احوالات حضرت فاطمه زهرا (سلام الله)
ای شمع یانیر کوکب سیّار اود ایچینده
پروانه چکیر آه شرر بار اود ایچینده
سوز باشلامیشام فاطمه درد و محنیندن
ائتدیکجه رقم غرق اولی گفتار اود ایچینده
بلبل پر آچانمیر، سیخیلیب دامن ناره
از بس کی وئروب شب پره منقار اود ایچینده
گل غنچه لری فکر ائله نه حاله قالارلار
جبریلن اگر یانسا چمنزار اود ایچینده
بیر لحظه تماشاگر ائله، دل گوزون آخر
جدا گورک آیا نه خبر وار اود ایچینده
جبریل امین بوسه وئران درگهه بیر باخ
گویا کی یانیر معبد اسرار اود ایچینده
خیبر گوتورن الده باخین قید قضایه
یاندی صدف احمد مختار اود ایچینده
ثانی نئجه گور نشر ایلئیب ظلم و فسادین
آواره دی محبوب دادار اود ایچینده
دیواره وئریب تکیه، آخیر قان سینه سیندن
فریاده گلیبدیر در و دیوار اود ایچیده
ای گلشن ائدن ناری خلیلالهه رحم ائت
امّالنجبا اولدی گرفتار اود ایچینده
هاردا گورونوب حمله ی خصمانه گتیرسین
بیر عورته اوچ یوز نفر اغیار اود ایچینده
آیا نه جسارتدی بو ثانیده خدایا
صدیقی کبرانی ائدیب زار اود ایچینده
آخر نه روا حامله بیر طاهره عورت
نارس بالاسین سقط ائده ناچار اود ایچینده
زهرانی سالیب تنگه، عمر اوز قاپیسیندا
قان ائتدی دوشونده سوتی مسمار اود ایچینده
گوردی قاپینی قان بوریوب اودلادی فورا
تا محو اولا قاندان قالان آثار اود ایچینده
قالماز بونی درک ایلمدی گون بولود آلتدا
گئتمز آرادان مطلع انوار اود ایچینده
یانمازدیم اگر بیر اودا قیلسیدی کفایت
اولسیدی فقط فاطمه خونبار اود ایچینده
قنفذ دان آلیب قمچینی اویناتدی الینده
گویا کی چیخیب صیده سیه مار اود ایچینده
قمچیله گوگرتدی هاراسی گلدی قباغه
گوردی یوخ او مظلومیه غمخوار اود ایچینده
از بسکی وئروب فاطمه نی سالدی دوزومدن
درد ائتدی اونون گوزلرینی تار اود ایچینده
سسلندی او دم فضّه نی امداد ائله یاندیم
سالدی منی دیلدن داخی اشرار اود ایچینده
آز قالدی عدو حمله ائده صحن سرایه
ال دوت منه ای یار وفادار اود ایچینده
فریادیمه گل چارسیزم محسنیم اولدی
ییخدی ائویمی قوم ستمکار اود ایچینده
وئر خامه تسلی بو مصیبتده بتوله
قویدی قاپیسین کینه ی کفّار اود ایچینده
سویله سن اوزون کی واریدون کرب و بلاده
گوردون کی نئجه گرمیدی بازار اود ایچینده
سن ناظریدون زینبوون خیمه سی یاندی
قالدی او رشیده قیزون آغلار اود ایچینده
سندنده چتین درده دوشن زینبون اولدی
قویدی اتگین دشمن جبّار اود ایچینده
پروانه کیمی شهپرین اوددان اودا ویردی
به به نه گوزل ایلدی پیکار اود ایچینده
مأواسی یانان قوش کیمی آواره قاچاردی
شاید اولا اطفاله هوادار اود ایچینده
سسلردی دمادم کرم ائت ای حَکَم الله
اودلاندی امانت بالا قیزلار اود ایچینده
قویما منی شرمنده حسینیمدن الهی
گورکیم وار اولا حقّه پرستار اود ایچینده
هر قیز دیله گلسه دئسه یاندیم شرر آلتدا
تئز باشلارینا قمچی وئرارلار اود ایچینده
رحم ائت یانار اوددان قوتاری ساجدی یا رب
خوشدور من ئولم قالمایا بیمار اود ایچینده
ایله نظر الله بو قوجاقیمده کی طفله
داغلی دلیمی ناله سی داغلار اود ایچینده
سیفی نه گوزل رتبهی ممتازه یئتیشدین
اولدۇن گوهر عشقه خریدار اود ایچینده
سیفی اردبیلی
با سلام