متن نوحه های ترکی و فارسی

احوالات کربلا

کربلاده کوفیان آیا نه عنوان قویدولار

خاندان مصطفی‌نی خانه ویران قویدولار

بوقراری قویمیوب یوخسا خداوند حیات

مهر زهرادور همان بوقان اولان آب فرات

بو کلامه نامسلمانلار گوتوردی نه ثواب

صاحب آب فراتی اوچ‌گون عطشان قویدولار

حق طریقیندن چیخوب پیغمبر اوغلون داندیلار

جیفۀ دنیایه دونان زمان تولاندیلار

تؤکدولر مظلومه قانین اوچ گون عریان قویدولار

خون‌بها هر بیر شهیده، بی‌بها قان قویدولار

گل مجاهد سیرینه قوی عرصۀ عشقه قدم

حضرت عباسی گور مشک اوخلانوب قوللار قلم

سعی جنگ ایلر مبادا سرنگون اولسون علم

هر طرفدن اوستونه یوز قوم عدوان قویدولار

گوردولر شهباز اوج همتی بی‌بال دور

کاسه چشمی دولوب قانیله مالامال دور

اقتداری جنگه یوخ چوخ‌چوخ پریشان‌حال ‌دور

بی‌ مروتلر بنای تیرباران قویدولار

گوردولر اکبرده ظاهر دور شعاع نورحق

کربلا صحراسینی اول نورائدوبدور طورحق

حضرت موسا کیمی دوتموش وجودین شورحق

شیوۀ فرعونیانی آل سفیان قویدولار

موجه گلدی شامیان پرموج دریالر کیمی

فرق پاکی اولدی منشقّ تیغیله حیدر کیمی

ام لیلانی سر زلف علی‌اکبر کیمی

ایلیوب آشفته عمرینجه پریشان قویدولار

اکبرین اون سگّیز ایل چکمیشدی لیلا زحمتین

بولمورم یارب نئجه گوردی اونون او حالتین

سالدیلار توپراقلار اوسته سروه بنزر قامتین

گون قباقینده یارالی نعشین عریان قویدولار

آلدی آغوشه علی‌اصغری سلطان دین

گئتدی میدانه بویوردی رحم ائدون ای قوم کین

چون حسینی گوردولر بو حالتیله مشرکین

چکدیلر ناله بنای آه و افغان قویدولار

باغ زهرایه تاپوب یول یوز قویوب زاغ و زغن

گل سولوب بلبل اولوب یاسه باتوبدور یاسمن

گل سولوب بلبل‌لر آغلار اولدی غمخانه چمن

نه چمن نه گل نه بلبل نه گلستان قویدولار

ظهر عاشورا حسینی شمر دون بی‌حیا

سینه‌سی اوسته چیخوب ائتسون ذبیحاً من قفا

عرش حقدن دمبدم فرشه گلوردی بو ندا

قویمیون کافر‌لری اسلامی ویران قویدولار

خیمه‌ده زینب اوتورموشدی ائدردی شور و شین

گوردی آفاقی دوتوب دور نالۀ قُتِلَ الحسین

گلدی میدانه چکوب ناله توکردی اشک عین

عرض ائدردی دور منی سن‌سیز حسین جان قویدولار

میر عبدالحسین خازن تبریزی

منبع مجموعه کانالهای مدح و مرثیه