ورود به کربلا و
گریز به حضرت علی اصغر (علیه السلام)
عشقیده قدرته باخ عارفی عاشق ایلیور
عارف و عاقلی عشقون الی لایق ایلیور
علمینه عامل اولور سالم و صادق ایلیور
آچیلور قلب گوزی چاهی گورور راهی گورور
هارا سالسا نظرین گوزلری آللهی گورور
عشقون اکسیری دگور هر اورگه طاهر اولور
یوخ زوالی گه اورکلرده دی گه ظاهر اولور
عشق نیرو ویرور عاشق ایله بیر ماهر اولور
بیر باخشیدا گورسن دیللری تسخیر ایلیور
نیزه نی منبر ایدور حق سوزی منبرده دیور
عشق اوزاق یوللاری عاشق گوزینه کوته ایدور
عشق ، جُونیله حسینی گتورور همره ایدور
عشقدور خولی ایوین خلقه زیارتگه ایدور
عشقون اعجازینون اثباتینه بو بسدی بیزه
قانلی باش ساکن اولان ایوده مقدسدی بیزه
عشق گه نار اولی گه خار اولی گه غنچه و گل
عشق اگر عاشقی یاندرماسا هیچ عشق دگل
عشق اودور سینۀ عاشقده آچا قرمزی گل
عشق او دور عاشق اونا عامل اولاندا قوجالا
ظاهراً دوشسه ایاق آلتنا عرشه اوجالا
عشق اودور روح کیمی قلب و رگ وجسمه دولا
عشق اودور عاشقی محنتلی اولا رنگی سولا
عشق اودور عاشقی بیر گون بشره کعبه اولا
کعبه نی ترک ایلیوب کعبه دیگر یارادا
وصل اولا یاره داخی قالمیا مانع آرادا
من بیر عاشق تانورام بو سوزی اثبات ایلدی
ترک آسایش ایدوب قصد بلیات ایلدی
کعبه نی یوخ اوزینه بیر چولی میقات ایلدی
تپراقی محضر جاناندا ز بس طاهریدی
کعبه دنده قباق عرش اهلی اورا زایریدی
کعبه دن من دئین عاشق غرض ایتدی حرکت
کربلا دشتینه تقدیر اولارا ویـردی جهت
دشت گمنامه چاتوب ویردی او دشته عظمت
ایلدی عرش فضیلتده مهِ ارض حلول
پر آچوب فوج ملک ایتدی او صحرایه نزول
دایانوب باخدی حسین دقتیلن صاق صولینا
تلینه عرصه سینه نهر فراتین یولونا
ویردی دستور او موقفده توقف اولونا
آل حیدر او بیابانیده خرگه قورالار
ناقه لر اوستن آی اولدوز کیمی اندی بالالار
آشنا گلدی بلا دشتی امامین گوزینه
فکری گیتدی باباسی خاتم مرسل سوزینه
بعضی سوزلرکه بویورمشدی حسینون ئوزینه
سابقاً آگهیدی بادۀ معنا دادینا
دوشدی پیغمبر اکرم بویوران سوز یادینا
گوردیلر غملی باخورگه سویا گه گوگده گونه
اللی بش ئیل ایله بیل منتظریمش بو گونه
بیلدیلر بو سفرین رشته سی دوشدی دوگونه
کربلا تپراقینا داشلارینا دقّت ایدور
نخلزاره سویا دقت ایلیور فکره گیدور
زینبون قلبینه باخدوقجا بلا رعدی شاخور
او مناظر که گورور قارداشی زینبده باخور
حضرتین صورتینه گوزلرینون یاشی آخور
بارش رحمتی آغلار گوزی احسان ایلیور
بالالاردان ولی گوز یاشینی پنهان ایلیور
پهنۀ دشته باخور صحبت ایدور ئوز ئوزینه
یرده بیر خار مغیلان ساتاشانـدا گوزینه
تز باخور محملین اوستنده رقیه یوزینه
آغلیان گوزلری گویا بالاسیلان دانشور
بی خبـردی بالا امّا آتا قلبی آلیشور
دوندی عباسه دئدی عمده نشان وار یرده
گزدیگیم یر بورادی سّر نهان وار یرده
اندیرنده بالامی گوزله تیکان وار یرده
گوزله قارداش بو گل نازیمی قویما سولسون
هله تزدی هدف خار مغیلان اولسون
بیر مناسب یری تعیین ایله قور خیمه لری
خیمه لرده بالالار دینجله امکان قدری
راحت ایله یورولان قیزلاریمی صود امری
داشلانور نهر فراتین سویی قارداش چوخدی
سو گتورمک هله آزادیدی مانع یوخدی
نظره بیر یری آل نهره یولون آز قالانی
او یریکه دیورم شرطی بودی یاخچی تانی
اولماسون خیمه لرون دوره سینون داش تیکانی
لازم اولسا بالالار قوش کیمی شهپر آچالار
اللری باشدا قاچان وقتیده راحت قاچالار
چک خیامین یرینی بو اجا تلین دالینا
اورا بهتردی یقین اهل خیامین حالینا
اوچوخور یرده گرک عشق خیامی سالینا
احتمالاً بورا آینده ده میدان اولسون
نگرانم حرمین اهلی هراسان اولسون
رعب و وحشت بو بیابانیده شاید سالالار
بیزدن آزادی امکانی بو لشکر آلالار
بعضی پیش آمداولا سس اوجالا ال چالالار
قیزلاریم رشتـۀ درد و محنی هـورمیه لر
باش کسن اولسا اگر باش کسنی گورمیه لر
بوردا شاید صود امر قنداقی قانیله دولا
حادثه دوشسه گوز اوخلانسا قلج دگسه قولا
عرصه گورسنمیه بو تّل آرادا مانع اولا
باخسالاردا نگران علقمه نون یوللارینا
دوشمیه گوزلری قولدان کچه نون قوللارینا
گرک اطفالی بشر قورخولی یردن قوریا
هاردا وحشت وار اوشاق یاخمیا هرگز اوریا
قورخوب آغلاشمالاری قوی هله قالسون صوریا
گورسه لر لشگری ممکندی ملاله باتالار
نچه گون قوی بو بیابانیده راحت یاتالار
بالالار خسته دیلر ایله بیر آزجا عجله
اکبری قاسمی یوللا سو گتورسونله اله
بعضی سولزلرکه دئدیم بیرکسه فاش ایتمه هله
گوزلریم قارداش او قاره گوزه اولسون قربان
بلسه لر مطلبی قیزلاریم اولالار نگران
قویدی ال گوزلره عباس بدیع السیما
امر مولاسینی تز باشلادی ایتسون اجرا
ایلدی خیمه لری تّل دالندا برپا
خیمه لر مأمن اولوب عترت خیرالبشره
سو مهّیا اولوب اوّل ویریلوب صودامره
آلوب آغوشه رباب اصغری سیراب اولونا
صودامنده بالانی تکیه ایدوب ئوز قولونا
صورا سالدی بشیگه قویدی نسیمین یولونا
تا نسیمین یلی یورقون گُله احسان اولسون
یاتسون اولدوز ، اونا آی گویده نگهبان اولسون
او گجه کوفه لیلر سو یولونی باغلامادی
سو ایچن ایچدی ، یاتان یاتدی اورک داغلامادی
صودامر صود اموب آسوده یاتوب آغلامادی
کوسممشدی هله سو ، بخت ربابه یاریدی
او گجه هم سو مهیائیدی هم صود واریدی
نهریدن بو گجه ایستوردی سو صحرایه آشا
نچه گون کچدی او چولده ولی سو چیخدی داشا
خوش گونی چاتدی ربابین داخی دنیاده باشا
بالانون آغلاماقی قویمادی قالسون اونا تاب
گوز قباقینده چالشدی بالاسی باخدی رباب
آناسیلان سوزولن گوزلـه دانشدی بالاسی
ماهی تک اللری اوستنده چالشدی بالاسی
تشنه لیک بیر اود اولوب یاندی آلشدی بالاسی
بالیا باخدی آنا اذن ویروب گوز یاشنا
بالاسی الده دولاندی قوری مشگین باشنا
مشگ چشمین سوئی داشلاندی قوری مشک اوسته
هم بالا هم آنا اولدی سو غمیندن خسته
مشگین اوسته بالانون قویدی یوزین آهسته
یعنی باخ گور ننوون آخرینه دلخوشدی علی
سینمون مشکی کیمی مشک ئوزیده بوشدی علی
غلامرضا هادی اردبیلی
با سلام