در احوالات حضرت زینب کبری (س) 5748
در احوالات حضرت زینب کبری (سلام الله)
قید محنتدن او قدری قالموری اولسون رها
جان ویرن وقتیمده بیرلطف ایله ای شاه ولا
گل جمالین گل گوروم جان بذل ایدوم آسوده تا
گلمه سن دلده قالور بیحدملالی زینبین
گل اوزون قارداش آنام زهرایه ده اخبارایله
مرتضا و مجتبایه مطلبی اظهارایله
قارداشیم عباسه اوغلوم اکبره اخطارایله
بیرده گلسون قاسم و اول مه جمالی زینبین
اصغرشیرین زبانی ای مه برج کمال
لطف ایدوب رنجه قدم قیلسان اونی آغوشه آل
نورچشم مجتبا عبداللهی یانینجه سال
سربلند ایله بو غمفزالی زینبین
بازدید ایت لطفیله بو خانه سی ویرانی سن
قیل تلاوت باشیم استه آیه قرانی سن
منتظر قویما قالا بو دیده سی گریانی گل
قالماسون دلده بو آخر دم ملالی زینبین
ای کنار نهریده جان بذل ایدن عطشان غریب
جان ویرور غربت ولایتده باجون نالان غریب
سن غریب و من غریب و گردش دوران غریب
غربت ایچره یتدی آخر ارتحالی زینبین
اهل اسلامه گوروم کفارایچنده عاراولا
ناطق قران قیزی آخر غریب داراولا
بیر کسیم یوخدور حسین قویما جنازم خواراولا
کربلاده دوغرانوب آخر رجالی زینبین
غم لباسین قدیمه روزازلدن بچمیشم
بر بلا لفظیله مین جام محبت ایچمیشم
ایتموشم شرکت سنیله منده جاندان گیچمیشم
شاهد احوالیدور اول ذولجلالی زینبین
گرچه دنیاده یتوب چوخ درد و محنت زینبه
ظاهرا محنت ولی باطنده رفعت زینبه
اولدی بو غربت عجب کسب شرافت زینبه
حشر اولونجا پایداراولدی جلالی زینبین
نیلیوم تقریره گلمزدلده بو درد و محن
اوندا که گوردوم یارالی نعشیوی من بیکفن
سالدی دلدن زینبی آخرده اشرارزمن
خالق دانا بلورنولدی او حالی زینبین
گردش دوران گوروم ایکاش اولیدی تارومار
گوزیاشیم گوزده دونوب قانه ویروب یوزانکسار
گل باجون قبره اوزون قوی ای شه ذوالاقتدار
ای هدایت شمسی وی بدرکمالی زینبین
اولقدرظلم ایلدی اول بینوایه اشقیا
بیل بوکولدی زلف آغاردی رنگی اولدی کهربا
الدی غربتده حسین فکریله اول کنزوفا
علم وحدتده واریدی جوخ کمالی زینبین
ویردی جان چوخ حسرتیله بنت شاه ممتحن
ارض شامی ایلدی معناده بیررشک عدن
گوردولر اما باسوبدورسینیه بیر پیرهن
اولمادی اول پیرهندن انفعالی زینبین
دوشدی بیر سوز خاطره گیتدی الیمدن اختیار
گوزیاشیم ویرمورامان دلدن آلور صبر و قرار
ایلورم بو عرضیمه صاحب زماندان اعتذار
قلبیمه اود ووردی آخربو مقالی زینبین
باخدی غساله او جسمه گلدی داد و شیونه
ساچلارین یولدی توکوب گوزدن سرشکین دامنه
گوردی جسمین ضرب قمچی دوندروبدور سوسنه
نه بدن گویا قالوب نقش مثالی زینبین
هرگورن جسم نحیفین یاندی دولدی گوزلری
دل آلوشدی گوردی گل جسمی اولوب نیلوفری
ظلم اعدادن قرالموش تازیانه یرلری
آغلادور عصرین امامین بیله حالی زینبین
(خائفا) کاتب سنی تشویق ایدوب بو مطلبه
مطلعی یازدی ویروب ایتدون توسل زینبه
گوئیا قویموشدی استادین سنی بو مکتبه
حالیوه شاملدی چوخ لطف خصالی زینبین
من مریضم دل ملولم چوخلی رنجورم خدا
زینبه ویرم قسم بیر لطف قیل سن ویرشفا
قید غمدن بو دل فگاریمی ایله رها
صاحب عفو و کرمسن لایزالی زینبین
مرحوم خائف تبریزی
منبع کانال گنجینه گذشتگان
با سلام