در احوالات حضرت علی (ع)
الیمده خامه گوزومده سرشک بارانی
گوگلده موج ورور بیر خیال طوفانی
قلم قالوب حرکتدن اوزومده مبهوتم
که قالموشام متحیر یازام نه عنوانی؟
اورک دولوبدی ملالیله اشک ویرسه مجال
امید وار قلمیم ثبت ایده بو طغرانی
هزاره چمن عشق اولوم و یا که گیدوم
دیار کرب و بلانون اولوم نواخوانی؟
بو گیر و داره ناگه هاتف غیبی
ندا ایدوب منی ای کوی عشق حیرانی
نه فکردور نه تعجبدی، بو نه حیرتدی؟
ایتورموسن نیه راه وصال جانانی؟
نشان ویروم سنه بیر یول که رهسپار اول گیت
نهایتا تاپاسان راه خلد رضوانی
علی ولایتینون شاهراهی، حق یولیدی
تاپار او یولدا گیدنلر رضای رحمانی
فقیر عشق ولا بوریایه ایتمز عوض
سریر سلطنتی یا حریر و دیبانی
دئدیم آتام آنام اولسون بو رهنمایه فدا
ارائه ایتدی منه راه رشد و عرفانی
عجب قوتاردی منی عالم تحیردن
گتوردی خاطره بیر ماجرای زیبانی
دیر کمیل که بیر گون گجیدی نیمه شب
فضایه حاکمیدی بیر هوای بارانی
کمال ظلمتیدی شهر کوفه خلوتیدی
جهانی ابر سیه ایلمشدی ظلمانی
هله چراغی یانوردی چوخ ایولرین، اما
چوخ ایولرین واریدی خواب نازه برهانی
یاغوش بیر آز یاغوب، آچمشدی، یرده نم واریدی
هوانی لطف نسیم ایلمشدی روحانی
منی خیال ایلدی بولمورم ندن بدخواب
که سخت مشکله سالدی او امر آسانی
دئدیم دوروم چخوم ایودن کناره، بیر دولانوم
گوروم تلاوت ایدر کیم کلام سبحانی؟
عراقین ایولرینون نغمه سی اولار قرآن
بو فکریله ایشیدم بیر نوای قرآنی
همین بو قصدیله چخدیم کناره منزلدن
که بلکه صورت فعله سالام تمنانی
ولی او فکر که من ایلمشدیم عکس اولدی
اوزاقدا گوردی گوزوم بیر مثال انسانی
او تیره شبده او نمناک یرده همتیله
ایدر خمیده گهی قد سرو رعنانی
گهی دورور دوزلور ایلوری گینه تکرار
ایدور گهی گینه خم قد سرو طوبانی
او منظره ایله بیر جالب توجهیدی
محالیدور ایده ترسیم خامه مانی
دئدیم خدا بو بشردور گوزومده جلوه لنور؟
و یا شبح دی؟ اونا ایلورم تماشانی
اونون او حالتی ایتدی منی ایله مجذوب
دوزنمدیم داخی دلدن آپاردی یارانی
کمال حیرتیله من دیردیم اوز اوزومه
گرک بولوب تانیام بو صفاته دارانی
گورم نه وار بو دل شبده خالی از اغیار
گهی دورار اوتورار گاهگاه پنهانی
کمال دقتیله ایتدیم او وضعه نظر
بو نیتیله که حل ایلیم معمانی
یاخونلاشاندا نه گوردوم علی ولی خدا
الینده نانیله خرمادی بیرده انبانی
تصادفاً آچیلوب بند کیسه یا انبان
سالوبدی زحمته اول شهریار خوبانی
قوم اوستونه داغلوب نچه قرص نان، ناچار
یقور او قرص لری گور او صبره دریانی..
کمال لطفیله بیر بیر او شهریار عرب
سیلور قویور گنه انبانه هر دوشن نانی
او قدر منتظر اولدوم کنارده مخفی
که یقدی باغلادی آذوقه فقیرانی
دوباره آلدی گنه کتفنه دوزلدی یولا
گلوب خیالیمه تعقیب ایدم او مولانی
گورم او نیمه شبده هارا گیدور تنها؟
بو فکر مندن آلوب طاقت و توانانی
خدا نکرده دئدیم بلکه بیر حوادث اولا
علینی تک قویام، اولماز بو عشق میزانی
بیر آز گیدوب منه معطوف ایدوب توجهنی
فقط علیده تاپار خلق بو مزایانی
بویوردی سن نیه گلدون کمیل نیمه شب؟
گیت استراحت ایله، گورمه رنج و ایذانی
منیم وظیفم ایدر بو مسائلی ایجاب
که نیمه شب دولانام شهری یا بیابانی
گورم نیازی اولان خانواده لر نیلور؟
بو گون منم اولارین ظاهراً نگهبانی
تعهدیم وار اولار قالسا آج، منم مسئول
صباح حشرده وار عدل و داد دیوانی
گورم تهیه و تامین ایدوب معاشین اولار
و یا طعام و غذاسی اولوب جگر قانی
گنه گیدردی دئدیم ویر اجازه منده گلوم
اولا قدملریون بو کمیل قربانی
بویوردی گلماقیوا یوخ نیاز، گلمه کمیل
منه وظیفه دی پروردگار فرمانی
ادبله عرض ایلدیم امریوه مطیعم من
ولی اولا سنه قربان بو عالمین جانی
آقا بو نیمه شبده سن اوزون تک و تنها
بو شهر کوفه ده چوخ واردی دشمن جانی
مباد صدمه یتورسونله جسم اطهریوه
بو غصه مندن آلور قدرت و شکیبانی
تبسمیله بویوردی او شاه دریا دل
باشوندان آت بو هوای خیال و بی جانی
علیده سن بولوسن یوخدی وحشت و پروا
بو امره ایتسله مامور اهل دنیانی
بیری یاخون گله بولمز منه، یقین ایله
یاراتمیوبدی خدا منده بیم و پروانی
کیمون نه قدرتی وار سوء قصد فکرین ایده
الیمده گور هله بو تیغ آتش افشانی
یر اهلی ایلیه بولمز منی بلایه سالا
اجل گلر اولار عمرون او لحظه پایانی
ولی بلای الهی اگر مقدر اولا
علینی دوتماقا، اولماز نجاتین امکانی
نه سن، نه من، دنیانین اهلی اولسا بسیج
محال امردی دفع ایلسون بلایانی
اجازه ویردی صورا منده محضرینده اولام
ولی بو شرطیله مخفی قویام قضایانی
دولاندی کوفه نی ایتدی وظیفه سین ایفا
نوازشیله دانشدیردی هر پریشانی
یتیم اوشاقلاری شیرین دلیله دیندیردی
او گرم دم که سالار حیرته مسیحانی
همینکه نوبت تقسیم شهر اولدی تمام
بیر آیری قصدده گوردوم او شیر مردانی
کنار کوفیه گیتدوق یواش یواش آرام
بولر بیر عدیه مسئول اولان بو ایمانی
قوتاردی شهر، یتشدوق او نخل زارلره
علی ووروب بلینه همتیله دامانی
کنار نخلده هر بیر نفر که یاتمشدی
قویوب گچردی باشی اوسته نان و خرمانی...
همان او طرزیله هر قدر یوخلیان واریدی
ایدوب غذاسنی تامین او شیر یزدانی
یواش یواش گوتوردی قدم، اویانمیه تا
اولار که مسکن ایدوب نخلزار و صحرانی
علیدن اوزگه ده اولماز بو رافت و ایثار
گوروبدی چشم فلک کیمده بو مدارانی
همینکه نوبت تقسیم آخره یتدی
امام ایلدی حمد و ثنای یکتانی
کمال شرمیله عرض ایتدی ای خدای جلیل
قصوری اولسا گذشت ائت علی عمرانی
گلوب جسارته عرض ایتدیم ای امام مبین
بو گون که سیز بولارا ایلدوز بو احسانی
تانوردوز هیچ بولاری؟ یا که کیمدیلر بولوسوز؟
بو کارگرلریله ایلدوز بو سودانی
یهودیدی بولارین چوخلاری سنه قربان
که ایلدون بولارا سن بو لطف شایانی
همینکه بو سوزی مندن ایشتدی باخدی منه
کمال خشمیله اول شهر عشق سلطانی
عتابیله بویوروب وای اولا کمیل سنه
علی مگر تانیماز کافر و مسلمانی؟
اگر اولیدی مسلمان بولار، عنایت حق
فقط اولاردی که تکمیل ایده بو نقصانی
و گرنه من که امیرم گرک ایدم تقسیم
او دوز که سفرمه زینتدی، بول بو معنانی
منیم الیمده دی تقسیم و حفظ بیت المال
گرک رعایت ایدم حکم حی اعلانی
بولار حکومت اسلامه باغلیوبله امید
رفاهده بیر اولار مسلمیله نصرانی
قبول ایدوبله که ویرسونله جزیه اسلامه
او اصلدندی که ایمندی مالی یا جانی
گوزلدی بیر تیکه تاریخدن بو یرده یازام
اولا بو مسئله انصاف غیر اعلانی
عدالت ئولدی، مسیحی دیر ئولنده علی
بو اعترافه مورخدی واردی اذعانی
دیلله فضل اودی، دشمن اونا شهادت ایده
علینون عدلیدی مجبور ایدوب ترسانی
ایدوب مطالعه عمر علیده بیر مدت
حقیقتین اولا بولمز گوروب که کتمانی
فقط سلونی علیدن اولار برازنده
بلی بو بحث اوزی بیر ماجرادی طولانی
دیر نولوردی که هر قرن بیر علی گتوره
الیله حل اولا هر بیر رموز پنهانی
علی نمونه فضل و عدالت محض
سپهر معرفتین نیر فروزانی
محال بیرده بو دنیایه مادر ایام
علی کیمی بیر اوغول ایلیدی ارزانی
علی شهادتی دنیانی سوگوار ایدوب
او شدتیله که خلقتده یوخدی جبرانی
علی عطیه دی دنیایه، حق ایدوبدی عطا
بو قصدیله تانیدا رهبریله رهبانی
او پاک دیده آینده بین و ژرف اندیش
بلی باخاندا ثرادن گورر ثریانی
باخوبدی کوفه دن ایراندا او گوز نه گوروب
گیدوب ایدوبدی مداینده دفن سلمانی
یازوب کفنده وقدت علی الکریم یعنی من
حضوریوه الی بوش یولادیم بو مهمانی
الینده توشه آپارماق کریم محضرینه
قبیح امریدی، سلماندا گر اولا بانی...
ولی نه فایده، افسوس صد هزار افسوس
اولیدی زیر و زبر کاش چرخ خضرانی
او عقل و فهم و فراست، او درک و عقل کمال
مقام حکمتی محو ایلیوبدی لقمانی
ئولنده فاطمه، روحیه سی علینون ئولوب
قویوبدی توپراقا زهرائیله منایانی
دوشوب فشاره قالوب تنگناده مرکز وحی
ایاق کسوبدی او منزلدن عالی و دانی
نه بیر گلن نه گیدن وار نه حالینی سوروشان
امام ایدوب سپری عمر تاب فرسانی
او فضل صاحبی عزلت گزین و خانه نشین
ویروب اراذله و اوباشه چرخ، جولانی
ابی قحافه نون اوغلون ایدوبله خلقه امیر
دوتوب مصادر امری گروه سفیانی...
علی تجسم تقوادی هیکل توحید
علی مروت و ایثار و عدل قربانی
یگانه معرکه جنگه شیر بی پروا
وحید دهر قویاندا ترابه پیشانی
علیده خالقی جمع ایلیوبدی اضدادی
او جنگ قدرتی بو طاعت نمایانی
شجاعتی هامی افراد خلقدن برتر
ایدوب عبادتی عباده تنگ، میدانی
عباد با تشدید حرف ب
مقام زهدده زهاده مایه حسرت
سالوب تحیره تقواسی اهل تقوانی
علی جلالتینه معترفدی اهل جهان
خصوص محو ایلیوب عشقی، اهل ایمانی
گورون قلم سوزی هاردان هارا چکور آپارور؟
کیمم نه یم تانیام من او شاه والانی؟
گنه کمیلدی راوی دیر که بیر گجه من
کنار شهرده گوردوم او شیر هیجانی
او قدر راز و نیاز ایتدی نخلزارده تا
یخلدی بیر قوری نخل اولدی جسم بی جانی
گلوب شتابیله زهرایه ماجرانی دئدیم
بو امردن ایدم آگه بتول عذرانی
بویوردی هاردا او حالیله گوردون؟ عرض ایتدیم
بو نخلزارده ای مهر و رافتین کانی
کمال لطفیله فرمایش ایتدی قورخما کمیل
علیده چوخ گجه لر وار او حال ربانی
اوزوم او عالمی چوخ گورموشم عم اوغلومدان
دوشر او حالتده، عشق ایلینده طغیانی
او هر گجه گیدر اول باخار فقیرلره
صورا عیادت ایدر هر مریض تنهانی
نیازمندلیره دلده چون تعهدی وار
ایدر همان او طریقیله عهده ایفانی
تلاش ایدر بیرینون حقی اولماسون پامال
فقط علیده گورر خلق بو سجایانی
سزادی بوردا دیاق یا اباالحسن، ای کاش
گلوب نولوردی گوریدون او شام ویرانی
ویروبله آل رسوله خرابه بیر مسجد
حرملرین اوجالوب عرشه آه و افغانی
نه سقفی واریدی نه سالمیدی دیواری
فلک چکوب هارا گور اهل بیت طاهانی
خرابه گوشه سینی توپراق اوسته زار و ملول
روادی مسکن ایده هاشمیه نسوانی؟
رقیه ده گجه گونوز یاناردی آغلاردی
توکردی عارضینه اشک چشم شهلانی
دئردی عمه بیزی کیم ایدوب خرابه نشین؟
ایدردی گوز یاشی شرمنده آب حیوانی
حجاز عزیزی هارا؟ من هارا؟ بو شام هارا؟
گوروم دونیدی سپهرین بو دور دورانی...
گنه عنانی الوندن آلوب قلم (خوندل)
یاز آغلا قویما فراموش اولا او پیمانی
بش اون گون عمر اولا یا اولمیا دگل معلوم
نه بی وفادی مگر گورموسن بو دنیانی؟
نقدر عمرده فرصتدی نوحه یاز آغلا
ملاک ایله اوزیوه خدمته او رویانی
علی طبیبدی قورخما مرض نقدر اولا سخت
تمام دردلرین وار علیده درمانی
تولدنده سنی وقف ایدوب حسینه آنان
گوزل یولیله آقاندا آلوب هدایانی
هدیه هر نجه ناچیز اولا، بویوکلر آلار
گر اولسا ران ملخ، شاد ایدر سلیمانی
نقدر آرتا مصیبت، ولایتون آرتار
ولایه لازم و ملزوم بول بلایانی
بو خانواده نی الله اوزی کریم ایلیوب
بو اهل بیتیده عاشق تاپار سجایانی
اگر چه دوست لرین وار بو امره اصراری
که منتشر اولا بیر فاطمیه دیوانی
ولی نگاه عنایت خانمدان اولسا اگر
اولار بو قطره ایده شرمسار عمانی.
مرحوم استاد حاج حیدر خوندل
منبع مجموعه کانالهای مدح و مرثیه
با سلام