زبانحال امام حسین (ع) به در شهادت جناب علی اصغر (ع) 4039
زبانحال حضرت امام حسین (ع) به خواهرشان
در شهادت جناب علی اصغر (ع)
گَل باجی گل ، اصغریم پژمرده حال اوخلاندی گَل
آفتابِ دین الی اوسته ، هلال اوخلاندی گَل
آلتی آیدور بیر بلا بُرجین هر آی بو ماهوَش
سیر ایدوب ایلوردی درک و ترک عشقه کشمکش
رهنمای عالَمِ عشق ، اولدی آخرده عطش
ایتدی ترکِ جانیله درکِ جلال اوخلاندی گَل
اوچ گجه گوندوزدی آغلوردی بالام عطشانیدی
سانما سن منظوری یا سو یا دولی پستانیدی
من بولوردوم مقصدی اوچ شعبه لی پیکانیدی
ویردی ساقیّ اجل آبِ زلال اوخلاندی گَل
عالمِ ارواحده تکمیل اولان بیر مسئله
اصغریم اوخلانماسیدی باجی گلمزدی اله
قلبیمه اود ویردی ظاهرده خدنگِ حرمله
باطنا" شادم ویرن نقصه کمال اوخلاندی گَل
تارِ قلبیمدن دگوب مضرابِ تیرِ جانشکار
قیردی تاری بو شکسته دلدن آلدی اختیار
گر چه پوزدی حالیمی ، امّا بو اوخدان هر نه وار
حاصل اولدی دلده کی فکره مآل اوخلاندی گَل
وار امامت چرخینون مِهرینده حالِ جانگداز
هئیتِ افلاک ایدر اوز گردشیندن احتراز
ویر خبر ایتسون نجومِ چرخِ عصمت پیشواز
گون کسوفه یوز قویوب بو مه جمال اوخلاندی گل
محنتِ هجران وجودین ایلمشدی پرّ کاه
آختاروردی خالی از اغیار بیر آرامگاه
اوخ بیچوب حلقین آچوب بزمِ وصاله شاهراه
ایتدی قان پیمانه سی مستِ وصال ، اوخلاندی گل
وار یری یانسون شرارِ آهمیله نُه رواق
شوریله دولسون باجی دشتِ همایونِ عراق
اوخ آتان قول قوّه لی ، اوخ زهرلی ، خوردا اوشاق
ظلم الیله اصغرِ شیرین مقال اوخلاندی گل
وار نقدری خیمه ده قاره گیَن ، اوغلی ئولن
باش آچوب ایتسونله برپا شیونیله انجمن
اوخشاسونلار اصغره ، پیکان یاراسین باغلا سن
سنگدل صیّاد الینده بو غزال اوخلاندی گل
گوردولر قومِ مخالف غشّ ایدوب بو ماهرو
بولدولر حاله گتورماقا بونی لازمدی سو
سو یرینه ویردیلر قان ایچدی سیراب اولدی بو
زهرلی پیکان ویروب تغییر حال اوخلاندی گل
بیر سارالمیش گُل آپارمشدیم صفِ هیجایه من
گَتدیم اما بیر قزل گل دسته سی لعلِ یمن
گیدیروب دشمن بالاما ارغوانی پیرهن
قرمزی اونّوک تکوبدور خونِ آل ، اوخلاندی گل
اللریم ، سینم ، یوزوم باجی گینه قانه باتوب
یوز گوزی قانلی ، الیم اوسته بالام راحت یاتوب
دنجلوبدور یوخلیوب سو فکرینی باشدان آتوب
گَل آپار گهواریه آهسته سال ، اوخلاندی گل
اوچ گجه گوندوزدی ایتمیشدی آناسین دلکباب
بیر دقیقه ساکت ایتسون چاره تاپموردی رباب
اوخ ایله لای لای دیوب گهواره سین ایتدی تراب
بیرده بو گهواره دن دورسون محال ، اوخلاندی گل
غشّدیدی اوخ دگنده دیسگنوب آچدی گوزین
گولدی بیر ، زهرا آنام آغوشینه آتدی اوزین
گولماقیندا کاملا" آندوردی مقصودین سوزین
گولماقین ایتدیم خداحافظ خیال ، اوخلاندی گل
آغلاماقدان سینه سی تنگه دوشوب باتمیشدی سس
ایتدی تیری اَمماقا پستان خیالیله هوس
طایرِ روحی اوچوب قالدی الیمده بوش قفس
بلبلِ گلزارِ زهرا اولدی لال ، اوخلاندی گل
چوخ خراش ایتمیشدی آجلیقدان ربابین سینه سین
اللری قانلی آپاردیم بو دُرِ گنجینه سین
یوز گوزی قانلی گتوردیم اکبرین آئینه سین
لیلیه بیکس رباب اولدی مثال ، اوخلاندی گل
چخدی ناگه خیمه دن بنتُ الوقار ، اُختُ الجلال
دولدوروب آفاقی گوردی ابرِ غم ، گَردِ ملال
اوخلانوب شمسِ امامت اللری اوسته هلال
سسلدی چکمه عزیزیم انفعال ، اوخلاندی گل
زینبون قربان خجالت جانوه ایتمه نوا
سنده یوخ چاره بو قومِ دون یوزی اولسون قرا
سن آپاردون بو امیدیله سو ویرسون اشقیا
اولمادی سو اولما چوخ غرقِ ملال ، اوخلاندی گل
باخ آقارمیش زلفیمه ای خسروِ گردون مدار
ویر بالامین قانینی آق زلفیمه ایلوم خضاب
ویردی قارداش ، آلدی باجی ، سسلدی ایوای رباب
هارداسان باغِ امیدونده نهال اوخلاندی گل
چوخ سنی تنگه گتورمشدی غمِ بی پایه سی
حالوه یاندی زبس رحم ایلدی اوخ دایه سی
سالدی بو سولموش گُله بیر خوشه سنبل سایه سی
ایلمز بیرده عطشدن ابتهال اوخلاندی گل.
یا حسین اوغلون (حسینی) آرزو ایلر مدام
قبروه اهلِ عزائیله گلوب ویرسون سلام
سس سسه ویرسونله قبرونده اوخونسون بو کلام
گل باجی گل ، اصغریم پژمرده حال اوخلاندی گل
مرحوم حسینی سعدی زمان
منبع مجموعه کانالهای مدح و مرثیه
با سلام