ورود به مدینه
ترکیب دو احوالات از مرحوم حسینی سعدی زمان
اشعار داخل پرانتز به ترتیب از مرحومین دخیل و عاصی و نجمی می باشد.
بشیر ویردی خبر تا قضیه کشف اولدی
مدینه شهری فغان و نوائیله دولدی
اوجالدی گوگلره فریاد و داد و واویلا
ایشتدی ناله و فریادی بینوا صغری
علیلیدی دورا بولموردی، طاقتی یوخودی
اوزی گیده سوروشا دیزده قوتی یوخودی
دئدی که جده بلا تیری قلبیمی دلوری
نه وار مدینه ده آغلاماق سسی گلوری؟
من علیله معین اول بو باره ده سنده
یاپوش الیمدن آپار کوچیه گیدوم منده
گوروم نه وار؟ بیله معلوم اولور بابام گلوری
بو گون منیم باشیما یا که چرخ کول الوری
بو ناتوان بدنیم غصه دن تاپار صحت
اگر گله یانیما اکبر ملک طلعت
بو رختخوابیمی بغ جده حمیده سیر
اطاقینون قاپوسین آچ گلور علی اکبر
بو رختخوابیمی بغ جده حمیده سیر
اطاقینون قاپوسین آچ گلور علی اکبر
گلاب حاضر ایله اوز اوزون ایتورمه بیله
علی اصغره بیر گاهواره حاضر ایله
اوشاقدی چوخ یورولوبدور گلور اوزاق یولدان
یرینی راحت ایله، خواب ناز ایده بیر آن
شب فراقین اگر وصل گوندوزون گورسم
مرامیمه چاتارام اکبرین یوزین گورسم
مریضه ام دئمه من جده ایچمرم یمرم
اگر بابام گله، من بیرده ناخوشام دیمرم
بیر ایلدی حسرتیله تیکمیشم یولا گوزیمی
صباحه تک گیجه دیواره قویموشام یوزیمی
گیدوب الیمدن علی اکبریله عزت و شان
بو یالقوز ایوده منیم یوخدی حالیمی سوروشان
ایشتدی جده سی بو سوزلری اولوب بی تاب
گلوب تکلمه، صغرایه ویردی بیله جواب
گلور اگر چه قیزیم، آل مصطفی خوشسان
ایاقه دورما ولی قیل سکوت، ناخوشسان
کنیز گوندروم احوالی بیر تفحص ایداخ
گوراخ آتان گلوری بیزده پیشوازه گیداخ
گوروبدی جده سی محزون، او زار و نالانی
سوزیله ایلدی اشغال فکر صغرانی
همان او حالیده بیر محشر آشکار اولدی
دوباره فاطمه نین قلبی داغدار اولدی
مدینه نین او زمان هاشمیه نسوانی
گلوبله ایتماقا آگه مریضه صغرانی
آرایه آلدیلا آغلار گوزیله صغرانی
احاطه ایتدیله مثل نگین او نالانی
باخاردیلار یوزینه منتهای حسرتیله
آخاردی یوزلرینه اشگ چشم شدتیله
دئمزدیلر او علیله، بوله که نه واردی
بو قدر وار که باخاردی یانوب سیزلداردی
ویروبله سس سسه بیردن او جمع آغلادیلار
شرار آهیله صغرا دلینی داغلادیلار
گورن زمان او بلاکش خانم بو احوالی
دئدی نه وار منی بو حالدن ایدون حالی
منیم جلالیم الیمدن گیدوب غمیم چوخدور
ایلیم سفر ایلیندن، گلوب گیدن یوخدور
بو گلماقوزدا سیزون یوخسا واردی تازه خبر
بولود کیمی دوتولوبسوز دیون نه واردی مگر؟
بیله منه باخورسوز حسرتیله آغلورسوز
فغانیله یوزه سیل سرشگ باغلورسوز
گیدوب قبیلم عراقه، واریمدی چوخ کدریم
یانیمدا وار نه باجیم، نه آتام، نه عمه لریم
آنام ئولوبدی، اوزوم ناخوشام یوخومدی طبیب
غذادی خون جگر قالموشام وطنده غریب
قالوبدی یولدا گوزوم وار نه نامه و پیام
امید وصل غم هجر سلب ایدوبدی دوام
مسافری اولانون آغلامازلا یاننده
نچونکه بعضی خیالات اولار گماننده
گیدنلریمدن اگر وار خبر بیان ایلیون
یانوقلی قلبیمی یاندیرمیون عیان ایلیون
دیوب بو سوزلری صغرا گلوبدور افغانه
بیری دوروبدور او عورتلرین، چو پروانه
ویروب یانا یانا رخصت گوزینده گوز یاشنا
دولاندی شوریله اول شمع بزم غم باشنا
او غم کشیده نون آرام و صبرینی آلدی
دالی طرفدن اونون باشینا قرا سالدی
گوروب بو حالتی صغرا تحملی گیتدی
ایویم یخلدی دئدی، ووردی باشه غش ایتدی
سپوبله سو یوزینه تازه دن گلوب هوشه
گوزینده خون جگر گلدی اشک تک حوشه
صاقا صولا متحیر باخوب اولوب بی تاب
دولاندیروب یوزینی جده سینه قیلدی خطاب
گرک ئولنجه ایدم ناله و فغان جده
دیوله گلشن عیشیم اولوب خزان جده
یوخودا گوردوقومون صدقی ایمدی ظاهر اولوب
گیدوب فنایه هامی جاه و عز و شان جده
باشیما سالدیلا قاره، یقین ایویم یخیلوب
یقین بابامدی ویروب قان ایچینده جان جده
دیوب بو سوزلری اول غمکش جهان صغرا
اوجاتدی شیونین افلاکه اول زمان صغرا
چخوب اوزیندن ایله صبر و تابی طاق اولدی
معاینه دیه سن گولدی گون دگوب سولدی
بلی ئولونجه بو ذیحقدور گله داده
دایانماق اول غمه، الحق چتیندی دنیاده
یولا سالا بیری بیر ایل یانا غمه جگری
گله گیدنلرینون سربسر ئولوم خبری
بو نکته قلبیمه اما منیم شرر سالدی
تصور ایلدیقیم حال صبریمی آلدی
بو بیر ایشتماقیلا خون دل گلور جوشه
او قدر آغلوری غش ایلوری گیدور هوشه
سکینه باجیسی اما نه نوع ایتدی دوام؟
باباسنی یره آتدان یخاندا لشگر شام
گوروردی هر گلن اول شاه دینه یاره ورور
قلج وران چکلور داش وران دوباره ورور
بدنده نیزه و خنجر یاراسی قان ویروری
سوسوز یارالی قوری توپراق اوسته جان ویروری
او وقتی عرض ایدورم دلفکار و دیده سی نم
تمام گلمیشدی قتلگاهه اهل حرم
گوروردولر یارالار پیکرینده سان ویرمز
قلج ووران اوخ آتان، داش وران امان ویرمز
بیری یاراسین اوپردی گلوردی فریاده
بیری باخاردی، بیری یالواروردی جلاده
گوروردولر کسه ایستور باشینی شمر لعین
دوتاردی خنجرینی بعضی، بعضیسی اتکین
دیوردولر بونی ئولدورمه، بینوایوخ بیز
بونون یرینه بیزی ذبح ایله رضایوخ بیز
نقدر ظلم ایلیوب شمر شوم دویمازدی
وراندا خنجری زینب دوتاردی قویمازدی
عقول عاجز اولار صبر قلب زینبدن
ویرولسه شرح چیخام قورخورام بو مطلبدن
ایدم سکینه و صغری غمین گرک تحقیق
ایکی باجنون ایدم صبر و طاقتین تطبیق
ایدم سکینه و صغری غمین گرک تحقیق
ایکی باجنون ایدم صبر و طاقتین تطبیق
بو بیر ایشتماقیلا اکبری ئولوب عطشان
او قدر قالمور ئوله، روحه جسم اولور زندان
سکینه اوز اوزین ئولدورمدی ندندور بس؟
او قدر جور و جفا ایتدی فرقه ناکس
گوزی باخا باخا اود دوتدی، خاطری یاندی
علی اکبری قطعه به قطعه دوغراندی
ندندی دونمدی بس قانه گوزده گوز یاشی
ورولدی اکبرینون نیزه باشینه باشی
وجود اکبری باشدان ایاقه سویدی عدو
گوره گوزه گوزی دوزدی، نه صبر و تابیدی بو
بونا دیوله دگوب حلق علی اصغره پیکان
ورور باشنا اوجالدور سپهره آه و فغان
ولی سکینه گوردی نه نوع قان ایچدی
سه شعبه تیر بوغازین قلج کیمی کسدی
اسوب سموم ستم غنچه گل کیمی سولدی
ایله بچلدی بوغاز، آغزی قانیله دولدی
او شیر خواره نی دفن ایلدی امام انام
و لیک قویمادیلار قبرده سپاه ظلام
اودم که ظلمینی اتمامه ویردی قوم شریر
گچوب جدالره باشلار، بسان مهر منیر
باخوب او باشلارا وقاص زاده نطقه گلوب
سکینه باغرینی تیر عداوتیله دلوب
دئدی بو باشلار ایچینده گورنمورم بیر باش
او باشی تاپماقا سیز ایلیون بو دمده تلاش
حسین النده گتورمشدی بیرجه طفل صغیر
سو ایستینده بوغازینا ووردی حرمله تیر
اونون جنازه سی هر یاندادور گرک تاپولا
جدا باشنا اونون قانلی باشی زینت اولا
بو حکمی لشگره تا ویردی اول عدو خدا
سوار اولوب آتنا اون نفر، الده جدا
مرحوم دخیل مراغه ای
(قویوبلا ایمدیه دین سینم اوسته اللریمی
دیوله نیزه ائله آختارولا اصغریمی
باشین کسله تاپولسا، دیون نه چاره ایدیم؟
منه نجف یولونی گوسترون هرایه گیدیم
آتاسی دفن ایدوب، آت نعشی اوسته چاپمیالار
گلون دعا ایلیون، اصغریمی تاپمیالار
واریمدی نسگلی جان ویرمیوب قوجاقیمده
نجه گوروم کسه لر باشینی قوجاقیمده)
مرحوم عاصی
(گل دعا ایله سکینه شام و کوفه لشگری
تاپماسون بلکه قیزیم نعش علی اصغری)
مرحوم نجمی تبریزی
(عمه دل ترابدن ظلم الی گوهر آختارور
نیزه لرین وورور یره اصغری لشگر آختارور...)
یره وراردیلا غیظیله نوک نیزه لری
بو قصدیله تاپالا بلکه تا او سود امری
بیری او حالده یاندوردی جمله آفاقی
چخاتدی نیزه باشندا او قانلی قونداقی
آخور گوزوم یاشی، بو مطلب اود وورور جگره
محالدور داخی پرده چکم همین خبره
نجه حسین سوه نون اشگیله گوزی دولماز
بلی جفا اولی، بو انتهاده ظلم اولماز
بو ظلمی گور آپارار قبره صاحب الاسلام
او ظلمی اصغره گوردی روا او بد فرجام
یتوب بیوک یره سوز، آه یا امام زمان
اوزوندن ایستورم عذر، ایلیم او ظلمی بیان
او ظالمی که تاپوب اصغرین جنازه سینی
آلوبدی دست قضادن جفا اجازه سینی
تمام لشگره تاپماقلیقینی آندوردی
ازل جداده او قونداقی بیر دولاندوردی
حریم محترمین اختیارینی آلدی
او سود امر بالانی نیزه دن یره سالدی
توکوب رباب و سکینه عذاره گوز یاشینی
آتندان اندی او ظالم، کسه اونون باشینی
گوروب بوغازی او طفلین ز بس لطیفیدی چوخ
بچوب بوغازینی باشدان باشا، قلج کیمی اوخ
قالوبدی بیر دری آویز، قطع اولوب حنجر
باشین آیریماقا لازم دگل داخی خنجر
نه ظلم اولوب دئمرم یوخ دلیمده شرحنه تاب
بو قدر وار که یوموب گوزلرین آناسی رباب
گوروب سکینه بو حالی الین قویوب گوزینه
آلشدی قلبی گینه تسلیت ویروب اوزینه
یانا یانا توکوب آغلار گوزی یوزه قانیاش
دیردی بوندان ازل من علی ئولیدیم کاش
نه تک سکینه نی جاندان بو غم اوساندوردی
بیوک کچیک حرم مصطفانی یاندوردی
با تشکر از جناب وحید تقی زاده
بابت تایپ این اشعار ناب
منبع مجموعه کانالهای مدح و مرثیه
با سلام