احوالات حضرت علی اصغر (ع)
بخش اول
دوتوبدی آئینه ی قلبیمی غبارِ ملال
حسین مصیبتی ایلوب منی پریشانحال
گرک علاقهء دل ، عیشِ دهریدن کسیله
غبارِ قلبیمی گوزدن آخان سرشک سیله
عزیز فاطمه دوشدوقجا یاده ، دیده دولور
آخور گوزوم یاشی یالقوزلیقی مجسّم اولور
معاینه گورورم تک قالوب او سبطِ رسول
دوروبدی مرکزِ میداندا دلفکار و ملول
گهی خیامینه یوز دوندروب او شه باخوری
باخور بالالارینا اشکِ حسرتی آخوری
صاقا صولا نظر ایلور او شهریارِ زمن
گورور او دشتیده یوخ بیر کمکلیق ایدن
دوتوب یوزین قوشونا اول امامِ کلّ انام
خطاب ایلوری ای اشقیای کوفه و شام
یازوبسوز اون ایکی مین نامه ای سپاهِ دنی
قوناق چاقورموسوز آخر منِ فلک زده نی
عیالیمی گوتوروب گلدیم احترام ایده سوز
منِ غریبه نه کی ظلموزی تمام ایده سوز
قوناقه رسمیدی هر یرده احترام اولونی
گوروبدی کیم قوناقا باغلاسونلا سو یولونی
دیلیم دوداقیم عطشدن یانور کباب اولوری
جگرلریم آلشور عمریمون گلی سولوری
سودان بودشتیده محروم و بی نصیبم من
گلون مروّته رحم ایلیون غریبم من
بو بس دگول که ایدوبسوز منی سودان محروم
زمانه نون گوزی گورموب منیم کیمی مظلوم
جوانلاریم هاموسی دوغرانوب بو صحراده
بالالاریمدا گلوبلر خیامیده داده
ایدون بو السیز ایاقسیز اوشاقلاریما نگاه
گلون ترحم ایدون خاطراً لِوَجهِ الله
ترحماً منی گردابِ غصه دن اوتورون
بالالاریما باخون ، من غریبم ال گوتورون
اسوب سمومِ ستم سولدی ظلمیله چمنیم
گل اوزلی اکبریمون ئولماقی بسیمدی منیم
گورندن اکبریمی جان ویرور قوری یرده
گیدوبدی گوزلریمون نوری گلمیشم درده
چکیلدی لاله کیمی داغ قلبیمه بولورم
چتین قالام قیریلوب بندی قلبیمون ئولورم
بیلیم سینوبدی ابوالفضلیدن صورا نه حیات
خیالیم عمر اولا عباسیدن صورا هیهات
باخون خیامیمه اما گورون نه وحشتدور
بو آغلیانلار اوشاق ، قاره معجر ، عورتدور
بولارکی کان حیا ، نِی کیمی نوالیدیلر
سیزون پیمبریزون سربسر عیالیدیلر
یوخومدور الده علاجیم بو اضطرابه نِدیم
قویون بولارین الیندن دوتوم فرنگه گیدیم
عیالیمی گوتوروب روم و دیلمه گیدرم
سیزه ئولنلریمون قانینی حلال ایدرم
مگر منی تانومورسوز منیله جنگ ایدوسوز
بو قدر عرصه نی منِ بی پناه تنگ ایدوسوز
آنامدی فاطمه جدّیم رسولِ اکرم دور
آتام علیدی حسن قارداشیم مسلّمدور
اماموزام هامی احکامِ دینه آگاهم
تمامِ خلقه بو عالمده حجت اللّهم
خیال ایدون نه امامم نه مصطفادی بابام
نه فاطمه دور آنام نه ولیّ حقدور آتام
نه سبطِ احمدِ مرسل نه شاهِ ذوالحَسَبم
بو قدر واردیکی منده سیزون کیمی عربم
موحّدم اوزوم اسلامی ، هاشمی ، عربی
منیم قانیمی هدر بولماقین ندور سببی
بیری کمکسیز اولا رحم ایدر اونا دشمن
غریبم آرخاسیزام ال چکون داخی مندن
دئدی زبسکی بو سوزلردن اول امامِ کبیر
ایدیب ایکی نفره اول سپاهیدن تأثیر
چکوب قلیجلارین اول شاهه ایتدیلر نصرت
ولیک کوفه و شام اهلی ویرمدی فرصت
گلوب تموّجه دریا کیمی قوشون یکسر
شهادته یتوشوبلر همان او ایکی نفر
گینه او دشتیده مظلوم امام تک قالدی
یانوقلی قلبینه یالقوزلیقی شرر سالدی
نقدر سوز دئدی اولقومه سیّدالشهدا
او سنگ دیللره تأثیر ایتمدی اصلا
گوروب امام او صحراده قالدی چون یالقوز
اوجاتدی طاقِ سماواته نالهء جانسوز
بو رسمیدور ایکی لشکر اگر ایده دعوا
شکستلیق اولا هانسی طرفده گر پیدا
خیالِ صلح اولا مغلوب اولان طرفده اگر
ازل او غالب اولان لشکره سوزون سویلر
قبول ایلمسه صلحی فرقه ی عدوان
قباقه اوندا چخاردیلّا رسمیدور قرآن
سپاهِ غالب اگر مُسلِم اولسا مردانه
جدلدن ال گوتورر تا باخار او قرآنه
ترحّم ایتمسه قرآنه اهل کفرِ نفاق
او دم قباقه چخارداللا سود امر بیر اوشاق
نه مسلم و نه مجوس و نه گَبرِ بداختر
او شیرخواریه هر ملّت اولسا رحم ایلر
اودور امامِ حسین گوردی قومِ کینه سیر
ترحّم ایلمیر ایستولّه قانینی توکه لر
گوروبکی چاره سی از بس کسیلدی هر یاندان
قایتدی خیمیه پیغمبر اوغلی میداندان
کمال یأسیله پژمرده حالیله اول شاه
آلوب الینه او ساعتده بیر کلام الله
آچوبدی باشینه قویدی همان او قرآنی
گلوب مخاطب ایدوب تابعانِ سفیانی
دییورسوز ای سپهِ شام بیز مسلمانوق
موحّدوق بو جهان ایچره اهلِ قرآنوق
قسم بو مصحفه خلّاق حیّ سبحانه
که منده معتقدم ای قوشون بو قرآنه
هم عالِمم بونون آیاتینه همی عامل
همین بو مصحف اولوب جدّیمه منیم نازل
گولوم سولوبدی اوزوم باغِ مصطفایه گُلم
خدایه آند اولا ایقوم خارجی دگلم
من ایلینده سیزه موعظه ندن گولوسوز؟
موحّدم نیه بس قانیمی هدر بولوسوز؟
مگر شریعت و دین اوسته قویموشام بدعت؟
منیم قتالیمه بیر بیله ایلوسوز سرعت
گلون گوراخ دییوری هانسی آیهء قرآن
ایدون غریب مسلمانی قانینه غلطان
چوخوز ایشیتموسوز انصاف ایدون سپاه کَفَر
که منبر اوسته مکرّر دییردی پیغمبر
چوخ ایستورم حسنِینی دیمون عبث یره من
بهشت جوانلارینون شاهیدور حسین و حسن
سیزون خیالوزا بِالفرض من گنهکارم
گیچون بو مصحفه من یالقوزام دل افکارم
دئدی امام حسین هر قدر بو دیللردن
بیرسی گلمدی رحمه او قومِ کافردن
قایتدی خیمیه مظلوم امام پژمرده
بو فکریله که او شه احتجاج ایده بیرده
خیال ایدوب اویادا بلکه کفر لشکرینی
آلوب ال اوسته او دم شیرخواره اصغرینی
بیر الده ساخلادی قونداقِ طفلِ عطشانی
قویوب باشینا اوبیرسی الیله قرآنی
او حالتیله گلیب رزمگاهه شاهِ شهید
خطاب ایلدی ای تابعانِ امر یزید
بو سود امر بالا نسلِ رسولِ اکرم دور
سیزه قوناقدی لب عطشاندی دیده پُرنمدور
یاخوندی عهدِ السته خوش امتحان ویرسون
او قدر قالمور الیم اوسته تشنه جان ویرسون
گلون بونا بیر ایچیم سو ویرون الولانوری
الیمده گورموسوز آیا نجه بالام یانوری؟
آخوب گوزی کسیلیب طاقتی باتوب نفسی
اولور اودور سببی چخمور آغلیاندا سسی
وفا سپهرینه بو بیر ایشیقلی اختر دور
نظرده اصغر ، اوزی یادگار اکبردور
ندور گناهی بونون رحم ایدون بو نوگلیمه
جفانی ترک ایدون اود ورمیون یانان دیلیمه
ئولوم تری دوزولوب آلنینا بالام ئولوری
نجه یانور اوره گیم بولموسوز خدا بولوری
عطش زبسکه اثر ایلیوب بو غنچه گوله
نفسی گلمیری یا آغلیا و یاکی گوله
اگر چه سوزِ عطش جانینه سالوبدی شرار
ولیک یوخ دیلی اوز حالینی ایده اظهار
دیسوز بهانه دی بو ایستورم اوزیمه من آب
گلون آلون آپارون ایلیون اوزوز سیراب
جهاندا هر نجه اَدنی' بیر آدم اولسا اگر
قویالّا سوز دانوشاندا سوزون تمام ایلر
ولی سرشکیله دولدوردولار حسین گوزینی
دیه دیه سوزین آغزیندا قویدولار سوزینی
الینه حرمله بیر تیریله کمان آلدی
پیمبر اوغلونون آغزینداکی سوزی قالدی
عزیزِ فاطمه نین قلبی اود توتوب یاندی
باخاندا گوردی بالا ظلم الیله اوخلاندی
تصوّر ایله نه حاله قالوب او طفلِ صغیر
بیچوب قلج کیمی حلقین سه شعبه زهریلی تیر
دگوب بوغازینا اوخ سو یرینه قان ایچدی
لطیفیدی بوغازی اوخ دایانمادی گیچدی
نشست ایتدی امامین قولونا تیرِ جفا
چکوب چخاتدی او پیکانی سیّدالشّهدا
امام قوینینا قویدی او دمده قرآنین
هر ایکی اوجونا دولدوردی اصغرین قانین
ازل او قانی یاخوبدور اوزی عمامه سینه
عمامه سیندن آخوب صورتینه جامه سینه
دوباره قانی دوتوب اوجونا فغانیله
بویادی اصغرینین صورتین او قانیله
اوچومجی دفعه او صابر اولان بلیّاته
دوتوبدور اوجونا قانی سپوب سماواته
دئدی که شاهد اول ای خالقِ علی اصغر
نه رحم ایدیر بویوگه نه صغیره بو لشکر
بو قانی ساخلا امانت ، سپهره ویر زینت
حضورِ جدّیمه حاضر اولاندا بو امّت
زمینِ محشره محشرده ولوله سالّام
بولاردان اوندا بو قانیله انتقام آلّام
قیامتین گونی یارب سن اول بو حاله گواه
زبسکه عرصه نی تنگ ایتدیلر منه بوسپاه
گتوررم الده کتابون بو قومِ عدوانه
ولیک باخمادیلار احترامِ قرآنه
یرینه حرمتینی مصحفین یتورمدیلر
منِ غریبدن اشرار اَل گوتورمه دیلر
ترحم ایتمدیلر ظلم عیاری یوخلادیلار
سو ایستدیم بوغازین سو یرینه اوخلادیلار
عزیز فاطمه بسکه یانوب بو محنتدن
گلوب تسلّیّ دل مصدرِ جلالتدن
حبیبیم اصغره چوخ باخما کؤنی یاندیرما
الونده بو قوزی قربانوی دولاندیرما
هانی سنون کیمی عاشق وفا نشان ویرسین
بالاوی قوی یره آسوده بلکه جان ویرسین
غم ایلمه سوسوز اوخلاندی دؤز بو سودایه
بو سود امر بالاوا وار بهشتیده دایه
اگر چه خیمده اشگیله چوخ دولوب گوزلر
آناسی فاطمه اما بونون یولون گوزلر
امام گوردی که یوخ چاره چوخ گیدور قانی
قوری یر اوستونه قویدی او تشنه قربانی
باخوب او غنچه گوله صرصرِ خزان اسدی
امام تیغیله بندِ قماطینی کسدی
اونون او حالی امامین قرارینی آلدی
او خیرداجا بالا قان ایچره ال ایاق چالدی
وفای عهدینی قارداشی تک نشان ویردی
حسین باخاباخا اول شیرخواره جان ویردی
گورنده ئولدی بالا گَلدی قلبی چوخ درده
دوزنمدی قالا غنچه گُلی قوری یرده
گلیب جگرده اولان قانی دیده ده جوشه
گوتوردی آلدی جگرگوشه سینی آغوشه
آقام نه حاله قالیب یوخ دیلیمده تابِ مقال
تصور ایله او حالی اوزون خیالیوه سال
ادامه دارد ...
مرحوم حسینی سعدی زمان
منبع مجموعه کانالهای مدح و مرثیه
با سلام