زبانحال حضرت رباب (س) در راه شام 5219
زبانحال حضرت رباب (سلام الله)
در راه شام
ای نیزده کسیک باشی قرصِ قمر اوغول
ایکاش آنان رباب ئوله ای سود امر اوغول
من ناقه ده سنه باخورام سنده نیزده
آچ گوزلرون بو بیکسه ایله نظر اوغول
توز توپراقه قانا بلَشن خیردا تللرون
قلبیم کیمی صبا توخوناندا اسر اوغول
من ساربانه ، حرمیله سن اسیرسن
مظلوم آنا بالایه بولار ظلم ایدر اوغول
صیّاد ایتسه صید بیر آهو بالاسینی
چوللرده چاره سیز آناسی هی ملر اوغول
واقف بو سرّیدن اولا بولمز هامی اولا
صحرالری آنان نیه حیران گزر اوغول
رخشنده بیر ستارهء اقبالیدون منه
باتدون که بخت مندن یوزون دوندرر اوغول
حیرت دیشینده بارماقی چوخلار باخار سنه
بی اختیار صورته اشگین دوزر اوغول
بعضی هلاله ، بعضی گونه نیزده باشون
بعضی سُیهل اولدوزونا بنزَدر اوغول
صحبت دوشنده حرمله دن یا خدنگدن
بو اوتلی قلبی تیرِ مصیبت دلر اوغول
روزِ جزاده وار او شقیدن شکایتیم
اکبادیمه سالوب او ستمگر شرر اوغول
آت اویناداندا قانلی باشون نیزده دن دوشر
یوخ قاتلونده رحمدن اصلا اثر اوغول
بنزر انارِ سرخه باشون نوکِ نیزده
توکمز نجه آنان یوزونده اشگِ تر اوغول
دوزدوقجه اشک گوهرینی گوزلریم یوزه
زلف آدلی دستمالِ مصیبت سیلر اوغول
منده علاقه وار او قمردن گوزل باشا
گیدسه هارا رباب دالیجه گلر اوغول
تنها آنان دوشوب چوله ای وای اوغول دیمز
منله اولوب چوخ اوغلی ئولن همسفر اوغول
اکبر باشی مقابلِ لیلادی نیزده
رهبر اولوب آناسینا یول گوسترر اوغول
منله کجاوه یولداشی قاسم آناسیدور
من ایلینده ناله منه سس ویرر اوغول
زینب دلنده وار ایکی لاله اوغول داغی
باخ اوندا همّته ایکی درده دوزر اوغول
سایه کیمی قاباقلاماز اکبر باشین باشون
ایلر ادب ملاحظه ، نورِ بصر اوغول
اولدوز گونون یانندا گورونمز گونوز گوزه
سن آفتابیله اولوسان جلوه گر اوغول
کرب و بلاده حلقوی بوس ایلینده اوخ
نه حاله قالموشام؟ اونی الله بولر اوغول
کسدی بوغازون اوخ نجه؟ حیرتیدیم هنوز
هاردا خدنگ حلقی باشا باش کسر اوغول؟
آلسا اگر سو جامی اله چاره سیز آنان
میل ایلینده سو سودا عکسون گورر اوغول
بی اختیار او جام النده دونر قانا
غربالِ چشم قانلی سرشکین الر اوغول
سن شه النده ظلمیله اوخلانموسان سوسوز
بیکس آنان سو هاردا گوارا ایچر اوغول
سینه مده یادگاریدی دیرناقلارون یری
بو یادگار قبره منله گیدر اوغول
پروانه شمعِ وصلوه بیرده اولانمارام
نیلوم سینوب یانوب توکولوب بال و پر اوغول
بوندان صورا دل آئینه سینده جمالوی
هر دم ربابون ایستسه گوگلی گورر اوغول
دینجلمرم نقدری وارام ، غم ایله یوروب
پرواز اولاندا روحی آنان دینجلر اوغول
قالسیدی گاهواره آلاردیم من عطروی
یاندی اودا یاناندا او گون خیمه لر اوغول
اگ باشوی جِدادن اوپوم غنچه لبلرون
بلبل بو رسمدی گُلون ایگلر اوپر اوغول
واردور رقیه نین سنه آرتوق علاقه سی
ای وای اگر بو حاله اولا باخبر اوغول
چوخ چوخ گجه یاتوب یوخودا شوریله سنه
گهوارهء خیالیده لای لای دیر اوغول
باشون اولان جدایه اونی قویمارام باخا
باخسا تانیر سنی اوزونی ئولدورر اوغول
باخما آنان گورور سنی ایتمیر هلاک اوزون
صبر ایلوری بو محنته بو دربدر اوغول
رخشنده نجمدور فلکِ نیزده باشون
مهریله ماه جلوه ده رشگین چکر اوغول.
مرحوم سیّد یوسف نجمی
منبع مجموعه کانالهای مدح و مرثیه
با سلام