زبانحال حضرت زینب (س) به آفتاب در روز عاشورا 3718
زبانحال حضرت زینب کبری (سلام الله)
بآفتاب در روز عاشورا
غارت گونی عوالمه چون دوشدی انقلاب
زهرا قیزی دوتوب گونه یوز ایلدی خطاب
باتدی اسلامین گونی ای گون نه رخوتدور بو گون
سنده بات غارت تمام اولسون قیامتدور بو گون
سن بو گون طالع اولاندان کونه دوشموش انقلاب
تک نه صحرای بلا ایلور عوالم اضطراب
گورموسن بیر آسمان ماه و نجوم و آفتاب
باتدی قان دریاسینه سنده نه غفلتدور بو گون
گورموسن اولموش هدایت آسمانی منفطر
گورموسن اولدوزلاری یرده توکولموش منتثر
حشر و نشر اولموش بدنلر یر یوزینده منتشر
بیر قیامتدور قیامتدن علامتدور بو گون
بو گونون بیر نصف روزی نچه ساعتدور مگر؟
وار بو آز ساعتده بیر دنیا حوادثدن خبر
توکدی بیر قانلار بو گون اشرار اولاد بشر
قطره سی دریای راز بدو خلقتدور بو گون
بیر جوانلار توکدی قانلی تپراقا قوم رذیل
هر بیری پیر طریقت اهلینه پیر نبیل
خانقاه عشقیده مسند نشین بی عدیل
پیروانی رهروان حق طریقتدور بو گون
مردلر الدوردولر تزویریله نا مردیلر
مردلر که لافتی تک منحصر برفردیلر
وار دل مردان عالمده بو غمدن دردیلر
شیر مردان دردمند بی نهایتدور بو گون
قوه نوریه وی اسکیت پیمبردن اوتان
حدت ناریه وی آرتورما حیردن اوتان
جبرئیل لایلای دین صد پاره پیکردن اوتان
یاندی روح فاطمه بو نه حرارتدور بو گون
توکدی بیر قانلار عنادیله بو گون قوم عنود
قطره بقطره او قانلار صاحبی حی ودود
آه اگر طعنه وورا اسلامه کفاریهود
چون او قانلار ننگی دامنگیر امتدور بوگون
باتموسان یوخسا دچار درد بی درمانیسن
یا ایتوردون مغربون سیرینده سر گردانیسن
بات هایان گلدی ولو مشرق نیه حیرانیسن
گرچه عالملر غریق بحر حیرتدور بو گون
کوفیان قطب وجودی سیندوروب یخدی یره
خط سیریندن چیخار قطب اولمیاندا دایره
گودموسن بی نظم اولوب دگموش عوالم بیر بیره
بو منظم سیریوه داعی نه علتدور بو گون
بیر جنایت ایلیوب آل امیه آشکار
گورمیوب گورمز نظیرین بیر ده چشم روزکار
صفحه تاریخ اعراب اولدی یکسر لکه دار
آل هاشم صفحه سی تاریخه زینتدور بو گون
بات یوبانما ایلمه باتماقدا بیر لحظه درنگ
قوی دوتا دنیانی بو روز سیه شبدیز رنگ
تا گوراخ هاردان هارا اولدوزلار آخموش لنگ لنگ
خوردا قیزلار حالی چوللرده نه حالتدور بو گون
امر قتله خاتمه ویردی بو گون قوم ظلام
تنگه گلدی خوردا قیزلار اولموری غارت تمام
معجر استنده کشاکشدور بات اولسون تیره شام
هر قدر تیز باتسان آل للهه نصرتدور بوگون
یاز حسینی صفحه رخساره بو غم چامه سین
قویما خشک اولسون مداد اشک و مژگان خامه سین
صالحات ایلر بو نامه سیئاتین نامه سین
اجریوه (ذهنیده) ذیحق شراکتدور بو گون
مرحومین حسینی سعدی زمان و ذهنی زاده
منبع کانال گنجینه گذشتگان
با سلام