زبانحال حضرت زینب کبری (س) در قتلگاه 4095
زبانحال حضرت زینب کبری (سلام الله)
در قتلگاه
بونه حالدور حسین جان بیله وضع حالت اولماز
آنام اوغلی بیر بدنده بو قَدَر جراحت اولماز
نه باشون قالوب بدنده نه لباس و جامه تَنده
مگر اللرون کسنده کسن هیچ خجالت اولماز
دیمـرم بـلادن هـرگز اوسانوب بلالی باشون
بولورم سالوبدی من‌تک باشا مین خیالی باشون
کسیلوب سوسوز جدایه وورولوب یارالی باشون
اوخور آیه‌آیه قرآن بیله خوش تلاوت اولماز
وورولوب باشون جدایه بدنون قالوبدی‌یئرده
ایـدرم نظاره قانیـاش تؤکرم بو روی زرده
بولوسن بو غملو قلبیم نقدر گلوبدی درده
داخی بو جهاندا سنسیز منه استراحت اولماز
هانی بس او کهنه کؤینک که گیدنده مندن آلدون
منی بـو قضیّـه‌دن چـوخ غم بیشماره سالدون
اونی کیم چخارتدی عریان بوگون ایستیسینده قالدون
بیله ظلم بی‌نهایت بیله قتل و غارت اولماز
وورولوبدی گر چه دورت‌مین بو یارالو سینوه اوخ
پوزولوبدی نقش جسمون بدنونده صاف یرون یوخ
ولی قلبوه دگن اوخ اوره‌گیمی یاندورور چوخ
سنه آغلاسام اؤلونجه سبب ملالت اولماز
یولی کاش دوشمییدی باجووون بو کارزاره
جَسَـدِ شریفــون اعــدا ایلیوبـدی پاره‌پاره
نه یوزیله ساربانـون کسوب اللریـن دوباره
ندن اللری شل اولماز بیله بیمروّت اولماز
بو یارالو جسمه یاره یئتیشوب ووروبدی هر کس
کسیک اللرون فداسی هانی خوردا بارماقون بس
سسیمه سبب ندور ای آنام اوغلی ویرموسن سس
آنام حقّی ویرمَسَن سس اوره‌گیمده قوّت اولماز
بدنون آلـوب کنــاره اؤپَـرم یـارالاروندان
دئمـم آشکار یاره وورولوب هارالاروندان
مگر اوزمُوسن علاقون بوگون اوز بالالاروندان
داخی کیمسه‌دن برادر اولارا حمایت اولماز
قُشونـون سینـوب برادر اوجا بیرقون باتوبدور
آت ایاقی جزو عضوون هامی بیربیره قاتوبدور
بو یارالو سینه‌ده اوخ نئجه باش باشا چاتوبدور
سنه هر جفانی ایلوب دئدیلر کفایت اولماز
ستـم آتشی بـرادر وورولوب خیامه سنسیز
دوشوب عترت غریبون نئجه گور نظامه سنسیز
بیزی اهـل شام و کوفه آپارولاّ شامه سنسیز
بو قدر جفا و ظلم و ستم و عداوت اولماز
بو حسین عزاسی ذاکر هامی قلبی صاف ایلر
هامی درده اشگ چشمون بولوسن کِفاف ایلر
اولاریکه ایمدی قبـرین بو شهین طواف ایلر
چخادور بهشتی یاددان او صفاده جنّت اولماز
مرحوم ذاکر تبریزی
با سلام