احوالات خروج از مدینه

 

یثربدن ایستدی چیخا شاهنشهِ تبار

امر ایلیوب جلالیله باغلاندی بیر قطار

 

دستگاهِ سلطنت گئدیری طمطراقیله

راوی دیئر کی منده باخوردوم گوروم نه وار

 

گوردوم کجاوه لر قورولوب بیر ردیفیلن

هودجلر اوسته چکدیله استارِ زرنگار

 

تشکیل وئردی منظره ی باصفاسینی

هر بیر جوان او هودیجلن اولدی هم قطار

 

قاسم گلوب سریّه نی میندیردی محمله

مستوره ی محجّبه نی صاحب خدار

 

هر محرمون جوانی سوار ائتدی ناقیه

ذات الحجالی حجله نشین ائتدی هر سوار

 

گوردوم وقاریلن گلوری بیر مخدّره

مخدومه ی خلایق و محبوبِ کردگار

 

بیر نوجوان رشید دوشوبدور قباقیجه

ایلور اونی سوار ائلماقدا چوخ افتخار

 

آلدیم خبر کی کیمدی بو خاتونِ محترم؟

هم صاحبِ جلالت و هم معدنِ وقار

 

بیر شخصیدن یتیشدی سوزیمه منیم جواب

زینبدی بو ،  قاباقداکی عبّاسِ نامدار

 

بیر زر نشان کجاویه ایلیوب سوار اونی

اول بانوی مجلّله نی ذاتِ استتار

 

تا کربلاده قوردی حسین خیمه گاهینی

زرّین خیامده هاموسون ائتدی برقرار

 

امّا او گونکه شمسِ هدایت ائدوب کسوف

سیّار ثابتیله چیخوب بُرجدن کنار

 

ئولدی حسین ، او وقت دئدی شمر زینبه

دور ناقیه سوار ائلیوم قالما انتظار

 

مجبورسن اسیرلیقا مینمه سن اگر

مأمور ائدوبله زجری گلر الده بیر تتار

 

باخما فراته قارداشون عباسی سسلمه

قلبون شرارِ آیریلیقا اود توتوب یانار

 

عبّاس باشینی گوره سن ایندی نیزده

نوکِ جدایه باخسان اگر تازه قان دامار

 

قالموبدی لشکرون ، اودی بو لشکرِ شریر

ایندی گلوب ائده له سیزی ناقیه سوار

 

حکم امیریدور بیزی مأمور ائدیبدولر

مأمور اولان امیریدن ایلر چوخ اعتذار

 

اکبر هانی کجاویه میندیرسین عمّه سین

نه قاسم و نه جعفر و عون و بنی نزار

 

چوخ آغلاما علی قیزی باخ تازیانیه

بیر خارجی ئولوب ، دئ گوروم بیر داخی نه وار

 

یاندی بو غمده (ناظمِ ) افسرده نون دیلی

گوز یاشینی ائدر یوزینه مثلِ جویبار.

 

مرحوم سید محمد ناظم (ناظم آقا)

منبع مجموعه کانالهای مدح و مرثیه