احوالات بسته شدن راه فرات
و گریز به احوالات حضرت علی اصغر (ع)
از میدان تا خیمه گاه
راه فراتی باغلادی چون لشگر جفا
گلزار مصطفاده عطش قویمادی صفا
باغ پیمبرین سارالوب سولدی گللری
نسرین و ارغوانین اولوب رنگی کهربا
چوخ غنچه نین بهاری خزانه دونوب او گون
بلبل لرین ترانه لرین ایلدی نوا
بیر غنچه گلون عطشی چوخ شدیدیدی
ویردی قضا سو ، بلبلی قالدی یانایانا
نه غنچه دور؟ نجه سو؟ که یاندوردی بلبلی
دشت بلاده گلدی وقوعه بو ماجرا
غنچه حسینون اصغری ، نوش ایتدوقی سو قان
بیچاره عندلیبی رباب آدلی بیر آنا
تفصیلیلن بو مطلبی عرض ایلیم گرک
شرح خبردی لازم و ملزوم مبتدا
وقتیکه خیمه لرده عطش شدت ایلدی
یاندی بویوک کچیک او یانار اوددا برملا
اهل حرم بنای مواسات قویدولار
بیر عهد باغلیوب هاموسی ایتدیلر وفا
بیر شربه سو تاپاندا صغاره ویروب کبار
ایچمزدیلر مباد اوشاقلار هلاک اولا
آخر تاپولمادی بیر ایچیم سو خیامده
دللرده قالدی سو آدی مانند کیمیا
اصغر آناسینون جگری ایله اودلانوب
سود خشک اولوب ، بالا عطشه اولدی مبتلا
هاردان آنانین سینه سینه سود گلور مگر؟
اوچ گوندی نه ایچوب سو نه میل ایلیوب غذا
بیر غنچه دن لطیف بالا ، سوزش عطش
سوز نهانینه یوخدی حد و انتها
هم آجلیقین حرارتی وار هم سوسوزلوقین
خاصه گون ایسی سی ، عربستان کیمی هوا
از بس سیزیلدیوب دوتولوب سس ، باتوب نفس
عرشه چیخار فغانی اوجالمور ولی صدا
باش فرط ضعفدن بدن اوستونده دورموری
پژمرده غنچه تک اگیلور صاقه گه صولا
دل یوخ سوزون دئسون قوروموش لبلرین امور
ایستور اشاره ئیله ایده مطلبین ادا
حیران باخور آنا بالانون حالینه یانور
حسرت الین وورور الینه ایلور آه و وا
هر قدر دل دیور گینه آرام ایدنموری
بی اختیار صیحه چکور وا مصیبتا
گاهی دولاندیرور گهی گهواریه سالور
بلکه بیر آز یوخ گوزونه اولسون آشنا
یاتمور بالا ، بیر آز چابالور حس سیز دوشور
قالمور او قدر روحی بدندن اولا جدا
بیر چاره تاپموری ایدوری هر تشبثات
آخر گورور گرک گینه بوش سینیه سالا
ایستور امه گورور سودی یوخ، سینه اود ویرور
فریادین آرتورور چکلور هولیله بالا
لایلای دینده دل دوتولور نطقدن دوشور
رقتلنور ز بسکه گلوگیر ایدور بکا
پروانه تک دورور دولانور باشینه ، دیور
ای شمع بزم عیشیم آز آغلا سنه فدا
صبر ائت علی بو قدر اوزون ایلمه کباب
دوشدون نفسدن آخر هلاک اولدون آغلاما
هر دم دوتور یوزون گویه گوز یاشلی عرض ایدور
یاندی بالام سوسوزدان علاجیم ندور خدا؟
عمه آنا باجی آلور آغوشه هر بیری
بیر دل دیوللر اولمور او دلسیزدن اعتنا
قونداق نازنینی گل غنچه سی کیمی
الدن اله ویروله هامی خویش و اقربا
صاحب خبر سکینه خاتون دور دییر
گوردوم وجود صبریمی ایلور عطش فنا
فکر ایلدیم گیدوم عمم حضورینه
شاید سو ممکن اولوب ایتسون منه عطا
جان علی اکبره ویرم دئدیم قسم
مایوس ایلمز منی ، چوخ میلی وار اونا
بیر آز قالاندا خیمیه گوردوم که اصغری
آغوشه جان کیمی باسوب ، آغلور او مه لقا
دردیم علاوه لندی باخاندا او حالته
آرتوردوم آه و نالمی ، عمم ایشتدی تا
باخدی منه گورنده بویوردی سکینه جان
آغلورسان علتی ندور ای دیدمه ضیا
عرض ایتدیم عمه اصغره چوخ نسگلیم گلور
قلبیم دوتور شراره یانورام آغلورام لذا
دوردی ایاقه سویلدی سنده سکینه گل
بو درد بی دوایه تاپام بلکه بیر دوا
اصحاب خیمه سین دولاناخ بیر به بیر تمام
بیر قدر سو اله گله چوخ ایلورم رجا
تا سو آدین ایشتدیله اطفال تشنه لب
هر خیمه دن توکولدوله دیشره برهنه پا
قرخا یاخون بالا ، دالیجا دلده العطش
دوشدی قباقه نایبه خیره النساء
هر خیمیه یتیشدی دئدی وار سویا گمان؟
سس گلمدی ، مگر هامی ویردی جواب با
مایوس اولوب سوسوز بالالار ویردی سس سسه
فریاد العطشله دولوب دشت نینوا
قلب بریره ایلدی تاثیر ناله لر
سس چکدی آغلادی ایدوب احبابینی ندا
سویلوب قلج بیزیم الیمزده اولا اولا
اهلحرم سوسوز قالا ، هرگز دگل روا
بیر جمعیله فراته گیدوب سو گتوردولر
یا قان اولیدی اول سویی ، سو گلمییدی یا
اطفال تشنه باخبر اولدی که سو گلوب
دلشاد اولوب هامی که اله گلدی مدعا
هولیله یوز قویوب هامی بیر مشگین اوستونه
مجبور ایتدی کشمکشه شدت ضما
مشگین آچلدی بندی ، توکولدی تمام سو
گیتدی هدر صحابه چکن زحمت و عنا
بیر حسرت آتشی ده دوشوب اودلی دللره
یاندی یاخیلدی تاره دن دن اطفال بینوا
بعضی قویاردی مشگه قوروموش دوداقلارین
لابد سرایت نمه ایلردی اکتفا
بعضی باساردی باغرینا بوش مشگی ، گوزلرین
اشگیله دولدوراردی بوشالداردی جام سا
بعضی قویاردی سینه سینی سو آخان یره
تا سو برودتیله سوزشین آلا
بیر آنیده امیدی یاءسه دونن بنات
بولمم نه حاله قالدیلا یا دائم البقا
سوز چوخ کناره چخدی گچاق اصل مطلبه
منظور شرح قصه اصغردی (ذهنیا)
راوی دیر که عاشر شهرالحرامده
قلب حسینده واریدی منتها قوا
گلنار اولوردی رنگ جمال مقدسی
ویردوقجا یوز او سروره هر محنت و بلا
میدانه نچه دفعه که گلدی او گون کی گون
گویا گلور وقار تمامیله مرتضا
صاق ال همیشه قائمه ذوالفقاریده
صول ال جلودا ، سهم و صلابتده لافتا
قونموب جمال پاکینه مغلوبیت توزی
گویا تمام لشگری باقیدی جا به جا
قانه بویانمیوب دیه سن یار و یاوری
نه بیدقی یاتوب ، نه ئولوب صاحب لوا
گوردوم که رزمگاهه گینه عزم ایدوب گلور
بیر اوزگه حالیله خلف ختم انبیا
گل تک یوزی سولوب سارالوب رنگ احمری
حالی شکسته لیقدان علامتدی مطلقا
مرکوبینون لجامینی صول الده ساخلیوب
اما صاق ال ، گورنموری استونده وار عبا
هر دم عبانین آلتنا حسرتله بیر باخور
گوزدن توکر سرشکینی مظلوم کربلا
گلدی او حالیله دایانوب عرصه گاهیده
اما کمال یاءسیله اول مامن الورا
ناگه آلوب ال اوستونه بیر سود امر بالا
سسلندی بیر باخون گورون ای قوم اشقیا
سوز عطش نجه بوریوب شیر خواره می
ضعف ایلیوب الیم اوستنده غش آرا
هر چند حق یولی منیم حقیمده آزموسوز
ظنوزجه راه شرعده من گیتمیشم خطا
آخر بو سود امر بالا آل رسولیدور
دوتموش شرر وجودی یانار اوددی گوئیا
بیر شربه سو ویرون ، یتیشوب جان دوداقینه
جان سو یانندا تشنه ویره اولمیون رضا
سس چکدی هایهائیله دشمنلر آغلادی
از بس موثر اولدی بو احوال غمفزا
ویردی بروزه حرمله اما شقاوتین
پیغمبر و خدادن او شوم ایتمدی حیا
باخموب او سود امر بالا جان اوسته دور اوزی
سو ویرمه ما او بی گنهه بسدی منتها
بیر اوخ قویوب کمانه شتابیله ویردی تاب
شستیندن اولدی تا او ستم پرورین رها
تیر سه پر ، پر آچدی او پربسته بسمله
پیکان ظلمه پیک اجل اولدی رهنما
اوخ راه راست گلدی دگوب حلق اصغره
قد حسینی بوکدی ایدوب قوس تک دوتا
تشنه لطیف حنجری سالدی نه حالته؟
واضح دیمم بو مطلبه لازمدور اختفا
اوچ شعبه زهریلن سواریلموش اوخون یری
فکر ایلین بولر که نه حاله گرک قالا
مقصود شوم حرمله کامل گلوب اله
باخدی او حالده بالانون حالینه آتا
گوردی سو اولمادی دم پیکان ظلمیله
ویردی سوسوز فداسینه سو ساقی قضا
قربان یاری ایستدی زینت سیز اولماسون
قونداقینه جمالینه بیر یاخدی قان حنا
بیرده مبارک اوجونی دولدوردی قانیله
گوی سمتینه سپوب دئدی یا رافع السما
سن شاهد اول الهی بو قومون جفاسینه
یارب بو قانی ایله منه توشه جزا
شانا فصیل ناقه صالحدن اصغریم
اسگیک دگل یانوندا ایا خالق علا
گوی ضبط ایدوب ، قییتمدی بیر قطره قان یره
وار ایمدیده علامتی هر صبح و هر مسا
خورشید غوطه ووردی او قان ایچره صبح و شام
اسم شفقله حشره کیمی وار همان دما
سس گلدی یا حسین یره قوی شیر خواره وی
جنتده دایه وار ، الون اوستنده ساخلاما
بولدی حرم امیری که قربان اصغری
اولدی منای عشقده مقبول کبریا
توپراقلار اوسته قویدی او شاداب غنچه سین
دلدن او خشک اولان دلیله ایتدی بیر ثنا
قصد تشکریله ایدوب نیت صلوه
قیلدی نماز شکر ایکی رکعت او مقتدا
باخدی او طفله گوردی ویروب جانستانه جان
آلدی اله فداسین او فخریه منا
یوز قویدی خیمه گاهه ولی انفعالیله
باشین سالوب اشاقه سرشگی آخا آخا
گویا خجلدی ، خیمه لره گیتماق ایستمز
ایستور او حالیله بالانی گورمسون آنا
گاهی گیدور ، گهی دایانور فکر ایدور بیر آز
بلکه مصیبته چکه بیر نحویله غطا
صاق و صولا توجه ایدور حال یاسیله
واله دی خط سیرینه اول خضره رهنما
الده قالوب جنازه ، آلان یوخدی بیر نفر
هریانه حسرتیله باخور سبط قل کفا
آخر کسیلدی چاره سی ، سسلندی گل باجی
گل یاخشی ویردی اصغره سو لشگر دغا
پژمرده غنچه گور نه طروات لنوب باجی
خوشرنگ اولوب ، تاپوب سارالان صورتی ضیا
گل آل ، یتور آناسینه گوزلر بالا یولون
بو انتظار دردینه مشگلدی ابتلا
جان اوسته تاپشوروب منه جان و دلین رباب
آلسون امانتین داخی گوز تیکمه سون یولا
دنجلدی راحت اولدی بالام ، تازه یوخلیوب
آهسته آل ، مباد اویانوب گوزلرین آچا
بیرده سو ایستمز ، سوده میل ایتمز آغلاماز
یوخ زحمتی آناسنا بو خوابدن صورا
زینب آناسینا نجه تسلیم ایدوب اونی؟
ذکر ایلینده کثرت غم ایلوری ابا
اصغردن اصغر ایستدی اشعارین اصغرین
ختمین که چوخ زمانیدی ایتموشدی ابتدا
(ذهنی) صله ویروله سنه ، اولما ناامید
جود جواد اکرمه ، حرمان دگل سزا
مرحوم ذهنی
منبع مجموعه کانالهای مدح و مرثیه
با سلام