احوالات راه شام 5239
احوالات راه شام
کوفه نی ترک ایلیوبدور اسرا اجباری
شامه قول باغلی چکور شمر دنی احراری
بی جهاز اشترون اوسته بالا قیزلار ملشور
هربیریندن جان آلور زجر و سنان اخطاری
غل و زنجیره چکوب اهل ستم سجادی
لنگ بیر ناقیه مینمیش کرمون معیاری
فکر ایله مرکب لنگان اولا راکب بیمار
نجه گور طی ایلیردی ره نا همواری
هرقدم آتدیقیجان ناقه دییردی سجاد
بس هاچان باشه چاتار شامون اوزون یوللاری
گردنیندن قان آخور یاره لیوبدور زنجیر
کعبه ی معرفتون قانه باتوب استاری
چرخه باخ عترت اطهار گیدن قافله ده
ابن وقاص اولوب قافله نون سالاری
ویرمیشیدی او قدر زجر دنی قیزلاری
سارالاردی کیمه باخسیدی یقین رخساری
هر کیمون قمچی سی وار الده ایدور ظلمون علن
یوخ مراعات ایلین عورتی یا بیماری
هاردا اتراق ایلییردی سپه شوم و دغا
اوندادا یوخدی اسیرانه فراغت باری
صبحه جک زینب بیچاره و محکوم بلا
ویرریدی ملشن قیزلارینا دلداری
بعضی لر داشلاری بالش ایلیوب یوخلاردی
بلکه تسکین تاپا یاره لرون آزاری
تا دوراردی یوخودان لشکر بی شرم و حیا
باشلاناردی گینه قمچیله بدن پیکاری
لازمیدی هامی بی وقفه مینه ناقه لره
چاتماقا شامه عجولیدی یزید انصاری
گر یوبانسیدی بیری قمچی انردی باشینا
تیتردردی بو بلا عرش حق داداری
هر قیزا دمچی دگوب سسلنوب الله یاندیم
سن ئوزون چاره ایله چاره سیزم آی تاری
اوندا تک داده گلن زینب غم پروریدی
ایلییردی او قیزا دشت بلاده یاری
ناقیه ساری گیدن قیزلارینا باخدیقیجان
زینبین جوشه گلردی محن سرشاری
پنجه اوستونده چوخی یول یرییردی یارب
فرصت اولمازدی ایاقلاردان آییرسون خاری
یولا بیر یولدا دوشور درد و بلا قافله سی
مختلف دور او همان قافله نون اخباری
شامه جک چوخ بالا تاب ایلمدی جان ویردی
اوقدر کی چوخودی ظلم و ستم معیاری
قالان اطفال دییردی بو سوزی بیر بیرینه
قسمت اولماز بیزه گویا وطنون دیداری
هر کیمون غم توزی توتسیدی اورک شیشه سینی
فوری زینب اولاریدی او کسون غمخواری
هامیدان چوخ ولی گوزلردی رقیه بالاسین
زینب احیاگر قرآن اسرا سرداری
آیریلان وقتیده چون شاه ولا مخیمدن
زینبه ویردی امانت او در شهواری
شامه جک سعی ایله نازلی بالامون همدمی اول
شام ویراندا اونون دیدینه گللم آری
اودی زینب گل گلزار رسول مدنی
سعی ایدردی ایلیه یاخجی امانت داری
بیر گجه بنت علی غفلت ایدوب بیر لحظه
او همان لحظه یازوب چرخ،بلا طوماری
نیزه دن شمس هدی ناظریدی قافلیه
گوردی بیر اولدوزی یوخ،گوزدن ایدوب خون جاری
باغبان مثلی و یا باخدی سولان گلشنینه
گوردی بیر سوسنی گول ترک ایلیوب گلزاری
ناگهان سینه صحراده دوروب راس امام
هر قدر ویردیله زور گیتمدی اول میر همام
بیرنفر محضر سجاده گلوبدور آنی
عرض ایدوب سنده دی مولا بو ایشون درمانی
تیری تک سانجیلوب اول نیزه ترابه گویا
کوه تک هیبتی وار یوخدی تکان امکانی
محضر شاه شهیده یتیشوب شاه زمان
عرض ایدوب جانیم اولا قانلی باشون قربانی
بابا آیا نه اولوبدور بیله تاخیره دلیل
اولیانون چون اولار هر عمله برهانی
بیر اشاره ایلیوب نی ده همان یاره لی باش
گورسدوب نایبینه قافله ی طفلانی
گوزلریلن دیدی سجاد بالام یولدا قالوب
گر یوبانسوز چیخاجاق قورخولی چولده جانی
زینبی آگه ایدوب صاحب وسالار جهان
دیدی سای فوری بیبی خردا بیوک یارانی
اسرانون بیری گویا کی دوشوب صحراده
هانسی بیر طفلیدی گور ترک ایلیوب اعوانی
باخدی زینب اسرایه دیدی بیردن ای وای
ننمون بنذری یوخ ، خواراولا بو عدوانی
دیدلر بیر نفر الساعه گتیرسون او قیزی
ترپدنمز بیری یوخسا او سر تابانی
زجری کی خوار ایلمیشدی سر شاه شهدا
فکر ایدوبدور یتیشوب کینه سینون جبرانی
مرکبی غیضیله میندی او دنی دوشدی یولا
تا کی صحراده تاپا دختر مه سیمانی
ولی صحراده رقیه اویانوب رویادن
سسلدی داده اول ذات حق یزدانی
قاچدی ال باشدا بیراز ساق سولونا دلده نوا
عمه سی گوردی گیدوب اشکه باتوب دامانی
بس ایاقینه باتوب خار مغیلان یولدا
گوردی تپراقه ایاقیندن آخور القانی
اگلشوب تاکی ایاقدا ن تیکانی خارج ایده
آخ دیدیقجن او بالا تیتردی دین ارکانی
دوتدی بیر یول یوزونی گوگلره اول نجم وفا
دیدی سن داده یتیش آی بابامون جانانی
دوزدی یارب بی بیمی یولدا اذیت ایلدیم
حقی وار گوزدن آتا او من بی سامانی
ولی یا رب سنه من نیلمیشم دنیاده
سنه زیبادی مگر بو یتیمون افغانی
سنی حیدر جانی بیر چاره ایله دای ئولورم
وحشتیمنن دی کی دوزخ گورورم صحرانی
گوردی ناگه او بالا مرحمت یزدانی
درک ایدوب دشت مخوفی اوزمان نورانی
گوردی بیر عورتی قدی بوکولوب باش آغاروب
دیدی کیمسن بویور ای یار شب ظلمانی
سنی گوندردی خدا تا کی ملالیم آزالا
مندن آرتوقدی ولی ئوز غموون میزانی
فاطمه باخدی او دشت ایچره بیراز اوخشارینا
دیدی سن سن بالامون آهو باخیش جیرانی
تا ایشیتدی بو سوزی آغلادی اول خردا بالا
دیدی آیا گورورم فاطمه ی زهرانی؟
آناجان یاخجی یامان گونده منی یاد ایلدون
یاخجی بو دشتیده ا ولدوم آنامون مهمانی
تا قولاقینه چاتوب مرکب رهوار سسی
روحی ده گوردی او دم ترک ایلییوب معنانی
زجر گورجک اوقیزی فوری انوب مرکبدن
قمچی نی قوزادی ویرسون او گل رضوانی
زجر ظالم الینی فوری دوتوب همسفری
دیدی بو نوعیله ویرسون بو ئولر ای جانی
گر بو ئولسه داخی باش حشره کیمین ترپنمز
بو فقط راضی ایدر گیتمگه اول سلطانی
ای «نوید» یازما سخن احسن زیبا آلاسان
یاز خانم فاطمه دن خلعت اعلا آلاسان
کربلایی نوید آسال اردبیلی
با سلام