احوالات حضرت علی اصغر (ع) بخش دوم 6005
احوالات حضرت علی اصغر (ع)
بخش دوم
گوروب الیندن آلان یوخ ، قیلوب فسوس واَسف
اوتاندی گیتسون امامِ زمان خیامه طرف
باخاردی صاق صولا ، نِی تک گلیردی افغانه
گیدیردی گه قییدردی دوباره میدانه
امام قلبینه بو نکته دور شراره سالان
تاپولمادی بالاسین بیر نفر الیندن آلان
کیمی واریدی آلِیدی او قانلی قنداقی
ایدیدی دفن یتیدی تمامه میثاقی
باخاردی اصغره قلبی یاناردی آغلاردی
یانیخلی سوزلریله کایناتی داغلاردی
دییردی قالدی الیمده جنازهء اصغر
گل آل الیمدن آپار دفن ایله علی اکبر
غریب امامه نجه اکبری ویریدی جواب
که قطعه قطعه اونی دوغرامیشدی اهلِ عذاب
گورردی ویرمدی جدّی شبیهی اکبر سس
یاناردی قلبیدن آغلاردی اولشهِ بیکس
دونوب باخاردی فرات اوسته اول امام علیم
دییردی هارداسان ای یاوریم ابولفضلیم
الیمده اوخلانوب اصغر گوزوم توکر قانیاش
ایاقه دور آنام اوغلی عزیزلیقیم قارداش
یوخومدی حاله یانان محنت و غمیم چوخدور
بالام الیمده قالوب بیر نفر آلان یوخدور
یانیخلی قلبیمه بیجا خدنگِ غم دولمور
خیام سمتینه گیتماخلیقا یوزوم گلمیر
کمکلرینه ایدوب بیر به بیر بو نوعی خطاب
غریب امامه ویرن اولمادی ولیک جواب
قالوب علاجسیز ایلوب سبیل ، اشکِ ترین
یانایانا او زمان سسلیوبدی شیعه لرین
ایچن زماندا سرین سو منی سالون یاده
تاپولمادی منه بیر سو ویرن بو صحراده
غریب گورسوز اگر یاد ایدون بو محنتیمی
سالون خیاله او وقته منیمده غربتیمی
دیار کرب وبلاده اولوب گوریدوز کاش
آخور نه نوعیله گوزدن عذاریمه قانیاش
دیمم کمکلیق ایدیدوز منِ دل افکاره
کناریدن ایلییدوز بو حاله نظّاره
نجه گوریدوز الیم اوسته آلدیم اصغری من
بالاما رحم ایلیه بلکه سنگدل دشمن
سو ایسته دیم بالاما داد و آه و زاریله
بوغازین اوخلادیلار تیرِ زهر داریله
عزیزِ فاطمه گوردی قالوب الینده بالا
ترحم ایلین اولمور گَله الیندن آلا
خیال ایدردی گینه خیمیه گیده اولشاه
او حالیدن ایلیه اهل بیتینی آگاه
گورردی خیمه قباقینده منتظردی رباب
بیله بولور بالاسین ایلیوبدولر سیراب
حیا ایدردی گیدوب ماجرانی بولدورسون
آناسی واریری گورسه اوزینی ئولدورسون
دییردی اوز اوزونه ای خدا نه چاره ایدیم
خجالتم نجه یوز دوندروب خیامه گیدوم
آناسینا نجه بو حالی ایلییوم اظهار
سوزومی قویدولار آغزیمدا فرقهء کفّار
نه مصحفه نه منه احترام یوخلادیلار
سو ویرمه دیلر علاوه بالامی اوخلادیلار
سو فکرینه آناسی گوندروبدی میدانه
نجه دوزر گوره سو ایچمیوب باتوب قانه
گوروب امام گرک چاره یوخ گیده خیَمه
کمالِ خجلتیله یوز قویوب گینه حرمه
خجالتیندن اوجاتموب او شاه دین سسینی
دوشوب بو فکره چاقورسون بلا خزینه سینی
توکوبدی گوزیاشینی چکدی آه آه اوسته
چاقوردی زینب علیا جنابی آهسته
بویوردی گل باجی گل قلبیم اود دوتوب یاندی
الیمده تشنه بالام ظلم الیله اوخلاندی
علیّ اکبریم ئولموشدی غرقِ محنتیدیم
انیسِ غصه و همخانهء مصیبتیدیم
او نوجوان غمی ایتمیشدی گر چه باغریمی قان
چخارتدی اصغریم اکبر مصیبتین یاددان
بالامی سوزِ عطش ایلمیشدی بسکه کباب
باخوب یانوردی بونون حالینه آناسی رباب
خراش ایدردی آنا سینه سین بو مه پاره
دئ گلسون ایلسون ایندی بو حاله نظاره
تاپوب آنام باجی تغییر ازلده کی حالت
سو ویردی بیر سولی پیکان ، یاتوب راحت
یری وار آهیمیله یاندورام بو آفاقی
قالوبدی اصغریمون الده قانلو قنداقی
منیم بسیمدی پوزوب حالیمی بونون حالی
گَل آل آپار قیل آناسین بو حالدن حالی
خبر ویر اوغلی ئولنلر یغیشسون آچسون باش
بالاما آغلاسون عورت ، خانیم ، قیز ، اوشاق
ایشیتدی حضرتِ علیا مکرّمه ناگاه
حزین حزین گلوری صوتِ سرّ الله
قرار و صبرینی قارداشینون سسی آلدی
چخوب خیَمْدن او احواله بیر نظر سالدی
او بیر نظرده یوزینه غبارِ غم قوندی
نه گوردی قارداشینون حالی خیلی پوزقوندی
بالاسی اوخلانوب افلاکه ناله سی دایانوب
لباسی اللری عمّامه سی قانا بویانوب
شرارِ آهیله یاندوردی کون و امکانی
آلوبدی قارداش الیندن او تشنه قربانی
گتوردی خیمه لره ویردی اهلبیته خبر
یغیشدی باشینه یکسر عیالِ پیغمبر
گوروبله تازه هلالی قضا خسوفه سالوب
ستاره لر او هلالین تمام دورین آلوب
مخدّرات ووروب دورِ ماهده هاله
گورن بوغازینون اوخ یاره سین چکوب ناله
بیری ووروب باشا تا اوخ یاراسینا باخدی
یوزینه زلفینه قانین بیری دوتوب یاخدی
رباب گوردیله ایلور حیا ایده افغان
سیزیلدوری اوتانور ایتماقا نوا اوجادان
حزین سسیله ایدور ناله نورِ دیده سینه
تمام اوغلی ئولنلر ویروبله سس سسینه
باخوب او حاله سریّه یانوب بو نسگیلدن
چخارتدی قاسمی یاددان سالوب آدین دیلدن
گورنده لیلی علی اصغرین او حالتینی
چخارتدی یاددان علی اکبرین مصیبتینی
نقدر واریدی اوغلی ئولن آنا یکسر
ویروبله سس سسه سویلوبله وای علی اصغر
تصوّر ایله حرملر نجه گرک یانالار
جوان اوغولّاری یاددان چیخاردولّار آنالار
فغان ایدن باش آچان ساچ یولان او ساعتده
قاریشدی بیر بیرینه خیمه گاهِ عصمتده
ایله قیامت کبرا او چولده ایتدی ظهور
که بیر علامتِ صغرادور عرصه گاهِ نشور
دولاندوردولار الدن اله او غنچه گلی
قالوب آناسی نه حاله؟ اوزی خداسی بولی
باسوبدی سینیه جان تک چکیده ی جانین
یودی سرشکیله اوّل بوغازینون قانین
سرشکِ چشمی جگر سوزشین بولوندوردی
بو دیللریله سولان غنچه سینی دیندیردی
دئدی اوغول دیگوروم کیم سالوب بو حاله سنی؟
سالوبدی بیله نفسدن ملر قویوبدی منی
چوخ ایچموسن سو اودور گلمور آغلیاندا سسون
دوتوبدی یا بوغازون لخته قان ، باتوب نفسون؟
جهاندا سن چمنِ عمریمه علی گولیدون
گلنده نالیه بیر خوش ترانه بلبلیدون
ندندی اولموسان ایندی بو نوعیله خاموش؟
ایدوبدی ساقیِ دست قضا مگر مدهوش
قضا باخار سنه سویلر غریبه قرباندی
هزار حیف که عطشان فدای جاناندی
قَدَر دییر دگول عطشان ایدوبدور اوخ سیراب
ولی رباب گوزوندن او اوخ توکر خوناب
گرک بو سوزِ دیلیله یانا ئولونجه رباب
نجه که سیزیلدار یانار اود اوسته کباب
بو سوزشِ دلی گوزویاشی سوندوره هیهات
آخا ئولونجه گوزیمدن اگر چه شطّ فرات
اولا نقدر حیاتیم بو دارِ دنیاده
گورنده سو علی سالّام سوسوزلوقون یاده
مگر چیخار بو یادیمدان سوسوزدان اودلاندون
سو ویرمدیله سنه ظلم الیله اوخلاندون
گورنده بیر سود امر طفل آنا قوجاقینده
علی مجسّم اولورسان گوزوم قباقینده
بالالارا آنالار سود ویرنده اودلّانام
منیمده سینمه سود گلور باخوب یانّام
هجوم ایدردی سنه سوزشِ عطش هر آن
نه سو نه صود تاپولوردی ویرم منِ نالان
نه دل بولوردون ایدیدون سوسوزلوقون اظهار
نه دل دیینده دوتوردون بیر آز بالا آرام
آنان ئولونجه مگر حل ایدر بو نسگیلیوی
قویوردون اوز قورویان لبلریوه گه اَلیوی
دیلون دوداقیوه گاهی دولاندوروردون علی
ربابی شعله ی آهیله یاندوروردون علی
گهی ایدردون عطش ، شدّتیله مه پاره
خراشِ ناخنیله سینمی منیم پاره
بالیق کیمی چابالوردون باخوردوم آغلوردوم
قالوب علاجسیز آخر الیوی باغلوردوم
غریبه اولدوم انیسِ مصیبت عالمده
اوزون گیدوب ولی قویدون نشانه سینمده
باخوب بو سینه ده دیرناقلارون یرین گورّن
توکوب سرشک سوسوز ئولماقوی بولدورّم
خیال ایونده بو نسگیلریوی فکر ایدرم
الیم اورکده آدون دیلده قبره من گیدرم
حرمسرای امامتده عزّتیم سنیدون
باشیم اوجالیقی هم جاه و شوکتیم سنیدون
داخی بوودهریده سنسیز غمه دچار اولّام
خانیم لیقیم گیدوب الدن ئولونجه خوار اولّام
آنا بو دللریله سوزِ قلبین آندوردی
سکینه باجیسی گلدی جهانی یاندوردی
او سود امر بالانی آلدی باسدی آغوشه
گلوب او دم باجی قارداش محبّتی جوشه
دیسم سزادی که بو چوخ یانوب آناسیندان
کباب اولوب اوره گی اوپدی اوخ یاراسیندان
فغانیله دئدی قارداش علی باجون ئولسون
داخی محالیدی سنسیز منیم یوزوم گولسون
علیّ اکبریمی ئولدورن زمان دشمن
قیریلدی بندِ دلیم یاندیم ایلدیم شیون
گورنده نعشینی قوندی ئولوم توزی یوزومه
سنیله ویردیم علی تسلیت ولی اوزومه
دیدیم بونون غمی عیشیم نهالینی کسدی
اگر صاق اولسا علی اصغریم منه بسدی
سنیده آلدی الیمدن بو عرصه ده دشمن
بوگونکی گوندن ازل کاش علی ئولیدیم من
گوزومی کیمسه گورنمزدی داخی منیم یاشسیز
توکولدی کول باشیما قالدیم ایندی قارداشسیز
ووروبلا حلقیوه بو اوخ که فرقهء عدوان
دگیدی کاش علی قارداش منیم بوغازیمدان
سنی بوحاله سالان ایتمیوب علی انصاف
نجه شقیدور ایدوب ظلمیده بیله اصراف
بولوردی تیرینی ایلوبله زهریله سیراب
دیموبکه زهرلی تیره اوشاقدا اولماز تاب
باخوب بوغازیوا گرچه گوزوم توکر قانیاش
ولی خوشا سنون احوالیوه علی قارداش
قالوب اگرچه سوسوز غنچه کیمی سولدون
سو اوسته قانه بویاندون ولیک قورتولدون
منیم کیمی داخی سن گورمدون اسیر اولماق
دیارِ شامه کیمی شمره دستگیر اولماق
خبر ویروبدی بابام قورتولاندا امرِ قتال
سویوب اسیر ایده جاقلار بیزی گروهِ ضلال
(حسینی) بو غمی تا حشر گر یازا خامه
غم و مصیبت اصغر یتیشمز اتمامه
حرملره ایله سخت اولدی محنتِ اصغر
گوروندی خیمه لر ایچره علامتِ محشر
نه تک سکینه نه یالقوز ربابی یاندوردی
بو غم حرملری جاندان تمام اوساندوردی
بو سهلیدور که بویوکلر یاناردولار یکسر
کیچیک اوشاقلارادا ایلدی بو غصّه اثر
او وقته تک بالالارا العطش دییوردی تمام
دولیدی نالهء المائیله خیامِ امام
گورنده اصغره قانیله سو ویروب دشمن
سالوبلا خوردا اوشاقلار سو آدینی دلدن
فغان العطش عرشه داخی یتورمدیلر
دله سوسوز بالالار سو آدی گتورمدیلر.
مرحوم حسینی سعدی زمان
منبع مجموعه کانالهای مدح و مرثیه
با سلام