در ولادت حضرت زینب (س) 5784

در ولادت حضرت زینب (سلام الله)

 

بیله حیالی خانم گلمیوبدی دنیایه

دوباره سالمیاجاخ مثلی اوسته گوی سایه

 

آناسی فاطمه دن درد و محنتی چوخدور

بونون غمی غم اهل جهاندان آرتوخدور

 

یازوبلا حین تولد، بو غم کش ایام

گوزین تکوب قاپویا،  گوز یاشی توکردی مدام

 

کمال لطفیله نواده سین رسول انام

آلوب الینه اوپردی که ایلیه آرام

 

نقدر ایستدی رام ایتسون اولمادی مانوس

علی و فاطمه هم مجتبا اولوب مایوس

 

او دمده منزله قویدی قدم امام حسین

قولاقینه یتشوب زینبین کلام حسین

 

نه گوردیله اوزین ایستور آنا قوجاقندان

آتا یره، اوپه قارداشینون ایاقندان

 

او حالیله که حسین گوردی نازلی زینبینی

عزیز خواهرینین بیلدی عین مطلبینی

 

آچوب ایکی قولونی، سسلدی خانیم باجی گل

یاخوندی آتش غمدن یانا جانیم باجی گل

 

قماط زینبی آلدی او دم الی اوسته

دئدی قولاقنه بیر سوز و لیک آهسته

 

بئله گمان ایدیرم نور دیده یاسین

دئردی خواهرینه کربلا قضایاسین

 

حسین زینبه، زینب حسینه آغلاردی

او آغلاماق دل خیرالنسانی داغلاردی

 

حسینه بو خانمین چوخ محبتی واریدی

محبتینده اورکدن مسرتی واریدی

 

 مرحوم طوری تبریزی

منبع مجموعه کانالهای مدح و مرثیه

در احوالات حضرت زینب (س) 5631

در احوالات حضرت زینب (س)

 

اولان گونونده نشان ویردی عشقیده وَلَهین

ئولنده باغرینا باسدی حسین پیرهنین

 

او پیرهنده نه وار ، ای تمامِ عالمه رب

فقط اوزون بیلوسن بیردع باغریقان زینب

 

اولوبدولا متحیّر او غملی احواله

گلوب سویوندورا پالتالارینی غسّاله

 

خبر ویروبدیله حاضر اولوب او دم تابوت

نظر جنازیه هر کیم ساولوب اولوب مبهوت

 

بدن یانوب قرالوبدور ، بونا ندور علّت

نه قدر غم چکوب آیا بو معدنِ عصمت

 

بولوبدولر که اولار غملی بیر اثر یریدی

بدنده شمر ووران تازیانه لر یریدی

 

گوروبدولر گوگروبدور وجودی سرتا پا

ندور سبب بو گوگرمالقدا آه و وا ویلا

 

بو غملو واقعه نی (طوریا)قوتار یازما

دولان مدینیه گیت راه و جادّه نی آزما.

 

مرحوم طوری تبریزی

منبع مجموعه کانالهای مدح و مرثیه

زبانحال حضرت زینب (س) در خروج از مدینه 5611

زبانحال حضرت زینب (س) سر قبر مادر 

در خروج از مدینه

 

بو رسمدور که مسافر ایدنده عزمِ سفر

آتا آناسینون اوّلده قبری اوسته  گیدر

 

بو رسمه ایتدی عمل زینب اول وفا کانی

گیدوب زیارت ایده دختِ شاهِ بطحانی

 

مُشرّف اولدی گجه قبرِ پاکِ فاطمیه

زبانحالیله دردِ دلین آنایه دیه

 

او عمرینی یتورن باشه مین ملالیله

دیردی دردِ دلین بو زبانحالیله

 

دوشوب بلالی باشیم تازه دن بلایه آنا

مدینه دن گیدورم دشتِ کربلایه آنا

 

اگر چه هر نه بلا وار باشیمدا سن بلوسن

یوخ احتیاجی ویرم شرح ماجرایه آنا

 

حسینویله قیزون زینبون شراکتی وار

گرح اونیله گیدم دشتِ کربلایه آنا

 

اوزیله یتمیش ایکی برگزیده فدیه سی وار

جهانیان اولا قربان بیله فدایه آنا

 

بیری اولاردان ابوالفضلیدور ، بیری قاسم

بیری علیدی که مظهردی مصطفایه آنا

 

علی الخصوص بیری شیره خواره اصغردور

که ارمغان آپارور بزمِ کبریایه آنا

 

دیمه گلایه ایدر زینبیم مصیبتدن

گرگدی قیز دیه دردِ دلین آنایه آنا

 

تذّکر ایلمه سم غصّه مرگ اولوب ئولّم

یتمیشمز اوغلون حسین عینِ مدّعایه آنا

 

حیالی زینبیون امری بیر یره یته جاق

گیده حیاسیز عمر سعده التجایه آنا

 

توقّعیم بودی جدّیم رسوله تسلیه ویر

آلاندا قارداشیمی اشقیا آرایه آنا

 

اولاندا کشمکشیم قتلگهده شمریله

گوزیوی یوم ، نظر ایتمه او بی حیایه آنا

 

سویاندا قیزلاریوی اشقیای کوفه و شام

آتامدا سنده حسنده گلون هرایه آنا

 

یانانندا خیمه لر آل علی قاچاندا چوله

تحمّل ایتمگمیه ال گوتور دعایه آنا

 

وفات ایدنده بویوردون بلایه دوز دوزدوم

بلادن ایلمرم من سنه گلایه آنا

 

ولی نه نوعیله صیر ایلرم زیاد اوغلی

آچاندا نحس دلین کفر ناسزایه آنا

 

کلامِ ناطقِ حق ، باشی نیزه باشیندا

تلاوت ایلیه قرانی آیه آیه آنا

 

چکنده شمرِ ستمگر یزید مجلیسینه

فغانون اوج ایده جاق طاقِ نُه سمایه آنا

 

امید عفویله ((طوری)) منه توسّل ایدوب

اولام شفیعه اونا درگه خدایه آنا.

 

مرحوم طوری

منبع مجموعه کانالهای مدح و مرثیه

خروج از مدینه 5504

خروج از مدینه

 

مورّخین وقایع ، محدّثینِ جهان

حدیثِ کرب و بلانی بیله ایدوبله بیان

 

معاویه که اولوب درکِ اَسفَله واصِل

یتیشدی اوغلی یزیده خلافتِ باطل

 

فلاتِ مملکته یازدی بیر به بیر نامه

که اخذ بیعت اولونسون امیرِ ظُلّامه

 

علی الخصوص ولیده یازوبدی بیر فرمان

پیمبرین ایلسون خانمانینی ویران

 

که یعنی ویرمیه پیغمبر اوغلونا مهلت

امام حقدن آلا ، کفرِ مطلقه بیعت

 

ولید ، ایتماقا شورا چاغوردی مروانی

ارائه ایلدی مروانه عینِ فرمانی

 

او ببحیا دئدی بو سرّی ایتمموش اظهار

ایله حسینیله ابنِ زُبیری سن احضار

 

او دم که ایلدون احضار ، ایله کشفِ مقال

به ضربِ تیغ ، اولاردان یزیده بیعت آل

 

حضورِ زادهء زهرایه گلدی بیر خادم

دئدی امیر دیور گلماقوز اولوب لازم

 

امام عالِمیدی دعوتین ندور سببی

یانینجا گوتدی جوانانِ هاشمی نسبی

 

بویوردی من گیدیرم مجلسه ، ایشکده اولون

سسیم اوجالسا قلج الده بارگاهه دولون

 

ولید مجلسینه داخل اولدی شاهِ انام

به حسبِ شرع ، ایدوب تهنیت ، ولیده امام

 

ولید عرض ایلدی ای عزیزِ پیغمبر

معاویه ایلیوب عالَمِ بقایه سفر

 

یزیده بیعت ایدوب اهلِ شام و مصر و یمن

حجاز و کوفه و بیت المقدّس و ارمن

 

منی یزید ایلیوب بیعت آلماقا مأمور

خصوصا" امر ایلیوب ایلیم سنی مجبور

 

جواب ویردی ولیده عزیزِ ختمِ مآب

جماعت ایچره صباح ایلروخ سوال و جواب

 

خطاب قیلدی ولید ابنِ عتبیه ، مروان

دگول خلافته لایق سنون کیمی نادان

 

حسینی قویما گیده ، محبسه سالوب ساخلا

و یا شهید ایله ، قلبِ پیمبری داغلا

 

بو کلمه نی ایشیدوب نورِ دیدهء زهرا

بویوردی کس سسیوی یابن مِراه الزّرقا

 

منی سن ئولدوره بولمزسن ای خبیث و عنید

اهانت ایلیه بولمز منه ولیدِ پلید

 

علاوه تک دگلم ، ئولمیوب بنی هاشیم

علی الخصوص واریمدی اون آلتی قارداشیم

 

بیله گمان ایلمه بوردا یوخدی انصاریم

واریمدی الّی نفر نوجوان هواداریم

 

تمام الده قلیج مثلِ شیرِ شرزه دلیر

چتیندی ال تاپا شیره شغال و روبهِ پیر

 

هنوز اکبریمون پارچالنمیوب باشی

بویانمیوب قانینا جسم و زلف و گوز یاشی

 

هنوز آت ایاقی آتدا قالمیوب قاسیم

یخیلمیوب یره قولسوز وفالی عبّاسیم

 

بو وقتده که اوجالدی بیر آز صدای حسین

توکولدی صحنه قلج الده اقربای حسین

 

او سطوتیله بنی هاشمی گوروب مروان

دوروب ایاقه ، قاچوب ایلیوب اوزین پنهان

 

امام ایلدی آرام یار و انصارین

چاغیردی خدمتینه کربلا علمدارین

 

بویوردی گیت باجیما ایله ماجرانی بیان

سلامت اولماقیمی بولسون اولماسون نگران

 

گیدنده بزمِ ولیده بیلوردی زینبِ زار

حسینین الّی نفر نامدار یاوری وار

 

بو حالیله گینه دوزمزدی سینه داغلاردی

گوزون تیکوب یولا قارداش دیردی آغلاردی

 

بو یرده خاطریمه دوشدی یومِ عاشورا

ایکیندی وقتی که قالموشدی بو حسین ، تنها

 

نه حالدِیدی او ساعتده زینبِ کبری'

دییردی قارداشی ، هذا وداعی الاُخرا

 

ارائه ایلمیشم منتخبده بو خبری

وداع ایدنده حسین اهلِ بیتِ دربدری

 

بویوردی فضیّه ای خیرة النّسایه کنیز

بو افتخاریله دنیا و آخرتده عزیز

 

فلان محلّیده بیر بوقجا واردی رنگی فلان

اولوب او بوقجادا ملفوف بیر لباس نهان

 

بیر عمده مطلب اولوب بو لباسیده مکتوم

ایدوبدی چون اونی خلّاقِ لم یزل محتوم

 

خلیله ، ناری او پیراهن ایلیوب گلشن

مساسی دیدهء یعقوبی ایلیوب روشن

 

او پیرهن منه میراث انبیادندندی

گرک گییم اونی اسرارِ کبریادَندی

 

باشارسان ایلمه بو امری زینبه اظهار

دیوب آنام اونا بو امریده نه حکمت وار

 

گیینده اوغلوم اونی عمرونون اواخریدور

حضورِ یاره گیدنده لباسِ فاخریدور

 

گیدردی فضّه گتورسون او کهنه پیرهنی

گوروب کنیزی خانم ، لرزیه دوشوب بدنی

 

کنیزی فضیّه فرمایش ایلدی زینب

سنه نه امر ایلدی قارداشیم؟ ندور مطلب؟

 

ادبله عرض ایلدی ، من بیر امره مأمورم

سیزه او  امری بیان ایلماقدا معذورم

 

دئدی قسم ویرورم عصمتِ بتوله سنی

حسینیم امر ایلین سرّه آگه ایله منی

 

وفالی فضّه اولوب بو قضیّه ده ناچار

بلالی زینبه اَسراری ایلدی اظهار

 

بولوب قضیّه نی ، ایوای دیوب اولوب مدهوش

خیالِ مرگیله ریگ اوسته اولدی هم آغوش

 

گلیب حسین خانم زینبون باشی اوسته

باشین گوتوردی دیزی اوسته قویدی آهسته

 

دئدی اگر ایکی اوچ قطره سیزده سو تاپولا

سَپون بونون یوزینه بلکه غشّیدن آیولا

 

جواب ویردیله یا سیّدی تاپولماز سو

حرام ایدوب بیزه مَهریّهء بتولی عدو

 

مؤثر اولدی ز بسکه امامه بو احوال

بسانِ چشمه گوزوندن آخوب سرشکِ زلال

 

توکولدی قارداشین اشکِ تری باجی یوزینه

باجی آچوب گوزینی باخدی قارداش گوزونه

 

دوروب اوتوردی دئدی ای شقیقهء روحیم

محیطِ غمده اولان فُلکِ صبریمه نوحیم

 

او آغلیان گوزون اولسون باجون فداسی حسین

گلِیدی کاش منه باشوین بلاسی حسین

 

بویوردی باجی بو بیر امردور محتوم

گرک باشیم کسیله ، تشنه لب اولام مظلوم.

 

مرحوم طوری

منبع مجموعه کانالهای مدح و مرثیه

مناجات در قتلگاه 4017

مناجات در قتلگاه

 

من ایلدیقیم عهده وفا ایتدیم الهی

ایتدوقجا وفا حمد و ثنا ایتدیم الهی

 

اسلامیده گوردوم پوزولوب رونقِ اسلام

قتلِ حقه ناحق یره ایلوبدوله اقدام

میقات ایلدیم ، کعبه ایوین ، باغلادیم احرام

مین سعیله بو یرده صفا ایتدیم الهی

 

گوردوم داغیلوب مُصحَفِ حق آیه به آیه

ذبح آیه سی کشف اولمیاجاق اهلِ ولایه

بیر شرحِ عظیمیله یتیشدیم بو منایه

تفسیرِ فَدَینانی ادا ایتدیم الهی

 

بولدوم نقدر باش ایلسه جسمه علاقه

یتنمز باشا هجر عالَمی ، وصل ایتمز اِفاقه

تدبیر ایلیوب دوشدوم اوزوم بیله سیاقه

جسمیمدن اودور باشی جُدا ایتدیم الهی

 

الفت ایلدیم روزِ ازلده قَدَریله

اول الفتیمی باشه یتوردوم بو سریله

گلدیم بو منای حقه یتمیش نفریله

بو یر بو منا اوسته فدا ایتدیم الهی

 

ای عالِم اولان عالَمِ معناده بو رازه

ای رازِ وفانی یتورن اهلِ نیازه

سن شاهد اول ایندی بو نیازیله نمازه

امّتلری من بوردا دعا ایتدیم الهی

 

بو سو تک آخان قاندا الهی جریانَم

قان صاحبی سنسن ، من اوزومده سنه قانم

بو حالیده امّت طرفیندن نگرانم

ویر مژدهء غفران که عطا ایتدیم ، الهی

 

هر چند بو ساعت منیم آخر نفسیمدور

دشمن منه آغلار ، منیم امّا هوسیمدور

از بس هوسیم وار دیمرم یاره بسیمدور

دگدوقجا یارا ، یاره رضا ایتدیم الهی

 

(طوری) یتوروب بسکه منه صدقِ ارادت

آغلار گجه گوندوز نقدر تاپسا فراغت

منظوری زیارتدی قیامتده شفاعت

دوزخدن اونی منده رها ایتدیم الهی.

 

مرحوم کربلایی حسین طوری

منبع مجموعه کانالهای مدح و مرثیه

در احوالات حضرت علی (ع) 1601

در احوالات حضرت علی (ع)

 

دیارِ کوفه ده باشدان علی قلجلاندی

جهاندا آلِ علینون بلاسی باشلاندی

 

اولیدی کاش او دم ابنِ مُلجمین الی شل

که چکدی مُصحفِ عظمایه قانیله جدول

 

او بی حیا که قدم قویدی قربِ محرابه

بو قصدیله وورا شمشیر قطب الاَقطابه

 

سارالدی چهرهء اسلام ، رنگِ دین قاچدی

ملکلر آغلادی ، روح الامین باشین آچدی

 

بهشتِ عدنده زهرا دئدی عم اوغلوم وای

پیمبرین اورگی ضعف ایدوب دئدی ایوای

 

باخاندا یر یوزینه ساکنانِ عرشِ عظیم

بیری بیرینه دئدی وای شریعت اولدی یتیم

 

ایدنده قامتینی راست ، زادهء ملجم

ضلالتین عَلمی آچدی عالمه پرچم

 

علی باشیندان او ملعون ووران زمان شمشیر

بلی' قضایه دئدی ، تاپمادی قدر تغییر

 

یخیلدی شیرِ خدا توپراقا یوزی اوسته

بویوردی فُزتُ و ربّ امامِ دلخسته

 

دوشوب تزلزله یر ، ایتدی لرزه عرشِ برین

یریله گوگ آراسیندا دایاندی روح الامین

 

اوجا سسیله دئدی اولدی نورِ حق خاموش

ابی تراب ترابیله اولدی هم آغوش

 

صدای روح الامین سالدی عالمه شیون

علی الخصوص ایشیدوب بو سسی حسین و حسن

 

گلوب او دم حسنِینون حضورینه زینب

سلام ایدوب ایکی قارداشینا او کانِ ادب

 

دئدی دورون آنام اوغلی گورون باشوزدا نه وار

صدا گلور که باتوب قانه حیدرِ کرّار

 

شتابیله او ایکی نورِ چشمِ پیغمبر

یتیشدی گوردی باتوب قانه صاحبِ منبر

 

ایدوبله نیّرِ چرخِ امامتی هاله

بیری بیریله ایکی قارداش اولدی هم ناله

 

دوباره مسجدی دولدوردی ناله و افغان

هامی او ناله گَلَن سمته اولدولار نگران

 

نه گوردیلر گلور عبّاس شیرِ یزدان تک

دییر غریب آقا وای آغلار ابرِ نیسان تک

 

یتیشدی گوردی قزیل قانیله دولوب محراب

آتا یارالی دوشوب ، دوره سین آلوب اصحاب

 

یارالی پادشهین صاق صولون آلوب حسنِین

خسوف اولان آیا ، گویا قِران اولوب سَعدِین

 

گوروب او حالی ابوالفضل سسلدی ای وای

اولان محاسینی قاندان خضاب وای بابا وای

 

او وقته حاله گلوب ، عینی عینُ الله

گوزی ساتاشدی ابوالفضله چکدی دلدن آه

 

دئدی اوغول منه آز آغلا قلبیمی داغلا

دَمیر عمود ایلین خورد باشوا آغلا

 

منیم یارالی باشیمدا واریمدی بیر یاره

سنی یخوب یره قولسوز ، ایدلّه صدپاره

 

سنه او قدر وورار یاره قومِ سفیانی

جنازه ن حملینه اولماز حسینون امکانی

 

یوبانمیون منی محرابدن دورون گُتورون

گوزی یولومدا قالان اهلِ بیتیمه یتورون

 

نه نوعی گتدیله شرح و بیانی یوخ الده

عبارتِ حَمَلوهُ یازوبلا مقتلده

 

حرمسرایه دوشنده شعاعِ نورِ امام

حریمِ عصمت ایچینده قیامت ایتدی قیام

 

نه حاله قالدی او حالتده غم چکن زینب

زمانه ده یوزی بیر لحظه گُلمین زینب

 

آتاسنون سارالان رنگینه ساتاشدی گوزی

گوزیندن آخدی یوزه خونِ دل سارالدی یوزی

 

او وضعِ حالی گوروب ابنِ ملجمِ کافر

دئدی علی قیزی حقّیندی آغلاسان نه قدر

 

بویوردی زینب او ملعونه چوخ واریمدی رجا

آتام علی یاراسی چوخ تئز التیام تاپا

 

و لیک سن ایکی دنیاده روسیاه اولاسان

سنه قصاص ایده قارداشلاریم تباه اولاسان

 

شقاوتین ایلدی آشکار او تخمِ زنا

تمام سوزلرینی یازماقا واریمدی حیا

 

دئدی علی باشینا وردیقیم او بیر ضربت

یر اهلینه اولونا بیر به بیر اگر قسمت

 

بونی یقین ایله سن جمله سی اولور فانی

نه نوعی واردی علینون دیریلماق امکانی

 

مجسّم ایلیه هر کیم بو وضعِ احوالی

بصیرتیله گورر زینبی نولوب حالی

 

معاینه ایلینده علی باشین جرّاح

ایشتموسوز نجه نومید اولوب او کنزِ فلاح

 

بو بارده ایدورم اوز عقیده می اظهار

گرک بو خانیما آغلیانلار آغلیالار

 

دلیل بو سوزیمه حجّتِ خدا سوزیدور

بونین مصیبتینه آغلیان علی اوزیدور

 

ویرنده جان ایلیوب زینبین یوزینه نگاه

بویوردی اشهد ان لا اله الا الله...

 

مرحوم طوری

منبع مجموعه کانالهای مدح و مرثیه

احوالات حضرت زینب کبری (س) 1226

احوالات حضرت زینب کبری (سلام الله)

 

مدت عمرینده چوخ یر اولدی مسکن زینبه

بلمدوخ اولدی هارا آخرده مدفن زینبه

 

اول عمرینده یثربده بوبانوی عفاف

قبرزهرانی ائدردی هرگجه گوندوز طواف

گاه اولوردی قبر پیغمبر بوخاتونه مطاف

گه بتولین بیت الحزانی نشیمن زینبه

 

ایله بیر بانوئیدی بوعصمت پروردگار

هرکیمون حالین سوروشسیدی ائدردی افتخار

بیله بیرخاتونی یثربدن آیردی روزگار

وئردی بیر مدت بیابانلاردا میهن زینبه

 

ایلیوبدور حق تعالی کعبه نی دارالامان

امنده قالسون ائدن اول مامن خلقی مکان

مامنه اولدی پناهنده اوبانوی جهان

اولمادی دارلامان صد حیف مامن زینبه

 

عرصه نی از بسکه تنگ ائتدی حسینه اهل شام

قویمادی پیغمبر اوغلی ائتسون اعمالین تمام

سیندیریب احرامینی ناقص قویوب حجین امام

کربلا صحراسین ائتدی دشت ایمن زینبه

 

عزتیله وارد اولدی کربلا صحراسینه

ناز ائدردی گه حسینه گه رشید عباسینه

گون دولاندی تاحسینون یتدی عاشوراسینه

لیل تاراولدی ایشیق گوندوز مبرهن زینبه

 

دورت طرفدن جمع اولوردی کربلایه اهل کین

شاه دین دورون آلوردی اشقیا مثل نگین

ازدحام دشمنی گوردوقجا بوعصمت مکین

عرض ائدردی بار الها رحم ایله سن زینبه

 

هرطرفدی کربلایه یوز قویوب لشگر گلور

بیر حسینمدن اوتور بیر بیله کین پرور گلور

هرگلن الده قلج اوخ نیزه وخنجر گلور

گوئیا سن وئرموسن بیر قلب آهن زینبه

 

من نجه تاب ایلرم ال آچسالار قارداشیمه

قارداشیم اولسه اگر نه کول سوورام باشیمه

واردی حقیم قلبمون قانین قاتام گوز یاشیمه

آغلیا لاهوتیان قدوسیان من زینبه

 

بوتخیل عالمنده ئیدی دوزنموردی ولی

بلمورم دوزدی نجه تاب ایلدی دخت علی

گوردی قارداشی حسینون نه باشی وار نه الی

تازیانه الده ایلور حمله دشمن زینبه

 

اوزلیقیدان چخدی گوردی غارت اولدی خیمه گاه

دورده دشمن اوزی یالقوز تاپولمور دادخواه

اللری باشدا آپاردی قارداشا بیر باش پناه

وئردی یوز بی اختیار افغان وشیون زینبه

 

بیر چوخور یرده یتوب گوردی گل زهرا سولوب

وای حسینیم وای دیوب آشفته وحیران اولوب

گوردی قارداش مصرعی آلات حربیله دولوب

ایلیوب دشمن تهیه یاخشی مخزن زینبه

 

سینه وپیکر اولوب صدپاره خندان گل کیمی

هر طرفدن باش باشا اوخلار چاتوب سنبل کیمی

عطر گل مهوش ائدوب شوره گلوب بلبل کیمی

عرض ائدوب یاتما اویان ای جسمی گلشن زینبه

 

ای آنام اوغلی شریکوخ بیز بوپوزقون گلشنه

وقت قسمتده یتوبدور قرمزی گللر سنه

یاسلیام گوردی قضا لایقدی نیلوفر منه

قمچیدن تقدیر ائدوب بیر دسته سوسن زینبه

 

ایلدی تاراج جسمون گلشنین بوقوم کین

قویمادی بی رحم گلچین زینب اولسون خوشه چین

ساچلارین یولدی حیالی قیزلاری ای شاه دین

وئردیلر ترتیب بو گلشنده خرمن زینبه

 

قویمادی اعدا کسلسون آه و زاری زینبون

کوفیه قول باغلی یولاندی قطاری زینبون

بختی تک تار اولدی گوزده روزگاری زینبون

کوفه بازارینده مسکن اولدی برزن زینبه

 

کوفه ظلمین تک به تک گوردی اوبانوی حجاز

ایستدی تحصیل ائده تکمیل صبره امتیاز

گیتدی شامه شامده اولدی اونا بیر پیشواز

آغلیاندا وئردی سس رقاص وکف زن زینبه

 

صبحدن شامه دولاندی شامی بوینوندا طناب

غارته گتمیشدی معجر سانما قالدی بی حجاب

ابر زلفندن توکوب مه صورته مشکین نقاب

نیزده اون یدی یردن گلدی احسن زینبه

 

شامده بیر بزم عشرت ایلدی چیده یزید

زینبون بوفکریله درددلین ائتسین مزید

خیزران گنجینه ی سر حقه سالدی کلید

اولدی اول گنجینه دن بیر سر روشن زینبه

 

بیر ایله مجلسده اصلا ائتمدی بیر ذره باک

باشلادی شیر خدا تک بیر خطاب خشمناک

سسلدی ویرما بوباش بسدور اولودور چاک چاک

عالمی تنگ ایلمه چون سم سوزن زینبه

 

ناقه ی صبری خانم ظاهرده گرچه پیلدی

باطنا الله بلور ترویج دینه نیلدی

کفرینی هند جگر خوار اوغلونون فاش ایلدی

قوت قلب آرتوروب خلاق ذوالمن زینبه

 

بزم شربین گوردی ظلمین گوهر درج بتول

چخدی مجلسدن پریشان حال محزون وملول

ایلدی ویرانه ده گوزیاشلی اجلال نزول

آلتی آی ویرانه ی شام اولدی مسکن زینبه

 

عترت خیرالوری ویرانه ده ائتدی مکان

هاشمیاته اولوب مونس گیجه گوندوز فغان

آج قالوب قول باغلو توپراق اوسته بیر قیز وئردی جان

کنج ویران اولدی زندان صبره معدن زینبه

 

قورتولوب آخر غزالان حرم اول دامدن

آلدیلار مهلت هره اوز عمریجه ایامدن

عزتی الدن گئدن زینب قیتدی شامدن

کربلا دشتی دوباره اولدی موطن زینبه

 

دولدوروب خون دلیله دیده ی چون ابرینی

شوق وصل یار آلوب الدن قرار و صبرینی

جان کیمی آغوشه باسمشدی حسینون قبرینی

اولدی انوار سعادت پرتو افکن زینبه

 

باش یارالی پیکری نیلی ایاقلار آبله

قبرزهرایه آپاردی الده زادو راحله

رسمدور ایلر آنایه قیز مصیبتدن گله

بوقضیه اولدی بیر برهان متقن زینبه

 

چوخ منال ومال آپارمیشدی اوبانوی محن

کربلا دشتنده غارت ائتدی اشرار زمن

شامدن گتدی ولی بیر دورت مین اوخلی پیرهن

سینه ده اولدی اولونجه مرهم تن زینبه

 

قویمادی آسوده دل دور فلک دوتسون عزا

قتل وغارت یثربی ائتدی دوباره اشقیا

مسقط الراسین ائدوب ترک اول بلایه مبتلا

هر طرفدن وئردی مین غم یوز غم اوستن زینبه

 

غم توکولدی اوستینه هرلحضه مانند تگرگ

چوللره دوشدی نهال عمری توکدی شاخ وبرگ

(شام) یا(مصر)و(یمنده) اولدین آخر غصه مرگ

اولمیوب تا حال بیرمدفن معین زینبه

 

اون ایکی شور حسینیله اولان سرگرم غم

(طوری) و(صحاف)و(سعدی زمانه)وئردی غم

ایلسون بو اوچ نفر صدقیله بیر نوحه رقم

غم حشم محنت خدم اندوه توسن زینبه

 

زینبه وئروخ قسم ای خالق ارض سما

بوگلن ایل سن بیزه ویر بیر برات کربلا

چوخ گنهکاروق اگرچه ایتمیشوق بیحد خطا

گیچ خطا میزدن بغشله بیزلری سن زیبنه

 

 مرحومین طوری و صحاف و حسینی سعدی زمان

منبع مجموعه کانالهای مدح و مرثیه

زبانحال حضرت سکینه (س) در راه شام 921

 زبانحال حضرت سکینه (سلام الله)

در راه شام

 

باجیوی شامه علی گرچه بو زنجیر آپارور

جذبه ی عشق چکر، زلف گره گیر آپارور

 

ایستدی قدرتینی گوستره خلّاق ازل

ایلدی سلسله ی هاشمی خلقتده گوزل

سنیدون جدّیوه بو سلسله ده مثل و بدل

عشقیوه سلسله بندم منی تصویر آپارور

 

مکتب غمده وفا درسینی مشق ایلمیشم

لوح حسنونده باخوب خطیوه عشق ایلمیشم

مشق تحصیله دوشوب عزم دمشق ایلمیشم

خِطّه ی شامه منی اول خط تحریر آپارور

 

عالم ذرّیده ارواحه یتن دمده خطاب

روح لر اولدولا بی روح حسین ویردی جواب

اولدی تقدیر مقدّر، یازیلوب امّ کتاب

نیزه باشینده آتام باشین او تقدیر آپارور

 

سالدی عشق عالمی عالمده بلایه باشیوی

گتدی عنوان بیله مصداق منایه باشیوی

سربلند ایلماقا ووردی جدایه باشیوی

حق باشون مجلس ناحقّه او تدبیر آپارور

 

نیزه باشیندا او بیر باش که اَنَا الحق دانیشور

حقّی اثبات ایلیوب حقّیده مطلق دانیشور

فعل ماضینی مُضارعده محقّق دانیشور

امر مجهولی کتاب اهلینه تفسیر آپارور

 

کربلایه منی گتدون سن علی عزّتیله

شوکت و جاه و جلال و خدم و خدمتیله

ایمدی سرّی ندی بس سن باخوسان ذلّتیله

قولی باغلی منی بو شمر خداگیر آپارور

 

نرگس مستون عجب ایلدی مستانه منی

ایتدی مجنون کیمی سرگشته و دیوانه منی

گوز تیکوبدور یولوما گوزلوری ویرانه منی

منی معمار قدر ایتماقا تعمیر آپارور

 

بلبل عشقم علی ایمدی چمن سیزلمیشم

گلیمه یتمور الیم، سرو و سمن سیزلمیشم

اگ باشون نیزه دن آخِر علی سن سیزلمیشم

گور بو بیر کلمه نه اندازه ده تقریر آپارور

 

بو گوزون یاشی که طوری گوروسن شوردی بو

سالما گوزدن اونی، اهل نظره نوردی بو

یوزه جاری ایله، محشر گونی منظوردی بو

نیکبخت اوردا اودور گوزیاشین اکسیر آپارور

 

 مرحوم طوری 

منبع مجموعه کانالهای مدح و مرثیه

زبانحال حضرت سکینه (س) به راس حضرت علی اکبر (ع) 920

 زبانحال حضرت سکینه (سلام الله) به

راس حضرت علی اکبر (علیه السلام)

 

گرچه غم عشقون سالوب بو باجیوی دلدن علی

سالماز مبارک اسمیویبیر آن باجون دلدن علی

 

مدّتدی شمع حسنیوه پروانه ی عشق اولموشام

اول نرگس مستون کیمی مستانه ی عشق اولموشام

آخِر گورورسن سن اوزون دیوانه ی عشق اولموشام

ویر بوینوما زنجیر ایدوم بیر تار او کاکلدن علی

 

توکمه قرا زلفون یوزه ایتمه پریشان گوگلومی

زلف سیاه اوسته علی قیلما قزل قان گوگلومی

زلفون یوزوندن ردّ ایدوب شاد ایله بیر آن گوگلومی

بیله اوساندورما باجون بو ناتوان دلدن علی

 

هردم توکر باد صبا زلفون یوزه سنبل کیمی

آشفته حال اولّام علی سولّام سارالّام گل کیمی

شوره گلور گوگلوم قوشی چک چک وورا بلبل کیمی

بیر آن گوتورمز گوز گوگل مرغی او سنبلدن علی

 

تاپشور صبایه دگمسون ا... رضاسی زلفیوه

گوگلوم تیکوب گوز ای گوزوم نور و ضیاسی زلفیوه

قورخوم بودور دگسون صبا یتسون جفاسی زلفیوه

روحیم بدندن آیریلور آیریلسا تل تلدن علی

 

عاشق گرک عشقین یولون طیّ مراحل ایلیه

امّید وصلی لُجّه ی هجرانه ساحل ایلیه

آخِر گیچه جاندان، اوزین جانانه واصل ایلیه

واردی منیمده مطلبیم طیّ مراحلدن علی

 

بزم محبّت، مجلس خلوت، یاتوب اهل مجاز

دوشمز بیله فرصت اله، گل ایلیاخ راز و نیاز

قان اولدی باغریم غنچه تک، دیندیر منی چوخ ایتمه ناز

ناز ایلماخ وقتی دگل، فرصت گیدر الدن علی

 

لوح ضمیریمده چکوب نقّاش قدرت نقشیوی

کلک خیالیله قیلوب چوخ طرفه زینت نقشیوی

دلده مجسّم ایلرم ای ماه طلعت نقشیوی

آلّام وصالون فیضینی شکل و شمایلدن علی

 

دنیاده یوخدی منی کیمی حسرت قالان یار آیریسی

اولدوم منی بیچاره بو عالمده دلدار آیریسی

بیر بلبل شوریده ام مدّتدی گلزار آیریسی

گور بلبلون حالی نولور آیری دوشه گلدن علی

 

سندنصورا قارداش علی دنیاده هر آن آغلارام

قورتولسا گوزیاشیم اگر باشه ووروب قان آغلارام

صبح آغلارام، شام آغلارام، تا جاندا وار جان آغلارام

گوزیاشلی جان ویرّم قوری یرده بو نسگلدن علی

 

طوری دوشوب گرچه ایشون بو شهر ایچینده مشکله

صبر ایله دلتنگ اولما چوخ ایله بلایه حوصله

آغلا صمیم قلبیله، صدقیله آل خامه اله

یاز یا امیرالمومنین قورتار بو مشکلدن علی

 

مرحوم طوری

منبع مجموعه کانالهای مدح و مرثیه

احوالات روز عاشورا 883

احوالات روز عاشورا

 

بوگونده انس و جان آغلارحسینه

بو گونده خلق قان آغلار حسینه

 

عزا خانه ایدوب عرش برینی

خدا- کون ومکان آغلار حسینه

 

قدیم و حادث و ایام و سرمد

جهان و دهر و آن آغلار حسینه

 

جمادات و نباتات اوزدلینجه

اولوب نوحه کنان آغلار حسینه

 

گیومدی خلق نیلی رنگ جامه

اولوب قدی کمان آغلار حسینه

 

پیمبرلر ملکلربیربیرینه

اولوبدورروضه خوان آغلار حسینه

 

گلوب افغانه اون سکزمین عالم

زمان آغلار مکان آغلار حسینه

 

دینده جبرئیل ایوای آقام وای

هامی لاهوتیان آغلارحسینه

 

شریعت سسلنور وای صاحبیم وای

چکر اسلام امان آغلار حسینه

 

دیر ایوای حسینیم وای اوغول وای

پیمبر هرزمان آغلار حسینه

 

آچوب ضربتلنن باشین نجفده

امیرالمومنان آغلار حسینه

 

قاپوسی باغلانان خاتون محشر

ایدوب اشکین روان آغلارحسینه

 

تجلی ایلین او-محو اولان بو

ویرنده امتحان آغلارحسینه

 

یخاندا ذوالجناح استن یراسته

اوزی آتدان یخان آغلار حسینه

 

علی اصغربوغازی اوخلاناندا

آتان تیری کمان آغلار حسینه

 

ووراندا ظلمیله اود خیمگاهه

او بی دین کوفیان آغلارحسینه

 

دیر(طوری) گیجه گوندوز حسین وای

نهان آغلار عیان آغلار حسینه

 

مرحوم طوری تبریزی

منبع کانال گنجینه گذشتگان

خروج از مدینه 576

خروج از مدینه

 

گلستان رسالتدن نچه دسته گل آیریلدی

قونوب هر بیرگل اوسته بیرایکی اوچ بلبل آیریلدی

 

پیمبردن پیمبر اوغلی تکلیفین سئوال ایتدی

بیلوب تکلیفینی مسئول ایویندن سائل آیریلدی

 

جهاندا مدت عمرونده خوش گون گورمین زینب

آنا قبریندن حسرتله اورکده نسگل آیریلدی

 

قبائلدن اولوب دوت مین نفر همره حسینیله

وطندن وصل جانانه اولانلار بیرایل آیریلدی

 

حرملرهودج ایچره آل هاشم مرکب اوستونده

حجاز عزمیله یثربدن ایگرمی محمل آیریلدی

 

اوتوز بیرکوکب مسعود تابانیله بیتیندن

اولان مصداق والشّمسه چوبدر کامل آیریلدی

 

پناهنده اولوب دارالامانه مأمن عالم

ایله تا امن اولوب اعمال حجدن عامل آیریلدی

 

ایدوب طی مراحل مصرع موعودینه یتدی

او مصرع کیم هامی یردن بو امره قابل آیریلدی

 

او گونکه منزل ایتدی کربلاده کربلا شاهی

اوشاهه کوفه اهلیندن اوتوز مین قاتل آیریلدی

 

وفا قربانگهنده قابلیّت ایتمگه اظهار

نچه مین رحمسیز قابیل تک بیر هابیل آیریلدی

 

دیلینده چوخ مجاز اهلی ویراردی دم حقیقتدن

ویرنده امتحان یتمیش ایکی اهل دل آیریلدی

 

حصول مطلبین منظور ایدنلراوزحیاتینده

گیدوب امّا نهال عمردن بی حاصل آیریلدی

 

اولار کیم گلمیوب گلمز وفاده مثلی دنیایه

بساط عشقیده جمع اولدی بسط شامل آیریلدی

 

سچیلدی باشیله جاندان گچنلر گیچمینلردن

قالان قالدی گیدنلرگیتدی حقدن باطل آیریلدی

 

ایله ممتاز اولان اصحاب ایچیندن بیرق حقه

ابوالفضل وفاپرور سچیلدی حاصل آیریلدی

 

نسیم آه لیلی گلستان حُسن اکبرده

ایدنده شانه زلفین اسدی گلدن بلبل آیریلدی

 

حقین حقّین محقق ایتماقا اصغر آناسیندان

بوغازی اوخلانوب اولسون چو مرغ بسمل آیریلدی

 

الی اوسته آلاندا اصغری شه فوج لشگردن

فنون رزمیده دارا اولان بیر قاتل آیریلدی

 

قالان دشمن الینده بی پناه اهل و عیالیندن

کومکسیز شاه آیریلدی ولی چوخ مشکل آیریلدی

 

شه دریا دل اطرافین حرم دوتموشدی ساحل تک

تعجّبدور نجه دریای غمدن ساحل آیریلدی

 

حیاتیندن حیات عالمه علت اولان ناخوش

امیدین کسدی تا تاپسون شفای عاجل آیریلدی

 

ره جاناندا جان بذل ایلینلردن شه مظلوم

مقام کبریایه نمرۀ اوّل باذل آیریلدی

 

بقای یاره قلبینده مهیّا ایتدیگی یردن

مرامیله اولوب همراه صاحب منزل آیریلدی

 

امان اول وقتیدن زینب حسینی گون قباقینده

تاپوپ صدچاک وعریان تاپمادی بیرحایل آیریلدی

 

امامه اولمادی ممکن امامی باغرینا باسسون

موانع اولدی ضعف و هم طناب و هم غل آیریلدی

 

اونی من بولمورم ظلّام آیردی تازیانیلن

ویا اوز اختیاریله امام عادل آیریلدی

 

عزا بزمینده ( طوری ) اهل عشقه ایتماقا القا

حدیث غم فزای کربلانی قائل آیریلدی

 

مرحوم طوری

شجاعت شاهزاده حضرت علی اکبر (ع) 464

 شاهزاده حضرت علی اکبر (علیه السلام)

 

بو جوان کیمدورالهی یکّه و تنها گلور

مرد مردانه بیله میدانه بی‌پروا گلور

 

حاش‌لِلّه اولمیوب اولماز بشرده بوجمال

محو اولور نور جمالیندن بونون عقل و خیال

گوستروب خلقه بونیله اوز جلالین ذوالجلال

آیۀ حُسن المآبه احسن و طوبی گلور

 

اوج ایدر عرشه یوزوندن لَمعه لَمعه نور حق

آیۀ نوره حقیقتده بودور منظور حق

یا گلوب واد مقدّسده ظهوره طور حق

طور سینایه مناجاته چخوب موسی گلور

 

بیز بوگون دوتدوخ حسینه عرصه‌نی بیر نوع تنگ

ایلدوخ کرب و بلا دشتین قزل قانیله رنگ

مطلقا دوردومجی گُویدن ایلیوبدور عزم جنگ

ایتماقا نصرت حسینه حضرت عیسی گلور

 

یا ایدوب رجعت بوگون دنیایه ختم الانبیا

ایلیه اوغلی حسینه کربلاده جان فدا

تاج سبحانَ الّذی اَسری باشندا مصطفی

آیۀ اجری ایده تفسیر ذی‌القربی گلور

 

هاشمیلرده اگر چه حُسن چوخ تکمیل‌دور

بیر به بیر انوار حقّه مرکز تأویل دور

بو جوان آیا یوزوان دورت سوریه تنزیل دور

قلب قرآن مُبین یاسینیله طاها گلور

 

مصحف خطّنده قرآن خط بخط تحریردور

«کاف‌ ها یا عین صاده» مصدر تفسیردور

مین دلیلیله وجودی آیۀ تطهیردور

سورۀ «والشَّمسه» تحت اللّفظده معنی گلور

 

گوردی سعد اوغلی قوشوندا وار بیراؤزگه انقلاب

رعشیه دوشدی وجودی قلبی دوتدی اضطراب

ایلدی اول بی‌حیا قومه بو نوعیله خطاب

ایمدی ایش ایشدن گچوب عقبا گیدوب دنیا گلور

 

‌اشتباهه دوشمیون ای قوم بی موسی دگل

گلمیوب دوردومجی گؤیدن حضرت عیسی دگل

شبه دور پیغمبره یاسینیله طاها دگل

وارث رَفرَف سوار لَیلَۀ‌الاسری گلور

 

ایجماعت نورچشم مصطفی اکبردی بو

حُسن صورتده رسول‌اللهه چوخ بنزردی بو

خَلقده هم خُلقده منطقده پیغمبردی بو

تشنه‌لب اوغلی حسینون عزم ایدوب دعوا گلور

 

سیزده دعوایه آچون اَل ایلیون جنگِ عظیم

اُمَّهاتِ اربعه اولسون بو دعوایه عقیم

پاره‌پاره دوغریون جسمین اَیا قوم جَهیم

باش آچوب زینب دیسون لیلایه واویلا گلور

 

قامت موزونی بنزر آهه لفظ عامیله

آهی تشبیه ایلیو حرف اِلاهه لامیله

لام عبارت ذوالفقاریندندی بیله نامیله

باشدا تشدید اولسا عین‌الله اولور پیدا گلور 

 

 مرحوم طوری 

منبع مجموعه کانالهای مدح و مرثیه