متن نوحه های ترکی و فارسی

در احوالات حضرت فاطمه زهرا (سلام الله)

او گوز که اولسا گوزوم اشگباری زهرانون

یازار خدای جهان دوستاری زهرانون

ایکی جهاندا اولور چوخ نتایجه منتج

حقیقتیله دوتولسا اصاری زهرانون

آدیدی فاطمه ام الائمه بیر لقبی

بو عمده منصبه وار انحصاری زهرانون

بیوک مقامی وار الله یانندا فاطمه نون

بولور خداسی ندور اعتباری زهرانون

رضاسی خالق عالم رضاسیدور مطلق

نقار حضرت حقدور نقاری زهرانون

تمام ما خلق الله طفیل فاطمه دور

سوای عم اوغلوسی، باب کباری زهرانون

کمینه جاریه سی مریمیله آسیه دور

هزار موسی و عیسی دی جاری زهرانون

آتاسی احمد، آناسی خدیجه کبرا

علی ولی خدا هم عیاری زهرانون

اوخوندی صیغه عقدی سماده کرسیده

ایدوب خدای جهان در نثاری زهرانون

بو شان صاحبی انصافدور جفا چکسون؟

روادی اودلانا درگاه داری زهرانون؟

گوروم ایکمجی نون الله عذابین آرتیرسون

نقدر واردی خداوندگاری زهرانون

قاپو دالندا قویوب محسنین شهید ایتدی

عذاره خون دلین ایتدی جاری زهرانون

اوجالدی ناله سی، گل فضه محسنیم ئولدی

یتیشدی سمع امامه بو جاری زهرانون

کمال سرعتیله گلدی، گوردوقون گوردی

امام عباسی اولوب استتاری زهرانون

دونوب جماعته سسلندی اولماسیدی نبی

وصیتی، کیم اولوردی شراری زهرانون؟

جماعت آنلادیلار ذوالفقار چکمیه جاق

مقام صبرده دور شهسواری زهرانون

جری اولوب اسداللهه فرقه روباه

رعایت اولمادی حال فکاری زهرانون

چکوب عم اوغلوسونی مسجده که بیعت ایده

دنی رعیتنه شهریاری زهرانون

دوروب او حالیله دامان مرتضانی دوتوب

حمایت اولدی امامه شعاری زهرانون

دوروب او حالیله دامان مرتضانی دوتوب

حمایت اولدی امامه شعاری زهرانون

گوروب ایکمجی اولور خلقه فاطمه فایق

اگر چه چوخ چوخودی استحاری زهرانون

الین دوتوب حسنینین قویوبلا مسجده یوز

قویوب گورنلری حیران وقاری زهرانون

یتوب عم اوغلوسونی اوزگه حالده گوردی

پوزولدی حالی گیدوب اختیاری زهرانون

ال آتدی معجره زهرا، عمامیه حسنین

امامه واجب اولوب ابتهاری زهرانون

بویوردی فاطمه نی قویما باش آچا سلمان

بلا نزولنه وار امتصاری زهرانون

پیمبرین قیزینی ساکت ایلدی سلمان

سونوب بیر آز شرر اقتهاری زهرانون

قویوبلا دوردوده یوز دودمان والایه

و لیک ظاهریدی اعتصاری زهرانون

بو قدر ظلمه کفایت ایدیدیلر ای کاش

اولونمیایدی حقی غصب باری زهرانون

گلوب چخاتدیلار عامل لرینی ملکندن

دوباره یاندی دل داغداری زهرانون

بیر آز زماندا چکوب حدسیز غم و محنت

کنوز محنت اولوب اشتهاری زهرانون

اوزی مریضیدی خانه نشینیدی حیدر

معاشدن چوخ اولوردی فشاری زهرانون

اوروج دوتاردی سوئیله ایدردی افطارین

نه حدیدیدی خدا افتقاری زهرانون؟

دئدی عم اوغولوسنا بیر گون ای شه ابرار

حد کماله یتوب اعتساری زهرانون

نه چاره ایلیوم اوچگوندی آج قالوب بالالار

دوشوب بو خطیله سیر و مداری زهرانون

اجازه مرحمت ایله گیدوم آلوم فدکی

اولور که باشه یته اضطراری زهرانون

مرخص اولدی گیدوب یتدی بیت بوبکره

علیده ایوده اولوب انتظاری زهرانون

جهانه باخ کیمی گور ایلیوب کیمه محتاج؟

من اوزلقمدا وارام شرمساری زهرانون

دئدی خلیفیه ریحانه رسول خدا

شرار جوعیله وار استناری زهرانون

فدک سنونکیده اولسا منه عطا ایله

رعایت اولسا نولور حال زاری زهرانون؟

او قدر دل دئدی شرم ایلدی او بی آزرم

یازیلدی رد اولونا نخله زاری زهرانون

آلوب قباله نی یوز قویدی دودمانه، قضا

ایکمجین ایلدی یولدا دچاری زهرانون

دئدی که فاطمه هاردان گلورسن ایله بیان

عجبدی رهگذر ایچره گذاری زهرانون

بویوردی حقیمی گیتدیم خلیفه مهر ایلیه

ثمر ویروب شجر اعتراری زهرانون

دئدی گوروم نجه مهر ایلدی؟ نجه تصدیق؟

بو امره سویلدی یوخ اقتداری زهرانون

او ظلم لر که منه ایلدون کفایت دور

هنوز وار مرضینده عزاری زهرانون

تانور منی هامی دنیا، کیمم کیمون قیزیم

روا دگل بولوسن انتذاری زهرانون

نقدر دل دئدی یالواردی اولمادی مقبول

اولان اولوب، اوجالوب آه و زاری زهرانون

پیمبرون قیزینا ادعای امت ایدن

نه ظلم ایدوب بولوری کردگاری زهرانون

او ظلمیله یره دوشدی اصابه زهرا

شبیه سوسن اولوب گلعذاری زهرانون

سنان قفس گنه سندی ایاق جفاسیله

دوشوب یره قد شمشاد واری زهرانون

عجبدی کسمدی روحی علاقه جسمندن

خدا بولور نه ایمیش بردباری زهرانون

او حالتنده که دوشموشدی غش ایچینده خانم

آخاردی صورتنه ثقب ثاری زهرانون

بیلنمورم خانیمی کیم گتوردی منزلنه

و یا کیم اولدی او اثناده یاری زهرانون

قاپو دالندا قالاندان مریضیدی زهرا

بو ظلمدن چوخ اولوب انکساری زهرانون

سالندی بستر غم دودمان حیدرده

اولوب او بستر غم غمکساری زهرانون

نه حالنی سوروشان اولدی نه گلوب گیده نی

نه بی وفا ایمیش اهل دیاری زهرانون

دیمه که گلمدی بیر کیمسنه عیادتنه

عیادت ایلینیدی صغاری زهرانون

طبیبی دلده کی داغ جفای امتیدی

دواسی درد و غم بی شماری زهرانون

او قدر اوستنه ظلمات غم تهاجم ایدوب

که دوندی بیر شب تاره نهاری زهرانون

بوکولدی بار غمیله آغاردی محنتدن

او سرو قامتی گیسوی تاری زهرانون

نمازی ختم ایلینده دیردی حی رعوف

وجودین ایله حیاتندن عاری زهرانون

او باب و لطف و کرمدن بو التماسیم وار

قبول اولونسا اولور افتخاری زهرانون

بودور مرام دلیم تز تمام اولا عمریم

خزانه تیز دونه یارب بهاری زهرانون

مآل کار قبول اولدی درگه حقده

دعاسی یتدی دم احتضاری زهرانون

دئدی عم اوغلی گل عمروم تمامدور ئولورم

یتوردی کامنه پروردگاری زهرانون

گوروم دویونجا سنی، سنده گور دویونجا منی

قالور قیامته دیدار یاری زهرانون

بو دودمانه گلندن گر اینجیسن مندن

کرامتونله گذشت ائت نگاری زهرانون

بو مدتی سنه گر چه چوخ اولدی تصدیعیم

اوزون حلال ایله ای تاجداری زهرانون

سنه مرام دلمجه ایدنمدیم خدمت

قصور خدمته وار اعتذاری زهرانون

قبول زحمت ایدوب باشلا سوره یاسین

گوگلده قالمیا حسرت غباری زهرانون

گجیله غسلمی ویر قبره قوی گجه ایله منی

قالا جماعته گزلین مزاری زهرانون

اولاری که ظلم ایلیوب گلمسونله تشییعه

بو قومدن چوخ اولوب انزجاری زهرانون

نه احتیاج سنه تاپشوروم یتیم لری

اولاردی نخله عمرینده باری زهرانون

هامی وصیتین عرض ایلدی تمام اولدی

یتیم اولوب آنادان یادگاری زهرانون

قلم دایاندی دایان ((ذهنی زاده)) ختم ایله

تمامه حاشه یته سوگواری زهرانون

الهی امر ایله نقل ایلین ملک لرده

که ((ذهنی نی)) ایده لر همجواری زهرانون

تمام شیعه نی بو روسیاهی کامه یتور

منای دلدی فقط اعتماری زهرانون

آتام ئولونجه زیارت دئدی تمام اولدی

امیدوار آپاروب انتقاری زهرانون

تمام اولدی بو اشعار عید زهراده

صله ویرر وارام امیدواری زهرانون

 مرحوم ذهنی زاده 

منبع مجموعه کانالهای مدح و مرثیه