حضرت موسی بن جعفر(علیه السّلام)
و گریز به قتلگاه
یا رب سن ئوزون کاشف هر درد و بلاسن
هم پاک و منزّه سن و هر قلبه رجا سن
هم غافر و هم سامع و هم مٌجزِل عطاسن
غربتده قالان بنده نم ای خَلقِ بَرایا
بوردان منی گل ایله رها مٌطلِق اٌسارا
ای قلبیلرون مونسی ، بی یارو کَسَم من
بیر قوش کیمی زندانیِ آهن قفسَم من
زهرا بالاسی ، سِبط شه لوکشفَم من
حٌزنیله آنام فاطمه نی داده چاغیرّام
گر یاره سی چوخدور ولی امداده چاغیرّام
زهرا آنا گل گوشه ی زندانیده قالدیم
بو سِندون اَلیندن آنا گول مثلی سارالدیم
یوخدور گلنیم یا گئدنیم بوردا قوجالدیم
بغدادیده گل اوغلووا لطف و نظر ایله
معصومه مه مندن آناجان بیر خبر ایله
هجران اوتی عمروم گونونی قاره ائدیبدیر
زنجیر آناجان قولّاریمی یاره ائدیبدیر
بو ظلم الیینلر منی آواره ائدیبدیر
گیم گورسه دییر بیر سارالان گولشنه بنزر
جسمیم آنا گول مثلی سولوبدور سنه بنزر
جسمیم اَریییب گوز یاشی رٌخساره رواندور
آهیم اوجالیر گویلره گل داده آماندور
بو گوشه ی زندانون آنا دردی گراندور
ای کاش کی رضا سنله آنا داده گلیدی
بیر الده کفن محبسه امداده گلیدی
حسرتده قالیب خوش گونه عمروم کدر اولدی
اون بیر ایلیم البتده خطرلی گذر اولدی
معصومه میلن گئچمیش او کونلر هدر اولدی
یوخ تاب و توان دورسام ایاق اوسته ییخیلّام
بیر قوش کیمی هِی گوشه ی زندانه سیخیلّام
دورانی گوروم خوار اولا هئچ قویمادی راحت
قبرینده ده بیر دینجلسن وئرمدی فرصت
چگدین آنا اون سکّیز ایل عمرونده مصیبت
گوز یاشین آنا معجرووی ایلدی تر تر
بیر خوش گونون هئچ اولمادی هِی اولدی مکدّر
دوران سنی گه کربوبلایه آپاروبدور
نهر اوسته علمدار ولایه آپاروبدور
گه مطبخ خولیده نوایه آپاروبدور
گاهی آپاروب شام غم آباده یارالی
الآندا گه بو محبس بغداده یارالی
قرخ پله یئنیر بورداکی من قالمیشام الآن
از بسکه رطوبتلی دی یوخ یاتماغا امکان
زنجیری رطوبت چورودوب گل سنه قربان
فرصت منه ده وئرمدی بو گردش گردون
زهریله آخیر ئولدورجک سِندیله هارون
زهرا آنا گل آه و نوایه بو عزایه
یوخدور گلنیم دادیمه گل باری نوایه
فرض ایله گلورسن آنا جان کربوبلایه
زینب کیمی نه آغلیانیم وای دیینیم وار
غربتده نه ده آهیله لای لای دیَنیم وار
گرچه آنا دوغرانمادی اوغلوم بو جهاندا
یوز اوسته یادا دوشمدی قولسوز او نشاندا
اوچ پر اوخیلان یانمادی سینم بو مکاندا
قالدیم ولی غر بتده عیالیمدن آرالی
جان وئردیم حسین مثلی چوخور یئرده یارالی
قالدی بدنیم جدّیم حسین تک داشین اوسته
خنجر پاراسی ائتدی اونی نم منی خسته
باری یئنه زینب گوزونی ایلدی بسته
قورخوم بودی عمّم کیمی سینم اولا پرپر
تنها ،گوز آچیخ دنیانی ترک ایلییم آخر
البته آنا آغلامیسان کربوبلاده
یانمیش سینٌوی داغلامیسان کربوبلاده
گوز یاشی یوزه باغلامیسان کربوبلاده
مقتلده حسین قانه باتاندا آنا گلدون
لب تشنه چوخور یئرده قالاندا آنا گلدون
زینب باشینی آچدی اورگلر محن اولدی
عریان بدنین اوستونه سردی کفن اولدی
سندن صورا اولحظه نه داده گلن اولدی
ناگه اوجالیب سس باجی نیلیم کی یولوم یوخ
عفو ائت گله بیلمم داها امداده قولوم یوخ
گه دوردی ایاقه سالا سایه باشین اوسته
ایلشدی گهی خنجرو نیزه داشین اوسته
گوز یاشینی توکدی یوزونه قارداشین اوسته
ناله ائلدی ، آغلادی اوت دوتدی جهانی
یاندی سینه سی باشلادی آهیله فغانی
آختاردی الین سینه سی اوسته ائده مرهم
گوردی کسیلیب یوخدی بیلگدن او شه غم
دامانینی گوز یاشی ایله ایلدی نم نم
سسلندی اخا السیز عیالسیز نه یاتیبسان
یورقون باجووی اولمیا کی گوزدن آتوبسان
اصغر الماسی اهری
با سلام