کوفه

 

مِی جلوه ایلدی گینه جامِ بلوردن

گوز کاسه سی ز بسکه لبالبدی نوریدن

 

دل مزرعینده تخمِ وفا ویرمیوب ثمر

اِلّا نتیجه ویرسه ویرر آبِ شوریدن

 

یوخدور وفاسی عالَمِ فانینون ای عزیز

عبرت گوتور نظارهء اهلِ قبوریدن

 

شاهانِ تاجدار رهینِ تراب اولوب

قالموب اثر سکندر و بهرامِ گوریدن

 

عمرون توکندی گچدی گونون خوابدن اویان

بیر توشه اخذ ایله ، کنار اول فتوریدن

 

آخر سنه لباس کفندور نه یاتمیسان؟

ملبوسون اولدی گرچه حریر و سُموریدن

 

شربِ طهور ایستیه سن ، طاهر اول نخست

بیر هوشه گَل بو قدر خمارِ خموریدن

 

گچدی بهارِ عمر خزان اولدی گللّرون

ال بوش ، ذخیره یوخ ، بو سِنین و شُهوریدن

 

ای بُوالهَوس عجب بودی کیم هیچ اوتانمیسان

بو زشت صورتیله تمنّای حوریدن

 

غایب اوزونن اولگله ، تاپ بیر حضورِ قلب

گور نه ثمر گلور بو غیاب و حضوریدن

 

چوخ پربهادی گوزده کی بو شور گوز یاشی

پُر نشئه دور حریفه شرابِ طهوریدن

 

ایستر که نوح تک ویره طوفانه عالمی

امّا اورک دوام ایده بولمز قصوریدن

 

سال خاطره مصیبتِ آلِ پیمبری

یعنی قیامتی که مُقدّمدی صوریدن

 

راوی دیَر که کوفیه زینب یتن زمان

قارداش باشین مشاهده ایلردی دوردن

 

گوردی غریبه نخل سِنان اوسته منظری

بنزر کلیمه جلوه ایدن نوره طوردن

 

بیرده باخاندا گوردی بیر اوزگه نشانی وار

ایلر اشاره زینبه حالِ تنوردن

 

بنزتدی بیر خسوفه قالموش هلاله ، چون -

شمسُ الضّحی' نی گوردی میانِ بُدوریدن

 

بی اختیار ووردی باشین چوبِ محمله

تا گیتدی اختیار دل ِناصبوردن

 

عرض ایلدی که ای آنام اوغلی نه فایده

سندن صورا جهاندا مرورِ دُهوردن

 

دوشدی بدندن آیری باشون راه عشقیده

امّا جداده دوشمدی بیر لحظه شوردن

 

قرآن سسون گَلور لب ِمعجر بیاندن

قویموش تمام خلقی عبور و مروردن

 

امّا دیولّه خلق گَلور خارجی باشی

ای طینتی عجین اولونان محضِ نوردن

 

هانسی مصیبتی گتوروم یاده یا اخا

ای پایمال پیکری سُمّ ستوریدن

 

رأسون دالینجا کوچه لری زینبون گزر

پروانه ناشکیب دی شمعِ قصوریدن

 

جائز بولوبله قتلوی آلسونلا جایزه

بیر صاحبِ شقاوت و فسق و فجوریدن

 

کفّار رحم ایدر بیزه هاردا روادی رحم

قرآن اهلینه اولا اهلِ زبوریدن

 

کافر بو ظلمی کافره بولمز روا ولی

قارداش بیزه یتیشدی بو قومِ کفوریدن

 

گوردون اوزون که مجلسِ ابنِ زیادده

آلِ رسوله نه ایتدی او بیدین شروریدن

 

ساخلاندی اوردا قولقولا باغلی حرملرون

مَن هذه دییردی او بیدین غروریدن

 

جلّاده امر ایلدی که بیماری ئولدوره

ایتمزدی خوف مالکِ یومُ النّشوریدن

 

بو شهرِ غم فزاده حرم آهوانینه

چوخ صدمه لر یتیشدی او کلبِ عقوریدن

 

غم دفترین (یتیمدن) ایتسن شها قبول

بیر تحفه دور حقیر ، سیلمانه موردن

 

(مشکات) بسدی عالمه اود ووردی بو رقم

آل ، مغفرت خدای رحیم و غفوردن

 

اعمال خیره سعی ایله ، داوده آل سن

اول کردگار پاکه عبادِ شکوردن

 

چون اولموسان (یتیمه) معاون بو نظمده

ایله عیان بو اَسوَد و اَحمَر سُطوردن

 

اسود سطور ، نظم منِ روسیاهدور

احمر اولان جنابِ (یتیمِ) غیوردن

 

هر گوهریکه مخزنِ طبعی ایدر عیان

نزد گوهرشناسده چوخ مین کروردن

 

درگاه ِحقدن ایسترم ای خامه هر زمان

دولسون همیشه خاطری عیش و سروردن.

 

مرحومین مولانا یتیم و مرحوم مشکو'ة

( مرحوم علی اکبر وقایعی)

منبع مجموعه کانالهای مدح و مرثیه