجودووه یکسر آخوب یریندن قان

 

آدینی غارت پیراهن اهل کین قویدی

بُلنمورم نجه دل سختمیش نجه سویدی

 

بیر آیری سمتده کلثوم ایدر روان اشکین

قویوب برابره عبّاسین اوخلانان مشکین

 

آلوب الینه خانم بیر قانا بلشمیش علم

دیور باجون سنه قربان منه گراندی بوغم

 

باخان بو پرچمه ای صاحب هنر قارداش

بُلَر وجودون اولوب اوخلارا سپر قارداش

 

سالوب او مجلسه اوضاع شورش محشر

کلید باب غم عمامۀ علی اکبر

 

سالوب برابره هر بیر اسیر بیر جامه

یتشدی لیلی مجنون نمایه عمّامه

 

باسوب او دوغرانان عمّامه نی ئورک باشنا

ویروبدی چشمۀ چشمینده اذن گوز یاشنا

 

ایدور عوالمی مجنون عوالمین پیدا

مقام عشقده مجنوندی شهرتی لیلا

 

بهار ابری کیمی گاه گوزلری دولوری

سووُموری ئوره گی قانلو ساچلارین یولوری

 

گهی باشندا الی گه دیلینده وا وَلَدا

اوغوشدورور ئورگین مجلسه سالور غوغا

 

باخور اویان بویانا گه توکور سرشک بصر

دیور فغانیله ایوای اوغول علی اکبر

 

جهاندا بیر سنیدون نخل عمریمه حاصل

تمام زحمتیمی ایلدی فلک باطل

 

یارالارون گوزیمه هر نفسده جلوه لنور

بلی اوغولسوز آنالار باشینا کول اَلَنور

 

سالوب او بزمده هر بلبل ئوز گولون یاده

سریّه شیون ائدردی بالاسی داماده

 

باسوبدی سینه سینه طوی گونی گین کفنین

قلجلاریله اولان پاره پاره پیرهنین

 

ووراردی باشه دیردی اوغول عزاسیدی بو

کفن اولوب بالاما گر چه طوی لباسیدی بو

 

بو بس دگلدی آتادان یتیمیدی اوغلوم

یتیم لیق غمی ائتمیشدی قلبیمی مهموم

 

شکفته وقتی خزان یتدی اول گل یاسه

مراده یتمدی دوندردیلر طویون یاسه

 

ائدنده قاسم آناسی بو دللریله نوا

ئورکلنردی یاناردی عروس بخت قرا

 

اولوردی عفتی مانع اوجادان آغلاماقا

شرار شعلۀ آهیله سینه داغلاماقا

 

گلوردی شیونه گزلنجه سینه داغلاردی

باخاردی گوشۀ چشمیله دلدن آغلاردی

 

یاواش یاواش ائدوب افغان اولوردی نوحه سرای

دیردی وای طوئی یاس اولان عم اوغلوم وای

 

خانیملار آغلادی از بسکه زلفینی یولدی

خرابه سهلیدی شامات شوریله دولدی

 

هامی ایشیتدی که وار شامده بساط عزا

دوتوب ئولنلره ماتم خلاص اولوب اُسَرا

 

اولار که شامده اوّل گلوردی سرزنشه

سالوبلار ئوزلرینی شکل تعزیت منشه

 

دیردیلر بولاری خارجی بُلوردوخ بیز

گلنده شامه ازل طعن ایدوب گُلوردوخ بیز

 

گلون گیداخ بولارین ماتمینده تسلیته

ویراخ تسلّی آچاخ دل تمام معذرته

 

حنا یاخانلار اله باشه سالدیلار قاره

گلوبله تعزیۀ اهلبیت اطهاره

 

اناث شام گلوب دسته دسته فوج به فوج

خرابه دن ایدوب افلاکه واحسین سسی اوج

 

ائله ملردیله آهو کیمی مخدّره لر

که سس وئروب اولارا آغلاشوردی دشمن لر

 

ائدوبله یدّی گون اولاد مصطفی ناله

هلاکت ئوز وئره آز قالدی خردا اطفاله

 

دئمه بو یدّی گونی بیر نفر ییوب یاتدی

او قدر ایلدیلر ناله سسلری باتدی

 

امام گوردی که بیر گونده طول چکسه عزا

اولار هلاک خواتین یثرب و بطحا

 

دوتوبدی رأیی علاقه عزا تمام اولسون

آز آغلاسون بالالار ساچلارینی آز یولسون

 

اگر چه شامیده یتسه تمامه بو ماتم

تمام اولان دگی تا واردی صفحۀ عالم

 

بتول نائبه سی زینبه یتوب بو خبر

دوباره جوشه گلوب گوزلرینده خونِ جگر

 

دئدی هنوز منیم دویمیوب گوزوم یاشدان

گرکدی قارداشیمون ماتمین دوتام باشدان

 

کسوک باشیله ئوزی گلمه سه او شاه زمن

محالدور که یغام قارداشیم عزاسینی من

 

ائدوم نه نوعیله کلثومه بو سوزی اظهار

رشید قارداشیم عبّاس ماتمین قورتار

 

بو بزمه گلمسه اکبر او مظهر طاها

نجه اولور دوتا آرام ناله دن لیلا

 

خبر وئریلدی یزیده که باشلاری گوندر

سرشک چشم خواتینی قانه آز دوندر

 

او وقت اولوب که بلا تیری دللری دلدی

عزانی یغماقا صاحب عزا ئوزی گلدی

 

او حالیده که آخاردی عذاره قان یاشلار

منوّر ائتدی عزاخانه نی کسوک باشلار

 

قاباقدا بیر یارالی باش که چوخ منوّر دور

یارالی باش دئمه توحیده عمده مظهر دور

 

محاسنی بلشوب قانه وجهی گرد آلود

ولیک آینۀ وجه ذات داور دور

 

سالوبدی خطّ باشیندا خطوط منکسره

جبینه باشدا اولان خطّ لر برابر دور

 

آغیزدا اوخ یاراسی سجده گهده داش یاراسی

بوغازدا نیزه یری لالۀ محمّر دور

 

هنوز وار لب لعلینده خیزران اثری

قزل گول اوسته هویدا بنفشۀ تردور

 

عقیق لبلر اولوب ظلمیله زبرجد رنگ

نشان چوب جفای یزید کافر دور

 

دالنجا ارخه لنور چوخ هنرلی بیر باشه

یقین بو باشه او باش صاحبی برادر دور

 

او باشدا جلوه لنور چوخ شجاعت آثاری

باخان بُلر که بو شاهه امیر لشگر دور

 

اولوبدی قانیله سرشار چشم مرتضوی

سر منیر ابوالفضل پور صفدر دور

 

نه باش که کاسۀ سرده شکست لیق گورونور

عمود نوفله حاکی جراحت سر دور

 

ووربلا زهرلی اوخ سجده گاه انورینه

کشیده قاشی کماندور مژه چو خنجر دور

 

دولوبدی گوزلری چون مشک قانلو اشکیله

گمان گئدور که بو سقای چوخ هنرور دور

 

یوموبدی گوزلرینی گوئیا خجالتی وار

سکینه دن سو خصوصنده چوخ مکدّر دور

 

گوزون آچانموری باخسون خانملارین یوزونه

عجب رشید دلاور وفالی سرور دور

 

اونون دالنجا گلور بیر گوزل جوان باشی

معاینه دیه سن صورت پیمبردور

 

بشرده یوخدی وجاهتده مثل و مانندی

ملکدی صورت انسانیله مصوّردور

 

باشندا وار عربی زلفی خم بخم پر چین

شمیمی رونق بازار عنبر تردور

 

نه زلف عنبر چین و ختایه طعنه وورار

سبب او زلفیدی مشک ختن معطردور

 

دوشوبدی گوشۀ ابروده هاشمی بیر خال

نه خال دانه و دام قلوب مضطردور

 

ائدوبله باشینی تیغ جنائیله منشق

قلجلانوب باشی گویا باباسی حیدردور

 

باتوبدی خال و خطی زلفی تل به تل قانه

او حسن او خال او خط بیر اسفلی منظردور

 

اناث شام او باشی گورنده سویلدیلر

بولاردا کیم گوره سن بو جوانه مادردور؟

 

او قیز که ساچلارینی یولدی بو باشی گورجک

بو بخت قاره یقیناً بو باشه خواهردور

 

اوجالدی ناگه اوغول وای صداسی لیلانون

دئدی بیر عمردور آدون دیلیمده ازبردور

 

اونون دلالنجا بیر آی پارچاسی طلوع ائتدی

نه آی یوزی دیه سن آفتاب خاوردور

 

ئوزی جواندی قولاقنده قانلو حیدری وار

قاشی، گوزی، یوزی، صنع خدای اکبردور

 

دیوللر آدینه قاسم حسن نشانه سیدور

سریّه آدلو اسیره وفالی دلبردور

 

گلوب او مجلسه اون یدّی یاش بو نحویله

نه مجلس ، اوردا مجسّم بساط محشردور

 

او بزمدن فلکه وامحمّدا اوجالوب

یولوندی ساچ دیه سن بار مشک ازفردور

 

بو حسری محشر عظمائیله ائدن تطبیق

گورر نقدر بو اوندان بلند برتردور

 

جزا شفیعه لری ساچلارین یولاردی تمام

آچان او بزمده باشین بتول اطهردور

 

نه گوردیلر او زمان ئوزگه محشر ائتدی قیام

سبب او محشر کبرایه رأس اصغردور

 

طبقده گتدیله بیر سودامر اوشاق باشی

او آیلارین یانوجا بیر ایشیقلی اختردور

 

امام عصری او باش آغلادور ائدونجه ظهور

گئجه گونوز او باشا انتظار کیفردور

 

(حسینی) حضرت حجت بو قانی بیر گون آلار

امام منتقم و منتظر مظفّردور

 

نقدر وار نفسون خدمتونده ائتمه قصور

نجات حشرده بو خامه و بو دفتردور

 

مرحوم حسینی سعدی زمان

منبع مجموعه کانالهای مدح و مرثیه