احوالات قتلگاه 5970
احوالات قتلگاه
خداوندا حسینیم هاردا اولموش قانینه غلطان؟
قالوبسان هاردا قارداش؟ زینبون اولسون سنه قربان
دولاندی غم فزا دشتی گوروب آختاردیقی یوخدی
یتیشدی بیر چوخور یره گوروب قان لخته سی چوخدی
ولی مَستور ایدوب داش ، یا سینق شمشیردور اوخدی
گوروب بو یر دونَن شمریله ال دامان اولان یردور
یقین ایتدی حسینی قانینه غلطان اولان یردور
گویَرمیش اللریله ایتدی چون مانع لره چاره
عیان اولدی یوزی اوسته دوشن بیر نعشِ صدپاره
گوروب نه باشی واردور ، نه الی ، باشدان باشه یاره
توکوب حسرتله گوز یاشی ، دئدی قارداش حسین سنسن؟
شهِ لب تشنه ، پورِ فاتحِ بدر و حُنِین سنسن؟
چکوب بیر آه ، سِیرِ کینهء اهلِ عناد ایتدی
چووردی آرخاسی اوسته ، گچن ایّامی یاد ایتدی
بیر ال قارداشدا ، بیر ال آسمانه دوتدی داد ایتدی
دئدی الله بو قربانی اوزون بیزدن قبول ایله
فیوضین شاملِ احفاء و اولادِ رسول ایله
دئدی قارداش اویانسیدون بولردون منده حالتدن
باجون اوز سهمینی گوردی بو صحراده قیامتدن
حکایت ایلیوم قارداش نجه اوضاعِ غارتدن
گیدوب یغمایه حتما" اَلبَسیله اسلحون بی شک
اقلا" قالمیوب اگنونده کی مندن آلان کوینک
گچن شب عرض ایدوم قارداش نلر چکدیم بلادن من
گونوز خسته ، گجه ظلمتده یانقین خیمه لر شیون
سیزیلتی بیر طرفده بیر طرفدن ناگران سندن
سورشدوم صبح اولاندا ، وای منه قارداش حضوریندن
کول اولسون باشیمه ، دوتدوم خبر خولی تنوریندن
حسین قلبیم اولوب غم مخزنی از بسکه درد آلدی
منی دور سال یولا شامه ، باجون بو چولده تک قالدی
نجه آخر وداعوندا سنی زینب یولا سالدی
امیرِ کاروان ! گیتسون نه نوعی کاروان سنسیز؟
ایدور عزمِ بیابان زینبِ بی خانمان سنسیز
ایراق قارداش گوزوندن نازپرورده خانم قیزلار
اولوب دشمن اسیری ظلمیله بیر دسته یالقیزلار
گلوبلر شیونه ایوای اوغول دلده اوغولسوزلار
اولاردا ، موجِ غمندن دائما" لرزان دیلار قارداش
نهیبِ لشگرِ بیدادیله گریان دیلار قارداش
شبیهِ مصطفانی گوردوم اوپدوم چکدیم آغوشه
و لیکن گورمدیم من اصغری هاردا گیدوب هوشه
صباح اوغلون گلوب ترتیب ایدنده قبرِ ششگوشه
یاتار پائینِ پاده اکبرین دائم اوغول وای دئ
علیّ اصغری آل سینوه عطشاندی لایلای دئ
دیمه زینب سنی بو چولده سالدی باغریقان گیتدی
بیله گونلر قباقینده قویوب بی سایبان گیتدی
بولورسن لاعلاج ال اوزدی ای آرامِ جان گیتدی
سنی یاددان چیخاتمام روحیمی قویدوم رهینونده
اجلدن مهلت اولسا بیرده گلّم اربعینونده
مجالیم یوخ آلوبلا ، چاره می الدن خداحافظ
دریغا گورمدیم عبّاسی گیتدیم من خداحافظ
منِ زارین دلینجه اوندان ایله سن خداحافظ
سوروشسا گلمدی دیداریمه زینب ندور علّت
بویور ایستردی گلسون ، اهلِ کینه ویرمدی مهلت
اولوب زندانِ غمده (شاکرِ) محنت زده محبوس
محیطی غصّه دور ، مصیبتلر اونا مأنوس
تیکوبدور گوز سنه امّیدیله قویما اولا مأیوس
نجه اولسا ، گینه آخر وابسته دور بو درباره
سنِ زهرا خدادن ایسته ایتسون دردینه چاره.
مرحوم شاکر
منبع مجموعه کانالهای مدح و مرثیه
با سلام