احوالات جناب حر (ره)

 

ترکیب دو شعر

 

روز عاشورا گونون نوری اولاندا آشکار

باشلادون اتمام حجت، لشگره ای شهریار

حر اولوب نادم، گلوب درگاهیوا امیدوار

سویلدی گلدیم اورکده وار ندامت یاحسین

 

گلمیشم درگاهیوه ای ملک دینه پادشاه

اوز گناهیمدن یانوندا شرمسارم، روسیاه

لطف ایله احوالیمه شامل اولا لطف الاه

تا اولام مستغرق دریای رحمت یاحسین

 

رحمتون چوخدور سنون، ای معدن جود و کرم

دوتموشام من دامنوندن، ای شه حل و حرم

گر ئولمده من سنون دامانوی الدن ویرمرم

تا نوید عفویله اولسون بشارت یاحسین

 

سن بویوردون حره، ای آزاد مرد روزگار

شکر اولا اللهه خیره ختم اولوب انجام کار

غم یمه، توبن قبول ایتدی سنون پروردگار

حره ویردون مژده فوز و سعادت یاحسین

 

یازدی باب توبه نی، حر ریاحی شهید

آچدی نومید اهل عصیانه گوزل باب امید

ایلدی روی گنه کار سیاهین قان سفید

غسل توبه قانلا غرق بحر عصیان ایلدی

 

ووردی بیر غوطه او قان دریاده بیحد ذوقیله

نوش ایدوب شهد شهادتدن ئولونجه شوقیله

تاپدی جاویدی بقا، نفسین فنایه سوقله

بو بقادن غبطه خضر آب حیوان ایلدی

 

کوی عشقده ایستدی تاپسون او گمگشته، سبیل

قرب عزتده عزیز اولسون اوزون دوتدی ذلیل

صدقله باب نجات امته دوشدی دخیل

خاک راهی توتیای دیده جان ایلدی

 

توکدی گوزدن اشگ تر، ایسلاندی خاک پای شاه

عرض ایدوب کای هاربینه ملجاء و پشت و پناه

من خطاکارم، گنهکارم، پشیمان روسیاه

عذر خواهم، بیر گناهیم کونی پژمان ایلدی

 

نیلیوم چاره ندور؟ ای چاره سیزلر چاره سی

نیلسون دنیاده بیر دنیا خطا آواره سی

ووردی بیر اود جانه آه سردیم آتشپاره سی

حدتی خوناب چشمی آتش افشان ایلدی

 

ال منیم، دامن سنون، ای معدن رحم و کرم

گر کسلسه اللریم دامانون الدن ویرمرم

دامنون کسسن گینه ال دامنوندن چکمرم

تا گورم شه، بو دواسیز درده درمان ایلدی

 

اودلانوب بسکه سمندر تک شرار آهینه

ایلدی آهی اثر، رحم و کرم درگاهینه

موج ووردی بحر رحمت، بنده خاطر خواهینه

میزبانا رافتله حری، مهمان ایلدی

 

بیر نظرله قیلدی شه اوز خاکسارین کیمیا

دردینه محتاج درمان اولدی هر درده دوا

ایمدیده عرض حال ایلر اونا شاه و گدا

چوخلارین بیله تذلل، صاحب شان ایلدی...

 

 مرحوم حاج عبدالعظیم ذهنی زاده

منبع مجموعه کانالهای مدح و مرثیه