متن نوحه های ترکی و فارسی

احوالات جناب حبیب بن مظاهر (علیه السلام)

بیله روایت ایدوبلر مفسرین خبر

دیار کوفه ده ابن زیاد بد اختر

ایدوبدی ظلمیده طغیان اول جفا گستر

تدارک ایتدی حسین جنگینه آغور لشکر

بو قصه دن واریدی شهر کوفه ده آشوب

کیمیسی شاد کیمی نار محنته آلوشوب

سرور ایدردی اورکدن او گون منافقلر

یاناردی آتش غمده ولی موحدلر

گورردی مومن و کافر همان او قائله نی

بو قصه پوزموشیدی مسلم ابن عوسجه نی

گیچوردی بیر گونی ناگه او مرد باایمان

اورکده محنت وغم دلده سوز و آه و فغان

حبیبی گوردی آلوردی حنا بقصد خضاب

ویروب سلام ایدوب ماجرایه کشف الحال

دیدی یوخوندی خبر یوخسا ای وفا گستر

حسین جنگینه عازیمدی کوفیان یکسر

مخالفت علمین قوزیوب گروه لئام

آلولا اسلحه آلات حرب تیر و سهام

ایشتدی بو خبر وحشتی او پیر نجیب

توکوبدی گوز یاشی رخساره حسرتیله حبیب

حنانی قویدی یره ترک ایدوب تمنانی

بویوردی مسلمه گویا همین بو عنوانی

حسین معاونتی فرض امرلازیمدور

حرامیدور منهدنیا حنا نه لازیمدور

حضور حضور زاده زهرایه من شتاب ایدرم

بو آق محاسینیمی قانیله خضاب ایدرم

دیوب بو سوزلری ترک ایتدی فکر دنیانی

آخاردی صفحه رخسارینه جگر قانی

غبار محنت و غم نشست ایدوب دلینه

پوزولدی حال شریفی قیتدی منزلینه

باشیندا شور شهادت دلینده نام حسین

آلوب قرارینی الدن وصال کام حسین

اولوبدی بحر غمه غوطه ور او پاک نژاد

ایدردی کشف غمه خالقیندن استمداد

دیردی بیر اوزیمی مقصده یتورسیدیم

حسین قدملرینه بو یوزیمی قور سیدیم

حضور ناسیده گرچه اوزینی ساخلاردی

کنار و گوشه ده گزلین گیدردی آغلاردی

زبسکه دلده حسین آدین ایتدی برنامه

گلوب یتوشدی حبیبه حبیبیدن نامه

حسین عطرین ایدوب نامه سیندن استشمام

کسیلدی طاقت و آرامی قالمادی آرام

ایکی اللی نامه نی آلدی ایدوبدی اشکی روان

اپوب قویوب گوزی استه چو آیه قران

گتوردی مهر شریفین نگوردی ثارالله

یازوبدی خط شریفیله لقظ بسم الله

ازلده نامهده لطفیله کشف راقت ایدوب

حضور اقدسینه نامه سینده دعوت ایدوب

یازوب حبیب منی کربلاده لشکر کین

سالوب حصاره جفائیله قوم بد آئین

اولار که نامه یازوبلار منه ارادتیله

نقیص عهد ایلیوبلر ولیک جرئتیله

خبر ویروب منه جدیم رسول والا شان

علاوه باب کباریم او ناطق قران

اوزیمده حجت برحق قدرت اللهم

علوم غیبه بلورسن اوزیمده آگاهم

صراحتا سنی مطلبدن ایلورم اگاه

منی شهید ایده جاق جور و ظلمیله بو سپاه

یانیمدا واردی منیم عده ای وفا پرور

بو چولده حاضر اولوب الماقا علی اکبر

اوخی بو نامه نی مطلبدن اولگلن آگاه

سنونده شوق شهادت واروندی بسم الله

اوخودی نامه نی تا مطلبه اولوب حالی

الولاشوب اورگی چوخ پوزولدی احوالی

دیدی ثنا اولا بیحد حی یکتایه

باشیم اوجالدی منیم طاق عرش اعلایه

خدای لم یزله ایلیوبدی شکر و ثنا

دوشوبدی سجدیه عرض ایتدی ای خداوندا

عجب سعادته یتدوم بو گون من نالان

یازوب حسین گیدم من اونا اولام قربان

اوزون عطا ایله توفیق ای خدای وحید

حسین یولوندا اولام منده لطفویله شهید

ولی اورکده کی منظورین ایلدی کتمان

تمام خویش و احبادن ایلدی پنهان

ایدوبدی حفظ تقیه ایله دین و آیینی

امام اوزی بویوروب اتقیه والدینی

سفر تدارکینی گوردی چوخ شهامتیله

تمام فکرت و تدبیر یله مهابتیله

نچونکه یولارا جاسوس ابن مرجانه

معین ایتموشیدی سخت او دینه بیگانه

شهادت امرینی اوز نفسینه بلوب واجب

وداع ایدوب حرمین الماقا اولوب راغب

وداع قصه سی تاریخیده مطول دور

یوخ احتیاج اولارا شرح حال اجملدور

نه بیر هراس ایلیوبدور نه بیر ایتوردی اوزین

بلا دیارینی قصد ایلیوب یتوردی اوزین

حبیب گلماقینی نصرته امام مبین

بیان ایلدی اصحابینه امام حسین

دیدی حبیب گلور سیزده سرفراز ایلیون

دورون ایاقه گیدون ایمدی پیشواز ایلیون

حبیبیدور منه هم جدیمین نشانه سیدور

صحابه نبوینین در یگانه سیدور

کمال وجدیله کوی وصاله عازیمدور

محاسینی آغاروب احترامی لازیمدور

موحدین عرب ایچره ماه تاباندور

گوزیمده نور بصر دور گرامی مهماندور

جلیل قدر معظمدی پیر نورانی

یازوبدی لوح دله آیه آیه قرآنی

قوجالیقیندا گلوبدور وفا نشان ویرسون

اودا منیله بو صحراده تشنه جانویرسون

بامر سرور دین ایلیوبله استقبال

علی و اکبر و عباس اول حمیده خصال

ایدوبله جمله جوانان هاشمی پیشواز

اوپیر محترمه ایلیوبله چوخ اعزاز

مصافحه ایلیوبلراودم محبتیله

گتوردولر او خردمندی مهر و رافتیله

یتنده محضر پر نور حجت الهه

بیر آیری حال ویروب یوز او مرد آگاهه

گوزی دوشنده حسینین جمال انورینه

پوزولدی حالی یخلدی اونون قدملرینه

سلام ویردی ویروبدور اجازه گوز یاشینا

ایاقه دوردی دوباره دولاندی بیر باشینا

توکوبدی صفحه رخسارینه جگر قانی

حبیبین حالتی آغلاتدی رکن ایمانی

امام دوتدی الین حرمت تمام ایلدی

یانیندا یر ویروب اگلشدی احترام ایلدی

بویوردی آغلاما بزم بلایه خوشگلدون

حسینی گورماقا کرببلایه خوشگلدون

حبیب گلماقینا منتشر اولوب مطلب

ایشتدی بو خبری فاطمه قیزی زینب

حبیب آدین ایشیدوب جدی یادینه دوشدی

آلیشدی قلبی گیچن لر خیالینه دوشدی

دیدی حبیبه گیدون لطف و احترام ایلیون

منیم دلیمجه علاوه اونا سلام ایلیون

دیون حبیب حسینیم غریب و تنها دور

پیمبر اوغلودی نور دو چشم زهرا دور

یتوردولر او پیامی او مرد دانایه

اوجالدی آه شرر باری عرش اعلایه

توکوب محاسینه حیرتله دیده دن قانیاش

دیدی حبیب الیدون بو گونده ازل کاش

علی قیزی نه روادور سنه سلام ایلسون

خانم غلامه نه لازیمدی احترام ایلسون

سلام ویرماقونا راضی اولمویوبدی حبیب

تو کوبدی گوز یاشی رخسارینه او مرد نجیب

خوشابحال حبیب گورمدی او اوضاعی

نه حاله سالدیلار آخرده دخت زهرانی

حسینیدن صورا اطفال سینه داغلادیلار

او گون علی قیزینین قولارینی باغلادیلار

مطول اولدی سوزون (خائفا) تمام ایله

حسینه آغلا بو عالمده اخذ کام ایله

مرحوم خائف تبریزی

منبع کانال گنجینه گذشتگان