در احوالات حضرت امام حسن (علیه السلام)
دلخوشدی اهلِ عشق همیشه بلائیله
واردور بلانین اُلفتی اهلِ بلائیله
بیر عین و شین و قافیده ، وار یوز مین امتحان
معیار وار گوگلده بلایه ولائیله
تا شش جهتده منتشر اولدی بلای عشق
آمیزش ایتدی عشق و بلا انبیائیله
عینی عُیونِ باکیه ، شِینی شهادتی
قافی قرارِ قتل قویوب اوصائیله
بیر زهردار تیغ ویروب ابنِ مجلمه
باشدان تصادف ایلدی شیرِ خدائیله
تیره ترابی مسکن ایدوب ابوتراب
عشق الفت ایلدی حسنِ مجتبائیله
همخانه اولدی محنته بیر مدّتِ طویل
ویردی آز عمرینی باشه چوخ ابتلائیله
یوخ گوردی یار و یاوری ، خانه نشین اولوب
نِی تک انیس اولوب گجه گوندوز نوائیله
گه گه گلوردی مسجده راز و نیاز ایده
یأسیله اگلشوردی ایل و اقربائیله
بوینون قویاردی چگینینه محزون و دلفکار
ایلردی راز ، خالقِ ارض و سمائیله
منبرده سبّ ایدردی آتاسین خطیبلر
حالین پوزاردیلار الَمِ غمفزائیله
قلبی یاناردی ، لیک دوزردی او شاهِ دین
خوشنود ایدردی شاهدین عینِ رضائیله
گاهی آچاردی طعنه دلین اوز سُوَنلری
اِسمین دیردیلر او شهین ناسزائیله
توهینیله ویرردیله اول سَروره سلام
تحقیر ایدردیلر هره بیر مُدّعائیله
سویلردیلر ذلیل ایلدون مؤمنینی سن
صلح ایلدون عبث یره آلِ زنائیله
اسمین قویوب صحابه ، یغشدی منافقین
تجدیدِ عهده رابعِ آلِ عبائیله
اوز خیمه سینده آچدیلار اول شاهه ظلم الی
رفتار ایدوبلر گور نجه اول مقتدائیله
تاراج ایدوبله خیمه نی دویموبلا ظلمدن
باءِ بلا گیدوب او کشاکشده لائیله
جبرا" بیری گوتوردی باشندان عمامه سین
تاراج اولوب عمامه ، قبا و ردائیله
سجّاده سین بیری چکوب آلتندان اول شهین
مظلوم امامی سالدی یوز اوسته جفائیله
پهلوسینه ووروب بیری خنجر دینمرم
غشّ ایلدی امام او مُهلک یارائیله
تنگ اولدی بسکه عرصه او سبطِ پیمبره
پژمرده حال اولوب ستمِ اشقائیله
مجبور اولوبدی اوز وطنین ترک ایدوب گیدوب
سمتِ مَداینه شهِ دین التجائیله
قویموبلا اوردادا قالا آسوده مجتبی'
تقدیره باخ مشیّتِ امرِ قضائیله
بیر گون گلوبدی بیر نفر اَعمای کور دل
تلبیس و حیله ائیله ، خیالِ وَغائیله
باطن گوزیده کوریدی ظاهر گوزی کیمی
ابلیسه قلبیده اولونان اقتدائیله
الده دَمیر عصاسی واریدی او کافرین
دلده عداوتی او شهِ رهنمائیله
نوکِ عصا یازولّا ولی زهرداریدی
بیر ظلم ایدوب امامه او ظالم عصائیله
نعلِینی پارچالاندی ، ایاقندن آخدی قان
اگلشدی مجتبی' یره ، مجروح پائیله
بیر آه چکدی سویلدی یارب هارا گیدیم؟
یأس اوز ویرور هارا گیدورم من رجائیله
اَعمانی دوتدی گَتدی جوانانِ هاشمی
ئولدوردولر او یرده قصاص جزائیله
مظلوم امام رجعت ایدوبدور مدینیه
نچّه مجاورِ حرمِ مصطفائیله
ایتدی بهار عمرینی بادِ بلا خزان
پژمرده گلشنین گورن اولموب صفائیله
گلچینِ روزگار ، گُلین ایتدی خاره توش
عمرین یتوردی باشه او شه اِنزوائیله
سولدی سارالدی گل کیمی رخساری گون به گون
غم همدم اولدی وارثِ قُل اِنّمائیله
قانیاش توکردی گوزلری ابرِ بهار تک
قطعِ علاقه قیلمیشیدی ماسوائیله
هجر آتشینده یانمشیدی فکرِ وصلیله
ایستردی خلوت ایلیه بیر دل رُبائیله
قالوا بلی' گونینده بلایه بلی' ویروب
آلسون وصالِ دلبری بیع و شَرائیله
ایستردی جان ویره آلا حقدن متاعِ وصل
عهدِ اَلستینی ویره باشه خدائیله
زهرِ جفا ویروبله اونا نچّه مرتبه
وار بیر خبر گرک یازیلا مبتدائیله
هر وقت کی ویریلدی او مظلومه زهرِ کین
قبرِ رسوله گیتدی امیدِ شفائیله
چون باشه یتممیشدی غمی ، حق ویروب شِفا
عینُ اللهی منوّر ایدوب بیر جلائیله
تا وقت او وقت اولوب که اوزی شاهدِ ازل
محبوبی بزمِ وصله چاقوردی صلائیله
فرصت تاپوبدی بیر گجه جُعده اوز عورتی
خلوت سرایه گلدی خیالِ خطائیله
گوردی سپهرِ حُسنده گویا که گون باتوب
اوز دوره سینده بیر نچه بَدرُالدُّجائیله
گون تک جمالی جلوه لنور رختخوابیده
نصفُ النَّهار اولوب گیجه شمسُ الضُّحائیله
شبنم سالوبدی گل یوزینه قطره قطره تر
آی مرکزین نجوم دوتوب انتهائیله
مه صورت اوسته سایه سالوب زلفِ مشگ سا
مضجع ایدوب مقابله چین و ختائیله
حالی پوزولدی تاپدی دل آینه سی جلا
جوشه گلوب محبّتی بو انجلائیله
فکر ایلدی اورکده کی مقصودی ترک ایده
نفس ، عقله غالب اولدی ، هوای هوائیله
هوای به معنی عشق
نقشِ نگاری لوحِ ضمریندن ایتدی محو
بیگانه لیق رُسومی قویوب آشنائیله
آهسته گوتدی باشنون اوستن سو کوزه سین
بیر قدر زهر ایلدی ممزوج ، مائیله
اوز منزلینه گلدی ، دوروب منتظر گوره
زینب سسی هاچان گله جاخ آه و وائیله
ناگه اویاندی سبطِ نبی خوابِ نازدن
عطشانیدی اورکده اولان اودلی دائیله
آلدی اله سبونی فنا فی اللهِ فنا
لاجرعه چکدی باشینه فکرِ بقائیله
دل یاندی ، پارچالاندی دوداق ، دوغرانوب جگر
دولدوردی جامِ چشمی دُرِ پُر بهائیله
مشغولِ خوابِ نازیدی علیا مکرّمه
یاتمیشدی بختی تک گوزی بختِ قرائیله
گلدی امام سسلدی یاتما آنام باجی
دور ویر صدا صدایه منِ بینوائیله
دوغراندی لبلریم باجی یاندی جگرلریم
یتدی زمانِ وصل ، بابام مرتضائیله
دور ویر خبر حسینیمه ، اولادِ هاشمه
اولسونلا قاره پوش لباسِ عزائیله
اهل و عیالیمی باجی یغ باشیمه منیم
ایلوم وداع آلِ شهِ قُل کفی' ئیله
بیدار اولوبدی عالِمهء بی معلمّه
اولسون انیسِ ناله او نورِ هدائیله
بولمم نه گوردی باشین آچوب گوز یاشین توکوب
داد و فغانی عرشه چیخوب وا اَخائیله
عرض ایلدی ، حسن باجون ئولسون نه وار مگر؟
کیم حالیوی پوزوب ستمِ ناروائیله
فیروزه رنگ اولوبدی عقیقِ لبون ندن؟
ای آمرِ قضا ، نه ویروب یوز بدائیله؟
علّت ندور لبونده دوروب قطره قطره قان؟
آگاه قیل بلالی باجون ما مَضی' ئیله
فرمایش ایتدی زهر ویروبلر یاخوندی من -
قطع ایلیم علاقه بو دارِ فنائیله
زینب خبر ویروبدی بنی هاشم اولدی جمع
فریادِ وا اخائیله وا سِیّدائیله
ایستوب امام روضهء پیغمبره گیده
آز قالدی روح علاقه کسه دورت قوائیله
دهلیزده اوتوردی ، ایاقه دورانمادی
دورین مخدّرات آلوبلار صدائیله
ایتدی ندا آنام باجی بیر طشت حاضر ائت
فورا" گتوردولر او حزین بیر ندائیله
طشتین کنارینه قویوب آهسته اللرین
یوز دوتدی طشته زحمتِ بی منتهائیله
غِیّ عارض اولدی تا نفسین آلدی مجتبی'
بیر حاله قالدی شرحی بولونمز ادائیله
اَمعاءِ بَطنی ، قطعه به قطعه جگرلری
طشته توکولدی هیبتِ زهرِ جغائیله
دولدوردی طشتی ، لختِ جگر ، لخته لخته قان
رفتارِ دُختِ اَشعَثی گور مجتبائیله
یاقوتِ قلب سو کیمی آخدی ، یانوب کَبَد
رنگِ زبرجدی گورونوب کهربائیله
قیتردیلر ایوه سالنوب رختخوابینه
مأنوس اولوب بلالی باشی مُتکّائیله
چون اولدی راست قبلیه ، اول قبلهء زمان
کعبه قرا گییندی صفا و مِنائیله
شمسِ هدایته یاخون اولدی یته زوال
مشغول اولوب وصیّته بیر مه لقائیله
یعنی حسینه ایتدی حسن اوز وصیّتین
دردِ دل ایلدی شهِ گلگون قبائیله
حینِ وصیّتینده آخوب گوز یاشی باتوب نفس
فکرِ مقامِ عالَم عالی فضائیله
یومدی گوزینی ، زینبی گوز یاشلی گورمسون
گیتدی مؤانست قیلا خیرالنّسائیله
جان ویردی اولدی محنتِ هجراندن خلاص
درک ایلدی وصالِ حقی ارتضائیله
غسل و حنوط و کفنینه مشغول اولوب حسین
ملبوس اولوب حسن ، خُلَعِ اصطفائیله
وا مجتبی' سسی اوجالوب اهلِ بیتدن
دولدی مدینه نالهء وا مجتبائیله
زهرا بهشتِ عدنده وا مُهجتا دئدی
لاهوتی سالدی حیرته وا مُهجَتائیله
تعجلیله گوتوردوله یردن جنازه سین
قبرِ رسوله فکرتِ ما یُرتَجائیله
شمشیر اللرینده جوانانِ هاشمی
تشییع قیلدیلار اونی رنج و عِنائیله
بیر یاندا سسلنوردی ابوالفضل وا اَخا
دنیانی آغلادوردی فغان و بُکائیله
قاسم عمامه الده ، جگردن چکردی آه
لرزه سالوردی نُه فلکه وا اَبائیله
سلطانِ نشأتین ، آدی کیمیا حسین
آغلاردی قارداشی حسنه هایهائیله
تابوتی روضیه یتوروبلر بو فکریله
مدفون اولا او روضه ده خیراولوَرائیله
بغضِ نهادی ظاهر ایدوب عایشه گلوب
مانع اولوب او امره نچه بی حیائیله
ایش بیر مقامه یتدی که کافرلر آچدی ال
اول جسمه تیرِ راست و کمانِ دوتائیله
تابوتده جنازیه بند اولدی یتمیش اوخ
دین ادّعاسی ایتدیله عقلِ هبائیله
ایتمیشدی چون وصیّت اوزی توکمسونله قان
دفن اوسته جنگ اولسا گروهِ دغائیله
نقل ایتدیلر بقیعه دوباره جنازه نی
تابوتی قویدولار یره سوزِ خفائیله
بیر بیر جنازه سیندن حسین چکدی اوخلاری
یاندوردی عالَمی بو غمِ بَرملائیله
قارداش جنازه سیندن ایکی یرده اوخ چکوب
رفتار ایدوب بو نوع ایکی دل رُبائیله
بیر بوردا مجتبی' بدنیندن چکوب خدنگ
بیرده بو طرز ایلدی صاحب لوائیله
تاپدی او ساعتی که ابوالفضل پکرین
گلدی نوایه نالهء وا وَحدَتائیله
گوردی خدنگدن پر آچوب دور عقاب تک
اوخلار قویوب پَر الفتی پرسیز هُمائیله
آلدی دیز اوسته باشینی خورشیدِ مشرقین
رأفت بناسی قویدی همان مه لقائیله
بیر بیر یوزیندن ایتدی نچه قانلی اوخ کنار
آغلاتدی حالی دشمنی بو مایُرائیله
آنّیندان ایستدی چیخادا بیر شکسته اوخ
گوردی بویاندی اللری تازه دِمائیله
حمل ایلسون خیامه یارالی جنازه سین
ال ویرمدی نه مرکبیله نه ردائیله
قارداشینی او یرده قویوب گلدی خیمیه
دوتسون عزاسینی حرمِ کبریائیله
اوّل گلوب یتیشدی سالوب خیمه پرده سین
آندیردی قتلین امرِ اشارت نمائیله
ایستورسن ای (حسینی) قیامت گونی نجات
دلدن علاقه باغلا شهِ کربلائیله
یوخ خیر عمل الونده ، اوزون غرقِ معصیت
وار نه سوزون ؟ حساب ایاقیندا خدائیله
گر اولماسا شفیع حسینِ ابنِ فاطمه
هیهات همنشین اولاسان اصفیائیله
پاک اولماسان ، حسین حرمینده یوولماسان
ایسته گوزل مزارینی ، اهلِ عزائیله
اوردا سرشکیله یو ، معاصی دفاترین
گور عکسِ روحی آئینهء حق نمائیله
سرلشگرین گورنده شهنشاهِ نُه قباب
بو دللریله ایتدی علمدارینه خطاب
نجه بو حالیله گورسون سنی گوزوم قارداش
فدا بو قانه باتان پیکره اوزوم قارداش
ایشقلی گون کیمی قانیله صورتون دوتولوب
دونوبدی شامه بو صحراده گوندوزوم قارداش
باشون سنوبدی عمودیله ، قان دولوب گوزیوه
گوروب بو حالتی قانیاش توکر گوزوم قارداش
آچانموسان گوزیوی ، یا حسینه ناز ایدوسن؟
یانیقلی قلبیمی یاندورما وار سوزوم قارداش
ووراندا ال بدنون برگِ گُل کیمی داغیلور
گوروب بو نوعیله جسمون نجه دوزوم قارداش؟
ایویم یخیلدی ، بِلیم سیندی ، سن شهید اولدون
محالدور داخی بیرده گُله یوزوم قارداش
نجه قویوم سنی بو یرده من خیامه گیدیم؟
چتنیندی سن کیمی قارداشدان ال اوزوم قارداش
حرمسراده قیامتدی زینبیم باش آچوب
سنون فراقوه زینب ده یوخ دوزوم قارداش
دالونجا گلملیم آزدی فاصله بو یولا
اجل یتوبدی دوشوب قوّه دن دیزیم قارداش
(حسینی) جدّون حسینون دلنجه یاز بیرده
نجه بو حالیله گورسون سنی گوزوم قارداش.
مرحوم حسینی سعدی زمان
منبع مجموعه کانالهای مدح و مرثیه
با سلام