احوالات حضرت ابوالفضل (علیه السلام)

 

غمِ ایّامیله گرچه بو دیلیم پُرغم‌دی

بیر حسین آدلی آقام وار اوره‌گیم خرّم‌دی

 

عالمی گوزدن آتوب بیر اونا بئل باغلامیشام

او گوزل آدینه قربان شرف آدم‌دی

 

قاپوسیندان بولورم سائلی بوش قیترمز

چون کَرم صاحبیدی سبط شه اکرم‌دی

 

کوینگین سائله احسان ائده‌نین اوغلیدی بو

بیزی ائتمز الی‌بوش قوخما سوزوم محکم‌دی

 

گَزرم دیلده حسین آدی عزاخانه‌لری

بوحسین وای سسی هریاندا منه همدم‌دی

 

مکّه‌ده اولماسا قسمت منه واردور نه غمیم

آقامون مجلسی مکّه‌مدی گوزوم زمزم‌دی

 

دولانوب هریری گلّم بو عزا مجلسینه

یاحسین اذن دخولیمدی سرشگیم یَم‌دی

 

روز محشرده سیخیلّام آقامون سایه‌سینه

یاندیرانمازلا منی قلعهء مستحکم‌دی

 

سپر آتش دوزخدی قرا کوینگیمیز

آبرومیز ایکی‌دنیا بو قرا پرچم‌دی

 

او سببدندی عزادار حسین ئولسه اگر

گوره‌جاق قبری قرانلقدی اَزل مُظلم‌دی

 

نابلدیر اوزی نمناک چوخور ائلدن اوزاق

قورخوری وحشتی وار خیر عملی چون کم‌دی

 

باش طرفدن او زمان قبرینه بیر نور دوشر

آخ نه نور عالمی روشن ائلیوب خرّم‌دی

 

تا گوزون آچدی گورر باشینون اوسته آقاسین

بویورار گَلدیم حسینم کرمیم چون یَم‌دی

 

او حسین که گئجه گوندوز چاغیراردون او منم

گلمیشم گورماقوا قوخما غنیمت دَم‌دی

 

بلی هر یرده حسینچی ئوله عزّت واریدی

شب اوّلده آقا نوکریله باهم‌دی

 

بیر حسینچی تانورام عشقینه هیچکیم چاتماز

آدی عبّاسیدی اُول نهری آلان ضیغم‌دی

 

باشینون اوسته حسین گَلدی ولی بئلده اَلی

گوردی اعضاء جوارح داغیلوب بَرهم‌دی

 

ایکی‌اَلّلی گوتوروب باشینی آلدی دیزینه

شهه باشیله سلام ائتدی سوزی مُبهم‌دی

 

دئدی عبّاس اوشاقلار یولووی گوزلولّلر

بله یاتما یارالی خیمه‌سرا ماتم‌دی

 

ممکن اولسا سنی اکبر تک عبایه بوکَرَم

بو عبا عالمیده گورملی بیر عالم‌دی

 

باخورام بو داغیلان جسمه عبا یر وئرمز

نیلیوم آغلامیوم غصّه منه همدم‌دی

 

اوقَدَر دیل دئدی گتدی غرض عبّاسی دیله

دئدی شاها بو باشیمدور بودا که سینم‌دی

 

سنی زهرا اَلوی قوی بو داغیلمیش باشیما

صورا بیر آیری سوزوم وار که غم اَعظم‌دی

 

آند وئرّم آناوین سیلی گویردن یوزونه

منی اَخیامه آپارما که یریم علقم‌دی

 

منی قوی بوردا قالیم مشگی آپار خیمه‌لره

آغلادان چوخدا منی دیلده غم مُدغم‌دی

 

بله فکر ایلر اوشاقلار که سو ایچدیم من اوزوم

شاهد اُول ایچمه‌میشم بیرده خدا اَعلَم‌دی

 

سوروشان اولسا منی خیمه‌ده قیزلاره بویور

که عموز ایچمدی سو فکری سیزه دَرهَم‌دی

 

سنه لایق دگولم هئچ دئمه قارداشدی منه

دئنه من شمع وفایم بودا پروانه‌مدی

 

یارالار آغزین آچوبدور سنه لبّیک دئسون

مین‌بِله یارم اولا بیر باخیشون مَرهَم‌دی

 

من اوتوز دورد ایل آقا دوز چورگوندن یمیشم

او که روشندی سنه عمریده پروند‌م‌دی

 

سن اَگول بیر یول اوپوم من سنی جانیم چیخسون

جان دوداقیمده دوروب منتظر بوسم‌دی

 

بو وفا دیللّری بیردن آقانی آغلاتدی

دئدی بوینومدا خیال ایلمه حقّون کم‌دی

 

سنه عبّاس اوزوم اهل‌ و عیالیم قربان

آز اوتاندیر منی قلبیم غمی بیر عالم‌دی

 

ایستدی اولسون حسین قولبویون عبّاسیله

گوره‌لر محشر اولوب شمس و قمر باهم‌دی

 

شه قولون سالدی ابوالفضلین اودم گردنینه

جان کیمی باغرینا باسدی اونی سؤز اَعظم‌دی

 

قولبویون اولماقا عبّاسیده که قول یوخودی

بودا بیر نسگل او سرداره اولوب مُعظم‌دی

 

اوره‌گیندن بِله گئچدی که قولوم اولسیدی

آقامی منده قوجاقلاردیم عجب بیر دَم‌دی

 

ناگهان اوندا حسین بوینونا بیر قول گَلدی

بیرباخوب گوردی عجب وقته گَلوب مَحرم‌دی

 

اَلَه بیر دقّت ائدوب گوردی علینون اَلیدی

دست عبّاس عوضی گردنینه مُنضم‌دی

 

کربلائی  ناصر دانشمند