احوالات جناب عبدالله ابن حسن (ع)
یخلدی چون یره آتدان شهید راه الاه
اوجالدی گوگلره یردن صدای یا الله
ویروب ظهوره اوز عشقین او عشق قربانی
ایدوبدی سلسلۀ عشقی عشقدن آگاه
گهی دونردی صاقا شدّت حرارتدن
ویرردی یاره سی زحمت صولا دونردی گاه
یارالاریندان آخوب چشمه تک قزل قانی
او خون پاکله نقش اولدی یرده بسم الله
بدن یارالی هوا ایسّیسی اوزی خسته
او ایسّی قوملارین اوسته چکردی دلدن آه
دیردی وار گوره سن بیر نفر ولا اهلی
اولا بو بی کس و بی یار و بی پناهه پناه
ویره منه بیر ایچیم سو که لبلریم یاندی
ساراتدی پیکریمی سوزش عطش چون کاه
گوروبکه یوخ سسینه سَس ویرن او حالتده
یوزین دوتوب گوگه عرض ایتدی اول الهی گواه
پیمبر اوغلونا یوخ بیر نفر کمکلیق ایدن
که اُلدورر منی لب تشنه فرقۀ گمراه
سنون یولوندا رضا ویرمیشم قضایه بو گون
اوزیمدن اَل گوتوروب اولموشام فنا فی الله
ویروب او وقتده سعد اوغلی لشگره فرمان
حسینون امری اوزون چکدی ایلیون کوتاه
یریندن اوینادی آتلی پیاده هر یاندان
گَلوب طلاطمه دریا کیمی او چولده سپاه
قویوبلا اوستنه رُخ خضم دون پیل افکن
قالوبدی ششدر حیرتده مات شاهنشاه
قلج چکن اوخ آتان داش وُران عَصا گوتورن
قاریشدی بیر بیرینه شیره اَل تاپوب روباه
دیردیلر که وُرون اُلدورون توکون قانین
گَرک بو قانیله زینت تاپا بو میدانگاه
ایشیتدیلر بو سوزی خیمه لرده عورتلر
فغان و شیونیله دولدی خیمه و خرگاه
اولوب او وقتده بو هایُهویدن آگاه
امام حسن بالاسی شاهزاده عبدالله
دوروب اَیاقه یریندن ایتوردی اوز اوزینی
طلوع ایدوب افق خیمه دن او دم چون ماه
عمو دیه دیه یوز قویدی قتلگاهه طرف
گوزونده قانلو یاشی دلده نالۀ جانکاه
کَسوب قباقنی اول دمده عمّه سی زینب
او طفله ایستدی مانع اولا او عُلیا جاه
اَیاقلارین یره وُردی توکوب گوزیندن یاش
اوزینی زینب اَلیندن قوتاردی باشلادی راه
مشرّف اولدی حضور امامه سرعتیله
کمال حسرتیله اول شَهه ایدردی نگاه
گوروب کمین ایلیوب اَبهَر اِبن کَعبِ دَنی
بودور خیالی یخا دین ایوین او بخت سیاه
دیدی شَل اولسون اَلون ای خبیثه نون اوغلی
عَمومی اولدوروسن یوخدی بو عَمومده گناه
ویروب او خُرده اَلین هولدن قلج دمینه
قلنجی چون او زنازاده اَندیروب ناگاه
قلم اولوب قولی عبّاس عموسنین قولی تک
تمام عالم او طفلون گوزونده اولدی تباه
نه چکموسن دیدی بولدوم عمو بو حالیمدن
دوشنده قوللّارون ای خسرو فلک درگاه
اوزینی سالدی حسینون یارالی سینه سینه
یتشدی عین مرامه اَله گلوب دلخواه
دیردی دور عمو جان سمت خیمه گاهه گیداق
تیکوبدی گوز یولوا بانوان عصمت جاه
گوزتلوری یولوی خیمه ده بیبیم زینب
بیبیمی قویما قالا منتظر سنی الله
وُروبلا حلقینه بیر اوخ او طفل معصومین
علیّ اصغر شهزادیه اولوب همراه
نفس کسیلدی سَسی باتدی گوزلری آخدی
بویوردی اَشهَدُ اَن لا اِلهَ اِلّا الله
«سهیلی» ایلمه غم مُفلس محافِلسن
اَلینده واردی حسین آدی تک آغور تنخواه
مرحوم سهیلی
منبع مجموعه کانالهای مدح و مرثیه
با سلام