احوالات مجلس ابن زیاد 5758
احوالات مجلس ابن زیاد
بو غصه باغریمی قان ایتدی یا امام زمان
هاچان ظهور ایده جاقسان اولوم سنه قربان
کمال عذرایدورم نظمینه بو بیرخبرین
گیدوبله مجلس ابن زیاده عمه لرین
او گونکه مجلسینه گتدی آل طاهانی
بهشت عدنیده یاندوردی قلب زهرانی
اولاندا اخلمجلس او دختران بتول
باخوبلا مجلسه یکسر اولوبلا زارو ملول
گورنده مجلسین اوضاعینی خانم زینب
خدا بلورکه نه حاله قالوب او کان ادب
بو یازدیقیم سوزی راوی بیله بیان ایلیوب
خانم او بزمیده اول اوزین نهان ایلیوب
گرک بیان ایلیم علتین نییدی سبب
که گزلدوردی اوزین خلقیدن خانم زینب
دیار کرببلاده زبسسویولموشدی
اوئیدی علتی حالی که چوخ پوزولموشدی
علی قیزیدی هامی عالمین عزیزیدی
زنان کوفه سراسر اونون کنیزیدی
گورون نه ظلم اولونوبدور بیرایله خاتونه
الومدن آرتوق او مجلس اولوب او محزونه
زیادین اوغلی او دم مجلسه نظرسالدی
اسیرلر آدینی بیربه بیر خبرآلدی
سوروشدی کیمدی او عورت قدین کمان ایدوری
اسیرلرآراسیندااوزین نهان ایدوری
جواب ویدیله برج سماده کوکبدور
بتول فاطمه نون یادگاری زینبدور
ایشتدی زینب آدین آچدی لال اولان دلینی
یارالادی خانیمین دردیله دولان دلینی
دیدی تکلم ایله ای عزیزه دوران
که سنده واردی دیولر غریبه نطق و بیان
نه آه و ناله دی نه غصه دور داخی نه ملال
ندورایدن سنی آیا بیله پریشان حال
ایکی سپاه ستیزه اولان زمان طالب
بو رسمدوربیری مغلوب اولاربیری غالب
یزیده بیعت اگرایلسیدی قارداشین
بو گون بو بزمیده دونمزدی قانه گوزیاشین
هزار شکراولا درگاه حی لم یزله
گتورموشم هامی آمالیمی بو گونده اله
آتان نقدری توکوب قان خیالیمه سالدیم
بالالاریندان عجب منده انتقام آلدیم
هانی آتان هانی جدون هانی آنان زهرا
گلوب بو مجلس آرا سیزلری گوریدیله تا
یزیده بیعت ایدیدی حسین ازلدن اگر
قانی توکولمزیدی کربلا چولینده هدر
حیات گلشنی هرگزجهاندا سولمازدی
حیالی قیزلاری دشمن اسیری اولمازدی
الوب جوانلاری گیتمزدی عزت و جاهی
یانوب تالانمازیدی کربلاده خرگاهی
گور ایمدی سیزلری الله ننوعی خارایلدی
بنی امیه نی عالمده کامکارایلدی
بو سوزلر اوخ کیمی قلبین او غمکشین دلدی
آتاسی شیرخدا تک او دم دله گلدی
تمام قوت قلبیله دختر زهرا
ایدوبدی ابن زیادی او بزمیده رسوا
بویوردی باده کفرایلیوب منی سرمست
ویروبسن ایله بلورسن بیز اهلبیته شکست
غرور و کبرسنی حقیدن ایدوب غافل
بونی بلورس اوزون کیمدی حق کیمی باطل
بوگون زبسکه سالوبسان بیراختیارالیوه
او اختیاریله مالک اولونموسان دلوه
دلیوه هرنه گلور ایتموسن حیا دیوسن
پیمبر عترتینه حرف ناسزا دیوسن
و حال آنکه بیزوق عترت رسول کرام
هامی یارانموش اولوب جدیمه طفیلی تمام
بیزی عزیز ایلیوبدورخدا پیمبریله
تفاخرایلروق عالمده بیزاوسرورلن
بو فخربسدی بیزه بیز عیال طاهایوق
علی بالالاریوق دختران زهرایوق
جوانلارین الومی داغلیوبدی سینه میزی
اوتان حیا ایله یاندورما سن دوباره بیزی
خانم بو سوزلریله آندوروب اصالتینی
ولیک ابن زیادآرتوروب شقاوتینی
او ظالیمین ستمی دوتدی ماه تا ماهی
دانشدوروب او قدر دخت غیرت اللهی
زیادین اوغلی ایدوب بسکه ظلمیده طغیان
دوروب ایاقه او حالتده قارداشی عثمان
اولوب علی قیزینین گورایشی هارا منجر
که دشمنین اورگی یاندی توکدی اشک بصر
دیدی داخی گوتورال کینه و شقاوتدن
نه ایستوسن بو بلا مبتلاسی عورتدن
بو بس دگل بویانوب یدی قارداشی قانه
یارالیدی جگری مبتلادی هجرانه
ایکی جوانی الوب بسدی قلبی یاره لنوب
شرار آهی یانان اود کیمی شراره لنوب
بو عورتین که بیله دل یارالیان سسی وار
یقین بونا او یارالی باشین علاقه سی وار
سن ایلینده تکلم او ماه طلعتیله
بو باشه منده باخوردوم کمال حسرتیله
اونون شراره آهی بو باشی یاندوردی
گوزآجدی مجلسه اول گوزین دولاندوردی
منیم الیمدن او حالی توان و تاب آلدی
تمام دقتیله مجلسه تظر سالدی
سبب اودوراورگیم بحررحمته جومدی
حرملرینه دوشنده گوزی گوزون یومدی
گورنمدی باجیسین درده مبتلا قارداش
گوزینده ایتدی روان قانلی صورته قانیاش
دانوشدوراندا او خاتونی سن حقارتیله
باجیسین ایستمدی تا گوره او حالتیله
اماندی ایتمه تعدی بنات اطهاره
او قدری قالموری گلسون بلا بو حضاره
کسوب او دمده زیاد اوغلی دل شماتتدن
گوتورمدی گینه ال کینه و شقاوتدن
بو فکره دوشدی او بیدین و بیحیا و لعین
بیرآیری ظلم ایلسون اهل بیته ازره کین
گوروب بالارین احوالی چوخ پریشاندور
تمام خسته و رنجور و دیده گریاندور
ایدوبدی غملری مشغول اولاری اوزلرینه
غبار غصه و غم اگلنوب گل اوزلرینه
عزالی یاسلی تماما چکوله دلدن آه
سالوب مشقته چون چوخ اولاری زحمت راه
اسیراولاندان اولار ایتمیوبله بیر گیجه خواب
علاوه آجلوق اولاردان آلوبدی طاقت و تاب
بالالارین او لعین آجلوقین ایدوب احساس
نه ظلمه امرایلدی بیرگورون او ارزل یاس
توان و تاب دیدی آل مصطفادن آلون
دانمیون گتورون سفره طعام سالون
واریمدی بسکه عداوت علی عمرانه
اورکلرین بولارین دوندرم گرک قانه
غرض او بزمیده یابن الحسن امام زمان
نه چکدی عمه لرین بلمورم سنه قربان
سالیندی سفره دوشندی طعام رنگارنگ
او آج بالالارین اولدی گوزینده دنیا تنگ
اوشاقلارین قاباقین کسدیلر بویوکلراوزی
ساتاشماسین اولارین بلکه اول طعامه گوزی
طعامین عطری یتنده مشام اطفاله
قلاردی بلمورم اطفال او دمده نه حاله
خیال ایدون سیزاواوضاع بزمی اول حالی
گورون نجه پوزوب آجلیق او خوردا اطفالی
طعام خونچالاری تا دوزولدی سرتاسر
حرملرعارضه توکدی او دم سرشک بصر
بویوک آج اولسادا واضحدی بو بیان ایتمز
صغیرطایفه سی آجلیقا توان ایتمز
حریم عصمتی بو غصه گورنه حاله سالار
که بویلانوب او طعامه باخا بالا بالالار
آلاردی زینب مظلومه دن خصوص آرام
دین زمان بالالارعمه جان اماندی آجام
آنا کیمی خانم اطفاله مهربانیدی چوخ
اولارین آجلیقی آخر اونا گرانیدی چوخ
اوئیدی حالی پوزولموشدی چوخ او بی یارین
چکردی نازینی اطفال بی پرستارین
بو سوز که عرض ایدورم هردله اثرایلر
صحیحیدور اوزی سجاد امامیدندی خبر
یازولا شامین او ویرانه سینده صبح و مسا
نمازین اوتدوقی یرده خانم ایدردی ادا
دگولدی بی سبب البته علتی واریدی
او حالیله خلنیمین دلده رقتی واریدی
ویرردیلر اولارا نان گونده بیرمقدار
خانم گورردی که دویمور قالولا آج بالالار
ویرردی حصه سین اطفال خرد ساله تمام
توانی اولمازیدی ایلسین نمازه قیام
باخاندا هربالانین حالینه اولاردی ملول
توکردی اشکین عذاره او یادگار بتول
خرابه یر قوری تپراقلاراسته زارو نزار
گورردی آجلیق اولاردان آلوبدی صبرو قرار
بیری دیرردی من عمه آجام علاج ایله
بو آجلیقیم منی قویمور یاتام علاج ایله
بیری دیردی داخی ایمدی عمه من الم
اوزالماقیمی اوزیمده بو حالیدن بلم
بابام خیالی من زاری اوزگه حاله سالوب
عنان صبریمی الدن بابام خیالی آلوب
ملال کوفه نی (ذوقی) سن اختتام ایله
بو غم تمامه یتن غم دگول تمام ایله
مرحوم ذوقی تبریزی
منبع کانال گنجینه گذشتگان
با سلام