ای اوخ 6071
شاهکاری کم نظیر از جناب استاد طهمورثی با عنوان
ای اوخ
سنه خلوتگه یاری ویروبدور کیم نشان ای اوخ ؟
مکان لا مکان اولموش سنه هاردان عیان ای اوخ !
او دم که قورتولوب چیخدون شتابیله کَمانیندن
دَگوردون مطلع حتّی مَسیرینده نشانیندن
گرکدور ایلیم آگه سنی من بو مَکانیندن
مَکان لا مَکان اولدی سنه اِیمدی مَکان ای اوخ
تصاحب ایلدون سن که مکان عشق و میقاتی
بولوردون که بو ماواده تاپارسان اوزگه حالاتی
تاپوبسان ایندی که سن بو یانان دلده کمالاتی
نَدن قان آغلوسان آیا اِیله شرحین بیان ای اوخ
یانورسان داغلی سینمده اگر چه درد و محنتدن
بیر آز یان گور نه چکدیم من بو صحراده مصیبتدن
سَمایه اوج اِیدوب نالم چکنده اوخ جراحتدن
اولوبدور گولریم یکسر بو گلشنده خزان ای اوخ
بو چولده ظلم دریاسی بو گون باشدان آشوب داشدی
اونا باعث نه تک سنسن که بلکه بیر آغیر داشدی
دَگن دمده جبینیمدن بابام طاها باشین آشدی
آنام زهرا گوزون یاشین یوزه اِیتدی روان ای اوخ
آتاندا داشینی ظالم سنیله سایه به سایه
نشانیندن گلوب دگدی چکوب قان پرده سیمایه
یووار راهب آخان قانی یِتیشسَم دِیر ترسایه
قبالینده آلار حقدن اودا باغ جنان ای اوخ
هَله داش صحبتی قالسین که اِیتدی باغریمی القان
نَدن گَنجینه گَنجی ستمله ایلدون ویران
اِیله بیر حاله سالدون که خیمدن زینب نالان
آلوب باش اللری باشدا گلور ناله کنان ای اوخ
قدم آتدوقجا گوز یاشی آخور دامانینه نم نم
چکور بو صحنه نی ایندی خیالینده باخور هردم
باجی حسرتدی قارداشه دیور ای خالق عالم
حسینیندن قالوب زینب بو چولده ناگران ای اوخ
محبت روز خلقتدن بلی بحر عجایب دور
نه تک سن کشفینه طالب مسیحا کشفه طالب دور
بو دل که زینب کبری بونا عالمده صاحب دور
نَدور سرّی بولَر تنها اونی صاحب زمان ای اوخ
باتاندا قانینه اکبر دگوبدور قلبینه یاره
دوباره بیر یارا دَگدی دَگنده یاره سرداره
بو بیر احوالیده منده تاپانموردوم ره چاره
ددیم قان ایچره گل یاتما بلیم سیندی امان ای اوخ
آچوب قانلی گوزین سقا منه باخدی محبتدن
دونوب تا مشکینه باخدی گوزون یومدی خجالتدن
خلاصه دردینی بولدوم، نَدور دلده اشارتدن
آپاردیم مشکینی ویردیم سوسوزلاره نشان ای اوخ
باخیردی خیرداجا قیزلار سوسوز مشکه یانا یانه
او پاره پاره سو مشکی بلشمیشدی آخان قانه
او مشکین باشینه بیر قیز دولاندی همچو پروانه
ددی بی رحمیمیش مشکه ستمله اوخ ووران ای اوخ
او اوخ یاندورمادی ایله، که یاندوردی بو گون بیر اوخ
او اوخ ، ای اوخ ، او اوخدور که ، ربابی یاندوروب چوخ چوخ
اونون طرحین ویرن کَسده مشخصدور مروت یوخ
اوخی تا ایلدیم خارج یارا آغلوردی قان ای اوخ
بوغازیندن آخان قانی دوتوب آتدوم سماواته
شفقدن قطره به قطره آخوردی بام میقاته
دل عشاقه درد اولدی نه لازم نَفی و اثباته
او قاندور چرخین اوستونده اولوب رنگین کمان ای اوخ
او عطشان هنجری اوندا اواوخ که اِیلدی پاره
بیر آیری حاله قالدیم من تاپانموردوم ره چاره
او دم بیر دم که حسرتله گوزوم دوشدی علمداره
اورکلندیم نه گوردوم که یئیور جسمی تکان ای اوخ
باخوب اطرافیدن لشکر سکوت مبهمه دوشدی
نه تک لرزه او دم تنها سپهر اعظمه دوشدی
تزلزل یکسره اوندا تمام عالمه دوشدی
ایله تیتریردی که یر گُوی او دَمده همزمان ای اوخ
ندا گلدی او دم گویدن حبیبیم تشنه قربانی
آپار اخیامه آغلاتما بو غمده آل طاهانی
ربابین اوج ایدوب عرشه خیمدن آه و افغانی
دیور ای وای منه آغلور زمین و آسمان ای اوخ
(عتیقیم) شور و شوقیله همیشه اعتکاف ایلر
دیر بو اعتکاف ایتماخ کَدردن قلبی صاف ایلر
منه بیر گوشه ی چشمی اقام باخسا کفاف ایلر
بو حُسن نیتی اِیلوب اونی شیرین زبان ای اوخ
استاد طهمورثی (عتیق)
منبع مجموعه کانالهای مدح و مرثیه
با سلام