سؤال و جواب راهب
با رأس مبارک امام حسین (علیه السّلام)
دیریمده اولوبسان منه مهمان آقا کیمسن؟
گورسندی وارون عزت شایان آقا کیمسن؟
راهب چیخوب حق اوسته منیم جانیم حسینم
اوز دینیمه خاطر توکولوب قانیم حسینم
موسی سن او سیناده اولان طورووه قربان
احمد سن اگر صورت پور نورووه قربان
عاشق سن اولوم باشدا سنون شورووه قربان
وئر قلبیده کی دردیمه درمان آقا کیمسن ؟
جدّیمدی تانی حضرت پیغمبر خاتم
مصباح هدی نور خدا فلک نجاتم
جنّتده ورولمیش آدیما پرچم ماتم
طاها اوزودور پیده سی گریانم حسینم
نهضت ایلیوب سن بئله معلومیدی خیره
گون مثلی چیخوبسان گئجه صندوقیده سیره
عیسی کیمی نورون دوتوب هر سمتیده دیره
عیسی دگوسن پس سنه قربان آقا کیمسن ؟
کیفیت مرگیم سنه گر اولماسا معلوم
اظهار ایدورم کی اَنَا مَقْتُول اَنَا مَظْلُوم
راهب اَنَا عَطْشان اَنَا مَهْمُومْ اَنَا مَغمُوم
گوداله دوشوب پیکر عریانیم حسینم
دیداروه گوردوم گئجه حوّاده گلوبدور
موسی ده گلوب مریم وساراده گلوبدور
پهلوده الی بیر خانم افتاده گلوبدور
باخدون یوزونه حال پریشان آقا کیمسن ؟
آلمشدی عصا بیر اله موسائیدی راهب
گلمیشدی منه دم ویره عیسائیدی راهب
پهلوده قالان بیر الی زهرائیدی راهب
اللرده ئولوب مفخر نسوانیم حسینم
قالدی کشیکه یاوری دیریمده یزیدین
صحبتده اشیتدیم اولارون گفت وشنیدین
باشلارون الوب مندن هواداری رسیدین
یوخ سن کیمی دنیاده بیر انسان آقا کیمسن ؟
امضاء کی وئروبسن شهدا باشیدی باشلار
سر نیزده محکم ورولوب کوفه ده داشلار
اول گئجه لیک آی کیمیدی تیره لی قاشلار
جانین ویروب اسلامه شهیدانیم حسینم
گفتاره گلوبلر اله فرصت سالا جاقلار
گزلینده بو صحراده بیر عدّه قالا جاقلار
شب خون ورولوب باشلاری بیزدن آلا جاقلار
نه باعث اولوب ویردون او گون جان آقا کیمسن ؟
لطف ائتدی باخوب عاشقینه حضرت معشوق
دنیاده منیم خاطریمی ایسته دی مخلوق
دیرونده یارالی باشیمی ساخلادی صندوق
مهمانون اولوب عترت ویلانیم حسینم
اعلان ایله اون آلتی کسوک باشلاری کیمدی
نسوانون آخور صورته گوز یاشلاری کیمدی
بو قافله ده وار باجی قارداشلاری کیمدی
گل صحبته ائتمه منی گریان آقا کیمسن ؟
آزاده منم قید عدودن اوزاق اولدوم
پس قانلی بیابانیده پوزقون تفاق اولدوم
دیرونده سنون بیر گئجه گلدیم قوناق اولدوم
اولدی صلحا فرقه سی مهمانیم حسینم
صندوقیده قانلی باشووی چیگنیمه آلدیم
سس گلدی منه مفتخر اول بهتیده قالدیم
بیلدیم کی آقا بوینوما عزّت شالی سالدیم
گفتاره گل ای صاحب احسان آقا کیمسن ؟
مهمانوی گوردون واریدی کول دوداقندا
یر ویرمدی خولی منه ایوده اطاقندا
قالدوم گجه نون چاقی تنورون بوجاقندا
کول اوسته اولوب شام غریبانیم حسینم
گلدیم من اوزوم روزنه دن باشووه باخدیم
خلقتده چکن نقشهٔ نقّاشووه باخدیم
قانه بویانان گوزلرووه قاشووه باخدیم
صدمه نیه گورمیش لب و دندان آقا کیمسن ؟
حاضر ائده سن عطر و گلابی قاباقیمدا
ضربه وروب اعدا نئچه یول غملی چاقیمدا
آهسته یووارسان یارا واردور دوداقیمدا
چوبه هدف اولدی لب ودندانیم حسینم
واردور یوزوون قانلی کولی سالمیش عذابه
ویرسون گر اجازه بوکرم عطر و گلابه
خیر امریده منده چاتارام اجر و ثوابه
محشرده مکانیم اولا رضوان آقا کیمسن ؟
صندوقیده گتدون منی شخصیتون آرتدی
سس گلدی محبت ایلدون عزتون آرتدی
عیسی نون حضورینده سنون حرمتون آرتدی
وار قلبیده کی دردوه درمانیم حسینم
آدم ده سنون خاطریوی ایسته دی خیلی
دیدارووه گلسون گورونوب رغبت ومیلی
گور کیمسن اولوبدور سنه آدمده طفیلی
معناده ملک لر دی نگهبان آقا کیمسن ؟
صحرای بلاده یارالی-اولدی نمازیم
باشلاندی خداونده او گون راز و نیازیم
قربان کیمی راهب کسیلوب تشنه بوغازیم
پایانه چاتوب شرطیلی پیمانیم حسینم........
رویاده آقا گل بو «معزی»سنی گورسون
رویونده سنون نور حق ذوالمنی گورسون
قبرینده دئسون گلمیش حسینیم منی گورسون
اظهاره گلوب ائتمسون عنوان آقا کیمسن ؟
اشعارینه دنیاده «معزی» نمک ایستر
گوهر بیلوب هر بیتینی گورسون محک ایستر
مندن اوزونه روز ازلدن کمک ایستر
آخر ویریلر خلعت الوانیم حسینم
معزی اردبیلی
با سلام