احوالات ورود به مدینه

 

ای دل وطنه مکه مسافر لری گلدی

اهل حرمون باشدا قرا معجری گلدی

 

صدّیقهٔ کبری دیدی ای شهر مدینه

زهرا قزینون صورته اشک تری گلدی

 

سن ائتمه قبول عترت یاسین پوزولوبدور

سانما سنه آزاده لرون رهبری گلدی

 

دستور ویروب زین العبا خیمه قورولسون

فوراً قاباقا نوکر و فرمانبری گلدی

 

خیمه قورولوب زینب علیا دیدی نوحه

معناده غمه فاطمهٔ اطهری گلدی

 

امر ائتدی بشیره آقا گئت شهره خبر ویر

خیرالبشرون عترت غم پروری گلدی

 

امرین ایدوب اجرا اَله قاره علم آلدی

تئز اولدی حسین وای دیلینون ازبری گلدی

 

سسلندی بیلون قتل الحسین اهل مدینه

دل کرب معلّاده قالوب دلبری گلدی

 

قاره گیونون قاره چکون یکسره شهره

چون ئولدی حسین نائب پیغمبری گلدی

 

قزلار کی ایگرمی بش اولاردی سایی گئتدی

یولّاردا چوخی ئولدی بورا کمتری گلدی

 

زهرا قزینون قامتی غمدن بوکولوبدور

آق زلفیله بطحایه وفا مظهری گلدی

 

اوغلانلاری اللرده اولوب امّ بنینون

نه فضلی نه عبّاسی نه ده جعفری گلدی

 

پیشوازه چیخون تازه گلین لر قالا ایوده

یوخ گوشیده گوشواره حسین دختری گلدی

 

تأخیره سالا طویلارینی تازه جوانلار

چون اکبروزون شهره غم دیگری گلدی

 

گلسون آنالار صودامری قالسون ایوینده

شه بانوی دینون دیمیون اصغری گلدی

 

اللرده اؤلوبدور صودامر اوغلی ربابون

ترپدمگه خالی بشیگین مادری گلدی

 

وقتی کی بشیر کوی بنی هاشمه چاتدی

صغرا ایله فکر ائتدی گئدن ائللری گلدی

 

عرض ائتدی الیمدن یاپوش ای جدّه گئدیم من

شهرین ایله بیل ماه ملک منظری گلدی

 

فرمایش ایله فاطمه اولسون گوزون آیدین

گئتمیشدی جوانان وطن مفخری گلدی

 

منلن گئدک آچ اکبریمون باغلی اوطاقین

صغرانون ایوه دلبرو مه پیکری گلدی

 

روشن ایلیوم شمع و چراغین اوز الیملن

گلزار وفانون گل نیلوفری گلدی

 

سویلردیم علی جان طویوا آرزیلاریم وار

وار شکریم حقه سوزلریمه مشتری گلدی

 

دعوت ائدروک تازه جوانلار طویا گلسون

الده گوررم تای توشونون عنبری گلدی

 

صغرا نئجه کی چادره محنتله یتیشدی

بیر عورت اوگون الده قرا معجری گلدی

 

سالدی باشینا بیلدی علی اکبر ئولوبدور

گوز یاشلی دیله اکبرون اول خواهری گلدی

 

گل جدّه ایویم گور نئجه یثربده یخلدی

قارداشیم ئولوب اوستومه غم لشکری گلدی

 

غش ائتدی دوشوب تپراقا محبوبهٔ اکبر

یاندی حالینا جدّهٔ نوحه گری گلدی

 

نصف شبیدی اشک ترین توکدی «معزی»

فریاده بو شعرینده حسین نوکری گلدی

 

 حاج یوسف معزی اردبیلی