احوالات حضرت علی اکبر (ع)
سالوب یولا شهِ دین شاهزاده اکبرینی
باخوب دالنجا توکوب اشکِ دیدهء ترینی
بیله بولوردی اونون مایهء فتوحی گیدر
کسوب او جانِ جهاندان علاقه ، روحی گیدر
غرض او نورِ دلِ پادشاهِ کرب و بلا
یتوردی مرکزِ میدانه باشلادی دعوا
او نوجوانِ هنر پیشه ، ایله ایلدی جنگ
دوتوبدی عرصه نی شامات و کوفه اهلنه تنگ
عراق دشتینی شورِ حجاز دولدوردی
رشادتیله مخالفلره قلج ووردی
ز بس قلج ویروب اول بندِ عشقه وابسته
داخی یورولدی دوشوب حالدن اولوب خسته
عطش هجوم ایلیوب ، یادگارِ شاهِ نجف
عنانِ توسنی دوندردی خیمه گاهه طرف
حرمسرادن او دم اخترانِ برجِ ادب
سکینه فاطمه کلثوم ، ناتوان زینب
شکسته بال سراسیمه و پریشانحال
علیّ اکبری جمعا" ایدوبله استقبال
احاطه ایتدیلر اطرافنی عقاب اوسته
زنانِ خونجگر و دخترانِ دلخسته
کیمی اوپردی الندن کیمی ایاقیندن
کیمی اوغول دیوب آغلاردی اشتیاقندن
کیمی قاچوب آتنون بوینونی قوجاقلاردی
کیمی یوزینه باخوب زار زار آغلاردی
چو قلبِ دایره دن چیخدی مرکزِ پرگار
به عزمِ فیضِ ملاقات سیّد ابرار
حضورِ شاهِ فلک بارگاهه قیلدی خرام
اولوب پیاده آتندان ، ادبله ویردی سلام
که ای شهنشهِ گردون مدار یا ابتا
ولیّ حضرتِ پروردگار یا ابتا
هوانین ایسّی لیقی ، تشنه لوق ، بو ثِقلِ حَدید
سالوب مشقّته قیلدی فکار یا ابتا
اورک یانور ، اورگیم اودلانور حرارتدن
علاج قیل منی ایله خلاص شدّتدن
بو سوزشِ دله قیل چاره ای امامِ زمان
ایدر بو مشگلی مشگل گشا علی آسان
دوشن زمان نظری اکبرین جمالینه
نجه جمال سالوب جدّینی خیالینه
آلوب سلامینی ویردی جواب یا ولدی
بو قدر ایتمه منی دلکباب یا ولدی
گراندی چوخ منه ، مندن گلوب سو ایستمه قاقون
میّسر اولمیه بیر جرعه آب یا ولدی
مِیِ طهوریله جدّون سنی ایدر سیراب
بیر آز زمان عطشه ایله تاب یا ولدی
چکوب کناره گُلین سالدی بوینونا قولونی
اوپوب دوداقینی گوستردی کوثرین یولونی
زلالِ عشقی ایچوب چشمهء ولایتدن
آچیلدی قلبینه مین چشمه بحرِ رحمتدن
قیلوب چو رفعِ عطش ، شدّت ایلیوب عطشی
ز بسکه مست اولوب بادهء محبّتدن
غذای روحِ مجرّد ، قوامِ جانِ لطیف
حصول ایلدی عین البقای رحمتدن
حیاتِ تازه عطا قیلدی ، لعلِ جان بخشی
حیارتِ عاریه دن ال چکوب او بابتدن
ایدوب لسانینی سیراب چون لسان الله
رموزِ عشقده آگاه اولوب حقیقتدن
وداعِ جسمین ایدوب جانی ، قالبیندن روح
کسوب علاقه که چیخسون لباسِ کثرتدن
قُوای خَمسه ایدوب طیّ عالَمِ جسمی
آلوب سراغ چو خلوت سرای وحدتدن
قَوامِ روح ، عوارضدن ایلیوب اعراض
ایدوب مشاهده معنانی گچدی صورتدن
لباسِ ظاهر و باطنده ، طالب و مطلبوب -
بیر اولدی ، شدّتِ میل و اشدّ رغبتدن
علاقه روحی تاپوب روحی ، جسمینه جسمی
ولی دهانینه جذب اولدی شوقِ وصلتدن
دهانِ گُلدن ایدوب غنچه لبلرین سیراب
ولی فسرده لنوب رنگِ گُل با لطافتدن
گوروب دهانِ گُلی خشک ، چون لبِ غنچه
باشین اشاقه سالوب کثرتِ خجالتدن
گوزین تیکوب یوزینه عرض قیلدی یا ابتا
گچوبدی سنده هجومِ عطش نهایتدن
بو تشنه کام لوقوندان دلیم کباب اولدی
یانور منیم جگریم سنده کی حرارتدن
منی بو لعلِ لبون قیلدی جاندن سیراب
امید واردی ایچم شربتِ شهاتدن
سنه غلامِ (حقیرم) ئولونجه یا مولا -
بو فخر وار منه ال چکمرم حقارتدن
ایکی گوزینی اوپوب سَرورِ زمین و زمان
بویوردی دورما ، دوروب منتظرلرین نگران
گچر زمانِ شهادت دایانما ایله شتاب
یاخوندی ساقیِ کوثر سنی ایده سیراب
رجوع خیمیه قیل ، اهلِ بیتِ طاهانی
وداع ایله تماما" ، خصوص لیلانی
بنا به حکمِ همایونِ حجّتِ داور
متانتیله قیلوب سمتِ خیمه گاهه گذر
بلند صوتیله آلِ رسولی قیلدی ندا
حلال ایدون منی ای عترتِ رسولِ خدا
توکولدیلر ایشگیه خیمه دن بناتِ بتول
دولاندی باشینه پروانه وار آلِ رسول
دوروب کنارده لیلی ، خمیده قامتیله
چکردی آه ، باخاردی یوزینه حسرتیله
ترحّم ایلدی احوالینه علی اکبر
دئدی جهت نه باخورسان کناردن مادر؟
دئدی گیدوب اورگیم تاب و طاقتیم یوخدور
قدم لریم یریمور ، دیزده قوّتیم یوخدور
عنانوی دوتارام آهِ جانگدازیله
قویوب یول اوسته منِ زاری گچمه نازیله
اگر چه گیتملی سن یوخ سوزوم جهاده علی
آتندان اولمیه جاقسان مگر پیاده علی
اولورسا ممکن ای نورِ دیدهء زهرا
پیاده اول سنه قربان اوغول آنان لیلا
آتوندان اَن اشاقا ای گُلِ حدیقهء ناز
آنا اوغول بیر ایداق عاشقانه راز و نیاز
سالوب اوزینی یره فی الفور باشینه دولانوب
اوپوب ادبله الیندن ایاقینه دوشنوب
رضا مقامینه گَتدی آناسی لیلانی
یول اوسته یوسفِ بطحا قویوب زلیخانی
به عزمِ رزم چو شاهین اولوب عقابه سوار
ایشیقلی گون کیمی گویا او کوکبِ سیّار
اوزین یتوردی چو شیرِ دلیر میدانه
مقابل صفِ لشگرده دوردی مردانه
دایاندی سدّ سکندر کیمی مهابتیله
آچوب لسانِ گهربارینی فصاحتیله
او شیرِ بیشهء صولت ، هژبرِ دستِ نبرد
دوروب مقابلِ یوزمین قشون دا یکّه و فرد
آچوبدی لعلِ لبین ، اول مهِ سپهره وقار
توکوب لسانی بو طرزیله لؤلؤ شهسوار
الا ای قوم دون فرزند شیر کردگارم من
شجاع وارث دشت نبرد کارزارم من
منه اصل نجابتده جماعت کیم برابردور
بابام حیدردی جدهّ م فاطمه جدیم پیمبردور
آتام شیر خدا اوغلی - آدیم شهزاده اکبردور
حسینه قره العینم - علیدن یادگارم من
منم تابنده اختر اختر برج سعادتدن
منم رخشنده گوهر - گوهر دریای رحمتدن
منم نور درخشان نیّر چرخ ولایتدن
امامت گنجنون درجنده درّ شاهوارم من
منم شان مناقبده امیر المومنین اوغلی
صراط المستقیم حقده عین الیقین اوغلی
منم صدر ولایتده شه مسند نشین اوغلی
اوزوم شهزاده یم - سبط شه والاتبارم من
بو ال دست علیدور - پنجه دست یداللهی
بلیمه باغلیوب بو ذوالفقاری کربلا شاهی
دوتا دریای لشکر یر یوزون گر ماه تا ماهی
نهنگ بحر غیرت شهسوار نامدارم من
نشان لافتایم یادگار شاه لولاکم
دلیر صف شکاف و صف شکن بیر شیر بی باکم
هژبر خشمگین - ضرغام چالاک غضبناکم
علی قائم مقامی - ضیغم اژدر شکارم من
مسلم دور منه نصر سعادت - فتح و فیروز
نیامیندن چکم گر ذوالفقار آتش افروزی
سالور آتش نهاد دشمنه برق جهانسوزی
بنای هستی کفاره بیر سوزان شرارم من
مقام شان اوصافیم یتوشمز حد پایانه
هنر ، مندن مُوءیّددور - ظفر آماده فرمانه
کیم ایستر امتحان - میدان جرئتله دلیرانه
قدم قویسون که تا گورسون - سوزومده پایدارم من
شجاعت ارثدور بیزده , الومدن ایتمرم پروا
بو باش ، بو سینه ، بو پیکر ، او تیغ خنجر اعدا
سِنان و خنجر و شمشیردن باک ایتمرم اصلا
جماعت گیچموشم جاندان حسینه جان نثارم من
او یادگارِ هنرمندِ ضیغمُ الغَزَوات
علی نبیره سی فرزندِ صاحبُ الحَمَلات
بسانِ مور و ملخ اول گروهِ بیعاری
داغتدی بیر بیره ووردی صفوفِ کفّاری
مبارزان و دلیرانِ مصر و کوفه و شام
تمام قومِ جفاجو ، سپاهِ خون آشام
نه اقتدارِ تکلّم نه طاقتِ گفتار
سکوتِ محضده چون نقشِ صورتِ دیوار
بیری بیرینون اوزینه باخاردیلار حیران
نه حسّ و نه حرکت مهوِ مات و سرگردان
دوباره نعره چکوب یادگارِ شیرِ خدا
اوجالدی کنگرهء عرشِ کبریایه صدا
اولوردی هر طرفه حمله ور چو شیرِ دلیر
توکوردی صفحهء خاکِ هلاکه جمعِ کثیر
ایدردی حمله علی ، ذوالفقار الی اوسته
خطاب ایدردی ال اولماز علی الی اوسته
ایدوب او عرصه نی اعدایه عرصهء عرصات
بیرینده قالمادی اوز نفسینه امیدِ حیات
بسانِ رعدِ خروشنده یادگارِ علی
دلنده نامِ علی الده ذوالفقارِ علی
ووروب قیروب توکوب ال ، بدن ، صحرایه
شکست ، حملهء اوّلده ویردی اعدایه
بچوب گیچوب داغیدوب صفلری ایدوب بر هم
داغیلدی لشگر ، علمدار ئولدی یاتدی علم
اوجالدی نالهء اَینَ المَفَر لشگردن
ظهوره گلدی علامات قیام حشردن
بسانء خانهء شطرنج قیلدی عرصه نی تنگ
بنای مکر قویوب ناگهان قیلوب آهنگ
قلج الینده یتوب منقذِ زنازاده
که گرمیدی باشی شهزاده نین او اثناده
کمین ایدوب دالیدان ، باشدان اندیروب شمشیر
یتیردی جبهیه تا حالتی تاپوب تغییر
جبین انوری شمشیره چون نشان اولدی
مه منیرده شقّ القمر عیان اولدی
سکینه حالینه , احوال زار لیلایه
جراحت اثر زخمی خونچکان اولدی
بوکولدی قامت افلاک پشت چرخ برین
نهال قامت کلثوم تک کمان اولدی
چکلدی مصحف رخساره قانیله جدول
یوزونده خط جلی زلف سرخی قان اولدی
بویاندی طره لری قانه شده ی مرجان
دوشوب گل اوستونه گل رنگی ارغوان الدی
ملک لر آغلادی قان قطره قطره چون قانی
سرشک دیده زینب کیمی روان اولدی
سحاب سرخ سیه آفتاب تابانه
شفق سالوب بولود آلتندا گون نهان اولدی
مذهّب اولدی طلائیله صفحه قرآن
طلا و سرخیله سر لوحی زر فشان اولدی
یازیلدی سوره توحید صدر اوّلده
شهادت آیه سی عنوانینه بیان اولدی
نظرده یاره ایدی لیک منزل یاره
گیدردی الده او قان یاره ارمغان اولدی
نقدر قانی آخوب یوزده نقش اولوب یا دوست
چو حق یولوندا فراموش جسم و جان اولدی
وصال تشنه سینه تشنه لیق اولوب غالب
خیال وصلیله بی طاقت و توان اولدی
اراده ایلدی بیرده گوره غریب آناسین
خیام طاهریه عاطف العنان اولدی
یارالی یوسفی یعقوب اثقلانی گوروب
کسوب گذرگهی بیر گوشه ده نهان اولدی
باخاندا خنجر خونخواره قان دوتوب گوزینی
که باغری قاننی توکماقدان اوتری قان اولدی
بولوب خیالین او آهن دلین سویا دوندی
بلند او دم دل خنجردن الامان اولدی
دگنده خنجر ایکی کتفنین آراسندان
آت اوسته منقلب احوال او نوجوان اولدی
یتن ووراردی او ناکامی قوللارین سالدی
عقاب بوینونا یوز خیمیه روان اولدی
زبسکه قان یارالاردان آخوب عقاب اوستن
یخلدی خاک سیه منزل و مکان اولدی
بلی بو رسمدی هر عاشق امتحان اولسون
اولوب حبیبنه محبوب امتحان اولدی
زبس علی آدینی ورد ایدوب دلینده (حقیر)
سبب بودور بو مطالبده نکته دان اولدی.
مرحوم حقیرخوئی
منبع مجموعه کانالهای مدح و مرثیه
با سلام