زبانحال حضرت امام حسین (ع) به حصرت قاسم (ع) 2808

زبانحال حضرت امام حسین (علیه السلام)

به حصرت قاسم (علیه السلام)

 

آچ گوزون ؛ زلفی قزل قانه باتان قاسم جان

آتاوام فکر ائله مه یوخدی آتان قاسم جان

 

سن اوغول جلوۀ تابندۀ احساسیمیدون

اوغلوم اکبرکیمی گلشن ده گل یاسیمیدون

مجتبائیدون حسینه نه فقط قاسیمیدون

قوملاراوستونده یتیمانه یاتان قاسم جان

 

مجتباتک گوزلیم سنده ملک منظریدون

یادگار خلف اشبه پیغمبریدون

اکبریم دن صورا قاسم منه سن اکبریدون

او چاتان منزلت و شأنه چاتان قاسم جان

 

اوخشوسان پیکره سیز لوحه؛گل باغ عَدن

تیغ و سرنیزه لر آماجی سن ای قانلی بدن

بوکیچیک سِینّیده جسمون بلشوب قانه نه دن؟

دار دنیانی گوزوندن تئز آتان قاسم جان

 

خبرون مندن اگر آلسا سریّه نه دیوم

منتظردی سنه مخیمده سکینه نه دیوم

گورسه لراهل حرم قانلی دی سینه نه دیوم

عزّ و جاهین شرف دینه ساتان قاسم جان

 

خورداولان سینه سی ای آتش ایمانه یانان

دور گیداخ خیمه لره ای ملکوتی دولانان

دولانا باشیوه بیر دفعه ده مظلومه آنان

اودی گوزیاشلارینی قانه قاتان قاسم جان

 

او قدَر قامتیوه اوخ ورولوب نیزه دگوب

گوئیاپیکرون اوخلاردان اوغول جامه گیوب

بوکولن قامتیمی قانلی باشون بیرده اگوب

یارادوب قدّیوی طوبا ، یارادان قاسم جان

 

معرفتده بوتون هم سینّیلروندن باشیدون

هم گوزل طلعتیدون همّی کمانی قاشیدون

اکبره قارداشیدون غم گونونه یولداشیدون

منی بیروقفه ده غمدن قوجادان قاسم جان

 

مشق اولوب لمعۀ عشقین باشاباش اوتاده

عشق اولا کربوبلاده بو قد شمشاده

رشک ائدر جمله ملکلر سنه تک داماده

حجله سی طوی گونوزی قانه باتان قاسم جان

 

سنیدون برج شجاعتده کی تابنده بیر آی

هانسی آی دوشدی محاقه بوجهاندا سنه تای

آت چاپوبلارسینن اوستونده اوغول؛وای اولا وای

سینه سین خون ولادن بویادان قاسم جان

 

من گرک دی سنی اخیامه یتم نور دوعین

خانم عمّن سنه نوحه دیه بین الحرمین

وورا باشیندن آنان قیزلار ائده شیون وشین

بالا وای ناله سین عرشه اوجادان قاسم جان

 

یازیلار سینه لره عشق وصفا فضل ائله ماق

کفریلن حرب ائلیوب سرسپهین عزل ائله ماق

دئدون اهلاً مِن عسلدی منه جان بذل ائله ماق

ئورگی قانه باتوب قلبی یاتان قاسم جان

 

اکبرین یولداشیسان اکبره وئررم سوگند

سنی فردوسه یتن شهپره وئررم سوگند

بو«مصیّب» یارادان سوزلره وئررم سوگند

بوندان آرتوخ قلمین ایله روان قاسم جان

 

 مصیبی تبریزی

ورود به ماه محرم 2750

ورود به ماه محرم

 

گینه ئورک داریخور یار و همدم آختاریرام

واریمدی قلبیده بیر یاره مرهم آختاریرام

 

صفای عالم امکانیدن عُدول ائدورم

فنا جهاندا فقط دردیلن غم آختاریرام

نه انجُم و نه مَه و آفتابی بسله میشم

نه شاهیلر کرمین من ، نه حاتم آختاریرام

 

نه یوسف آختاریرام کوینگیندن عطرین آلام

نه قلب پرغم یعقوبه مَحرم آختاریرام

نه اسمعیل و نه یحییٰ نه جعفر طیّار

نه هاجریله نه سارا نه مریم آختاریرام

 

نه شوکت آختاریرام من نه عزّتیله نه جاه

نه منصب و نه جلال مُفخّم آختاریرام

گلن گئدن سوروشور حال زاریمی دیورم

یانیقلی قلبیله حالِ محرّم آختاریرام

 

قاپی قاپی گزورم هر بلاد و بازاری

حسینین عاشقیَم قاره پرچم آختاریرام

نه سلسبیل و نه کوثر نه زمزم ایستیورم

فراتی خوشلامیشام قانلی علقم آختاریرام

 

او یئرکی دوشدی ابوالفضل توپراقا آتدان

همان اویرده حسین قامتین خم آختاریرام

گوزوم کوراولسون اگر نیّتیم خلاف اولسا

رواق عشقیده من چشم پُرنم آختاریرام

 

حسین عزاسی دی،من گِیمیشم قراکوینک

بو قاره کوینگیمه شورِ مُدغم آختاریرام

کیمین وارعشقی علی اوغلونا،فغانه گلوب

دیور یانان ئورگه یاحسین دم آختاریرام

 

آنان وئروبدی مسیحا و مریمه دم ،ئوزی

او فاطمی نفسیندن مسلّم،آختاریرام

عنایت ایله گوروم باصفا مزاریوی من

کی آلتی گوشه مزاری دمادم آختاریرام

 

(مصیّبی) گینه باشلاندی ماه آه و نوا

دئنن بو آه و غمی عالم عالم آختاریرام

 

 مصیبی