متن نوحه های ترکی و فارسی

اشک رباب

سالوبدی محنت و غم قلبیمه شرر گوردوم

وجود ، مُلکینی وحشتلی پرُ خطر گوردوم

دئدیم توسّل ایدیم من ، حسینِ فاطمیه

توسّلینده حسینون عجب اثر گوردوم

اورک گوزیله بلا دشتینه نظر سالدیم

ربابی قبرِ حسین اوسته ، خون جگر گوردرم

چکوبدی جان کیمی قبرِ شریفین آغوشه

چوخ ایلوری سینه سی اوستونه نظر گوردوم

بولوردی چون بالاسی دفن اولوب همان یرده

گلوبدی شیونه ایوای بالام دیَر گوردوم

یانیقلی دللریله اوخشور آغلوری بالاسین

دیور علی یانورام ، قوی دیوم نلر گوردوم

او گونکه غنچه کیمی ظلمیله خزان اولدون

وجود ، نخلینی بِالمَرّه بی ثمر گوردوم

او ساعتیم علی جان مین ایله برابریدی

آلوب قوجاقه سنی قانه غوطه ور گوردوم

گوزوم قرالدی گورَنده بوغازوون یاراسین

باشون بدنده دایانمیردی مختصر گوردوم

گهی سنی چکوب آغوشه ، گاه غش ایلدیم

اوزومده اولموش عیان ، حالِ مُحتَضَر گوردوم

همان گونون گجه سی هجروه یاناردیم من

فراق عالمینی ، عالَمِ دگر گوردوم

گونوز اگر چه بالا سینه ده سودیم یوخیدی

گیجه بو سینه ده بیر اودلی سود گزر گوردوم

خیال عالَمینی صبحه تک دولاندیم من

نه آغلاماقون ایشیتدیم نه بیر اثر گوردوم

دئدیم گونوز تاپارام اولمادی گیجه ممکن

هزار حیف ولی تاپدی اوزگه لر گوردوم

بوئیدی فکریم اوپَم بیرده من کسیک بوغازون

منیم یریمه ولی اوپدی نیزه لر گوردوم

اسیر ایدوبله بیزی چکدیلر دمشقه طرف

کسیک باشون منیله اولدی همسفر گوردوم

گیرنده کوفه و شامه ایله پوزولموشدوم

خدنگِ محنت و غم ، قلبیمی دلر گوردوم

اولار که آگه اولوب جمله سرگذشتیمدن

بیری بیرینه آناوی نشان ویرر گوردوم

دیردیلر بودی او سود امر باشین آناسی

گورن او حالیمی اشکین یوزه توکر گوردوم

گِلایه بو سَفریمدن من ایتمرم هرگز

دیمم که اینجیمیشم رنجِ بیشتر گوردوم

گر چه شامده ویرانه منزلیم واریدی

دگلدی بیزلره لایق او یر مَقر گوردوم

و لیک بیر گجه یاتمیشدی سینم اوسته باجون

آیلدی وحشتیله آه و زار ایدر گوردوم

سراغ ایدوب باباسین شیون و فغانیله

سرشکِ چشمینی گوزدن یوزه اَلَر گوردوم

دئدی بابام یوخودا حالِ انکساریله

غبارِ زلفِ پریشانیمی سیلر گوردوم

منی قوجاقه آلوبدی کمالِ رأفتیله

نهالِ بختی او دم مُثمرِ ثمر گوردوم

گه عارضمیدن اوپردی ، گهی دوداقیمدن

گهی محبّت الین باشیمه چکر گوردوم

گلوبدی شوره گولونّن اوتور هَزاره کیمی

خزان یِلیله وجودی اونون اَسَر گوردوم

اویاندی جمله یاتانلار صدای شیوندن

باخان او حاله یانوب ، اولدی دیده تر گوردوم

او دم قوجاقینه آلدی بی بون محبّتیله

باسوبدی باغرینا ، رأفتله دیندیرر گوردوم

شرارِ آهیله اود دوتدی خرمنِ صبری

لهیبِ غمده دل و جانی شعله ور گوردوم

یزیدی ایلدیلر باخبر بو مطلبدن

اوتانمیوبدی خدادن او بَد سیَر گوردوم

آتا باشین بالایه گوندروب جفائیله

بیر ایله ظلمی دینمز که بیر بشر گوردوم

گورن کیمی آتا باشین ، آچوبدی قولّارینی

باسوبدی سینیه جان تک ، او خون جگر گوردوم

گلوب تموّجه بحرِ محبّتِ دیرین

یوزین قویوب یوزینه لبلرین اوپر گوردوم

تَرنّمیله دیردی آتایه دردِ دلین

دوتوبدی آینه ی وحدتی کدر گوردوم

کسیلدی ناله سی فکر ایلدیم بالام یاتدی

خیالیم عکسینه وار آیری بیر خبر گوردوم

بی بون فغانی او دمده اوجالدی افلاکه

خرابه توپراقینی باشینه سَپر گوردوم

دیور فغانیله ایوای گَلون بالام ئولدی

ایویم یخیلدی بولن یوخ که من نلر گوردوم

تاپولمادی باجوا غسل ایدوب ، کفن ایلین

گلابِ چشمیله غسلون بی بون ویرر گوردوم

کفن ندن ایلیوب اول یتیمه آلما خبر

او یرده دفن ایلیوب دانهء گوهر گوردوم

یازان زمانیده بو شعری ( احمدی) هر چند

ضمیرِ شعریده وار سوزیدن اثر گوردوم

و لیک حالیمی بی حد پوزوبدی بو مصراع

ربابی قبرِ حسین اوسته خون جگر گوردوم.

آقای حاج محمد احمدی صائب

منبع مجموعه کانالهای مدح و مرثیه