در احوالات حضرت موسی ابن جعفر (ع)

 

گینه خلق آراسیندا بو نه علامتدور؟

دگوبدی بیر بیره عالم مگر قیامتدور؟

 

قیامت عالمی بو خلق ایچینده ظاهر اولوب

بیری بیره قاریشوبلار غریبه وحشتدور

 

توکلّه یوزلره بی اختیار گوز یاشینی

دگل بو گوز یاشی ، بارانِ فصل و رحمتدور

 

یتوب او حالده بیر کیمسه دن سؤال ایلدیم

نه هایهویدور؟ آخر بو نه حکایتدور؟

 

جواب ویردی مگر بی خبر ، یوخوندی خبر

اوتورموسان بیله آسوده بو نه غفلتدور

 

دوتوبلا حضرتِ موسی بن جعفره ماتم

اودور خلقِ جهان ، غرقِ بحرِ محنتدور

 

اوتورما بیله داخی سنده استراحتلن

بو وقتِ غافل اوتورماقدی استراحتدور؟

 

غریب اماموی سال یاده ، اوخشا آغلاگیلن

غریبه آغلاماقون بیر جزاسی جنّتدور

 

اولوبدی ظلمیله زنداندا اون بیر ایل محبوس

و لیک شغلی گجه صبحه تک اطاعتدور

 

دیردی بار خدایا ، غریبه یردی بو یر

عبادت ایتمگه بیر مأمنِ عبادتدور

 

همیشه ایستردیم منزلیم اولا خلوت

هزار شکر مقامیم ، مقامِ وحدتدور

 

تاپانمارام بیله آسوده یر بو عالمده

مقام امن و امان ، گوشهء فراغتدور

 

گجه گونوز سنه قیلّام عبادت آسوده

همین بو شیوه دن آسوده لوق عبارتدور

 

غم ایتمرم نقدر من قالام بو زنداندا

بو یر نه گوشهء زنداندی ، جای طاعتدور

 

قبولِ ذلّت ایدر ، عزّت آختاران عاشق

بو گردنیمده کی زنجیر ، طوقِ عزّتدور

 

بو حبس ایچینده ویرم جانیمی ، زیاده خوشام

سنون یولوندا ویرم جان ، بو جانه منّتدور

 

جنازم اوچ گیجه گوندوز اگر قالا یرده

منه اوزون بولوسن مایهء شرافتدور

 

ایدوبله ظلمیله آخرده اول شهی مسموم

ویروبدی حبسده جان ، گور نه ننوع حسرتدور

 

خبر گتیردیله هارونه اول غریب ئولدی

که هیچ گلوب گیدنی یوخدی جای حیرتدور

 

قالوب جنازه سی زندانیده ندور حکمون؟

تعجّبم او لعینده بو نه عداوتدور

 

دئدی گیدون اوز عباسین چکون جنازه سینه

شکاره گیتملییم من ، شکار ، فرصتدور

 

قالوبدی اوچ گجه گوندوز جنازه سی یرده

اولوبدی جدّینه وارث ، عجب شراکتدور

 

اوچومجی گون قایدوبدور شکاردن هارون

گوروب که موقع و هنگامِ هتکِ حرمتدور

 

بیر امر ایدوبدی او ظالم ، جهانی یاندیردی

او امری شرح ایلمک بیر بیوک جسارتدور

 

تمام شیعه دن عذر ایستورم بو عرضیمده

قبوله یتسه اگر منتهای رأفتدور

 

دئدی گیدون آپارون ایمدی دورت نفر حمّال

جنازه سین گوتورون قالماقی اذیّتدور

 

ندن او وقته بو کون اولمادی ویران

توکولمدی یره گوگلر غریبه حکمتدور

 

گیدوب گتوردیله بیر کچیک تابوت

قویوب یره دئدیلر بسدی بو کفایتدور

 

جنازیه حرکت ویرماق اولمادی ممکن

آغورلاشوبدی ز بس قوزاماق مصیبتدور

 

کنار ایدنده عبانی نه گوردولر زنجیر

قالوب او حالیله بوینندا گور نه حالتدور

 

کناره چکدیله بیر نوعیله او زنجیری

باخوب گوروبله یری سر به سر جراحتدور

 

خلاصه نعشنی زنداندان ایتدیلر خارج

نجه که ذکری اونون مایهء خجالتدور

 

آپاردیلار که ویروب غسل ، کفن و دفن ایده لر

جنازه سین قویالار قبره ، گر چه زحمتدور

 

اولوب او دمده سلیمان بو حالدن حالی

ووروب باشا ، دئدی بیزلرده بو نه غیرتدور

 

بیزیم اماممیزی قبره دورت نفر حمّال

جنازه سین آپارا چوخ بیوک حقارتدور

 

ایاق یالین باش آچوخ سسلیوب غلاملرین

دئدی گلون که ئولن حامی شریعتدور

 

جنازه سین گوتوراخ چوخ چوخ احترامیلن

که احترامی بونون بیزلره اطاعتدور

 

آچوب یخاسینی چکدی فغان دئدی آقا وای

اولوم جنازه وه قربان بو نه مذّلتدور؟

 

اولوبلا شیعه لر اول دمده باخبر بیر بیر

گلوب نه گوردوله بیر ازدحام و کثرتدور

 

دئردیلر گتورون عود و مشگله عنبر

نثار ایدون بونا کیم منبعِ سخاوتدور

 

او کثرتیله امامون جنازه سین گوتوروب

کنارِ شطّه قویوبلار ، بیله روایتدور

 

که غسل ویردی سلیمان اوزی او مولایه

غریبه مرتبه دور بو ، عجب سعادتدور

 

بیری دیردی گرک من ایدم بو شاهه کفن

بیری دیردی من ایتسم غریبه لذّتدور

 

خلاصه بیر کفنه جمله سی شراکت ایدوب

کفنلیوبله امامی گوزل حمیّتدور

 

غریب ئولوبدی آقام ، یوخ یانندا آغلیانی

که آغلاماق بو غریبه بو گون غنیمتدور

 

گلوب و لیک اوزی باطنا" امامِ رضا

ویروبدی غسلنی ، گوردی زمانِ رجعتدور

 

قیلوب نماز ، قویوب قبره ، دفن ایدوب گیتدی

تعجّب ایلمه بو قوّهء امامتدور

 

گرکدی غسل ویره هر زمان امامه ، امام

قیلا نمازینی چون عمدهء وصیّتدور

 

دئدی او وقت سلیمان ، تمامِ عترتینه

خبر ویرون گله لر کیم زمانِ همّتدور

 

غریب ئولوبدی آقام ، یوخ یانندا آغلیانی

که آغلاماق بو غریبه بو گون غنیمتدور

 

گلوب او وقتده اهلِ حرم یولوب گیسو

ویروبله سس سسه گور نجه حمایتدور

 

دویونجا آغلادیلار اول امامِ مظلومه

جهاندا عورته چون اوخشاماقلوق عاتدور

 

بو یرده بیرجه آیق قلب ایستوری گوگلوم

که کربلایه گیده گوره نه صحبتدور

 

حسین آقا اولا جانلار فدا مصیبتوه

یتن مصیبتوه هانسی بیر مصیبتدور؟

 

سنون که اولمادی بیر کیمسه نعشوی گوتورن

و نه مزاره قویان شاهدیم زیارتدور

 

سویوبلا پیکریوین بیر به بیر لباسلرین

سپاهِ کوفه عجب بی حیا جماعتدور

 

نه بیرجه غسل ویرن اولدی نه کفن گتورن

عزیزِ فاطمیه گور نقدر جنایتدور

 

کفن که ایتمدیلر ، عرض ایدوم که نیلدیلر

او اهلِ کوفه ده باخ گور بو نه شقاوتدور

 

ووروبلا آتلارینا تازه نعللر او زمان

چاپوبلا نعشوین اوسته تازه خلعتدور

 

ویروب او وقتده سعد اوغلی لشگره فرمان

دایانمیون که حسین خیمه گاهی غارتدور

 

ووروبلا ظلمیله اود خیمه گاهه باخمادیلار

که خیمه لرده قالانلار اوشاقدور عورتدور

 

حضورِ سیّدِ سجّاده عرض ایدوب زینب

آلشدی خیمه و خرگاهمیز قیامتدور

 

ندور بو دمده گوزوم نوری بیزلره تکلیف؟

قالان اود ایچره تماما" عیال و عترتدور

 

بویوردی عمه دئ قاچسونلا چوللره اطفال

دایانماسونلا بولار مایهء شرارتدور

 

قویوبلا چوللره یوز عترتِ امامِ حسین

همینکه آنلادیلار قاچماقا اشارتدور

 

گورن زماندا بو احوالی کوفه نون اهلی

که چوللره داغیلان اهلِ بیتِ عصمتدور

 

سالوبلا آت دوشونه اهلِ بیتِ دربدری

ووروب یخاردیلا اونلاردا بو نه جرأتدور؟

 

(سهیلی) پرده لی سوز یاز ، یازاندا ال ساخلا

بیر آز توقّف ایله ، سنده بو نه سرعتدور؟

 

یقین بو ظلملری اوزلری ایدوبله قبول

و لیک فرقهء اعداده بو نه قدرتدور؟

 

حسین حرملرینی باغلاسونلا زنجیره

اسیرِ ظلم ایلسونلر ، مقامِ حیرتدور

 

محبّت اهلنه بیرجه اشاره کافیدور

فدا او قلبه اولوم که دولی محبّتدور

 

بوراخما دامنِ آل محمّدی الدن

سنونده قلبده گر مطلبون شفاعتدور

 

یازاندا فخر ایلمه چوخ یانقلی سوز یازدیم

بو سوزلری اوخیاندا (دخیله) رحمتدور.

 

میرزا احمد ‌سهیلی

منبع مجموعه کانالهای مدح و مرثیه