ماهِ شعبان
گوزل بیر آیدی بو ماهِ مُعظّمِ شعبان
فضیلتنده سراسر عقول اولوب حیران
خدا ، حبیبنه مخصوص ایدوب بو شعبانی
جلال و شأن و شرافتده یوخدی نقصانی
بو آیدا ایلیه هر بنده دلدن استغفار
خطا و جُرمین ایدر عفو قادرِ غفّار
اگر چه لیلهء قدری خدا ایدوب پنهان
یازولّا بعضی لری بیست سومِ رمضان
ائمّه دن یتن اخباری ایله سن منظور
گلور اله هامی مقصودون ، اولما دل رنجور
همین بو نیمهء شعباندی ، لیلِ قدر و برات
ایدر بو عرضیمی اخبارِ معتبر اثبات
آچوبدی بابِ کراماتی خالقِ سبحان
گناهکارلره فیضین ایلسون احسان
جهنّم اهلنه اودّدان براتِ آزادی
ویرور خدای جهان ، وار الیمده اسنادی
اولان علاوه سبب ، بو آیون شرافتنه
زُفافِ حضرتِ زهرادی ، باخ جلالتنه
یتوب بو گونده پیمبر گوگلده منظوره
به امرِ ربّ علا ، نوری تاپشوروب نوره
ویروب بتول الینی مرتضی علی الینه
کمالِ وجد و شعفله قیتدی منزلینه
بو بیر طوئیدی بو طویدا اولوب پیمبر شاد
دیوب قضا و قدر بو طویا مبارک باد
گلور خیالیمه بیر طویدا ، اولدی مایهء غم
اساسِ عشرتینی ایلدی فلک بر هم
همان او طویدی سالوب ماسوایه شیون و شین
بلا چولنده دوتوب کربلا غریبی حسین
دیسم نجه طوئیدی فاطمه گلور داده
سالور یانان اورگندن شراره اکباده
دیسم نجه طوئیدی مصطفا آچار باشینی
توکر امامِ حسن ، جنّت ایچره گوز یاشینی
بو طویدا ایتدی پیمبر علینی خرّم و شاد
او طویدا ، طوی گونی دوغراندی تشنه لب داماد
قورولدی عرشیده بو طویدا بزمِ عیش و طرب
او طویدا آچدی باشین ، یولدی ساچلارین زینب
بو طویدا ویردیله انواعِ تهنیّت گَلینه
او طویدا یاخدیلا قاندان حنا ، گلین الینه
بو طویدا ایتدی طوی اهلی زینت و زیور
او طویدا سالدی طوی اهلی باشنا قرا معجر
بو طویدا ویردیله نازیله یار الین یاره
او طویدا اولدی عروسین قولاقلاری پاره
( اولور هر طویدا بیر بزمِ ضیافت
بو طویدا اولدی بیر اوزگه قیامت
شهنشاه ایلیوبدور طوی اراده
ندن بس گلمیوبدور شاهزاده؟
آلوبلار دوره سینی قومِ اشرار
گلنمز ، جسمین از بس دوغریبلار
اوزین میدانه شاهِ دین یتوردی
طویا شهزاده نین نعشین گتوردی
چخاندا نو عروسی پیشوازه
گلوب پیشوازنه قانلی جنازه
قزل قان اولدی دامادون حناسی
دوتولدی مجلسِ طوی ایچره یاسی
قارشدی باشلاری شور و نوایه
طویا هر کیم گلوب ، گلدی عزایه )
گینه فضیلتِ شعبان ایدوب منی ترغیب
ایدم بقیّهء عنوانِ اوّلی تعقیب
جلالِ نیمهء شعبانه بیر عمده سبب
حسین زیارتیدور ، کشف اولا گرک مطلب
جهانه شور سالان یا حسین حسین سسیدور
او آلتی گوشه لی قبرین بو گونده وقفه سیدور
بو گونکی گونده اولانلار زیارته نایل
خدای عالمیان لطفنه ایدر شامل
بودور خبرلرین عالمده عمده مفهومی
زیارت ایلیه هر کیم بو گون او مظلومی
پیمبرانِ اولوالعزم و مُرسلِ برحق
همان او شخصله ایلر مُصافحه مطلق
او توزلی قبرینه قویسا بیری دوداقین اگر
ملائکینِ مُقرّب دوداقلاریندان اوپر
خوشا او کسلرین احوالنه ، اولوب زوّار
حسین قبرینین اطرافینه چکوبله حصار
یانالّا شاهِ شهیدون ملال و غملرینه
قویولّا یوزلرینی اکبرین قدملرینه
غریبه گوندی ، گوزل وقفه ، خوش سعادته باخ
او تَحتِ قُبّه ده حاضر اولان جماعته باخ
بیری حرم قاپوسندا ، افسرده حال و ملول
اوخور حزین حزین ، آغلار گوزیله اذنِ دخول
بیری اجازه ویرور پیشِ روده گوز یاشنا
طواف ایدور بیری ششگوشه قبرینون باشنا
دولوب حسین حرمی شیون و فغانیله
ویروبله سس سسه بیر جمع ، نوحه خوانیله
بیزه که اولمادی قسمت ، قویاخ ضریحینه اوز
همین بو حسرته قان آغلاروخ گیجه گوندوز
گَلون بو گونده ایداخ بلکه بیزده اخذِ مرام
ویراخ بو یردن او مظلومِ تشنه کامه سلام
سلام اولا سنه ای ظلم الیله قانه باتان
سلام اولا سنه ای کربلا یرینده یاتان
سلام اولا سنه ای نحرِ انوری منهور
سلام اولا سنه ای سینه سی اولان مکسور
سلام اولا سنه ای ظلمله سولان چمنی
قوری یر اوسته قالان اوچگون اوچ گیجه بدنی
سلام اولا سنه ای عترتین گوزوندن آتان
تنورده یارالی باشیله کول اوسته یاتان
سلام اولا سنه ای عالمی قویان حیران
او قانلی تربته اولسون آتام آنام قربان
ئولونجه دوشمز حسینون گوزل آدی دلدن
چتین بو سس کسیله حشره دین محافلدن
وظیفه ایلمیشم چون بو مطلبی اوزومه
ویرم امامِ زمانیله خاتمه سوزیمه
زبانا" ایستورم عرض ایلیم اورک سوزینی
بو گون تیکوب هامی عصرین امامنه گوزینی
نقدر پردهء غیبتده دور او نورِ هدا
محالدور اولا یر یوزینده صلح و صفا
تولّدنده او شاهون بیر اوزگه عالَم اولوب
مقرّبینِ خداوند ، شاد و خرّم اولوب
بو گونده صبح زمانی او عصر سلطانی
قدم جهانه قویوب ، کونی ایتدی نورانی
بیله تجلّی ایدوب جلوهء جمالِ خدا
ایشقلی گون کیمی تا سالدی شرق و غربه ضیاء
قویوبدی سجدیه باش ، مظهرِ صفات الله
بیوردی اشهد ان لا اله الا الله
او دمده جدّینون اقرار ایدوب رسالتینه
علی ولیّ خدا مرتضی ولایتینه
سایوبدی بیر بیر اجداینون وصایتینی
مقامِ عزّتنی شوکت و جلالتینی
یتوردی اوز آدینا ، دولدی خونِ دل گوزینه
حضورِ حقّده ویردی ادامه حق سوزینه
دئدی الهی اوزون وعده ویرموسن منه سن
منیله دولدوراسان یر اوزین عدالتلن
یتور او ساعتیمی تیز ای خدای بی همتا
بو یر یوزینده ایدوم شورِ محشری برپا
فغان و شیونیله لرزه نُه رواقه سالوم
بلا چولنده آخان قانلار انتقامین آلوم
نه وقته دین قالاجاخ یرده جدّیمون قانی
بتولین اوج ایده جاخ جنّت ایچره افغانی
مین اوچ یوز ایلدی اودور حجّتِ خدای جهان
گزر مدام الی قوینوندا چوللّری حیران
سرشک حسرتینی سیل تک یوزه باغلار
غریب جدّینه چوللرده صبح و شام آغلار
دیر زمان منی تأخیره سالدی یا جدّا
اولانمادیم سنیله گر چه روزِ عاشورا...
اشعار داخل پرانتز از مرحوم ذلیل می باشد.
مرحوم صحاف تبریزی
منبع مجموعه کانالهای مدح و مرثیه
با سلام