احوالات مجلس یزید
جهاندا ویرما لبِ لعله جامِ صهبانی
حیات خرمنینه سالما نارِ سوزانی
گر چه بیر سودی ظاهرده ، لیک باطنده
یانار بیر اودّی که اودلار تمام اعضانی
نهالِ عمری بو آبیله آبیار ایلیَن
چتین دَرَه ثمر ، نخلهء منایانی
اولار زمانه ده هر کیمسنه که باده پرست
بولر هوا و هوس ، دورِ چرخِ مینانی
هوای بادهء گلگونیله اولان سرمست
اولار پرستشی عقلا" هوای نفسانی
او کس که ساخلیا بیر لحطه الده پیمانه
بیر عمر الدن آتار ، تارِ عهد و پیمانی
او زوری وار ، که بو آتشِ مزاج ، آبِ مضاف
چو خاک ، باده ویره قدرِ باده پیمانی
ایدر ذلیل عزیزی ، اراذل اشرافی
گدادن اسگیک ایدر مِی ، مقامِ سلطانی
دییر شرابیله سرمست او سوز گرک دیمه سون
ایدر او شرّ عملی غیرِ شأن و شایانی
شهود ایستیه سن اهلِ عصرِ حاضردن
گوزوم گور آخرِ مِی خواره و سُکارانی
گر عبرت اخذ ایده سن ایسته سن گچن لردن
اوخی صحایفِ تاریخِ شامِ ویرانی
یزیدی گور ایله جبّار و مقتدر سلطان
او دم که گوردی مراد نجه دورِ دورانی
مِی ایچدی مست و خراب اولدی خانمانی خراب
دانیشدی مست و خراب عالمینده هذیانی
تلاوت ایلدی بیر آیهء کلام الله
ایدن کلامِ الهیّه دن تبرّانی
ایدوب او آیه نی ناحق ، حقله استدلال
بنی امیّه نی حق ، ناحق آلِ عمرانی
دئدی خدادور آلار مُلک ایستسه کیمدن
اوزی سوَر کیمه مُلکی بویورسا ارزانی
اولوب بیر آتشِ طعنه بو ناحق استدلال
یانوب او آتشه حق اهلنون دل و جانی
او آتش ایلدی مجبور ، آتشین نطقه
یگانه بنتِ قسیمِ جنان و نیرانی
دل آچدی نطقه علی تک ، علی قیزی زینب
کلامی حیرته سالدی کلیم موسانی
بویوردی حمد او پرودگاره دور مخصوص
وجوده گَتدی عَدمدَن بو کون و امکانی
اولا صلوة و سلام اوز بابام رسولِ حقه
که ذاتِ حق اونا زیبنده بولدی اسرانی
صورا دئدی صدق الله العلی العظیم
بَریدی کذبدن البّته ذاتِ سبحانی
او لهجه ائیله ایدردی تلاوتِ آیه
علی اوزی دیه سن بس اوخوردی قرآنی
یزید ذکر ایلین مُلکه آیه ردّینده
کلامِ حقدن اولوب ثمّ کانَ عنوانی
یتوردی آیه نی یَستَهزؤنیده ختمه
او اهلِ باطله آندیردی لفظ و معنانی
که یعنی سوء ده اصرار ایدنلر آخرده
گرکدی ایلیه تکذیب صدقِ فرقانی
یزید بیله گمان ایلدون جفائیله
که بیزدن اخذ ایلماقدان بسیطِ غبرانی
و تنگ ایلماقون بیزلره فشاریله
بو وسعتیله بو آفاقِ طاقِ خضرانی
و سن بو گون بیزه ذوالاِقتدار اولماقوون
خدادن اولدی بیزه یوخسا شأنِ نقصانی
و بیر کرمدی سنه ربّ ذوالکَرامتدن
اوزیوه فرض ایلدون امتنانِ منّانی
و ظنّ ایلدون اوز قدریون جلالتی دور
بو گوزده ذلّتیله گورماقون عزیزانی
بِاَنفِکَ فَشَمحِت نَظَرتَ فی عَطفَک
سُروریلن سیلوسن آستین و دامانی
و تَنقضُ مَرحا" مدرَوَیکَ حینَ رَأیت
ایدن مرادیوه اقبالِ دونِ دنیانی
اوخورسان آیهء مُلکی بو قصد و نیّتیله
که جلوه لندیره سن حقّ اهلِ بطلانی
بو فکره بیزدن اولوب منتزع سنه تفویض
بو خانوادیه مخصوص مُلکِ سلطانی
دایان یزید دایان ، گچ بو فکرِ باطلدن
باشوندان آت بو هوای غرورِ بیجانی
اونوتدون آیهء لا تحسبنّ نی آیا؟
که اهلِ باطل ایدر قول حقّ نسیانی
خدای حقّ که حقّیله گوندروبدی کتاب
دیوب کتابده هر خیر و شرّ انسانی
گمان ایلمه اعمالِ خلقدن غافل
خدای قادر و حیّ و بصیر و دانانی
ویرر جزاده سالان انتقامی تأخیره
جزای ذرّهء اعمالِ پیر و برنانی
و بیله بولمه که کُفّاره خیردور مهلت
نه بلکه شرّیدی یتسون کماله عصیانی
کماله یتمسه عصیانی درک ایده بولمز
لَهُم عذابُ مُهینی ، وَعیدِ یزدانی
دگول بو سلطنتون ای دنی خدادادی
مقامِ عالیه اعلا یتورمز ادنانی
بساطِ کینه و بیداددور بو تشکیلات
گرکدی سلطنته عدل و داد میزانی
بو عدلدندی ای آزاده گشته نون اوغلی؟
سالا عذارینه اهلون نقابِ دیبانی
ولی قالا باش آچوخ اهلِ بیتِ پیغمبر
یوزه نقاب ایلیه طرّهء مطرّانی
اولا سنون حرمون عزّتیله پرده نشین
تناول ایلیه هر نعمتِ گوارانی
و لیک فاطمه قیزلاری آج سوسوز قالسون
اسارتیله دولانسون چولی بیابانی
او نوع شهر به شهر ، اهلِ کین دولاندیرسون
که هر وضیع و شریف ایلسون تماشانی
و اولماسین بولارین بیر حمایت ایلینی
که قانینه بویانوب هاشمی جوانانی
بولار پیمبری انکاریون نتیجه سیدور
و دانماقون اثری بیزلره تولّانی
بلی زِنای جگر خوار هندِ زانیه نون
اولار نتیجه سی آخر سن کیمی جانی
پیمبر قیزینون اوغلونی شهید ایلر
اسیر ایدر حرمِ شهریارِ بطحانی
ساتار اوز آخرتین پنج روزه دنیایه
اوزینه مایهء عزّت بولر بو سودانی
مگر نشانهء عزّتدی دهر اقبالی
و یا زمانه نون ادباری ذلّ برهانی
بیزه نه فرق ایدر اقبالِ دهر ، یا ادبار
بیز اهلِ بیته طُغیلی دور عالی و دانی
بیزیم طرقتمیزدور شریعته ترویج
بو یولدا فقر و غنانون نه جای رُجحانی
و حال آنکه بو بلقیس خادمه حرمه
و لو مسلّم اولا حشمتِ سلیمانی
و یا که ایلیه دنیای دون ، ایله ادبار
نه اوّلی اولا ادبارینون نه پایانی
خدا یانیندا بیزیم شأنیمزدن اسگلیمز
فقط بیزه یارادوب شأن ، خالقِ شانی
او که گوزونده سنون مایهء مَذلّت دور
قسم عزیزه بیر عزّتدی عِزّلر کانی
عجب دگول بو جنایاتِ فاجعه سندن
ایدر سنون کیمی هر تخم نسلِ شیطانی
نیه امید دوتولسون او تخمِ فاجره دن
که دیشلیوب کبدِ سیّدِ شهیدانی
نموّ پرورش لَحمینون بولوب سببی
رهِ سعادته جاری ، سعیدلر قانی
اولار زمانه ده اولادِ فاسق و فاجر
هامی فجوره مروّج ، فسوق ایچون بانی
مگر دگول سنه اجداد بدر اشیاخی؟
پیمبرین یوزینه چکدی تیغِ برّانی
مگر پیمبرِ اسلام قتلینه فرمان
اُحدده ویرمدی کفّارِ آلِ سفیانی؟
دونن دی وَقعهء صفّین و نهروان و جمل
آتان معاویه سالدی او شور و غوغانی
اوزونده ایتماقا تکمیل ، نقصِ اجدادون
پیمبر اوغلونا ویردون او قتل فرمانی
او قدر ناحق اولانلار ، توکوبله حق قانی
دیماق اولار یوولوب دین و شرع بنیانی
یغیشدی بیر بیله قان عاشرِ محرّمده
محیطِ خون ایله دی وادیِ بلایانی
ایله تلاطمه گلدی که سیندی فُلکِ نجات
زمانه یاد ایلمز بیرده نوح طوفانی
بولار نتیجهء کفرِ قدیمدور سیزده
که آشکار ایلدوز دلده بغضِ پنهانی
سن آرزو ایدوسن ایمدی بدر اَشیاخین
علی الینده ئولن قومِ بی سر و پانی
گوریدیلر که نجه بدره انتقام آلدون
و سِیر ایدیدیله بو قدرتِ مهیّانی
دییدیلر سنه شل اولماسین بو ال که قوروب
بو سلطنتله بیله انتقام دیوانی
و شادیسن بونا کی نورِ حقی سوندوردون
جهانی ایلموسن روزگارِ ظلمانی
آغاج ویروسان او خشکیده تشنه لعلِ لبه
که یاندورار شررِ ظلمون آبِ حیوانی
و حالِ آنکه پیمبر اوپوب او لعلِ لبی
نه تک او لعلِ لبی ، دُرّ تک ثَنایانی
نه آنلوسان او دیشین قیمتین ، شکست ایدوسن؟
بلی گدا نه بولر قیمتِ برلیانی
بابالاروندا پیمبر دیشین شکست ایتدی
خبیث نطفه ، خبائث لره اولار بانی
هله آیلمیه جاقسان بو خواب غفلتدن
که خوابِ غفلتی سنگین ایدر هوسرانی
و توکموسن اوز الونله او کیمسه نین قانین
شبابِ اهلِ جنان سیّدیدی رحمانی
و آفتابدی اولادِ عبدِ مُطلّبه
و نورِ دیدهء یعسوبِ دینِ ربّانی
فَرحله سسلوسن اسلافوی که کافریدی
و ایلوسن او قبول اولمیان تمنّانی
بو آرزوده سن ای کاش اولیدیلر حاضر
گوریدیلر سن ایدن ظلمِ بی مهابانی
قسم معاده قیتسیدیلر بو دنیایه
دیسیدیلر سنه اوضاعِ دارِ عقبانی
اوزون او وقت دیردون که کاش اولیدیم شل
سوَردون اوندا کسلمیش ، بو دستِ عدوانی
بو آرزونی ایدردون که دوغمییدی آنان
و اَممییدون او شیر حرام پستانی
و تئز اولار که مسیرون اولار عذابِ اَلیم
مخاصمون گوره جاقسان رسولِ رحمانی
دونوب خانم گویه باخدی شکایتیله
که ای علوّ ایلین قدرِ عرشِ اعلانی
آل انتقاموموزی سن بو قومِ ظالمدن
و آل حقوقوموزی ای حقین نگهبانی
بولاردی ظلمیله ئولدوربله رجالیمزی
بو اهلِ کفر توکوب خونِ اهلِ ایمانی
بولاردی کسدی بیزیم رشتهء حیاتمزی
و قتل نفس ایلدی هر نفوسه اولانی
و هتک ایلدیلر احترام پرده میزی
و ایتدیلر عوضِ احترام ، ایذانی
بولاردی ایلدی بی پرده ، پرده لی حرمی
بولاردی ویردی حریمِ خدایه تالانی
بولاردی عترتِ پیغمبری سویان امّت
آلان بولاردی نقاب ، بناتِ زهرانی
دونوب یزیده بویوری گینه عتابیله
که ای ایدن شرفِ عقلی ، نفس قربانی
نه ایله سن ایله فعّالِ مایَشایه قسم
اولورسان عاقبت افعالیوون پشیمانی
قسم خدایه که سن کسمدون مگر اوز اولون
کسنده ماریه ده هر یمین و یُسرانی
و یاره ایلمه دون سن مگر که اوز بدنون
یارالینده قُوشون زخمدار اَبدانی
یزید تئز اولی بیر گون که درک ایلرسن
وبالِ قتلِ حسینه ، حضورِ طاهانی
او گون پیمبرون اطرافینی اهلِ بیتی آلار
نجه که اولدوزلار آلار دورِ ماهِ تابانی
و لیک بیر پاراسی قانینه اولار غلطان
خجل او یوزلر ایدر ، رنگِ لعلِ مرجانی
بولار اولاردی که ظلمیله قانلارین توکدون
و توپراق اوسته دوشنلر وجودِ عریانی
و بعضیسی اولارین سبز اولار ، زبرجد رنگ
سالار خفایه جلالی جلای خضرانی
اولاردا زهرِ جفادن شهید اولانلار اولار
که زهرِ ظلمیله درک ایلیوب منایانی
او گونده منتقم حق بیر انتقام آلاجاخ
او انتقامدن اولماز فرار امکانی
ویرر او گون بیزه بیر سلطنت خدا ، که ایدر -
غبارِ مقدمیمیز فرق تاج شاهانی
بیز ایلروخ او گونون امر و نَهینی ، لا غیر
جِنانه یولّاروخ احبابی ، ناره اعدانی
قیامتین گونونون وحشتِ عظیمیندن
بیزیم محبّتمیز قورتارار احبّانی
یتر او گونده جزای زِنای شومه سنی
رکابِ ملّتِ اسلامه میندیرن زانی
و تئز بولوندره جاخ اَیُّکم اَشَرُّ مکان
و من اَضَلُّ سبیلا" ، معادِ جسمانی
فَرَح سنی بو قدر دلخوش ایتمه سین بونا کیم
کسوفه سالدون عجب شمسِ عالم آرانی
اولار که ظلمیله سن قانینه بویاندیردون
اولوبلا رحمتِ پروردگار مهمانی
سبیلِ حقّیده قانه باتوب شهید اولانون
تاپار مماتیله بیر جاودانی احیانی
و لا تَقُولوا لِمَن یُقتَلی تلاوت ایله
دوشون او آیه ده معنانی ، لفظِ اِحیانی
بو گونده من که سنون قدریوی کیچیک سانورام
و ایلورم سنه توبیخ و پندِ عظمانی
نه بو خیاله سنه فایده بغشلیه جاخ
و نه بو فکره سنه یوز ویره پشیمانی
سعادتین قاپوسی باغلیدور شقی یوزینه
سن اهلِ شرّه گرک روی خیر حرمانی
که قویموسان هامی اسلامیان گوزون آغلار
و غم شرارینه همدم ، صدورِ حَرّانی
او سخت دللره پندِ لطیف اثر ایتمز
که شوره زار نیدر آبِ ابرِ نیسانی؟
قلوبِ قاسیه دور بیله قلبلر سیزده
ایدن بو نفس لروزدی خدایه طغیانی
دولوب خدا غضبیله تمام جسم لروز
ایدوب بو جسمه نبی ، لعنتِ فراوانی
بولاردا باغلیوب اوز آشیایه سین شیطان
بو نفس لردی شیاطین ، یار و اعوانی
بو آشیاندان اولانلار سنون کیمی لر اولوب
دانوب عزیزی ، قبول ایلوبدی عُزّانی
ویرار سنون کیمی لر صدمه اسلامه
نه بیر مجوس ویرار نه یهود و نصرانی
ایدر بو عالَمِ اسلامی ایله بیر ننگین
که طَعنه ده قویار هر ملّتِ مسلمانی
عجبدی بیر طُلقادن اولان زِنا تخمی
شهید ایلیه بیر متّقی جهانبانی
و چوخ عجبدی توکولسون یره جفائیله
رسالتون گویونون انجمِ درخشانی
و توپراق آتسون او اولدوزلار اوسته بیر پارا ال
او اللر اولماسین عالمده دستِ انسانی
یزید سن بیله فکر ایلوسن بو دنیاده
شهید ایتماقیلا شهریارِ خوبانی
و هاشمی لری توپراق اوسته توکماقیلان
و صود امرلرینه وُرماقیله پیکانی
و هاشمیّه لری پرده دن چیخاتماقیلان
و باغلاماقلیقلان قول قولا صَبایانی
و روم اسیر تک انظاره جلوه ویرماقیلان
بو بانوان بناتِ بتولِ عذرانی
و بَر خلافِ شریعت ، فروش اَمریله
بو شاهزادهء سلطانِ کون و امکانی
سنه مُسلّم اولار مُلکِ سلطنت بیزدن
و سِیرِ شپّره ایلر فضای عنقانی
قسم بیزی شرفِ وحی له شریف ایدنه
و هاشمی ایدنه فرقِ تاجِ لَولانی
محالیدور که بیزیم سلطنت سنه یتیشه
دگول فضای هما خاکِ پشّه میدانی
بیزیم مقامِ رفیعه محالیدور یته سن
ثَرایه اَندیره لر اوجدَن ثُریّانی
بیزیم جلالتی خالق بیر آدمه ویرمز
یاراتسا یوز مین اگر آدمیله حوّانی
بیزیم نهایتمیز درک اولونمیوب اولماز
که ذرّه درک ایلمز ، کُنهِ مهرِ رخشانی
آتانماسان یر یوزیندن پیمبر اولادین
چه قتلِ عام ایده سن اُمّهات و آبانی
محالیدور آدیمیز یر یوزیندن اولسون محو
و لو که محو ایده سن اسمیله مسمّانی
خدایه ایلرم اوز شِکوه و شکایتیمی
عدوّدن آلا دادِ دلِ احبّانی
نه فکر و حیله که قلبونده واردی گزلتمه
و ایله بیزلره هر ظلمده تَقلّانی
خطادی ایلدوقون اعتماد هر نه که وار
چوخ آزدی عمروون البّته روز و شب سانی
و تئز اولاندی بو جمعیّتون پراکنده
او گون که خلق گورر رستخیزِ کبرانی
او گونکی گونده منادیّ حق ندا ایلر
که ایمدی لعنتِ حق دوتدی ظلمه دارانی
او گونده سیزلر اولورسوز بو قانلارا مسئول
او دردمند اولاجاخسوز که یوخدی درمانی
خدادن ایسترم ایتسون بیز اهلِ بیته تمام
تمام اجرِ جزیلی ثواب و احسانی
و ایسترم بیزه ویرسون جمیل اِنابتیله
اوزی خلافت ، حیّ ودود بنیانی
و حمد اولار او خدایه که ختم ایلر اوزی
هامی ولی لرینه رحمتینی احسانی
نظامِ کلمه نی ( ذهنی) صحیفهء رویه
مدادِ اشکیله خوش دوزدی کلک مژگانی
او خطبه عقلیمون اندازه سیجه شرح اولدی
اگر چه ایلموشم قطره ، شرحِ دریانی
او شرحِ خطبه ده هر جمله نی که زاید اولا
یانوب یازوب الیمون کلکِ آتش افشانی
و بعضی جمله نی شرح ایلماقدان عاجزیدیم
یازانمادیم ، اولورام اعتذار خواهانی
دگل نظر منه فردوس یا برائتِ نار
رضای حق منه منظوردور حسین جانی.
مرحوم استاد ذهنی زاده
منبع مجموعه کانالهای مدح و مرثیه
با سلام