احوالات اربعین

 

الده بیر عنوان شکوه ، گردش ایامدن

پاره پاره کوینگون قارداش گتوردوم شامدن

 

تا حیاتیم وار بسیمدور ، ایتماقا قارداش نوا

بیر آدون بیرده بو قانلی کوینک ، اسباب عزا

دلده آدون ، سینه دن پیراهنون ایتمم جدا

سینه ده کوینگدن آلّام ، دلده عطرون نامدن

 

ئولمسم یولاردا قارداش ، قسمتیم اولسا وطن

ایستسه اهل وطن سندن نشانه ، اوندا من

سویلرم ایلر حکایت حالینی بو پیرهن

جسمینه نقدری اوخ نیزه یتوب ظلّامدن

 

قسمتیم اولسا آنام زهرا مزاری هر زمان

سویلرم یاتما آنا ، دور حالیمه باخ آغلا ، یان

دورت مین اوخلی کوینگین گتدیم حسینوندن نشان

رسمدور حال مسافر کشف اولار پیغامدن

 

نه دیوم بو پیرهندن ای عزیز جان من؟

بو سنون پیراهنوندور ای امام ممتحن

گور منیم اگنینمده نه حاله قالوبدور پیرهن

آل خبر سرّین منه تاپشوردقون ایتامدن

 

هر قیزا ایستردی ویرسون تازیانه اشقیا

قولّاریمی حایل ایلردیم قاباقدا یا اخا

ایمدیده جسمیمده وار آثار قمچی جابجا

چوخ چتین صحت تاپام بو بی دوا اَسقامدن

 

من او گونکه سندن آیرلدیم ، دچار اولدوم غمه

کوفیه گیتدیم اولام کاشف رموز مبهمه

کوفه ده گوردوم دوشوب شهره غریبه همهمه

بیر قیامتدور که عقل عاجز قالور ایهامدن

 

نیزده گوردوم باشوندا نور طور آثاری وار

حضرت موسی کیمی عشقنده شور آثاری وار

وجه وجه آللهیده اما تنور آثاری وار

قالمادی آثار منده ، صبردن آرامدن

 

ایستدیم خاکستری زلفیم جمالوندن سیله

یتموری گوردوم الیم ، وار بیر جداجه فاصله

باشیمی ووردوم همان ساعتده چوب محمله

قیرمزی قان اولدی جاری زلف مشگین فامدن

 

نیزه باشندا کسوک باشیله رخشان ماهیدون

کاروان عشقه مهتاب و دلیل راهیدون

سن منیم هر خط سیریمدن اوزون آگاهیدون

کوفه ده گوردوم نه لر اشرار بد فرجامدن

 

حشره تک چیخماز یادیمدان مجلس ابن زیاد

دوتموری دل عرض ایدم نیلردی اول کان عناد

داد او مجلسدن امان او ظلمدن ، فریاد و داد

ابن مرجانه ایدن بیداد و اذن عامدن

 

گل یوزه گل یوزلی قیزلار اشگی دوزدی ژاله لر

آهمیله داغدار اولدی چمنده لاله لر

ایلدی طعن و شماتت بیزلره رجاله لر

گور گچر بو ظلم لر افکاریدن اوهامدن؟

 

ایستدی مرجانه اوغلی کوس فخریت چالا

لرزه ارکان رکین دین و ایمانه سالا

ایله بیر مجلسده مندن بلکه توضیحات آلا

دینمدیم من ، لیکن او ال چکمدی اِبرامدن

 

عترتون محملده ، چخدی نوک نی ده سیره سن

الفتون بیزدن کسوب گیتدون حریم غیره سن

وا حسین دلده آنام زهرانی گتدون دیره سن

راهبه گوستردون آیت ، مذهب اسلامدن

 

گوزلریم عشقونده مشق آلدی دمشقی ابردن

صبر مندن تنگه گلدی ، من هجوم صبردن

چوخ سوزوم وار محضرونده ، باش گوتورسن قبردن

کشف قیلّام سرگذشتیمدن ، گچن آلامدن

 

درد دل شرح ایلسم وار احتمالی دل یانا

کربلادن کوفیه جور و جفا گلمز سانا

بو جفالر بیر یانا شامین جفاسی بیر یانا

صبحِ شام اولدی گوزیمده تار ، تیره شامدن

 

پیشوازه چخدی شام اهلی النده تار و چنگ

ایتدیلر نه شرم جدیمدن نه حقدن عار و ننگ

آتدیلار گاهی یهودیلر کلوخ و گاه سنگ

بی حیالر توکدولر گه اودلی نی لر بامدن

 

 مرحوم حسینی ‌سعدی زمان

منبع مجموعه کانالهای مدح و مرثیه