زبانحال حضرت رقیه (س) با رأس انور پدر 6039

زبانحال حضرت رقیه (سلام الله)

 با رأس انور پدر

 

من بابا عشقیمده عمّه م کیمی غوغا ایلدیم

هامی عشق اهلینی بو عشقیله شیدا ایلدیم

 

ایوی آباد اولا استادِ محبّتدی باجون

مکتبینده اوتوروب مشقِ الفبا ایلدیم

 

الف قامتینی دال ایلدی کلکِ فراق

منده بو دالی اگوب نونی انشا ایلدیم

 

کلمهء وصلیده کی لامِ غریبم ، یارالی

وصل تا گتیدی پوزوب لامی عجب لا ایلدیم

 

دوشدی سس یوسفِ یثرب گلوری بازاره

اوزومی امر ِتجارتده زلیخا ایلدیم

 

وار یوخوم بیر قوری جانیمدی بودا قربانون

نقد ِجان سود ویرر من اونی زیبا ایلدیم

 

آناوا اوخشاماقیمدان منه ارثیّه یتوب

آناوین مثلی هامی غمله مدارا ایلدیم

 

ئولرم ، قبریم اولار گوشهء ویرانه هامی -

بولَجاق شامه بقیع مُلکنی اهدا ایلدیم

 

سینم اوسته او قدر تپراقین اوستونده یاتیب

عاقبت سینمی چون سینهء سینا ایلدیم

 

نطقه گَل تا بوله عِلم اهلی یازا تاریخه

منده ویرانه ده اعجاز ِمسیحا ایلدیم

 

چوخ سوروشدوم سنی ، عمّم دئدی صبر ایله قیزیم

چشمهء صبری اودور اشکیله دریا ایلدیم

 

عاقبت هاتفِ غیبی منه اورگتدی که من

آغلیام ، آغلامادا حلّ معمّا ایلدیم

 

سن کلیساده یاتان شب اورگیم اسدی بابا

منده اسراری یانان سینه ده اخفا ایلدیم

 

صورا بولدوم داریان وقتیده راهب تلیوی

اورگیم تیتروری اسراری هویدا ایلدیم

 

اوچ یول اعجاز گوروندی یارالی رأسونده

هر اوچونده هامی کفر اهلینه معنا ایلدیم

 

بیری شق القمر اولموش ، بیری والشّمسِ ضُحی'

بیری وَاللّیلیدی اول زلفیوه ایما ایلدیم

 

خم ِگیسوی علی اکبره باخدیم بیر یول

خطّ ثُلثِ دلی تبدیلِ چلیپا ایلدیم

 

فکر ایدردیم سنه اکبردی ملازم افسوس

بولمدیم عفو ایله اندیشهء بیجا ایلدیم

 

کوفه ده زین العبا عمّمه بیر راز دئدی

دولت ِعشقیله تئز کشفِ قضایا ایلدیم

 

بولدوم اکبر ایاقون آتدا چاتوبدور شرفه

او سبب دن هوسِ سِرّ هویدا ایلدیم

 

کیم دییر ناقه ده معراجه گیده بولمز اسیر

ناقه ده معجزهٔ لیلهٔ الاسرا ایلدیم

 

باشون آی ، نیزه فرازینده کی باشلار اولدوز

من نبی ، ناقه بُراق ، ارضی ثریّا ایلدیم

 

مجلس ِشرب هارا؟ بیز هارا؟ نه فلسفه دی

بیر بو منطقله فلاسفلری رسوا ایلدیم

 

افق ِطشتیده گون چیخدی پوزولدی ظلمات

منده اولدوز کیمی بو سِیره تماشا ایلدیم

 

یانماسام اوتدا دیمزلر منه پروانه ، اودور -

شمعِ عشق اوسته پر آچدیم دیمه پروا ایلدیم

 

ایله یاندیم نه کولوم قالدی نه بیرجه اثریم

جانی تقدیم ایدوب اوز عهدیمه ایفا ایلدیم

 

قاف غمدور بو خرابه یازیلوب روز ازل

اوزومی بیله بلا قافینه عنقا ایلدیم.

 

جنابِ آقای سامان فردکامی (شمس شاب)

منبع مجموعه کانالهای مدح و مرثیه

اربعین حسینی 6038

احوالات اربعین

 

سایهء ولا باشیمندان ظلمیله کم اولدی قارداش

اشکِ نابیله عذاریم هر زمان نم اولدی قارداش

 

رمزِ عشقه پی آپاردیم سندن آیریلان زمانی

عاشقانه هفت شهرِ عشقی گزدیم آرمانی

یثربه طلب دئدیم من ، کربلایه شهرِ فانی

سِیر زینب اربعینله ختم توأم اولدی قارداش

 

مرغ ِبال بسته مثلی من اسیرِ دامِ تنگم

خستیَم ، گمان ایدوللر راهِ غمده پای لنگم

ناله ی فراقون اوسته چون نِی و رَباب و چنگم

زیر ِشوکتیم دریغا ظلمیله بَم اولدی قارداش

 

باشدا پوستینیم اولموش قانیله خضاب اولان مو

مَنتشأده دوشیم اوسته ردّ قمچیلردی سوسو

خانقاهِ پیره چاتدیم آهیله دیلیمده یاهو

دم بو دمدی ، طوفِ قبرون فیضِ اعظم اولدی قارداش

 

زخمهء بلا چکیلدی ساز ِفکریمه پیاپی

شورِ عشقه بیر درآمد ویردی چهارگاهِ هِی هی

پرده پرده نینوانی دوتدی بانگِ ناله ی نی

نغمهء مخالفیله ، شیون اقدم اولدی قارداش

 

عشقیمه قالوبلا حیران ، عُلویانِ خلدِ اعلا

سعی ایدوللر ایلسونلّه عاشقانه درکِ معنا

چوخ چتیندی پی آپارسون بیله رمزه اِنس و حورا

فهمِ عامه راز ِجانان جمله مبهم اولدی قارداش

 

دور اوتور منه خبر ور قلبیوین جراحتیندن

منده عرض ایدوم بو مدّت شامیان شمادتیندن

نفخ ِصورِ اشقیادن ، زینبون قیامتیندن

آل ِعصمتین جلالی سخت برهم اولدی قارداش

 

نیمروزِ پُر بلاده قلبیمه قالاندی غم لر

آلِ حقّه ناحق امّت گوردولر روا ستم لر

من گلنده قتلگاهه داده گلدیلر حرم لر

مقتله چاتونجا قدّیم جَبریله خم اولدی قارداش

 

وصلون آرزو ایدردیم ، مرقدیوه بیر چاتیدیم

کاش منده سن تک اول گون قانه توأمان باتیدیم

(اولمادیم حصیر اقلا" سنله قبریده یاتیدیم)

التزام ِحسرتیله قسمتیم غم اولدی قارداش

 

اولموشام بیر اربعیندور هم نوای مرغِ یاحق

مرغزارِ جاندا سالدیم باشیمه خِمارِ زنبق

نیمه شب لری چکردیم نقشه ی وصالِ مطلق

چَه چَه ِصداقتیله عالم ، عالم اولدی قارداش

 

شمع تک یانیب قوتولدوم اهل دل محافیلینده

یاندی آتشیمده چوخلار ماهِ شب مقابلینده

من وفای عهدی گوردوم ، دشمنون سلاسلینده

گرچه قولّاریمدا حلقه حلقه محکم اولدی قارداش

 

آینه مثالی باشون نیزه ده عیان اولاندا

طوطی دیلیم دیل آچدی ، فرصتِ بیان اولاندا

زینبی نشان ویریردی داشلارا نشان اولاندا

سیندی آینه منیمده نطقیم اَبکَم اولدی قارداش

 

کوچ ایدنده کربلادن قتلگهده جانه دویدوم

تیر ِآهیله دمادم قلب ِکائناتی اویدوم

نعشوین یانیندا خسته روحیمی خلاصه قویدوم

قالبیم گدیردی شامه دردِ مُعظم اولدی قارداش

 

کوفه بحرینه چاتاندا کشتیّ شکستهء عشق

موج لر گوروب او لحظه نوحِ دست بسته ی عشق

ساحلی سراغ ایدردی ناخدای خستهء عشق

بادبانِ جانه ، بادِ فتنه همدم اولدی قارداش

 

محویدیم ستاره مثلی ماه ِشبده غملی سِیره

راز پرده سی چکیلدی بیله سِیره چشمِ غیره

دست ِروزگار آپاردی ماهِ هاله داری دِیره

حالیمه یانان او غمده پور ِمریم اولدی قارداش

 

کاروانِ درد و محنت الغرض یتیشدی شامه

مرد و زن تمام چیخدی اشتیاق اوزیله بامه

صبحِ پُر فروغ دوندی زینبون گوزینده شامه

روزِ قتل بو حزینه چون مجسّم اولدی قارداش

 

قاسمین باشین گورنده ناگه اَرزَقین عیالی

انتقام نیّتیله سنگسار اولوب خیالی

نوعروسین اول دقیقه دوندی شیوهء مقالی

روحی تندن احترازه بس مُصمّم اولدی قارداش

 

شام محنتین نقدری شرح ایدم تمامه یتمز

اصلِ غم بو آز زماندا دردِ دلده کامه یتمز

هیچ جفا و ظلم قارداش انزجارِ شامه یتمز

بیزلره دمشقِ ویران کوی مُظلم اولدی قارداش

 

کاروانِ بی دَراده قلبیدن یارالی چوخدی

قامتی کمان حریمون قلبینه فراقون اوخدی

گَلدی شامه یول سالانلار ، حیف اولا رقیّه یوخدی

گلشنِ محبّتوندن بیر گُلون کم اولدی قارداش

 

لحظه لحظهء وفادور ، گاه ، گاهِ عهد و پیمان

نائلِ وصالِ یارم ، باشه چاتدی دورِ هجران

یادیمه دوشور بو چولده قانلی بحر سهمِ طوفان

بوردا غرق اولان دِمایه سِبطِ خاتم اولدی قارداش

 

(شمش شابی) چرخِ گردون جبریله سالوب فشاره

بیر کسه سوزون آچانمّیر ، یوخ امیدی غیر و یاره

دورت الین اخا اماندور قویما دوشسون انزجاره

هر نه اولسا گلشنونده بلبلِ غم اولدی قارداش

 

چوخلاری گمان ایدولّر صوفی دی ، غزل سرادی

لیک باطنا" ولای مرتضایه مبتلادی

خلوتینده هر دقیقه شورِ یومِ دین به پادی

فصلِ شعر شاهِ دینه بس مقرّم اولدی قارداش.

 

 جنابِ آقای سامان فردکامی (شمس شاب)

منبع مجموعه کانالهای مدح و مرثیه

احوالات کوفه 6029

احوالات کوفه 

 

هزاران یوسف ِمصری غموندن پیچ و تاب ایلر

جمالون گورسه خجلتدن یوزه زلفون نقاب ایلر

 

بُراق ِنیزده معراجه چخموش یاره لی باشون

به عینه شرح ایدور محرابِ او اَدنانی خم قاشون

بو قدری توکمه اختر تک سپهر ِوجهه گوز یاشون

کی هر بیر دانه سینده غبطه مین سنگ ِشهاب ایلر

 

مُسلَّمدور غمِ عشقون دل دیوانه دن گچمز

خمارِ جام جم معلومیدور پیمانه دن گچمز

یانار شمعِ بلا یاندرماسا پروانه دن گچمز

بلی معشوقیلر اوز عاشقون چوخ ارزیاب ایلر

 

باشون گون تک هارا یوز قویسا گلّم آی کیمی قارداش

تلألوء ایلدوخجا باشون ایلور کوفیان پرخاش

مُسلّمدور کی گوندن کام آلانماز ذرّه جه خفّاش

حسین ظلمت نشینلر سندن از بس اجتناب ایلر

 

بو دریای بلاده زورقیم یوخ غرقِ طوفانم

شبانِ غم الینده نی کیمی مشغول ِافغانم

سر ِزلفون کیمی باد ِمخالفدن پریشانم

اسنده تند یل نظم ِصفِ زلفون خراب ایلر

 

ازلده کیم وروب جام بلادن ، مستِ مست اولدی

وقوع حشره دین بی توبه هر دم می پرست اولدی

ولی بو کوفه ده پیمانهء عرفان شکست اولدی

بو نوعی کی زیاد اوغلی جسارت با شراب ایلر

 

منه (سرخوش) ویروب بو سر خط اشعارِ زیبانی

مقام ِامتحانه چکدی (شمس شاب) نالانی

غریبه عالمیدی نصف ِشب اول بزمِ عرفانی

خیال ایتدیم حسین شخصا" بو اشعاری کتاب ایلر.

 

جناب آقای شمس شاب تبریزی

( آقای سامان فردکامی)

منبع مجموعه کانالهای مدح و مرثیه