متن نوحه های ترکی و فارسی

زبانحال حضرت صغری (سلام الله)

فراقیوه علی جان روز وشب دوام ایلدیم

خیال وصلیله هجران ایوین مقام ایلدیم

عراقدن نه گلن وار نه بیر عراقه گیدن

نسیم صبحی سنه قاصد پیام ایلدیم

عراقه سن گیدلی من نوای آهمیله

حجاز قیزلارینا یاتماقی حرام ایلدیم

وجودیمی اریدوب منجنیق غم سخدی

ریاضت عالمینین درسینی تمام ایلدیم

نظام عالم امکانی گزلین  آهمیله

پوزوب نظامینی معناده بی نظام ایلدیم

طریق عشقیده سرمایه وفا نقدین

یغوب خزینۀ سینمده اخذ کام ایلدیم

هوانی دودۀ آهیم ز بس تصرف ایدوب

بو چرخ اطلس دنیانی نیلفام ایلدیم

علی علی او قدر خلق ایچنده سسلمیشم

علی آدین علی مشهور خاص و عام ایلدیم

دیدیم علی گَلی عَمَّم گَلی  آتامدا گَلی

فراق ایوینده بو فکری عَلَی الدَّوام ایلدیم

متاع عشقه خریدار اولان  متاعی یغوب

بو چار سوی محبتده من قوام ایلدیم

تاپولمادی علی اکبر کیمی ویرن قیمت

متاعه جلب ایلیوب مشترینی رام ایلدیم

مدینه اهلینی  مصر اهلی تک یغوب باشیما

اوز عشقمیله سنه  عشقیده غلام ایلدیم

بو گون منی آنام ام البنین دید ایتدی

کمال رأفتیله من اونا سلام ایلدیم

منه بویوردی قیزیم وار عموندن هیچ خبرین

مقابلینده اونا منده لا کلام ایلدیم

بو انتظاریله من قالمارام یقین  ئولَّم

اودور که عارض گل فامی  زرد فام ایلدیم

مجسم ایلورم هر گون نظرده  حسن رخون

بو فکریله اوزیمی مقضی المرام ایلدیم

ایکی گوزوم باخار هر گون سنین گلن یولوا

بو انتظاریله هر صبح شامی شام ایلدیم

مریضه قیز- آناسیز- یالقوز ایوده شام و سحر

یغوب بو خلقی باشا حسن انتظام ایلدیم

گلن گیدن سوروشور قارداشین هاچان گلجاق

بو آی گلن آیی هی تکیۀ کلام ایلدیم

انیسیم آه سحر مونسیمدی ناله شب

خدنگ عشق رخون سینم اوسته رام ایلدیم

گیچن گیجه یوخودا  گوردوم عَمَّم اوز باشینا

قرا سالوبدی قیامتدی من قیام ایلدیم

شکنج زلفیمی  قارداش سنین گلن یولوا

آچوب تمامی پوزوب بیر خطالی دام ایلدیم

نسیم صبح صبا عطر کاکلین گتورور

بو خسته جانه علی قوۀ مشام ایلدیم

دعا ایدر باجی قارداشینی گیده سفره

بو عادتی علی دنیاده تا وارام ایلدیم

نوای نی  کیمی هر صبح دم سیزیلداماقی

اوزیمه شیوۀ دیرینۀ مدام ایلدیم

بیزه « رفوگریمیز » یوز دوتوب امان گتوروب

اوزوم براتینی ویردیم سوزون تمام ایلدیم

مرحوم روفه گر

منبع مجموعه کانالهای مدح و مرثیه