زبانحال حضرت صغری (س) 5940

زبانحال حضرت صغری (سلام الله)

 

آغلاما صغری باجون قربان علی گوز یاشیوه

بیر ایاق ساخلا باجون دورسون دولانسون باشیوه

 

لطف ائدوب یاده سالوبسان سن بو وقتیمده منی

وار یری بو بینوانون عرشه چخسا شیوه نی

نیلیوم یوخ چاره گئت اللهه تاپشوردوم سنی

بیر ایاق ساخلا باجون دورسون دولانسون باشیوه

 

نصف شب بو گلماقون صغرایه چوخ ایلور اثر

بولمورم آیا نه واردور گیموسن رخت سفر

حالیمی پوزدی منیم چوخ قلبیمی دوتدی کدر

بیر ایاق ساخلا باجون دورسون دولانسون باشیوه

 

من دئمم قارداش عراقه گئتماقون گل ترک ائله

بیر بیله ساعت علی بیرده چتین دوشسون اله

بیرجه گل اگلش ائداخ صحبت غنیمتدور هله

بیر ایاق ساخلا باجون دورسون دولانسون باشیوه

 

رحم قیل قارداش علی بیر باخ منیم گوز یاشیما

بو سفردن قورخورام توکسون فلک کول باشیما

حسرتیم قالسون گوزیمده سن کیمی قارداشیما

بیر ایاق ساخلا باجون دورسون دولانسون باشیوه

 

آغلورام من دؤزمورم سن بو یول اوسته آغلاما

سیل تک رخساریوه بو گوز یاشیوی باغلاما

من علیلم ناخوشام بو سینه می سن داغلاما

بیر ایاق ساخلا باجون دورسون دولانسون باشیوه

 

اول قد شمشادیوون قارداش بلاسین من آلوم

گوزلروندن بیر اؤپوم قول بوینووا بیرده سالوم

اولما راضی من تک ائولرده علی یالقوز قالوم

بیر ایاق ساخلا باجون دورسون دولانسون باشیوه

 

باخ نجه گور بو کُمیت روحیم آردونجا چاپار

ممکنون اولسا منی قارداش یانونجا سن آپار

بو مریضه سنلن اولسا بول یقین صحّت تاپار

بیر ایاق ساخلا باجون دورسون دولانسون باشیوه

 

من نجه هجران غمینده بحر غمده باتمارام

صبر ائدوب خون جگر بو گوز یاشیما قاتمارام

صبح اولونجان هر گجه سن گلمیینجه یاتمارام

بیر ایاق ساخلا باجون دورسون دولانسون باشیوه

 

من باخوب یانّام سنون بو حالیوه قارداش علی

سن ندن جاری ائدرسن عارضه قانیاش علی

قالمیا سندن صورا صغری ئوله ای کاش علی

بیر ایاق ساخلا باجون دورسون دولانسون باشیوه

 

بو باجی قارداشی ائت الده وسیله شوریا

عرض قیل یارب عطا قیل جمعیلن بیر کربلا

باشلیاخ بو نوحه نی اوردا دوتاخ بزم عزا

بیر ایاق ساخلا باجون دورسون دولانسون باشیوه

 

مرحوم شوری تبریزی

منبع مجموعه کانالهای مدح و مرثیه

در شهادت حضرت امام هادی (ع) 5661

در شهادت حضرت امام هادی (ع)

 

آغلا اَیا فاطمه ، ناله و فریاده گل

اوغلون علیّ النّقی ، جان وئروری داده گل

 

اولمادی اوغلانلارون دهریده بیر شاد اولا

غصّه و غمدن خانم لحظه ای آزاد اولا

شغل لری دائماً ناله و فریاد اولا

هئچ بیرینون گُل یوزی گُلمَدی دنیاده گل

 

اُول متوکّل لعین اوغلووا اولدی دُچار

کینیله باطنده کی بغضون ائدوب آشکار

قویمادی راحت قالا چوخ اونا وئردی فشار

هر نه خیاله گلور ائتدی او ناشاده گل

 

جدّی پیمبردن هئچ ائتمدی شرم و حیا

آت دوشینه سالدی گَه اوغلووی اُول بی حیا

قصد ائلیوبدور هامی خلق آرا توهین اولا

دادینه باری اؤزون عالم معناده گل

 

بیر ستمِ ناگوار ائتدی او خانه خراب

حاضر ائدوب مجلسه اوغلووی ائتموب حجاب

عیش بساطین قوروب میل ائلیوبدور شراب

اوغلووا تارُف ائدوب الده دوتوب باده گل(1)

 

قورخمادی خلّاقیدن ایلمیوب شرم و عار(2)

ائتدی مکرر سوزون دشمن پروردگار

قالدی نه حاله بالان ایلدی چوخ آه و زار

چاره سی یوخ نیلسون باری سن امداده گل

 

بس که گوروبدور فشار گول کیمی رنگی سولوب

قلب شریفی خانم درد و غمیلن دولوب

دشمن الینده بالان آخری مسموم اولوب

ائتماقا چاره اؤزون دوغرانان اکباده گل

 

گل بیر اؤزون قیل نظر گور که نه حاله قالوب

زهر جفا عاقبت اوغلووی دلدن سالوب

بسکه مؤثر اولوب طاقتین الدن آلوب

گوزلری یول سسلوری هی سنی فریاده گل

 

بو بالاوون غملری چوخ سنه ایلوب اثر

شامیده یا قلبیوه چوخ یتیشوبدور کدر؟

مجلس آرا صف چکوب عترت خیر البشر

زینبون آغلور دیور ای آنا فریاده گل

 

اولمادی بُلمم ندن بیله جهانی خراب

اوندا که قوردی یزید شامده بزم شراب

ناخوشی ساخلوب ایاق اوسته قولوندا طناب

من دیه بولَّم دیور ای آنا جان داده گل

 

«شوری» اماموندی بو ائتگیله چوخ آه و زار

سامره ده گورموسن یاخشی گوزل قبری وار

بیرده سنون اولسا گر قسمتون اول دورت مزار

اؤز حرمینده دئنه آی آقا جان داده گل

 

شوری تبریزی

منبع مجموعه کانالهای مدح و مرثیه

کوچ از شام 5335

کوچ از شام

 

گئدوروخ هامی وطنه قیزیم

بئله یاتما سن بالا دور گئداخ

بو خرابه یرده نه گورموسن

قالوسان ندن بالا دور گئداخ

 

دور ایاقه گور وطنه قیزیم

گئدوروخ نه جاه و جلالیلن

گئدوروخ اورک دولی قانیلن

غم و غصّه ، درد  و ملالیلن

باجیلار آنان هامی عمّه لر

گئدوری بو باشی بلالیلن

بو خرابه یرده نه گورموسن

قالوسان ندن بالا دور گئداخ

 

بالا سن دئمزدون ای عمّه جان

گئدوروخ او یثربه بس هاچان

او قدر وطن دئدون ایلدون

هامی آل هاشمی باغریقان

گئدوسن قوجاقیمه گَل گئداخ

گوروسن دوشوب یولا کاروان

بو خرابه یرده نه گورموسن

قالوسان ندن بالا دور گئداخ

 

نقدر واریمدی بو جاندا جان

یوزه اشک آلیمی باغلارام

یادیمه دوشر غم و محنتون

باشیمی آچوب سینه داغلارام

دییرم خرابه ده آج سوسوز

قوری یرده جان وئرن آغلارام

بو خرابه یرده نه گورموسن

قالوسان ندن بالا دور گئداخ

 

او بلا چولونده نلر گلوب

گئدوب عزّ و جاه تالانمیشام

قریلوب ائلیم بوکولوب بلیم

همه جور ، بلایه دایانمیشام

او خدا بولر که وئرنده جان

قوری یرده سن نئجه یانمیشام

بو خرابه یرده نه گورموسن

قالوسان ندن بالا دور گئداخ

 

 بولوری سنون هامی «شوریا»

بو خانم رقیّه ده وار گوزون

بو قباقکه وقفه ده سعی قیل

او حسین مزارینه گیت اوزون

باجیسی دلیجه یقین اولور

او گوزل حرمده سنون سوزون

بو خرابه یرده نه گورموسن

قالوسان ندن بالا دور گئداخ

 

مرحوم شوری

زبانحال در اربعین 5312

زبانحال در اربعین

 

اسیر شمر اولوب حسین گئدوبدی شامه زینبون

خلاص اولوب حضوریوه گلوب سلامه زینبون

 

اگر چه قانلو باشیوی جداده چوخ گوروب باجون

مکرر هر دیارده باشوی دیندیروب باجون

بو توزلی قبرون عشقنی ولی بلوندوروب باجون

هزار شکر ئولمیوب یتوب مرامه زینبون

 

باشون دالنجا چوللری حسین دیوب دولانمشام

دیار شام و کوفه ده غم فراقه یانمشام

بو یولدا رنگ محنته بیر اربعین بویانمشام

چوخ اینجیدوبدی عاقبت یتشدی کامه زینبون

 

اگر چه چوخ بلا و غم یتوب حریم اطیبه

دئمم دیار کوفه ده نه ظلم اولوبدی زینبه

سنون اوز علم حکتون محیط دور بو مطلبه

دیوبله خارجی بیزه گلوب کلامه زینبون

 

بو غمکشیده زینبون آغاشدا گَه گوروب باشون

گَهی گوروبدی اهل کین جدالره ووروب باشون

گَهی گئدوبدی دیرده اوزون نشان وئروب باشون

گوروب بو حالی گوندوزی دؤنوبدی شامه زینبون

 

گیرنده شهره صف بصف دوزولدی اهل شام او گون

گُلوبله گَه چالوبلا کف او فرقۀ لئام او گون

گوزونده قانلو باشیوی ائدوبله ازدحام او گون

نه نوعی گور دوام ائدوب او ازدحامه زینبون

 

یانقلی قلبیمی منیم علاوه شمر یاندروب

محلّۀ یهودیده قطاریمی دایاندیروب

عداوتیله بیزلری او کوچه ده دایاندیروب

او وقته عمری آز قالوب یته تمامه زینبون

 

دیوبدی سیز بولون بولار ابوتراب عیالیدور

علی قزی او ناقه ده اولان باشی قرالیدور

گوروبدی کربلا غمین اودور که چوخ بلالیدور

او گیر  و داریده گوزی ساتاشدی بامه زینبون

 

نه گوردی نی لره ووروبلا اود زنان بی  حیا

توکوبلر اودلی نی لری اوشاقلار آز قالوب یانا

گورنده شامین اهلینی نظامسیز بو بینوا

حیالی قزلارون سالوب او دم نظامه زینبون

 

جفای شام شومدن امان برادر الامان

گئدوب یزید بزمنه او یرده وئردیم امتحان

ووراندا قانلو باشیوه یزید چوب خیزران

دئدی حسین گلوب بو گون عجب مقامه  زینبون

 

او مجلسین وقایعین گتورمه «شوریا» دیله

اگر حسین رضاسینی گتورماق ایستیسن اله

باجی دیلینجه قارداشا بو بیتی دلده ورد ائله

اسیر شمر اولب حسین گئدوبدی شامه زینبون

 

 مرحوم شوری

زبانحال حضرت معصومه (س) 3313

زبانحال حضرت معصومه (سلام الله)

 

غربتده جان وئرور بو معصومه قارداشیم گل

ذکریم رضا رضا دور گوزده بو گوز یاشیم گل

 

آیریلمیشام وطندن بلکه یتم وصاله

من کامه یتمدیم سن لطف ایله لامحاله

جان اوسته قالمیام من حسرت او گول جماله

غربتده جان وئرور بو معصومه قارداشیم گل

 

قارداش بو قدر بول چوخ معصومه باوفادور

درد فراقه هر آن هر لحظه مبتلادور

جان اوسته گل اوزون گور وردیم رضا رضا دور

غربتده جان وئرور بو معصومه قارداشیم گل

 

دلشادیدیم دیردیم اولدی عجب سعادت

قارداشیمی دویونجا من ایلرم زیارت

صد حیف اولا برادر قالدی اورکده حسرت

غربتده جان وئرور بو معصومه قارداشیم گل

 

مدّتدی واردی قارداش هجران غمینده یانّام

بو قصدیلن گلردیم سایونده دالدالانّام

لطف ایله باری سن گل باشوا من دولانّام

غربتده جان وئرور بو معصومه قارداشیم گل

 

قارداش یقینیم اولدی ئولَّم بو یرده قالّام

حسرتده قویما تئز گل جانون بلاسین آلّام

گورسم او گول جمالون قول گردنیوه سالّام

غربتده جان وئرور بو معصومه قارداشیم گل

 

گل باشیمی دیز اوسته آل بیرجه سینه داغلا

معصومه گور وئرور جان باخ یان گوزومی باغلا

سویله غریب باجیم وای سس چک سیزیلدا آغلا

غربتده جان وئرور بو معصومه قارداشیم گل

 

عالم بولور که قارداش هجران غمی یاماندور

سنسیز ایشیم برادر صبح و مسا فغاندور

قویما گوزیمی یولدا جان اوستیم اماندور

غربتده جان وئرور بو معصومه قارداشیم گل

 

لطف ائت ترحم ایله قارداش بو بینوایه

یوخ کیمسه قوم و قارداش تئز گل اؤزون هرایه

باخ گور باجون برادر دوشموش نجه بلایه

غربتده جان وئرور بو معصومه قارداشیم گل

 

سن مندن آیریلاندان آلامه مبتلایم

با این همه رضایم قارداش سنه فدایم

چونکه آدون رضادور من هر نولا رضایم

غربتده جان وئرور بو معصومه قارداشیم گل

 

«شوری» سنه اولوبدور معصومه قبری قسمت

آغلار گوزیله ایله بو مرقدی زیارت

باجی دلینجه بیرده قیل بو سوزی کتابت

غربتده جان وئرور بو معصومه قارداشیم گل

 

مرحوم شوری

منبع مجموعه کانالهای مدح و مرثیه

احوالات حضرت رقیه (س) 3019

احوالات حضرت رقیه (سلام الله)

 

ای دستگیر شامیان ایوای بالام وای

ویردون خرابه یرده جان ایوای بالام وای

 

دور بیر اوتور آچ گوزلرون ای نور عینیم

آخر سنه مهمان گلوب بیکس حسینیم

یا گورموسن عرشه چخوبدور شور و شینیم

اولموش منه ورد زبان ایوای بالام وای

 

قویدون عجب آغلار منی ای زار و خسته

بو پاره پاره قلبیمی قیلدون شکسته

توپراقلار اوسته یاتما دور گل سینم اوسته

یاندیم الولاندیم امان ایوای بالام وای

 

بو دهریده هر بیر غمه دوزدوم دایاندیم

هر بیر دیاری شمریلن گزدیم دولاندیم

اما سنون احوالیوه بیر اوزگه یاندیم

باغریم اولوبدور لخته قان ایوای بالام وای

 

نه وار سسیمه سس وئرن نه بیر گلن وار

گورسون خرابه گوشه سینده بیر ئولن وار

یرده قالوبدور نه کفن نه دفن ائدن وار

غربت مکاندا خوار اولان ایوای بالام وای

 

صبر ایلسون نه نوعلن دوزسون بو کلباش

یانمیش ئورکدن توکمسون رخساره قان یاش

نه واردی فریاده یتن نه قوم و قارداش

نه زینبون حالین قانان ایوای بالام وای

 

بیرده چتین گُلسون یوزوم دنیاده بُلَّم

نسگل لریوی یاد ائدوب فریاده گَلَّم

یانّام ئورکدن آغلارام تا اینکه ئولَّم

دوشمز دلیمدن بیر زمان ایوای بالام وای

 

آز عمریده چوخ غملره اولدون گرفتار

بیر کیمسه دردون بولمدی ائتزمدون اظهار

آخرده ائتدیم من سنه اولقدر اسرار

گوردوم آجیندان یاتموسان ایوای بالام وای

 

زینب نه نوعی گلمسون آه و فغانه

اولدون اسیر و دستگیر شمر و سنانه

اول قدر ویردی شمر بی دین تازیانه

باغرون قان اولدی قورخودان ایوای بالام وای

 

هاردا قالوب گلمور ندن اولاد حیدر

بُلمور مگر ئولماقیوی شهزاده اکبر

نازلو سکینه هی اونی فریاده سسلر

لیلا دیر ای نوجوان ایوای بالام وای

 

گوزلور یولون صغرا باجون آخر وطنده

قسمت اگر اولسا وطن دیده گلنده

احوالیوی آلسا خبر بیر کلمه منده

ویرّم جوابین آج قالان ایوای بالام وای

 

قارداشیمون قانلی باشی گر قالسا مهمان

ویرسه سسیمه سس منیم شاه لب عطشان

یاخشی دوتار عمّون سنه شام غریبان

باهم دئسون منلن آتان ایوای بالام وای

 

بو بینوانون غملری تعداده گلمز

غربت مکاندا حالیمی بیر کیمسه بولمز

بولمم ندن بس صاق قالوب بو زینب ئولمز

خم قدّیمی ائتدون کمان ایوای بالام وای

 

بو نوحه نی سن (شوریا) یازدون مرتب

اهل جهانه بُول یقین کشف اولسا مطلب

واضح گورَلَّر ورد ائدوب بی چاره زینب

ای دستگیر شامیان ایوای بالام وای

 

مرحوم شوری

منبع مجموعه کانالهای مدح و مرثیه

در شهادت حضرت امام جعفر صادق (ع) 1438

شهادت حضرت امام جعفر صادق (علیه السلام)

 

قبریدن ایا فاطمه دوروب وای اوغول دیوب ایت گیلن نوا

آغلا جعفر بن محمّدین حالینه خانم سن یانا یانا

جان ویرور دیور هارداسان آنا

 

کون و مایکون اود دوتار یانار شرح ایدم اگر درد و محنتین

صبر ایدوب بلا و مصیبته واضح ایتدی دینین حقیقتین

زنده ایتدی جدّی پیمبرین زحمتیله اُلموش شریعتین

حقّی گون کیمی ایتدی آشکار اهل عالمینه او مقتدا

 

جور و ظلم آل امیّه دن آز زمان اگرچه خلاص اولوب

ظلم آل عبّاسیدن ولی قلب اطهری قانیلن دولوب

دردینی ایدنمزدی آشکار، گولمیوب یوزی گل کیمی سولوب

چوخ ایدردی توهین او سروره دمبدم او منصور بیحیا

 

نقل ایدر ربیع بو حکایتی بیر گجه او منصور بدسیر

سویلدی ربیع بول بو قدر سن قلبیمی منیم چوخ دوتوب کدر

جدّ و جهد ایدوب جعفری بو آن حاضر ایلسن سن اوزون اگر

اُلدوروم او زهرا بالاسینی قلبیمه منیم تا اولا شِفا

 

واردی نچّه اوغلوم دیر ربیع وار بیرینون امّا شقاوتی

بو شقاوتیندن علاوه وار بیله ایشلره چوخ جسارتی

امر ایدوب خلیفه دیدیم اوغول حاضر ایت او شاه ولایتی

امرینی قیل اجرا خلیفه نین، اولما راضی امرینده نقص اولا

 

گلدی اول شقی بامیدن دوشب خاندان آل رسالته

اهل بیت عصمت بویوک کیچیک بولمورم قالوبلا نه حالته

گوردی اول امامی قیامیده خالقیله مشغول عبادته

ظاهر ایلیوب اوز شقاوتین قویمیوب نمازین ایده ادا

 

اول شقی امامی او حالیلن دوتدی، مقصده اولدی رهسپار

پا پیاده مظلوم امامی گور آت دوشونده امّا اوزی سوار

بولمرم ندن گویلر ای خدا گلمدی یره اولدی بیر قرار

دشمنین الینده بو نوع زار دستگیر اولوب پور مرتضی

 

گوردی اول لعین ازل ابد چوخ دوشوب او مولا اذیّته

بولمورم نه نوعی او سرورین حالینی گوروب گلدی رافته

ترکینه سوار ایتدی اول شهی اُفّ اولا بو بی شرم امّته

آل حیدری تک به تک ایدوب جور و ظلم و توهینه مبتلا

 

وارد اولدی بزم خلیفیه بولمورم نه وضعیلن اول امام

گوردی اول خبیثی غضبلیدور چاره سیز قالوبدور ویروب سلام

 

قوزیوب باشین سویلدی بِئلون باغلیوب کیمه دالدالانموسان

یوخسا چوخ گوروبسن مریدیوی نامه لر یازوبلار اینانموسان

ایلیوب اشاره محاسنین دوتدی سویلدی هیچ اوتانموسان

آز منه اذیّت ایله داخی ایشلروندن ال چک ایله حیا

 

چوخلی نامه توکدی یره دیدی یازمیسان هامی مسلمینه سن

حجّت خدا سویلدی که ای میرمومنین خسرو زمن

نامه لردن اصلا خبر یوخوم یازمادیم بیرین بیر بِلاده من

ایتمدیم جوانلیقدا آرزو، ایمدی من هارا سلطنت هارا

 

ساخلیوبدی شمشیر الینده چون قصد ایدوب امامی ایده شهید

چکدی تیغی اوج دفعه، قِیتروب ساخلیوب غلافینده اول پلید

گوردی قولّارین چرمیوب گلور ختم انبیا سویلور ای پلید

ال گوتور بالامدان، گوتورمسن ایلرم بدندن باشون جدا

 

یر ویروب یانیندا دیدی بویور یابن عمّ السّاعه کیف حال

بو عم اوغلوا لطفون آز اولور گلماقا بیزه تاپموسان مجال

ایلیوب معطّر، دیدی ظنین اولما ایلمه اوزگه بیر خیال

احترام و حرمت ایدوبدی چوخ، چوخلی عزّتیله سالوب یولا

 

شام شومیده ای رسول حق بیرجه سن گلیدون او بزمه کاش

اهل بیتیوی ساخلیوب یزید مجلسینده، کفرین ایدوبدی فاش

بیر طرفده شطرنجیلن شراب طشت ایچینده وار بیر یارالی باش

ساخلیوب ایاق اوسته خسته تن اول امام تبداری، بیحیا

 

زهریلن او منصور بیحیا عاقبت امامی ایدوب شهید

شوریا بو مولایه عشقیلن نوحه یازدون اولدون عجب سعید

اوز زیارتین ایسته ویر قسم اوز آناسینا اول گیلن امید

قسمتیم اگر اولماسا بو ایل قسمتیم اولا بلکه کربلا

 

 مرحوم شوری 

منبع مجموعه کانالهای مدح و مرثیه

در احوالات حضرت موسی ابن جعفر (ع) 1296

در احوالات حضرت موسی ابن جعفر (علیه السلام)

 

ای صبا ائله یثربه گذر عرض قیل او خاتون محشره

داده گل خانم زهر کین وئروب اهل کینه موسی ابن جعفره

 

دور ایاقه قبروندن ای خانم بو عزاده شور و نوایه گل

حبس خانۀ سِنده قیل گذر اوغلووا نظر قیل نوایه گل

یردن ئوز عزیزون گوتورماقا قیل عجل بو ذلّت سرایه گل

ظلم الیله هارون بی حیا چوخ اذیت ایلوب او سروره

 

گر اجازه اولسا خانم منه واردی « شوری » نون آیری بیر سوزی

هانسی بیر بالالاریوون سنون بو جهاندا بیر گولدی گول یوزی؟

قعرِ سِجنیده لیک بو بالان دائماً گجه اولدی گوندوزی

هر مصائبه دؤزدی صبر ائدوب شکر ائدردی خلاق داوره

 

بُلمورم او محبسده نچّه ایل یدّی ایل که یا اون بیر ایل قالوب

گون بگون ائدوب جسمینی ضعیف الدن آخری طاقتین آلوب

بعضی ظلملر حبسده اولوب اوغلووی خانم نطقدن سالوب

بیر خدا بُلوب بیر ئوزی بُلور نه یتوب او زار و مکدره

 

اوغلوون او هارون قتلینه چون حریصدور چوخ ائدوب شتاب

گه غلاملر گه ئوزی گلوب اُول غریب امامه ائدوب عذاب

نه ائدوبدولر عرض ائدنمرم ظلم اولوردی بی حدّ و بیحساب

بو قدر دیه بُلَّم آلدیلار تازیانه شل اولموش اللره

 

مدت مدید حبسده قالوب قلب اطهری قانیلن دولوب

گون بگون جمال مُنَوَّری غصّه دن خانم گول کیمی سولوب

اوغلوون نجه گور توپوقلارین کُنده لر سخوب خُرد خُرد اولوب

شیعه نون بو محنتده حقی وار آه و ناله سی چخسا گویلره

 

عاقبت گلوب تنگه حبسده عرض ائدوبدی معبوده ای خدا

یوسفی خلاص ایلین منی حبسدن ئوزون ائتگیلن رها

دوزموشم بُلورسن حبیب من هر قدر منه یوز وئروب بلا

لیک چوخ منم گوگلوم ایستوری ایلیم بو بغدادی مقبره

 

عرض ائدور که اوغلوم مینم خدا گَلمیوبدی مدتدی وار یوزوم

باشه یتدی عمریم بو حبسده ایندی اوغلومی آختارور گوزوم

گر رضا بالام گلسه یانیمه ایلرم وصیت اونا ئوزوم

هم بُیوکلره هم اوشاقلارا ایلسون سلام آل حیدره

 

هر قدر ائدوب ظلم دویمیوب اُول غریب بی یاره اهل کین

قاتلی وئروب سمّ اوغلوون قلبینی ائدوب یاره زهر کین

بُلمورم پرستاری کیم اولوب یا نه حالته قالدی شاه دین

بیر نفر او وقته تاپلمیوب چکسون اوغلووی آیری بیر یره

 

گول کیمی سارالدی سولوب خانم عاقبت قوری یرده جان وئروب

غربت ئولکه ده حبس خانه ده بو بالان عجب امتحان وئروب

کربلا یرین جدّینون غریب ئولماقین او وقته نشان وئروب

غسلنی وئرنده گوروبدولر جسم اطهری یاره یکسره

 

فاطمه آنان دامنین دوتوب «شوریا» بو گون عرض قیل آنا

نوحه یازمیشام خدمت ائتمیشم سن منه صله قیلگیلن عطا

وار ئورکده بیر عمده مطلبیم ایستورم آنا بیرده کربلا

کاظمینیده بیر سلام ائداخ جمعلن او موسی ابن جعفره

 

مرحوم شوری تبریزی

منبع مجموعه کانالهای مدح و مرثیه