متن نوحه های ترکی و فارسی

احوالات حضرت رباب (سلام الله)

بیرده خاطردن اُلونجه چخمادی عفّت مآب

اصغرین بی کس آناسی معدن عصمت رباب

گون قباقینده گیدوب هر گون آچاردی اوز باشین

وای حسینیم وای دیوب جاری ایدردی گوزیاشین

حالی ایلردی خواتین حرمدن سلب تاب

حالینه محزون اولوب سویلردیلر اولدون کباب

کولگه یرلرده خانم اگلش فغان و داد ایله

گون قباقینده آز اگلش ناله و فریاد ایله

اگلشوم سویلردی آخِر کولگه یرلرده نجه

گون قباقینده حسینیم قالدی اوچ گون اوچ گجه

اوز گوزومله اول شهین گوردوم من عریان پیکرین

بی کفن، عریان، یارالی، قانه غلطان پیکرین

هرقدر ایتسم بو خاتونین وفاسیندن رقم

آخِره یتمز قالار تحریریدن عاجز قلم

جانینی جانانی شاه کربلادن سیچمدی

جان ویرونجه آغلادی، اصلاً سرین سو ایچمه دی

سو گورنده دلدن ایلردی فغان و شوروشین

سسلنوردی سو کنارینده سوسوز اُلدی حسین

شیرخواره بیر اوشاق گورسیدی ایلردی فغان

سسلنوردی وای علی اصغر اُلیدی کاش آنان

سالمارام دلدن سوسوزدان اود دوتوب اودلانماقون

تا حیاتیم وار منی قان آغلادور اوخلانماقون

آچمادیم سوددن سنی، سینمده قالدی اللریم

حلّ اولا ممکن دگل قلبیمده کی نسگل لریم

قلبیم اودلاندی اوجالدی دود بو کانونیدن

وار سراغیم بیر وفالی غصّه لی خاتونیدن

چخمادی خاطردن عمرینجه همیشه آغلادی

باب عیش و عشرتی دائم یوزینه باغلادی

کیمدی بو صاحب جلالت ایلیوم آدین بیان

عصمت کبری نشانی زینب بی خانمان

شرح حالی حضرت زهرانی هر آن آغلادور

محنتی عصرین امامین متّصل قان آغلادور

وار گمانیم ایمدیده فردوسیده خیرالنّسا

ساچلاری الده توکر اشکین دیر وا زینبا

گوسترنده قولّاریندا تازیانه یرلرین

حالینی آشفته ایلر حضرت پیغمبرین

مرحوم حسینی سعدی زمان

منبع مجموعه کانالهای مدح و مرثیه