متن نوحه های ترکی و فارسی

احوالات امام حسن مجتبی (علیه السلام)

نه بهارین نه گُلون نه چمنین عاشقیم

نه ده آهو کیمی دشت و دمنین عاشقیم

نیلورم گلشنی بیر گون سولاجاق خوار اولاجاق

نه شقایق نه ده کی نسترنین عاشقیم

قالمیوب هئچ کیمه دنیا،منه ده قالمیاجاق

دئمرم شوکت چرخ کهنین عاشقیم

منده بیرگون ئولرم، بیرجه وصیّت ائدورم

سنگ قبریمده یازون پنج تنین عاشقیم

احمد و حیدرو زهرا،و حسن بیرده حسین

ایکی دنیا بو گؤزل انجمنین عاشقیم

حضرت فاطمه نین نوکرینون نوکریم

شیعیان شه خیبر شکنین عاشقیم

هرکس اوز دلبرینون سؤزلرینه عاشق اولار

من ولیکن ایکی شیرین سخنین عاشقیم

بیری مولای حرمدور ،بیری دریای کرم

ایکی شهزاده حسین و حسنین عاشقیم

بیرینون قبری بقیعده ائله نسگللی یاتوب

ای مدینه،او غریب وطنین عاشقیم

بیریده کرب و بلانی ائلیوب کعبهٔ عشق

نوکرم من او شه ممتحنین عاشقیم

بیرینون پارچالانوبدور اوز ائوینده جگری

ظلمیلن سو یئرینه زهر ایچنین عاشقیم

بیرینونده بئلی سیندی کمکی باتدی قانا

نهر علقمده او قولسوز بدنین عاشقیم

آغلا شیعه بیرینون اوخلادیلار تابوتین

یاندیم الله بئله مظلوم ئولنین عاشقیم

بیریده ایستی قومین اوسته سوسوز جان وئردی

اورگیم قاندی شه بی کفنین عاشقیم

گؤردی زینب ائله بیر حالدا حسینی کی دئدی

یوسفیم غارت اولان پیرهنین عاشقیم

باجون ئولسون بو نه حالتدی تانینمور کیمسن

بلبلم پرپر اولان یاسمنین عاشقیم

حسنه آغلامیشام چوخ سنه ده آغلیارام

من که بیر عمریدی درد و محنین عاشقیم

هانی بیر یئر که ننم تک الییم گؤز یاشیمی

سئورم خلوتی بیت الحزنین عاشقیم

انتظارینده دی ((صادق)) آقاسی مهدینون

سویلویر منده امام زمنین عاشقیم

منبع مجموعه کانالهای مدح و مرثیه