احوالات شهر شام 5747

خورشید و شام

 

تا اولوب شمس و قمر نی ده نمایان شامیده

قالدی  بو اعجازه اهل کفر حیران شامیده

 

چیخدیلار پیشوازه شام اهلی گلور چونکه  اسیر

گوردولر وار  نیزده  بیر شمس تابان  شامیده

 

خواب غفلتده یاتانلار قالدی حیران صحنه ده

گوردوله بیر باش اوخور صوتیله قران شامیده

 

شعشات نیزه دن مقهور اولوب  دیو  پلید

خوار اولوب صوت انا الحقیله  شیطان شامیده

 

کربلادن شامه تک اول قانلی باش سیر ائیله دی

بیلمیرم اولدی کیمه آخرده  مهمان  شامیده

 

شامه  اولاد  پیغمبر گلدی قولباقلی اسیر

تا که ائتسین دولت سفیانی  ویران شامیده

 

عترت پیغمبره بیر کس حمایت  ائتمه دی

یوخ مگر بیر  باوفا  ازاده انسان شامیده

 

کیم خبردار اولدی مهمانلار علی اولادیدی

کینه حیدر ائدیب   دیللرده  طوفان   شامیده

 

هر طرفدن داش گلیب میهمانلارین  پیشوازینه

میزبانلار  ائیله دی ظلمینده طغیان  شامیده

 

هلهله ائیلوردی بیر عده اورکده   کینه سی

ائیلیوردی  خردا قیزلار داد وافغان   شامیده

 

آه اوساعتدن  قورولدی مجلس عیش و سرور

تا ائده اوز قدرتین هند  اوغلی  اعلان شامیده

 

هر جسارت ائیلدوقجا یاره لی باشه یزید

ائیله دی  العبانین قلبینی قان شامیده

 

دعوت ائتمیشدی  او بزمه گوستره شخصییتین

زینب کبری ائدیب خوار و پریشان شامیده

 

مرحبا زهرا ائوین آباد اولا  گور زینبون

سالدی تاریخه  نئجه نطقیله طوفان شامیده

 

منطقیله زنده ائتدی شاه دینین  قانینی

ائیلییوب قاتل لری رسوای دوران شامیده

 

عشق آدی گلدوقجا مدهوشی عجب هوشیار ائدیر

نکته بین اولسا گورر وار سرّ پنهان  شامیده

 

 کربلایی محمد هوشمند (مدهوش)

کانال اشعار مدهوش

زبانحال حضرت رباب (س) 5585

زبانحال حضرت رباب (سلام الله)

 

دوشدون ایاقدان ائتمه بو قدری فغان اوغول

يانديرما سينه مي سنه  قربان  آنان اوغول

 

بیر قطره ده سو یوخدی خیامی دولانمیشام

هیچ بیر یئره یوخومدی دوباره  گمان اوغول

 

گوندرمیشم رقیه عموندن سو ایستسین

بلكه تاپا بير آز جا سو اول  مهربان اوغول

 

قلبيم دوشور دوگنمیه  باخدوقجا من سنه

آز قالدی عمریوین گولی اولسون خزان اوغول

 

منده یورولموشام سوسوزام چاره یوخ ولی

بو تشنه لیق آلیب هامیمیزدان توان اوغول

 

حسرتله باخما سینه مه  شرمندیم بالا

آز داغلا داغلی  سينمه مي ای بیزبان اوغول

 

اولسا دیلین اقلی دییرسین نه ایتیسن

دیلسیز باخیشلارین ائدیر هر قلبی قان اوغول

 

یومما گوزون اخاندا گوزون من باخانمورام

باخ  بیر دوباره گول سنه قربان بو جان اوغول

 

گر سو تاپولماسا منه بیر آیری چاره یوخ

آرزی باغین عطش ائده جاقدی تالان اوغول

 

بیر کیمسه بیلمیری اورگیمدن نه لر گئچیر

آهیم   چکیر زبانه  چو اتشفشان اوغول

 

قان قان  دئیور  فرات  کنارینده  تیغ لر

مین لر نفر آلیب اله تیرو کمان اوغول

 

آخدوقجا گوزلرین اورگیم سو کیمی آخیر

قلبیمده واردی آتش و سوز نهان اوغول

 

بیز آز باخاندا سن وئریسن قول قاناد منه

بیر باخ منه فدا سنه بو خسته جان اوغول

 

چوخ آرزوم واریدی اورکده گوزل بالا

اولدی تمام آرزیلار ایمدی  یالان اوغول

 

نیلوم نچاره وار منه باغلاندی سو یولی

سو اولماسا خزانه دونر  گلستان  اوغول

 

مدهوش ائدیر اورکلری باخدوقجا گوزلرین

خاطیرده خاطرین قالاجاق هر زمان اوغول

 

کربلایی محمد هوشمند (مدهوش)

منبع کانال اشعار مدهوش تبریزی

احوالات اربعین 5286

احوالات اربعین

 

ای وئرن جانان یولوندا جانینی عطشان حسین

ای ائدن عالم لری اوز عشقینه حیران حسین

 

آیریلقدان اولدی بو قرخ گونده قلبیم قان حسین

نیزه ده گوردوقجا باشین ائیله دیم افغان حسین

 

اولمدیم گلدیم دوباره بو چوله مهمان حسین

یاتما بیر دور قبریدن زینب سنه قربان حسین

 

دین حقین مقتداسی ای قتیل اشقیا

ای وئرن قرانه اوز قانیله تضمین بقا

 

بو صفالی قبریوه قارداش باجون اولسون فدا

گلمیشم شاماتیدن بیرده قورام بزم عزا

 

زینبم دور بیر من دلخستیه سس وئر اخا

خرمن صبره سالیب اود بو غم هجران حسین

 

سن بو چولده یار و انصارونله ائتدین انقلاب

منده قوباغلي چاليشديم ائيلديم حفظ حجاب

 

گر چي سينم آتش هجرانيله اولدي كباب

کوفه و شاماته سالدیم نطقیمله التهاب

 

خصم ناحقه همیشه حقیله وئردیم جواب

گرچه ظلمینده بو کفر اهلی ائدیب طغیان حسین

 

ائیله دیم قرخ گون گئجه گوندوز فراقینده نوا

قبریوه مشتاقیدیم ای پادشاه کربلا

 

بو همان یئردی سنی یالقیزلادی اهل جفا

اشک حسرت گوزده من عطشان سنی سالدیم یولا

 

تشنه لب کسدی قفادن باشیوی شمر دغا

میلین اولسا سو گتوردیم ایچماقا الان حسین

 

ای عزیز جان اویان دلخسته جان لاردان سوروش

دشمن بیرحم الینده باغریقان لاردان سوروش

 

بو سفرده باشه گلمیش داستان لاردان سوروش

غصه و غم شرحینی قدی کمان لاردان سوروش

 

قیزلارین احوالینی سن ساربان لاردان سوروش

گورنئجه یولاردا اولدی عترتین نالان حسین

 

دور قولاق وئر کوفه و شامین جفاسیندن دئیوم

یوللارین یولداشلاریندان ماجراسیندن دئیوم

 

ناقه اوسته قیزلارین سسیز نواسیندن دئیوم

سن یارالاردان دی من باشیم بلاسیندن دئیوم

 

شام ویرانین سنه غملی هواسیندن دئیوم

اوردا من دفن ائیلدیم بیرگوهر تابان حسین

 

دور اخا باخ گور نئجه حالی پریشان گلمیشم

اشک حسرت گوزده دیل داغلی نواخوان گلمیشم

 

گلمدی نازلی رقییم زار و نالان گلمیشم

سالمیشام شاماته من نطقیمله طوفان گلمیشم

 

دور یارالی پیشواز ائیله که مهمان گلمیشم

خستیم یولدا یوروب بو بیکسی عدوان حسین

 

سینوی آماج قیلدین زهریلی پیکان لارا

اگمدین باش باشیوی سالدین اخا طوفان لارا

 

حق یولون وئردین نشان آزاده مرد انسان لارا

نیزه باشینده ندا وئردین آییق وجدان لارا

 

ائتمه سین بیعت جهاندا فاسق و نادان لارا

سن کیمین قربانه عالم لر اولا قربان حسین

 

کانال اشعار محمد هوشمند (مدهوش)

اربعین حسینی 5280

اربعین حسینی

 

وئردی نتیجه آل علی استقامتی

احیا ائدیب دی دینی حسینین شهادتی

 

گرچی اولوبلا بیر نئچه گون دشمنه اسیر

هر تک تکی اولوب شهدا قانیینه سفیر

 

صبر ائیلییب مصائبه آماله چاتدیلار

هر بیر مکاندا پرچم حقی اوجاتدیلار

 

مسکن ائدیب خرابه نی تا آل مصطفی

تاثیر ائدیب دی عالم امکانه ماجرا

 

شام اهلینه موثر اولوب وا حسین سسی

خلقی آییتدی حضرت سجاد خطبه سی

 

شام اهلی آز زاماندا اولوب مطلبه خبیر

آل پیمبری ائلییوبدور یزید اسیر

 

آل امیه نین اوزه چیخدی قساوتی

خلقه یئتیشدی کرب وبلانین حکایتی

 

اونلار کی فکر ائدیردیله باتدی حسین قانی

انسانلاری گوروبله اویاتدی حسین قانی

 

شامین فضاسین ائیله دی بر هم فغان سسی

لرزه سالیب دی کاخ یزیده اذان سسی

 

وئردی رقیه گوشه ویرانسراده جان

رسوا ائدیب یزیدی او مظلومه هر زمان

 

نفرین یزید و آل یزیده اولوب مزید

بحرانیدن قوتارماقا یول آختاروب یزید

 

گوردی بویوک خطرده اساس حکومتی

ناچار اولوبدی باشلادی آیری سیاستی

 

ابن زیاده لعنت ائدوبدی او بی حیا

ما لی و للحسین دئیوب ائتدی آه و وا

 

چوخ ساده فرض ائدیر دی او ملعون قضیه نی

بیلمیردی کی بو قان ییخار آل امیه نی

 

دیل آچدیلار مذمت اوچون تا که عام و خاص

تصمیم دوتدی تا اسرانی ائده خلاص

 

تا آل حیدرین گتیره قلبینی اله

قتل حسین ده گتیروب عذرینی دیله

 

دعوت ائدیب دی حضرت سجادی محضره

تا کربلا شهیدلرینه خونبها وئره

 

بو سوزله بیرده قلب لرین داغلیوب غرض

دنیاده وار مگر شهدا قانینه عوض

 

باخ بیر یزیده گور نه قدر ائیله دی ستم

قیمت بیلیر حسین قانینا درهم و درم

 

بیرده علی اکبره همتا گلر مگر

اوغلی اولن آنا غمینی کیم بولر مگر

 

داغلار آغریلیقی وئره له سکه طلا

هاردا رباب و لیلی بو امره اولار رضا

 

دعوت ائدیب امامی حضوره او بد مرام

چوخ اعتضار ائدیب ائله دی چوخلی احترام

 

ایستیردی ظاهرا یئتیره حُسن نیتین

وعده وئریب امامه روا ائتسین حاجتین

 

بو حالیده امام یانیب توکدی گوزیاشین

اول ده ایسته دی شه دینین کسیک باشین

 

کرب و بلانی یاده سالیب قلبی اولدی قان

اول دم ایکنجی حاجتنی ائیلدی بیان

 

تشریح ائدیب دی لشگر ائده ن ظلم و محنتی

تا قیته ره اوز اهلینه اموال غارتی

 

بیئرده بویوردی وار نظرین قتلیمه اگر

مامور ائله بو قافلیه بیر امین نفر

 

چوخ اینجیدیب گلنده بیزی شام و کوفیان

عزتله تا مدینیه گئتسین بو کاروان

 

چوخ سوزلر اولدی رد و بدل حاصل کلام

آلدی اثاث غارتی اشراریدن امام

 

منظور اولوبدی زینب صدیقه ایسته گی

جان تک باسیب اورک باشینا قانلی کوینگی

 

اولدی اگرچی قلبلری غصه دن کباب

فاتح اولوبلا مقصدینه چاتدی انقلاب

 

پر بسته قوشلاری قوتاریب رنج دامیدن

سرعتله عشق قافله سی چیخدی شامیدن

 

کوی وفاده خوشلادیلار آشنا یولون

شوقیله آختاریردی هامی کربلا یولون

 

بیر یول کی تا قیامته جک وار مسافری

بیر قبر کی زیارت ائدیر عرشی زاییری

 

بیر کاروان او قبره طرف شوقیلن گئدیر

بیر عده کی نفسلری آفاقه حکم ائدیر

 

بیر قافله کی حق دیله هم حقه رهنما

قرخ گوندی گوز تیکیب یولونا خاک کربلا

 

نه کربلا کی مهر ولانین باتان یئری

یئتمیش ایکی یارالی لب عطشان یاتان یئری

 

بیر کربلا کی کعبه دن آرتیق صفاسی وار

عشق اهلینین او یئرده بیوک مقتداسی وار

 

بیر گلستاندی زینب اونون باغبانیدی

قرخ گون اولار کی قارداشینین نوحه خوانیدی

 

قرخ گوندی چوللری دولانیب زار و خسته دی

قرخ گوندی که عزالیدی قلبی شکسته دی

 

قرخ گوندی انتظار چکیر وصل یارینه

شرح ائیلسین اورک غمینی اوز نگارینه

 

یاد ائیلییور آنا بالاسین باجی قارداشین

هر کس انیس ائدیب اوزونه آه و گوزیاشین

 

گورسندي ناگهان گوزه صحراي نينوا

بی تاب ائدیب اورکلرینی شوق كربلا

 

هر کس کتاب محنتی بیرده وراقلادی

کئچمیش لری خیاله سالیب یاندی آغلادی

 

یاده دوشوب خیامه عدو ال آچان گونی

خردا اوشاقلارین تیکان اوسته قاچان گونی

 

یاده دوشوب سو اوسته سوسوز دوغرانان بدن

یوز دوتدولا فراته هامی دل دولی محن

 

آخ ای فرات آخ نیه قانیله دولمادون

پیغمبرین بالالارینا قسمت اولمادین

 

آخدون فرات چوللره اود دوشدی دیللره

اوخ قسمت اولدی سو یئرینه تشنه اصغره

 

سقانی درد و محنته آکنده ائیلدون

سو قولی وئردی قیزلارا شرمنده ائیلدون

 

گر چی سو صحبتی هامی دان سلب ائدوبدی تاب

باخدی فراته وای بالام ایوای دئیوب رباب

 

گلدوقجا موجه سو بالام ایوای دئیوب رباب

سالدی خیاله اصغری لایلای دئیوب رباب

 

اطرافه باخدی حسرتیله دیلده آه و وا

سسلندی هارداسان گل علی گلمیشم بالا

 

آختاردی تاپدی هر کس او ماواده دلبرین

ابر بهار تک هامی دولدوردی گوزلرین

 

هجران غمی یئتیشدی باشا وصله چاتدیلار

اندوه ودرد و محنتی یاتدان چیخارتدیلار

 

گرد ملال و محنته بیئرده بوروندولر

شاه شهید قبرینه ساری سوورندولر

 

بیر یولدا عشق روح و روان وئردی زینبه

کرب و بلا هواسی توان وئردی زینبه

 

چکمیشدی قارداش حسرتینی قرخ گونی مدام

قبری گورن کیمی اوجادان عرض ائدیب سلام

 

آرامين آلدي قارداشينین تشنه اولمگي

قبر اوسته سالدي دیلده فغان قانلي كوينگي

 

شوق وصال آلدي اوركلردن اختيار

گويا بهار فصلي ائدیر بلبل آه و زار

 

ابر بهار تک هاموسی دولدوروب گوزون

گتدی دیله اورکده اولان آیریلیق سوزون

 

بو آلتی گوشه قبریوه یوروقون جانیم فدا

دور بیرایاقه زینبی پیشواز ائله اخا

 

دور قبرین اوسته بیر سوری آهو گتیرمیشم

یاتما فراتیدن سنه من سو گتیرموشم

 

گتدیم مزارون اوستنه یورقون بالالارین

قارداش بویور نه حال دادی الان یارالارین

 

من قتلگاه عشقيده سندن دويانماديم

عفو ائت مني كي یاروه مرحم قویانماديم

 

سندن صورا حسین دئمیرم چكميشم نه لر

باخ گور نئجه قوجاتدي مني درد و غصه لر

 

شامین بلاسی چوخدی اخا شرح اولان دگیل

مین لر کتابه گر یازیلا قورتولان دگیل

 

غم گئچدی حد یدن بالالار تاب ائدنمدي

قالدی رقیه شامیده قارداش گلنمدي

 

ئولدي بالام جنازه سينه تاپمادیم كفن

اوز گوينگيله دفن ائیله دیم محنتيله من

 

قولباغلی گئتمیشم ولی آزاده گلمیشم

اما رقیه دن ساری شرمنده گلمیشم

 

شامل ائدیب دی لطفینی حق بو سفر منه

باش اگمدیم سنین کیمی هیچ یئرده دوشمنه

 

الله عنائت ائتدی منه بو سعادتی

بو من بو اربعین بو مزارین زیارتی

 

قورتولمياندي گرچي منيم درد و محنتيم

ايكاش بو مزارین اولا بيرده قسمتيم

 

باخدوقجا دیلده چشمه غم جوش ائدیر حسین

قبرین صفاسی عالمی مدهوش ائدیر حسین

 

کانال اشعار محمد هوشمند (مدهوش)

احوالات دیر راهب 5230

احوالات دیر راهب

 

كيمسن اي باش معجز عيساني گوستردين منه

قانلي صورتله بوگون معناني گوستردين منه

 

بير دانیش منله ندن منحور اولوبدور حنجرین

ياره لي باش باشيوه قربان هاني بس پيكرین

نيزه لر اوسته سنيلن همسفردور لشگرین

جلوه عشقینده سن يحياني گوستردين منه

 

كيمسن اي باش نيزه اوسته اهل عشقه راه سن

آسمان عشقيده قانه بويانمش ماه سن

کیمدی بو قاره گینلر اونلارا همراه سن

ياندي قلبيم خرداجا طفلاني گوستردين منه

 

كيمسن اي مظلوم اولن قانلي باشین اعجاز ائدیر

جلوه ائيلیر نيزده عشاقه كشف راز ائدیر

سنله هر کیم همسفردور عرش و فرشه ناز ائدیر

وصل ياره چاتماقا ميزاني گوستردين منه

 

بیر دانیش منله ائدیر هر قلبی روشن سوزلرین

آيه آيه ائیلیري قراني معنا گوزلرین

باش كسن قومه اسير اولموش ندن گل اوزلرین

تا بيليم كيمسن بئله دوراني گوستردين منه

 

درك ائده بیلمز جلال و شوكتين اهل فتن

سن کلیمه طور سیناده گورنموش جلوه سن

ائتمدون نفرين بو بد طينت لره آيا ندن

سري وار بو رحمت شاياني گوستردين منه

 

كشتي عشقین مني چكدي بلادن ساحله

آزدي ويرسه م باشيمي عشقین بها سينده صله

ايندي فردوس برين حسرت چكیر بو منزله

رمز و راز عالم امكاني گوستردين منه

 

خواب غفلتدن اويانديم لطفويله من بئله

راضی اولسا گر حرملر ائتمسه سندن گله

ساخلارام باشین قوناق تا دوشمه سین الدن اله

ابتدای راهیده پایانی گوستردین منه

 

نه يوزيله محشره آيا گلر بس امتین

دينیني دنيايه ساتدي بيلمدي اوز قيمتین

باشيوي تشنه كسيب آواره ائتدی عترتین

ظلم و جور امت ناداني گوستردين منه

 

گر بیزه قالسیدی عیسی نبی دن یادگار

ساخلیاردوخ گوزلر اوسته با کمال افتخار

اولدوروب پیغمبرین اوغولون بو امت آشکار

قدرت سيم و زر و دنياني گوستردين منه

 

مرهميم ده اولماسا سيللم جمالیندن قاني

اولميوب هيچ يئرده گويا استراحت امكاني

قال بو منزلده منه مهمان سنی عيسا جاني

عاشق ائتدین بير باخيشدا جاني گوستردين منه

 

هر نه امر ائتسن سوزون حجت دی طاعت ائيلرم

دينیوي ائتديم قبول حقه شهادت ائيلرم

هم سنه هم اهلبيته قالسا خدمت ائيلرم

گول یوزونده جنت الاعلانی گوستردين منه

 

قويسالا هر نه واريم وئره م سني تا ساخليام

هر گئجه شام عزا قوررام دويونجا آغليام

گر چه سايسيزدي ياران امكاني یوخدی باغليام

زخم عشقه مرهم و درماني گوستردين منه

 

كاش اوليديم سنله اي شه كربلاي عشقده

بذل ائديدیم جانيمي منده مناي عشقده

باش و جان لازم دییل الا هواي عشقده

بزم انس و خلوت جاناني گوستردين منه

 

بو گئجه سنلن تاپیبدي منزليم عالي صفا

شكري وار چوخ چوخ که من اولدوم سنيلن آشنا

بیر نظر قیل محشره قول شفاعت وئر آقا

اختيار عالم امكاني گوستردين منه

 

راهبی گوردی تحیرده امام عالمین

نطقه گلدی تا الین دوتسون اونون حبل المتین

من شهنشاه حجازم زاده زهرا حسین

عشقوین وار هر قدر امکانی گوستردین منه

 

سن مني راهب بلايه توش اولانلاردان سوروش

کربلادن باغری قانیله دولانلاردان سوروش

گل یوزی دوشمن جفاسیندن سولانلاردان سوروش

سن بوگون قلبینده کی ایمانی گوستردین منه

 

کانال اشعار محمد هوشمند (مدهوش)

راه شام 5206

راه شام

 

قوتاردي كوفه غمي آیری غم یازیب خامه

چكوبدی قافله عشقی ساربان شامه

 

یوخيدي اذن بيري ائيله سین نوا يولدا

يانان ياناردي غم و درده بيصدا يولدا

 

كيمن صداسي اوجالسيدي ني كيمي بير آن

وراردی قمچی او مظلومه اشقیا یولدا

 

گیدیردی شامه طرف قافله پریشان حال

يوخيدي قافیلیه بير غم آشنا يولدا

 

نئجه چتیندی سفر، اولسا ساربان قاتل

مگر اولاردی اورک غصه دن رها یولدا

 

گیدیردیلر يولي گوزیاشلی ديل لري داغلي

شهيد اولانلارا دوتموشدولا عزا يولدا

 

یارالی باشلاریلا همدمیدی اهل حرم

گئدوردی شامه طرف خویش و اقربا یولدا

 

باخاندا حسرتیله نیزده اوغول باشینا

ائدردی درد دل آهسته هر آنا یولدا

 

باخیردی اهل حرم دمبدم حسین باشینا

که بیرده نیزه ده قرآني باشليا يولدا

 

اوشاق بیوک هامی مشتاقیدی تلاوتینه

وئره اورکلره بیر رونق و صفا یولدا

 

گیدوردی سرعتیله شامه عشق قافله سی

واریدی جلوه آیات کبریا یولدا

 

دایاندی قافله بیردم گوروبله یول اوسته

هامي تعجب ائدوب وار نه ماجرا يولدا

 

نه وار مگر حرکتدن دوشوب زمین زمان

ائدیب حسین باشینا عالم اقتدا یولدا

 

قویوبدی اهل جفانی بو امر حیرتده

گزردی چاره بو اعجازه اشقیا یولدا

 

خلاصه بیلمدی بیر کس بو سرّ عظمانی

اولوب دی حضرت سجاد رهنما یولدا

 

بویوردی واردی قالان چولده خردا قیزلاردان

بابام نظاره ائدیر آغلیانلارا یولدا

 

چاغیردی بیر بیر آدیلا حرملری زینب

گوروبدی وئرمدی سس نازلی بیر بالا یولدا

 

یانیب یانان اورگی نی کیمی فغانه گلیب

اولوب دوباره غم و درده مبتلا یولدا

 

یانا یانا دیدی الله بالام هایاندا قالیب

آدامسیزام نه ائدیم من گئدیم هارا یولدا

 

بالام تاپولماسا دنیانی یاندریب یاخارام

اولونجه ائیلییرم داد وآه و وا یولدا

 

گوروبله قافله لنگ اولدی قالدیلار ناچار

مصمم اولدولا مشکل اولا روا یولدا

 

ائدیبئله تاپماقا زجر ستمگری مامور

گلن مسیری قیتدی او بی حیا یولدا

 

تاپيب گتیردیله نه نوعيله او خردا قیزي

اولوب دی خردا ایاقلار ولی یارا یولدا

 

یئتیشدی قافلیه نیزیه طرف قاچدی

يا نا يانا ديدي قالمیشدیم آی بابا يولدا

 

یورولموشام منی لطفیله بیر دانیشدیر سن

دئیوم گلیب باشیما هر نه ابتلا یولدا

 

بابا گوزوندن ایراق گلمیشم پیاده یولی

گتیردیله منی قمچی ورا ورا يولدا

 

بي بي مه بيرده سفارش ائله بو خونجگري

کی سالماسین بئله گوزدن او با وفا يولدا

 

اگر چی زحمتیمی چوخ چکیب خانیم عمه م

محبتلیه ائدیب گوگلومی رضا یولدا

 

یئتیرسه شامه منی زحمتیم تمام اولاجاق

خرابیه چاتاجاق راه کربلا یولدا

 

یزیدی خوار ائله سم آرزومه من چاتارام

همیشه لیک یومارام گوز خرابه ده یاتارام

 

زمانه گر چه منی ائتدی درد و محنته توش

خرابه شامیده دنیانی ائیلرم  مدهوش

 

منبع کانال اشعار محمد هوشمند (مدهوش)

میدان رفتن حضرت ابوالفضل (ع) 5099

میدان رفتن حضرت ابوالفضل (علیه السلام)

 

میدان رزمه گوردولر الده علم سقا گلور

سو آلماقا مامور اولوب بیر تشنه لب دریا گلور

 

حمله ائدیر الده علم ایستور فقط چاتسین سووا

جان نقدینی آلمیش اله آماده دی آتسین سووا

حاضردی گر سو اولماسا اوز قانینی قاتسین سووا

دورین آلیب گرچی عدو یوخ یاوری تنها گلور

 

سالمیش حصاره علقمی بیر عده اللرده کمان

بیر عده سی ائتمیش کمین تا حمله ائتسون ناگهان

مجبور اولوب شمشیرینی آلسین اله اول قهرمان

روبه صفت لر اوستونه چون شیر بی پروا گلور

 

سیماسینه باخسان اگر ائیلوب سوسوزلوق چوخ اثر

با اینکه عطشاندور ولی چوخ با صلابت جنگ ائدر

هر کس که میدانه گلر اوز قانینی ائیله ر هدر

عباسه اولسون روبه رو هر پهلواندان لا گلور

 

دعوادن آیری قصدی یوخ ایستور فراته یول آچا

عنقای غیرت سعی ائدیر قاف تمنایه اوچا

جنگه اراده ائتمه میش یول آختاریر لشگر قاچا

چون کیم دایانسا باشینه شمشیر رعد آسا گلور

 

شمشیری اعجاز ائیلییور قوللاری قولاردان اوجا

حیران قالیب بو هیبته بو قدرته اهل جفا

اخیامیده اهل حرم ائیلوله عباسی دعا

لب تشنه لر یول گوزلیور فریاد واویلا گلور

 

سیندیردی سایسیز لشگری وردی فراته پرچمی

سیراب ائدیب مشکی سودان دیلدن بیر آز گئتدی غمی

اما اوزی میل ائتمه دی حیرتده قویدی عالمی

دنیایه بیر ده بیر بئله اهل وفا آیا گلور ؟

 

سرگرم جام عشقیدی صاق قول گوروب اولدی قلم

شمشیری آلدی صول اله میداندا اول کان کرم

مشگین باسیب دیر باغرینا جان تک او سقای حرم

مشکه طرف اوخلارگوروب گویده ائدیر غوغا گلیر

 

بیر کس ده جرات اولمادی تا روبرو کسسین یولون

ائتدی کمین اهل جفا بو دفعه کسدی صول قولون

نه حاله قالدی بیلمیرم الدن وئریب صاق و صولون

زاغ و زغن فرصت تاپیب قان توکمگه یکجا گلور

 

مشکی باسیب دیر باغرینا حفظ ائیلوری مانند جان

سعی ائلییوردی خیمیه مشکی یئتیرسین اولزمان

اما بیر اوخ سو مشکینه ائتدی اصابت ناگهان

آخدوقجا مشکیندن سویی دیلده غم عظما گلور

 

یوز دوتدی اخیامه اودم سسلندی قارداش داده گل

یالقیزیلیب دشمن منی ائیله کرم امداه گل

مشک اوخلانوب قوللار دوشوب گل سیدی فریاده گل

بیر آز یوبانسان سیدی باش کسماقا اعدا گلور

 

بیر پهلوانین اولماسا مدهوش قوللاری اگر

یاره دگنده جسمینه باشین کرگ ائتسین سپر

دشمن ده انصاف اولماسا دیل یاره سی اوخدان بتر

قلبی دلر هم یاندیرار هر دردیدن بالا گلور

 

کانال اشعار محمد هوشمند (مدهوش)

ورود به کربلا 5038

ورود به کربلا

 

گلمیشم بو سرزمینه شوقیله مهمان باجی

وعدگاه وصلیدور وئرّم بو یئرده جان باجی

 

قیل اوزون درد و غمه آماده ای کان وفا

صبریوی قویما ائده تاراج اندوه و بلا

من خلیلم هاجری سن بو جوانلاریم فدا

ائیلرم جانانیمه بو جانیمی قربان باجی

 

دقتیده باخ بو صحرا وعده گاه عشقیدور

تلیدن اطرافه بیر باخ شاهراه عشقیدور

عشق محرابی چوخور یئر قتلگاه عشقیدور

باشیمی ذبح ائیلییر بوردا عدو عطشان باجی

 

بو مناده دوغرانار قران یولوندا اکبریم

سو ایچر اوچ شعبه پیکاندان علی اصغریم

گر کسیلسه خنجر کینیله باشیم اللریم

ایتمرم بیعت منه حکم ائیلیور قران باجی

 

من اوزوم آب حیاتم نه غمیم باغلانسا سو

ذره قورخوم یوخ اگر چی دوره می آلمیش عدو

قانلی میداندا اورک قانیله من آلام وضو

تا قالا بو نهضتیم دنیاده جاویدان باجی

 

من بو یئرده محضر جاناندا وئرم امتحان

یار و انصاریم وئرلر حق یولوندا تشنه جان

نیزه اوستین ائیلیر شامه کیمی باشیم مکان

تا اولا حق و حقیقت عالمه اعلان باجی

 

قیل اوزون آماده بو فوج بلایه صبر ایله

قارداشین باشسیز دوشن وقته منایه صبر ایله

قیزلاریم گر آغلاسا آه ونوایه صبر ایله

نار غم یاندیرسا قلبین ائیلمه افغان باجی

 

کانال اشعار محمد هوشمند (مدهوش)

عرض ارادت به مقام امیرالمومنین حضرت علی (ع) 5020

عرض ارادت به مقام مولی الموحدین

امیرالمومنین حضرت علی (علیه السلام)

 

ای تاپان بیت خدا ایچره ولادت یا علی

ای وجودی عالم امکانه رحمت یا علی

 

اولماسیدون سن صفا تاپمازدی قران مبین

اهل ایمان کسب ائدیر سندن شرافت یا علی

 

سن ازلدن ائیلمیشدین دعوت حقی قبول

کلمه توحیده وئرمیشدین شهادت یا علی

 

تا رسول الله تاپیپ فیض رسالت حق دن

سن همان گون دعوتین ائتدون اجابت یا علی

 

اولمادی بیر کس سلونی دن بیله منظوریوی

باغلامیشدی گوزلری دست جهالت یا علی

 

اولمادی بیر همدمین دردین فقط چاهه دئدین

آچدیلار هر عرصه ده باب عداوت یا علی

 

اولمادی هئچ عصریده بیر کس مقامین درک ائده

خالق منان سنه وئرمیش جلالت یا علی

 

سن نه بیر گون نه بیر ایل نه قرن ، تاریخین بویی

تاپمیوبسان درد غربت دن فراغت یا علی

 

ایندی اون دورت قرن دن صونرا یئنه تک قالموسان

ایستمیر بیر کس ائده حقه حمایت یا علی

 

دولدوروب ریب و ریا کفر و جفا محفل لری

حقین اهلی باشلییبدور راه عزلت یا علی

 

مدعی لر دولدورب دونیانی یوخ مرد عمل

کور ائدوب دی گوزلری حب ریاست یاعلی

 

ای نماز اوسته وئرن انگشترینی سائیله

روح تاپدی سنله محراب عبادت یا علی

 

آه او گوندن نهروانین شیخلری ائتدی ستم

قانیله رنگین اولوب محراب طاعت یا علی

 

کوفه ده محراب طاعت ده سن ای صبح ازل

آرزو ائتدین نصیب اولدی شهادت یا علی

 

سن هدائت رکنی سن افسوس دست ظلمیله

قانه غرق اولدون سینیب رکن هدائت یا علی

 

کوفه ده یوزلر یتیمه باش چکردون هر گئجه

سن شهید اولدون اولوبلار غرق حسرت یا علی

 

اوندا کی جسم شریفون دفن اولوندی توپرآقا

سن نه بلکه دفن اولوب روح عدالت یا علی

 

ایستورم منده یازام مدحینده نئچه بیت شعر

نیلیوم یوخ الده بوندان چوخ بضاعت یا علی

 

اینتظاروخ حضرت مهدی بالان ائتسین قیام

عالم امکان تاپا غمدن فراغت یا علی

 

روز محشر کی اولار آیدین نهان اسرار لر

وار اومیدیم سندن ای کان کرامت یا علی

 

سن امیریم سن منیم من عاشق و مدهوشیوم

بو اوزی قاره غلامه قیل شفاعت یا علی

 

کانال اشعار محمد هوشمند (مدهوش) 

کوچ از قتلگاه 4937

کوچ از قتلگاه

 

ای نخل دینه قانی وئرن تازه جان حسین

قربان یارالی جانیوه جان جهان حسین

 

ای کوی جاندا عاشیقینه رهنما اولان

ای سائیله همیشه اولان مهربان حسین

 

بذل ائیلدین نیین واریدی راه حقیده

وئردین رضای حقیده خوش امتحان حسین

 

نه بی مروت اولدی سنین میزبانلارین

هر نه کی وعده وئردیله اولدی یالان حسین

 

باش ظلمه اگمدین سنه آزاده لر فدا

وئردین فدا مرامیوه پیر و جوان حسین

 

اولدون شهید لیک یئتیشدین مرامیوه

آزاده لیق مسیرینی وئردین نشان حسین

 

باشین کسیلدی، تا کسه ظلم و جفا یولون

قانین توکولدی ائیله دی حقی عیان حسین

 

باشین اگر چی شمر و سنان وردی نیزیه

قران سسین حقیقتی ائتدی بیان حسین

 

دگدوقجا نیزه اوخ گل آچیب قانلی پیکرین

کرب بلا دیارین ائدیب گلستان حسین

 

سندن صورا خیامه قشون گلدی غارته

ائتدی اسیر قیزلاری شمر و سنان حسین

 

نصفی یانان چادیردا باجین منزل ائیلدی

یورقون همالره یوخودی آشیان حسین

 

یوخدور باشین بدنده دئسین شرح حالیوی

اولدون گئچن گئجه کیمه سن میهمان حسین

 

گودالیدن مشامه گلیر عطر جانفزا

زهرا آنام گلیب بو یئره بیگمان حسین

 

توپراق لار اوسته بیکس و تنها نه یاتمیسان

قان آغلارام بو محنتیوه هر زمان حسین

 

گلدیم دوباره اللریوی بیر آلیم اله

گوردوم نه ظلم لر ائلیوب ساربان حسین

 

آیا نئجه بو محنته من طاقت ائلییم

وئرمیر اجازوه دفنیوه بو کوفیان حسین

 

جبریله آیریلیب گئدیرم شام و کوفیه

یوخدور باجوندا درد فراقه توان حسین

 

تنها باجون دییل که ائدیر ناله و فغان

ناله ائدیر بو غمده زمین و زمان حسین

 

دور سال یولا بو قافله نی قیل اوزون دعا

یوخ بیر نفر بو قافیلیه پاسبان حسین

 

بیر گون بو عشق کعبه سیینه ایستین لرین

هر سمت و شهریدن اولاجاقلار روان حسین

 

بر گون بو کربلایه گلر شوق و ذوقیله

قبرین زیارت ائتماقا اهل جهان حسین

 

کانال اشعار محمد هوشمند (مدهوش) 

زبانحال در کوفه 4514

زبانحال در کوفه

 

ای قانلی باشی نیزه ده معراج ائلیین باش

هر بیر باخیشی صبریمی تاراج ائلیین باش

 

قران اوخی حق جلوه سینی خلقه نشان وئر

ای جان جهان زینبیوه تاب و توان وئر

ای قانلی دوداقیله ائدن کهفی تلاوت

سال نیزیه نین اوستن باشیما سایه عزت

غفلت یوخوسوندان آییلا بلکه جماعت

 

بو کوفه لیلر حقی اینانمیر چوخی قارداش

قربان دیلیوه نیزده قران اوخی قارداش

سن ایچدین حسین شوقیله تا باده وحدت

قسمت منه ده اولدی بو نهضتده اسارت

عشقینله منه سهلدی هر درد و مصیبت

 

عشق اهلینه ترسیم ائلدون راه ولانی

درد اهلنه من اورگده رم رسم وفانی

سینم ده بیلیرسن کی غمیم چوخدی برادر

گورمز نیه حق جلوه سینی امت کافر

قران اوخونیانلار ایلمیر حقیوی باور

سر نیزه ده باشین اوخور ایه قران

 

داشلاندی باشون قلبمی غم ائیلدی صد چاک

آچ قانلی گوزون زینبه باخ زاده لولاک

تا روشن اولا جلوه لولاکیله افلاک

بیلسون هامی عالم که بیزوخ آل پیمبر

قراندا بیزوخ آیه تطهیریله کوثر

 

غمدن بیلیسن زینبین اصلا دیله گلمز

گورسم سنی هردم دیله آیری گله گلمز

بیر آزدا یاخینلاش منه فرصت بئله گلمز

تا بلکه سیلیم پرده لنن قانی گوزوندن

زهرا عوضندن بیر اوپوم قانلی یوزوندن

 

ای سایه سی اهل حرمین مأمنی قارداش

باشوون گزور اللرده یوروبلا سنی قادراش

اوز ویرمارام هیچ بیر سنه دیندیر منی قادراش

ای شمس هدی غصه لی اولدوزلاری دیندیر

قارداشی اولن قاره گیین قیزلاری دیندیر

 

دوشموشدی ازلدن باشیوا شور شهادت

سالدین هامی عاملره اوچون نور هدایت

کیم گلدی سنین کویوه تاپدی ره عزت

ای جان جهان عالم امکان سنه قوربان

کوثر سنه قربان اولا رضوان سنه قربان

 

سن عهدیوه ایفا ایلدون کوی وفاده

معراج ائیلدی قانلی باشون نوک جداده

قالدیم ولی من حسرتیله سعی و صفاده

عالم متحیردی سنون صبریوه قارداش

زوار اولاجاق اهل وفا قبریوه قارداش

 

دونیا بویی آزاده لرون رهبری سن سن

حقین باباما نازل اولان کوثری سن سن

عشق عالمینین اولی سن آخری سن سن

حق نورینی نمرود زمان سوندوره بیلمز

باشوونده کسیلسه یولون عالمده کسیلمز

 

آی ایت حق منطق و گفتاروه قوربان

سنلن دولانان لشکره سرداریوه قوربان

هر دم منه باخ دیلده کی اسرایوه قوربان

خوار اولسون اولارکی اریا فاصله سالدی

سن مقصده چاتدون باجون افسوس قوجالدی

 

ای صبح ازل مطلع انواریوه قربان

ای تشنه فدا عشقیوه ایثاریوه قربان

رفتاریوه میزانیوه معیاریوه قربان

جانیم سنه قربان ایکی دنیا سنه قربان

حیدر سنه قربان اولا زهرا سنه قربان

 

ایستیردی یزید ائیلییه حق نورینی خاموش

دوشدون دیله سن لیک یزید اولدی فراموش

عشق اهلینی سن ایلدون اوز حسنوه مدهوش

ای جان جهان جمله شهیدان سنه قربان

هر یرده کی وار پاک بیر انسان سنه قربان

 

کانال اشعار محمد هوشمند (مدهوش)

حضرت امام زمان (عج) 4465

حضرت امام زمان (عج)

 

گوز یاشیمی او چشمه حیوانه ویرمرم

بو گنج عشقی گوهر و مرجانه ویرمرم

 

بیر دُرّدور که قیمتی یوخدور جهانیده

چوخ پر بهادی قیمت ارزانه ویرمرم

 

غم چولقویوبدی قلبیمی ، باران اشکیمین

بیر قطره سینده وسعت بارانه  ویرمرم

 

یارین غمینده نی کیمی دائم سزلدورام

دردیم یاماندی ناله می پایانه ویرمرم

 

آغلار گوزوم باخور یولونا مین امیدیله

من خرمن امیدیمی طوفانه ویرمرم

 

بیر عمردور که منتظرم من او سروره

تا گورمیونجه جانیمی جانانه ویرمرم

 

مژده گتیرسه باد صبا گر شمیمینی

بیر شمه سین شمیم گلستانه ویرمرم

 

صبحین نسیمی شانه ووران قاره زلفونون

بیر تارینی چمن دولی ریحانه ویرمرم

 

لعل لبینده موج اییلین حق بیانینین

بیر کلمه سین صفوف سخندانه ویرمرم

 

گر قسمت اولسا خاک رهین توتیا ایدم

اول بیر دمی تمامی دورانه ویرمرم

 

هانسی مکانه قویسا قدم گلستان اولار

 ایله مکانی روضه رضوانه ویرمرم

 

باخسا منه گوزل باخشیلا یارم باخیش

 اول لطفی من مین هدیه شایانه ویرمرم

 

((عتیق)) یازوب اورک سوزونی ((مدهوشیلن))

اولسا قبول اگر دُرِ غلطانه ویرمرم

 

استاد طهمورثی (عتیق) و

جناب محمد هوشمند (مدهوش)

منبع مجموعه کانالهای مدح و مرثیه

احوالات شام غریبان حضرت امام حسین (ع) 4218

احوالات شام غریبان

حضرت امام حسین (علیه السلام)

 

کربلاده گون باتاندا یاسه باتدی ماسوا

عالم امکان بو غمده گئیدی زینب تک قرا

 

شمردون کسدی حسین باشین وروب دی نیزیه

آلدی باشسیز پیکری آغوشه خاک کربلا

 

آتش جهل و عنادیله آلیشدی خیمه لر

غارت ائتدی هر نه ده قالمیشدی قوم بی حیا

 

قورخودان اهل حرم اوز قویدولا صحرالره

خیرداجا آهولری سالدی نفسدن اشقیا

 

قورخلی چول قان توکن لشگر آدامسیز اهلبیت

هرطرف بیگانه بیر کیمسه یوخیدی آشنا

 

تشنه لیقدان دیل دولانمیردی بیری دردین دئسین

سینه مالامال دردیدی تاپیلمازدی دوا

 

نینوا گلدی نوایه سس وئریب قدوسیان

نالیه گلدی بو غمده ساکنان نه سما

 

ییغدی چولدن بیر به بیر زینب آدامسیز قیزلاری

زیر پر آلدی قانادسیز قوشلاری یوروقون هما

 

شمع خاموشیدی اما شعله هجرانیدن

غصه لی پروانه لر یاندی کول اولدی برملا

 

باخدی بیر صحرایه بیر قیزلاره دیلدن چکدی آه

آختاریردی چاره تا راحت اولا آلعبا

 

گزدی یانمیش خیمه گاهی دیلده هجران شعله سی

ائیله دی بیر خیمه اول یانمیش چادرلاردان بنا

 

سس سه وئردی حرم آهولری آغلاشدیلار

دولدوروب کرب و بلا صحراسینی آه و نوا

 

کیم خیاله سالدی گوندوز قوزانان هنگامه نی

آز قالیب بیر دفعه لیک روحی بدندن آیریلا

 

گر اوشاق بیر دفعه قورخسا نچه دفعه دیسگینه ر

هی خیالینده اولار تصویر او غملی ماجرا

 

قان قلنج اوخ نیزه غارت قمچی خیمه یانماقی

صف چکیب هی گوز قباقینده اورک دوندی قانا

 

قورخوسوندان قوش کیمی قیزلار سیخیلدی بیربیره

گه یاتیب گاهی هراسان سسلنوبلر وای بابا

 

هر طرفدن سایه دوشسیدی او یانمیش خیمیه

دیسگینه ردی خردا قیزلار کی گلیر اهل جفا

 

یا اوجالسیدی اگر آت شیحه سی بیر سمتیدن

فکر ائه دردی قصد ائدیب دی خیمه نی قوم دغا

 

زینبه غارت غمی اولدی شهادتدن چتین

لشگرین ظلمین قلم یازماقلیقا ائیلیور حیا

 

داغلی قلبین صبحه جک بیرده اوشاقلار داغلادی

سیلی ردی اوزلرینده وار ایاقلاری یارا

 

یوردی غم غصه ایاقدان سالدی بیکس زینبی

سسلدی گل دادیمه ای بیکس و مظلوم آنا

 

دوتموشام شام غریبان بو گئجه قارداشیمه

گل تسلایه حسینین یاسی قویما خوار اولا

 

یاتدی توپراق اوسته نازیله یاتان دلخسته لر

صبحه جک زینب اویاق قالدی اودریای وفا

 

قالمادی طاقت خانیم اوتدوق یئره قیلیدی نماز

اللرین قالخیزدی گوزیاشلی بیله ائتدی دعا

 

بار الها ائیله بو قربانلاری بیزدن قبول

زینبه ای صاحب عالم اوزون صبر ائت عطا

 

قورخولی صحراده سس یاتدی کسلدی های هو

یاتدی زینبده زبس خستیدی اول کان وفا

 

بیر زمان آچدی گوزون گوردی گلیر بیر غملی سس

بیر آنا ائییلور یارلی قوش کیمی آه و نوا

 

باخدی بیر اطرافه گوردی یاتمییوب بیکس رباب

سسلنیر یاندیم شرار محنته دیلسیز بالا

 

گل علی گل ایچمیشم سو قان اولوب باغریم اوغول

اود دوتوب اودلاندی سینم یوخ داخی سنسیز صفا

 

گل اوغول یول گوزلورم سالما نظردن سن منی

حرمله یوخدور داخی سو ایستینده اوخ آتا

 

دفتر و خامه بو محنتده گنه مدهوش اولوب

ثبت ائدیر حسن ختام مطلبی یا زینبا

 

کانال اشعار محمد هوشمند (مدهوش)

وداع حضرت امام حسین (ع) 4051

وداع حضرت امام حسین (علیه السلام)

 

کربلا دشتنینده عاشورا گونی

آز قالیردی باتماقا زهرا گونی

 

حق و باطل اوسته باشلاندی جدل

کربلا دوندی منایه ما حصل

 

بیر طرف یئتمیش نفر آزاده خو

بیر طرف سایسیز سپاه فتنه جو

 

کئچدی جاندان بیربه بیرآزاده لر

جان وئروب دلدارینه دلداده لر

 

کربلا دشتی تاپیب شور و صفا

تشنه لبلر ایچدیلر آب بقا

 

کسدیلر اعدا خیامین دوره سین

داندیلا مهر و محبت سوره سین

 

جانینی تقدیم ائدیب پیر و جوان

قالدی یالقیز سرور آزادگان

 

یکه تاز عرصه بزم الست

شوق وصل یاریله اولموشدی مست

 

قالمادی هجرانه قلبینده قرار

ائیله دی کوی نگاری اختیار

 

هر نقدری سسلدی هل من معین

تیریله وئردی جوابین قوم کین

 

گلدی اخیامه او شاه تشنه کام

اهلبیتین سسلدی منی سلام

 

خیمه ده اهل حرم خرد و کبار

آلدی شاهین دوره سین پروانه وار

 

کیم خبردار اولدی آرتدی محنتی

خیمگهده دوشدی هجران صحبتی

 

قالمادی بیر کس ده صبر و اختیار

قمری لر کوکو ائدیب آغلاشدیلار

 

اهلبیته باخدی بیر حسرتله شاه

اود دوتوب اودلاندی دیلدن چکدی آه

 

بیر به بیر آلدی قوجاقه قیزلاری

آسمان عصمته اولدوزلاری

 

آخرین دیدار او شاه دلنواز

بیر به بیر اطفاله ائتدی مهر و ناز

 

مرکبه عشقه سوار اولماق همان

وعدگاه یارینه اولدی روان

 

زینب صدیقه زهرایه نشان

گوردی قارداش آیریلیر ائتدی فغان

 

سسلدی قربان اولوم گئتمه اخا

بیر دایان زینب سنه اولسون فدا

 

گرچه عازم سن اخا میدانه تک

من دولانام باشیوه پروانه تک

 

نیلیوم یورقون یارالی تشنه سن

تا نفس وار آغلارام بو غمده من

 

مست سن جام فنا فی اللهیدن

آیریلرسان خیمه و خرگاهیدن

 

اولموسان آماده قربان اولماقا

جدیمه جنتده مهمان اولماقا

 

آزقالیر اولسون شهادت قسمتین

یوخ سنین آب فراته حاجتین

 

بیر دایان ای پادشاه ذوالکرام

بیر سفارش ائلیوب زهرا آنام

 

قتلیوه لشکر ایتیلدیب خنجرین

وئر اجازه زینب اوپسون حنجرین

 

آز قالیر آفاق دگسین بیر بیره

قانیوی شمر لعین توکسون یئره

 

عمریده رخت وفانی سویمادیم

آند اولا بو جانه سندن دویمادیم

 

دل دولوب دردیله درمان ائیله گئت

دشت هجرانی گلستان ائیله گئت

 

ای منه روح و روان بیر آن دایان

جان زینب جانیوه قربان دایان

 

الغرض سلطان دشت نینوا

زینبی گوردی ائدیر آه و نوا

 

اندی مرکبدن او شاه با وقار

سسلدی گل ای منه هر یئرده یار

 

گل باجی گل آخرین دیداریدور

آیریلیق هنگامی پر اسراریدور

 

ایستیرم منده باجی کامه چاتام

شوق وصل یاریله قانه باتام

 

اولموشام سرمست جانان عشقینه

جان وئرم میداندا قران عشقینه

 

اولموشام سرمست جانانه باجی

جان وئرم تا دین و قرانه باجی

 

گوردی زینب قارداشی مخمور عشق

مقصدی میدان باشیندا شور عشق

 

وردی رخصت قان اولان گوزیاشینه

قبله عشقین دولاندی باشینه

 

یاد ائدیب زهرانی دولدی گوزلری

اوپدی جای بوسه پیغمبری

 

جلوه حق بیرده اعجاز ائیله دی

زینبی دمساز و همراز ائیله دی

 

حل اولوب کوی وفاده مسئله

زینب کبری او دم گلدی دیله

 

گئت حسین اولما حرمدن ناگران

گوزلرم قیزلاری گوز تک مثل جان

 

قویمارام پرچم یاتا قانین باتا

قویمارام هند اوغلی مقصوده چاتا

 

زاده مرجانه نی خوار ائیلرم

حقیوی گون تک پدیدار ائیلرم

 

سن گئدورسن جدیمه الان قوناق

لحظه لحظه منده آرتیر اشتیاق

 

بیر نفسده گوزدن آتما زینبی

کوفه ده یاددان چیخارتما زینبی

 

زینبه باخدیوقجا اول عالم پناه

اود دوتوب دیلدن دمادم چکدی آه

 

ائتدی فرمایش کی اولما ناگران

یولداشام یوللاردا سنله هر زمان

 

ناظراولام شامه جک احوالیوه

مرحبا احوالیوه اقبالیوه

 

همدم اولام دیلده سوز و سازیوه

نیزه ده گلم باجی پیشوازیوه

 

خواهشیم وار سندن ای زهرا خصال

قارداشین وقت نوافل یاده سال

 

صبر ائیله بو غمده آرتیرما فغان

ائیلمه بو نوعی گوزیاشین روان

 

صبر ائیله وار ماجرالر عاشقه

نوش دور جام بلالر عاشقه

 

من گئدیم آمال دل گلسین اله

تا سالیم سجاده قانلی مقتله

 

باشیمی تشنه کسنده شمر زار

جانیمی جانانیمه قیلام نثار

 

گل او یئرده جلوه دلداره باخ

یاره باخ دلداره باخ معیاره باخ

 

ظهر عشق اولدی یوباندیرما منی

من باجی اللهه تاپشیردیم سنی

 

جام وصل یاری من نوش ائیلرم

عالمی عشقیله مدهوش ائیلرم

 

کانال اشعار محمد هوشمند (مدهوش)

زبانحال حضرت زینب (س) در حال احتضار 4019

زبانحال حضرت زینب (سلام الله)

در حال احتضار

 

زینبون جان اوسته دی ای مهربان قارداش حسین

حالیمه یوخدور بو غربتده یانان قارداش حسین

 

واردی سندن خواهشیم ای معدن لطف و عطا

تئز یتیر شامه اوزون جانیم سنه اولسون فدا

صون نفسده باشیم اوسته گل اوخی قران اخا

محضرونده بذل ائدیم جانانه جان قارداش حسین

 

اولموشام الی بئش ایل دی عشقیویله آشنا

عشقیوه خاطر دئدیم هر نه بلا گلدی بلی

باشیوین آردیجا گزدیم چوللری گئتدین هارا

کوی عشقونده دولاندیم هر زمان قارداش حسین

 

شامیده دولدی بلادن صبریمین پیمانه سی

غربت اولکه اولدی آخر بو غریبین خانه سی

گل اولوم من بیرده شمع لطفوین پروانه سی

هارداسان ای زینبه روح و روان قارداش حسین

 

گویلوم ایستیر ائیلییم بیرده زیارت من سنی

لطف ائیله ای ذوالکرم قوتار بو حسرتدن منی

آز قالیر سولسون بو غربتده حیاتیم گلشنی

خرمن صبریم اولوب غمدن تالان قارداش حسین

 

قورتاریر عومروم قوتارماز عومرومون نیسگل لری

دولدورار شرح غمیم بوندان صورا مقتل لری

یادیمه سالدوقجا دشت کربلاده ائل لری

شعله قلبیمده چکیر سوز نهان قارداش حسین

 

هی خیالیمده مجسم دور نه ظلم ائتدی عدو

تشنه لب قانه بویاندون تاپمادیم بیر قطره سو

باشیوی گوردوم کسور شمریله اولدوم روبه رو

تاپمادیم چاره باخیب یاندیم امان قارداش حسین

 

یادیمه سالام نه ظلم ائتدی او چولده اشقیا

یدی قارداشین غمینده ائیلرم آه و نوا

قالدی نعشین گون قباقینده سنه جانلار فدا

نیزه باشین ائیلدی باشون مکان قارداش حسین

 

سیل غم موج ائیلدوقجا صبریمین سدین ییخار

خاطراتیم قلبیمی هر یاده دوشدوقجا سیخار

سن کیمی قارداش باجون اولسون مگر یاددان چیخار

ائتمیشم دیلده آدین ورد زبان قارداش حسین

 

مرغ بسمل تک اسور هجرینده قلب مضطریم

یوخدی باشیم اوسته عباس و علی اکبریم

هی باخیر کرب و بلایه ساری حسرت گوزلریم

قلبیمین باشین آلیب قاره دومان قارداش حسین

 

باشیم اوسته گل تلاوت ائت گیلین قرآن اوزون

باشیمه سال سایه سوندور دیلده کی هجران کوزون

یوخدی بیر کس باغلییا من بیکسین آغلار گوزون

گوزلریم قالمیش یولوندا ناگران قارداش حسین

 

یوخ سوزوم من هر زماندا تیرغم آماجیم

آخر عمرینده قارداشسیز قالان بیر باجیم

هر زماندان آرتیق الان لطفوون محتاجیم

تنگ اولوبدی زینبه سنسیز جهان قارداش حسین

 

"هوشمند"م اولموشام شمع وفا پروانه سی

حالیمی درک ائیلیینمز درد و غم بیگانه سی

دفتر عشاقه ثبت ائیله حسین دیوانه سی

زینبین یازدیم دیلیجه هارداسان قارداش حسین

 

 محمد هوشمند

حضرت ابوالفضل (ع) 3792

حضرت ابوالفضل (علیه السلام)

 

هر زمان گورسم گلیر موجه آخیر هریانه سو

آغلارام یانام ویرار اود بو دل سوزانه سو

 

یاده عاشورانی سالدوقجا اولار دریا گوزوم

وار یئری دونسون گوزومده قطره قطره قانه سو

 

یاده سالام عترت زهرانین عطشان لبلرین

دیل دوداقیم اودلانار گلدوقجا هر عنوانه سو

 

نه روادور موجه گلسین چوللره آخسین فرات

ورمه سین بیر قطره ده قوم جفا مهمانه سو

 

باخدی سقا دیلده حسرتله بوشالمیش مشگینه

اود دوتوب قلبی گتیردی غیرتین جولانه سو

 

تشنه سقا مشکی دولدوردی ولی لب ورمادی

تا خجالتدن دونه بیر اتش سوزانه سو

 

ائیلدی سقانی شرمنده اوشاقلاردان عدو

اولمادی امکان گتیرسین تشنه لب طفلانه سو

 

اصغرین یاد ائیلدی تا عمری وار بیکس رباب

ایچدی اما هر ایچنده اود سالیب دیر جانه سو

 

گون به گون آرتار آزالماز هیچ ربابین نیسگلی

یازسا شاعر لر نقدری دفتر و دیوانه سو

 

یاتدی قیزلار یاتمادی شام غریباندا رباب

زورق جسمین سالیب بیر سهملی طوفانه سو

 

اصغرین یاد ائیلدوقجا توکدی گوزیاشین دئدی

هارداسان قسمت اولوب سنسیز من نالانه سو

 

اولمادی بیر کسده انصاف و مروت تا دییه

قوخمیون دریا قوتولماز وئرسه بیر پیمانه سو

 

سو آدی گلدوقجا عطشان گوگلومی مدهوش ائدیر

گوزلریم توکسون گرک دیر بو دل سوزانه سو

 

کانال اشعار محمد هوشمند (مدهوش)

حضرت امام زمان (عج) 3353

سلطان آفرینش

 

ای ملک آفرینشه سلطان هایانداسان

جان دولت و جلالیوه قربان هایانداسان

 

ای عالمین صفاسی اورکلر داریخدی گل

اولدوق غمینده بی سرو سامان هایانداسان

 

درد اولدور بو جمع پریشانی قیل نظر

تئز گل سنین الینده دی درمان هایانداسان

 

گلسن گلر سنیله بهار بو خزان چوله

داغ داش اولار دوباره گلستان هایانداسان

 

سنسیز نقدری بایرام اولوب یاسه باتمیشوق

شادلیق ندور گر اولماسا جانان هایانداسان

 

سن بیر درین دنیز کیمی جوشقون بولاق کیمین

بیر عمردور کی قالمیشوق عطشان هایانداسان

آخدیقجا گوزیاشیم سوزولور حسرتیم اوزه

غم تیری ائتدی باغریمی شان شان هایانداسان

 

هی چاتدی جمعه شنبه یه ، هی شنبه جمعه یه

یوخدور بو دوره نقطه پایان هایانداسان

 

تقویم لرین وراقلاری شاهیددی بیر به بیر

سنسیز اولوب دی مهریمز آبان هایانداسان

 

مدهوش ائدیب فراق منی آزقالیر یئنه

مجنون کیمین دوشم چوله ویلان هایانداسان

 

کانال اشعار محمد هوشمند (مدهوش)

عرض اردات به حضرت امام حسین (ع) 2694

عرض اردات به سالار شهیدان

حضرت امام حسین (علیه السلام) 

 

حسینین گل یوزی جنت دی والله 

وجودی خلقته زینت دی والله 

 

حسین عالملره روح و رواندی 

صفای گلشن خلقت دی والله

 

حسین قانیله تفسیر ائتدی عشقی

که بیعت ظلمیله ذلت دی والله 

 

قیام ائتدی کی قران زنده قالسین

بیزه آزاده لیق اورگتدی والله

 

بو مکتبده اولان ظلمه باش ایمز 

سراپا مکتبی غیرت دی والله 

 

حسینین نوحه سی ذکر و دعادور

عزاسی درس حیثییّت دی والله 

 

بو بزم عشقه هر کس یول تاپانماز

گلر بیر کیمسه کی دعوت دی والله 

 

قرا پرچم بیزه نام و نشاندی 

قرا کوینک بیزه عزت دی والله 

 

بو درگهده بیری شرمنده اولماز

نه احسان اولسا بی منت دی والله

 

اولور تکرار اگر هر ایل عزاسی 

بیزه برنامه وحدت دی والله

 

مریض عشقه وار دارالشفاسی 

دواسی قان اولان تربت دی والله 

 

گوزلدی هر مکاندان کربلاسی 

مزاری قبله حاجت دی والله 

 

هاچان دعوت ائدر "مدهوشی" بیرده 

بیلیر قلبیم دولی حسرت دی والله 

 

منه لطف ائیله سه آخر نفسده 

نه غم، جان وئرماقیم راحت دی والله 

 

کانال اشعار محمد هوشمند (مدهوش) 

زبانحال حضرت زینب کبری (س) 2650

زبانحال حضرت زینب کبری (سلام الله)

 

گل باجین ترک ائله ییر غصه لی دونیانی حسین

دینجه لیر ظلم و جفادن يورولان جانی حسین

 

تئز یئتیر شامه اوزون جان وئریر م حسرتیله

گوزلریم آختاریری سن کیمی جانانی حسین

 

بیر کسیم یوخ دی بو غربتده منه مونس اولا

اولورم ائیله خبر عترت طاهانی حسین

 

نه باجیم وار باشیم اوسته نه ده قارداش نه آنا

کیمسه یوخ باغلیا بو دیده گریانی حسین

 

باجیوون مونسی غربتده فقط گوز یاشی دی

توکولور گور نئجه هجرینده اورک قانی حسین

 

عشقیوه سینه ده یئر وئردیم ازلدن قارداش

خوشلادیم عشقویله هر غم عظمانی حسین

 

دلخوشام قانلی قیامینده سنه یولداشیدیم

ایکیمیز حفظ ایله دیک صحنه ده قرانی حسین

 

حقین اثباتینه هر یئرده چالیشدیم قارداش

دانیشیب خوار ایلده دیم فرقه دونانی حسین

 

کربلا جلوه آیات خدایی دی ولی

یانارام یادیمه سالدیقجا قضایانی حسین

 

 ائللریم باتدی قانا ظلمیله خیمه م یاندی

بحر غم جوشدی ائدیب روحیمی طوفانی حسین

 

اولمادی دادرسیم کسدیله حق اوسته باشین

هاردا لب تشنه کسللر بئله قربانی حسین

 

باشیوین عشقی منیم سالدی بلایه باشیمی

گزدیم اردینجا سنین کوه و بیابانی حسین

 

کوفه ده قانلی باشین ایله دی پیشواز منی

سایه سالدی باشیما جلوه ربانی حسین

 

نه اولارشامل اولا مرحمتون بیرده منه

درک ایله صون نفسیمده من نالانی حسین

 

غصه لر سالدی ایاقدان منی امدادیمه گل

ایله ییب آیریلیقین روحومی زندانی حسین

 

 شام ده شامه دونوب زینبیوین قاره گونی

گل گتیر شامه اوزون روضه رضوانی حسین

 

تا نفس وار گوزل آدین دلیمین ازبریدی

عشقی تکمیل ائلدیم قالمیا نقصانی حسین

 

آلیرام عطریوی بو قانه باتان کوینک دن

سالیرام یادیمه اوچ شعبه لی پیکانی حسین

 

داغلاییر سینه می هرآن سینه وین اوخ یاراسی

اولمادی هیچ یاراسین باغلاماق امکانی حسین

 

ممکنیم اولمادی دفن ایلماقا پیکریوی

کربلا دشتینه تاپشیردیم او اعضانی حسین

 

قولومی باغلادی دشمن سنین عشقینله منیم

تا کی عالم بیله بو عهدیله پیمانی حسین

 

غم هجرونده یانیب دوندی کوله خسته گوگل

سوندوره بیلمه میشم بو دل سوزانی حسین

 

 نچه مدت دی بو آرزیمدی چیخان وقته جانیم

سن تلاوت ائده سن صوتیله قرانی حسین

 

نه اولار شامه گلیب شاد ائده سن زینبیوی

 چاره سیز دردلرین سنده دي درماني حسین

 

اولمادی کرب و بلا زینبیوه مدفن اگر

گل منه تحفه گتیر تربت اعلانی حسین

 

گوزلریم یولدا قالیب هارداسان ای روح و روان

گور نئجه عرشه چیخیر زینبین افغانی حسین

 

گل اوزون قبریمی قاز دفن ائله عزتله منی

گل دریغ ایلمه حقیمده بو احسانی حسین

 

هوشمندین اوره گی یازدیقیجا قان اولدی

وار یئری اغلادا بو غم هامی دنیانی حسین

 

محمد هوشمند