در ولادت حضرت امام زمان (ع)
و گریز به احوالات حضرت علی اصغر (ع)
بخش اول
دولاندی گلدی یتوب چاردهّم شعبان
ایکی یوز الّی بِشِ هجرت شهِ ابرار
مُشرّف اولموشیدوم دودمانِ والایه
گلوب حضوریمه نرجس ، او کانِ عزّ و وقار
دئدی خانم ایاقوندان گتور چیخاردوم کفش
دئدیم نه سوزدور بو ای درجِ لؤلؤء شهوار؟
کنیزوام سنون ای بانوی حریمِ جلال
اولام سزادی سنه من ئولونجه خدمتکار
ایشتدی تا حسن عسکری بیوردی منه
جزای خیر سنه ویرسون عمّه جان ، دادار
او گون غروبه کیمی محضرینده اگلشدیم
غروب موقعی ایتدیم کنزیمه اخطار
گَتور لباسیمی اوز منزلیمه رجعت ایدوم
بویوردی حجّتِ برحق که گیتمه قال زینهار
یاخوندی بو گجه ایتسون جهانی نورانی
شعاعِ نورِ الهی و قدرتِ قهّار
دئدیم اولور متولّد او نورِ حق کیمدن؟
بویوردی حامله دور نرجس ، ای حمیده شعار
گلوب من ایلدیم اولدمده نرجسی تفتیش
گورنمدیم او خانمدا بو مطلبه آثار
تعجّبیله قیتدیم امامه عرض ایلدیم
که بطنِ نرجسه من باخدیم ای بلند تبار
نه واردی ذرّه جه بطنینده وضعِ حمل اثری
نه ظنّ وار اولا مصداقِ مَطلعُ الاَنوار
دئدی اونون مَثَلی مِثلِ اُمّ موسی' دور
اوزی بو سِرّه چکوب پرده خالقِ ستّار
قالوب همان گجه نی من حضورِ نرجسده
بو ماجرانی او بانودن ایتدیم استفسار
جواب ویردی که من بیر زاد ایتمورم احساس
عبث یره منه بیر بیله ایلمه اصرار
غرض همان گجه نی استراحت ایتدوق بیز
سُحور وقتی من اولدوم تَهجُّده بیدار
قیلوب نمازِ شبی ، تا نمازِ وتره یتوب
ایدردیم عالَمِ وحدتده حقّه استغفار
او وقته وحشتیله خوابدن دوروب نرجس
قیلوب نمازِ شبی ، باشلادی گوزل اَذکار
او قدر طول چکوب صبحِ کاذب ایتدی طلوع
گُلِ یقینیمه تردید آز قالوب وورا خار
اوبیرسی حُجرده دن اوج ایتدی صوتِ سِرُّالله
ای عمّه ایلمه تردید اولما زار و فکار
یاخوندی وعده ، اوخی عمّه سورهء قدری
قالور طلوعینه اول نورِ حقّین آز مقدار
باخاندا نرجسه گوردوم دوشوبدی وحشته چوخ
اولوب جمالی گُلِ آتشی کیمی گلنار
محبّتیله باسوب باغریما یوزیندن اوپوب
او شاخهء گلی ایتدیم اوزیمه زیبِ کنار
شروع ایدوب اوخودوم تا که سورهء قدری
بقیّةُ اللهِ کبراده باشلادی گفتار
او نورِ پاک آنا بطنینده ویردی سس سسیمه
منه سلام و تحیّه صریحا" ایتدی نثار
منیله نرجس آرا تا چکیلدی بیر پرده
گورنمدیم اونی ، اولدی آراده نور ، حصار
او ماجرانی یتوردوم امام محضرینه
تبسّمیله بویوردی شهِ بلند تبار
تعجّب ایتمه بالام حجّتِ الهی دور
قیاس اوزگه لره اولماز آیتِ جبّار
قیت او منزله نرجس یرینده دور ، قورخما
او دُرجِ عصمتی تک قویما ، اولگیلن اونا یار
گلوب او منزله گوردوم تلؤلؤ ایلور نور
نه نور ، وصفینه عاجزدی صاحبِ افکار
حدیقهء حَسَنین ، نرجسی گُلی آچیلوب
او گُل او منزلی معناده ایلیوب گلزار
نه گُل ، جمالی گُلِ گلشنِ بهشتی دور
او گل خزانِ جهانه ویرور دوباره بهار
ایدوب جلوس ، یوزی قبلیه ، الی گویده
شهادتِینه مبارک دلی ایدور اقرار
یازوبدی دستِ خدا صاق قولوندا جاءَالحق
که یعنی بو ویره جاق حقّ و باطله معیار
اولوبدی خَتنه اوزی طاهر و مطهّردور
ایدور صراحتا" اوز منتقم لقین اِشعار
فصیح صوتیله عرض ایلوری خداوندا
تئز ایله ایلدوقون وعده نی منه اظهار
بنی امیّه دن اوز جدّیمون آلوم قانین
جهانه شور سالوم الده تیغِ آتشبار
قبول اولوبدی دعاسی ، او وقت اولار اثری
که دولدورا یر اوزین جور و ظلمیله اشرار
طلوع ایلیه جاق شرقِ بیتِ داوردن
بو آفتابِ امامت ، بقیّةُ الاَخیار
اوجا سسیله امامِ زمان خطاب ایده جاق
ای اهلِ عالَم ، اولون باخبر ندور اسرار
شهید ایدوبله جدّیم حسینی لب تشنه
سویوبلا رختینی ، عریان قویوبدولار کفّار
ای اهلِ عالَم ، اولور من بو ظلمه تاب ایلیوم؟
بابام حسین بدنین آت چاپوب ایاقلادیلار
بیوک یره دایانوب سوز (حسینی) ال ساخلا
تمامه یتمز اگر نظم اولونسا مین طومار
ایا امامِ زمان ، عزّتِ بنی هاشم
نه وقته دین اولاجاق ذلّتِ بنی هاشم
نه وقته دین قالاجاخ آفتابِ عالمتاب
سپهرِ غیبتِ کبراده ، صورتنده سحاب
امامِ مُنتَقم و منتَظَر ، مروّجِ دین
نه وقته دین گزه جاخ چولده دیده سی پُر آب؟
نه وقته دین باخاجاخ ذوالفقاره ناله کنان
الی اورکده گوزی یاشلی پرده ده بیتاب
دوشر خیالیمه هر نیمهء مهِ شعبان
تولّدنده ، ظهوره ، ایدوبدی فتحُ الباب
اوزی دعا ایلیوب وعده می تئز ایله خدا
رضا چوخ اولما گوزی یاشلی قالماقا احباب
بئله روایت ایدوبدور حکیمه خاتون
اونون روایتینی ثبت ایدوبلر کُتّاب
زمانِ صبحیدی ایتدی جهانی نورانی
بقیّة الله کبری' و شاهِ ذوالاَنساب
آلوب قوجاقیمه ویردیم آتا قوجاقینه
باسوب بالاسینی آغوشه پورِ اُمّ کتاب
او بوطهء گُلی اوپدی ، یوزین قویدی یوزینه
اذان قولاقینه ویردی امامِ عرش قباب
جمالِ حجّتِ حقدن طلوع ایدوب بیر نور
یریله گوی آراسیندا چکوب او نور حجاب
نزول ایدوب یره بیر دسته آق قنادلی قوش
طوافِ نورِ امامه ایدوبله سعی و شتاب
امام تاپشوروب اوغلین او قوشلارین بیرینه
باسوبدی باغرینا ایتدی سپهره عزم ، ذهاب
گوروب او حالتی نرجس پوزولدی احوالی
ایدوب سرشکیله معمورهء توانی خراب
باخوب بو حاله حکیمه امامه عرض ایلدی
هارا آپاردی اونی طایرِ سفید - ثیاب؟
بویوردی عمّه او روحُ القُدُسدی ، شاهِ مَلَک
ایدوب اَئمیّه دایه اونی حقِ وهّاب
آپاردی دایه کیمی پرورش ویره بالاما
دئ نرجسه گوزون ایتمه پُر اشک ، چون میراب
اگر چه حقّی وار ایتسه فراقدن ناله
هله وصالدن او ، دَرمیوب گُلِ شاداب
بلی چتیندی آنا آیریلا بالاسیندان
نه چکدی بس گورسن اصغرین آناسی رباب؟
امام آلدی بالاسین آپاردی میدانه
بو فکریله ایده لر بلکه کوفیان سیراب
الی اورکده آنا خیمه لر قباقینده
دوروب باخور گوزی میدانه ، زلفی یوزده نقاب
اوغوشدورور اورگین ، ایلوری خراش یوزین
عذاره خونِ دل ایلور روانه چون سیلاب
بولور سوسوزدی جگر گوشه سی ، دل و جگرین
ایدور اورکده کی سوزیله سیخِ غمده کباب
آلوب اله قوری سینه لرین سپهره باخور
بو دللریله ایدور حیّ لاشریکه خطاب
گواهِ مسئله سن حیّ داوریم یا رب
ایله سوسوزدی ایدوب غشّ اصغریم یا رب
نه سو تاپولدی ، نه سینه لریمده صود تاپولور
نه ایتدی تاب عطشه ، نو گُلِ تریم یا رب
دوداقلاری قورودی ، غنچه گل کیمی سولدی
چکوب شراره یانوب قلبِ مضطریم یا رب
نه دل بولوری ، دییَم دل بیر آز دوتا آرام
ایدوردی نه اونا تأثیر دللریم یا رب
او قدر سینمی ، اوز صورتین خراش ایلدی
بویاندی قانیله آخرده اللّریم یا رب
آتاسی رزمگهه سو امیدینه آپاروب
قالوبدی حسرت اودور یولدا گوزلریم یا رب
بلنمورم ویره جاخ بیر ایچیم سو اهلِ جفا
و یا که اوخلاناجاخ اول سَمَن بَریم یا رب
آنا بویوندا سیزیلدیر بسانِ تارِ رَباب
آتا اویاندا ایدور دشمنه خطاب و عتاب
بو صود امر بالا ذرّیّهء پیمبردور
سوسوزدان اوچ گون اولور ایتمیوبدی راحت خواب
ندور سبب بیر ایچیم ویرموسوز بو صود امره
او سو که اوندان ایچور دیو و دَد ، وُحوش و دَواب
گوزوم یاشی ایله دریا کیمی گلور موجه
که نُه قباب او دریاده گورسنور چو حباب
بیری تاپولمادی اول جمعدن جواب ویره
مگر سؤلِ امامه خدنگ ویردی جواب
هدایتین گونی گوردی هلال اوخلاندی
دوتوب یوزین گویه پروردگاره ایتدی خطاب
ای خدا اوزون شاهد اول بونا اوخلانان علی اصغریمدی بو
قانینی سنه تحفه یولّورام عرشیوه سنون زیوریمدی بو ...
ادامه دارد ...
مرحوم حسینی سعدی زمان
منبع مجموعه کانالهای مدح و مرثیه
با سلام