احوالات قتلگاه

 

واردور شکایتیم فلکِ نیلفامدن

بو چرخِ سُفله پرورِ بی ننگ و نامدن

 

دورینده چوخ ذلیل لری ایلیوب عزیز

سالدی عزیز کیمسه لری احترامدن

 

کرب و بلاده پوزدی حسین دودمانینی

شرم ایتمیوب او سرورِ با احتشامدن

 

بولمم بو اود نه اوددی دوتوب کلّ عالمی

اوضاعِ یومِ عاشرِ شهرُالحَرامدن

 

آتدان یره دوشنده حسین ابن فاطمه

دوشدی سپهر و گردش ِعالم نظامدن

 

چوخ سعی ایدردی جانینی جانانه بذل ایده

نایل اولوب مرامینه بو اهتمامدن

 

کرب و بلا چولونده قیامت قیام ایدوب

پیغمبر اوغلی عاجز اولانادا قیامدن

 

دگدوقجا گون یاراسینه جوشه گلردی قان

گیتدوفجا قان دوشردی وجودی قوامدن

 

عشق عالمینده بیر نچه ساعت قالوب امام

باتدی نفس کسیلدی صدا خاصّ و عامدن

 

حاله گلنده لشگره فرمان ویروبدی شمر

دولدی دوباره یر یوزی ظلمِ ظُلامدن

 

لشگر یریندن اوینادی ، آت سالدی آتلولار

چوخ غیظیله چکیلدی قلجلار نیامدن

 

اطرافینی حسینون او حالتده آلدیلار

قرخ مین نفر شِرار ، امیر و غلامدن

 

یانسون دلیم نه نوعی دیوم من او وقتده

نه ظلم لر بُروزه گلوب اهلِ شامدن

 

هر سمتدن گلوردی وورون ئولدورون سسی

دوشدی جهانه غلغله بو ازدحامدن

 

اوخلار یاغاردی جسمینه بیر آیری نحویلن

باران یاغار نه شدّتیله کیم غمامدن

 

پیکانلارا ضمیمه اولوب نیزه لر اوجی

تنگ اولدی سینه صفحه سی بو انضامدن

 

قتلِ حسینه ایلدی اقدام او وقتده

بیر نچّه قان توکن اُمراء العِظامدن

 

حتّی سَنان و خولی گلوب تیز قییتدیلر

از بس چکوبله خجلت او بیکس امامدن

 

نوبت یتنده شمره ، آچوب فاطمه باشین

عرشه اوجالدی ناله ، رسولِ کرامدن

 

اول بیحیا نه فاطمه دن ایلدی حیا

نه شرم ایدوبدی حضرتِ خیرالانامدن

 

قویدی قدم او سینهء مجروحه قوخمادی

محشر گونونده کی آلینان انتقامدن...

 

ایستردی شمر ، دین ایوینی ایلسون خراب

زینب بو گیر و دارده چیخدی خیامدن

 

یولّاندی قتلگاهه طرف سالدی بیر نظر

گیتدی توان و طاقت او والا مقامدن..

 

بولمم نه گوردی قاچدی دوتوب شمر خنجرین

 

عین الله اوغلی آچدی گوزون گوردی زینبی

روحی بیر آز قالوب ایده پرواز دامدن

 

فرمایش ایلدی باجی صبر ایله آغلاما

گچمه مقامِ صبریده حدّ دوامدن

 

یالوارما چوخ بو ظالمه ، دور خیمه گاهه گیت

منّت قبول ایتمه بو قومِ لئامدن

 

ویرمه بو قدر طول (سهیلی) کلاموه

آز قالدی اود جهانه دوشه بو کلامدن.

 

مرحوم میرزا احمد سهیلی

منبع مجموعه کانالهای مدح و مرثیه