در مدح و میلاد حضرت امام حسین (ع) 6081

در مدح و میلاد حضرت امام حسین (ع)

 

ای حسینون عاشقی اولسون سنه جانیم فدا

سَسله عشقیله حسینی هارداسان اِیله صفا

 

صورت ظاهرده باخما باغلانوبدور میکده

صورت باطنده باغلانماز ولیکن می سرا

 

می سرای عشق ارباب طریقت بازیدور

حضرت صادق بیله فرمایش اِیلوب، انما

 

کیم دیور میخانه لر باغلاندی ساغرلر سینوب

پیر رنداندور محبانه شهید نینوا

 

کیم حسینه آغلاسا هر یرده صدقیله اگر

دیده گریان باش چکر اول مجلسه خیرالنسا

 

دول بوشالدور میکده هوهو چکور دیوانه لر

نغمه پیمانه دن بلبل اِیدور شور و نوا

 

وه نه نغمه وه نه پیمانه نه باده نه شراب

گوشه میخانه ده عشاق اِیدور رقص و سما

 

ماه شعبان ، جَذبهِ ساقیِ ، فروغ روی یار

شاد و خرمدور بو بزم ایچره قلوب ماسوا

 

شهر یثربده چکوب زمره ملائک صف بو دم

اِیلیه مدهوش بلکه نورس شاه ولا

 

آز قالور زینت تاپا بیر باده نوشیله جهان

روح احبابه تجلی اِیلیه بیر مه لقا

 

پشت درده منتظردور حضرت روح الامین

گوزلیور قنداقه سین عرشه آپارسین بر ملا

 

جان جانان عشق منان دلبر دلدادگان

تا قدم قویدی جهانه تاپدی چوخ دیده ضیا

 

دیده بینای شاه لافتایه آچدی گوز

شاد اولوب یُمنِ قدومیندن او میر مقتدا

 

گوز گوز اولدی تا شبیریله امام عالمین

یوز دوتوب زهرایه اوز دلدارینی اِیتدی ندا

 

سویلدی زهرای من ای پاره قلب رسول

ای منیم ایستکلی دلداریم سنه جانیم فدا

 

بو گوزل مولوده باخدوقجا ایشخلاندی گوزوم

حیدره ذوق و صفا ویردی ایوین آباد اولا

 

آیری بیر عالم یاراتمیشدی قدوم شاه عشق

حضرت طاهایه تبریک عرض ایدوردی انبیا

 

بیر نه تک طاها و حیدر اولموشیدی مست مست

سس گلوردی عرشیدن اول نور پاکه مرحبا

 

سس گلوردی جبریلا تز یتور محبوبیمی

تا او نور پاکیله زینت تاپا اَرض و سما

 

لفظ کن تا صادر اولدی حضرت دلداریدن

عرش حق حقیده شورش سالوب بو ماجرا

 

بو ندادن آلدی دم فطرس سماده شوریله

عرض قیلدی بار الاها اِیت بو مسکینه عطا

 

اذن ویر منده حسینی بیر زیارت ایلیوم

اول زیارتله یته بلکه من زاره شفا

 

تا بو سوز چیخدی دیلوندن فترس دلخسته نین

گوردی گلدی موجه دریای کرم بحر سخا

 

بال و پر آچدی دوباره اولدی مدیون حسین

بیر نظر ایتسه حسین دنیایه ایلر اکتفا

 

تک نه فترس خانقاه عشقینه اولموش دخیل

درگه اربابیده زانو ویرار شاه و گدا

 

وار بو شاهین بیر وزیر جنگی صاحب پرچمی

سو کنارینده اولوبدور قولاری تندن جدا

 

آه او ساعتدن اوجا یردن یخیلدی توپراقا

بیر اورکدن آه چکدی سسلدی ای وای آنا

 

چشم جانیله نه گوردی دیده گریان سر زنان

فاطمه قولارین آچدی سویلدی ای با وفا

 

عشق اولا ایثاریوه ای جان نثار کوی عشق

گل یارالی سینه مه ای تشنه جام لقا

 

ایلدی عباس نام آور او دم تدبیرینی

دلده بو فکریله ازلده گیدوب پابوس اولا

 

بولمورم دوشدی نه نوعیله ترابه گول یوزی

اول اسفلی حالتی زهرایه اولدی جانفزا

 

وار یری قان آغلاسا بو نکتیه چشم جهان

بیر ایاقی ، بَند اولموشدی رکابه گوئیا

 

سسلنیردی هارداسان قارداش حسین امداده گل

ای مقدس درگهی اهل جهانه التجا

 

اوخلانوب مشکیم علاوه صاق صولوم تندن دوشوب

جراَته یکسر گلوبدور عرصه ده قوم دغا

 

آز قالور تندن آیرسون باشیمی جلادیلر

 سون نفسده گل زیارت ایلیوم بیرده اخا

 

چوخ سوزی آچما (عتیقا) لازمه جَف قلم

چوخ آچیق سوزلر یازوبلار که اوخونماز مطلقا

 

بیر اشاره بس محبانه مصیبتدن ، او دم

شاه دینون سرو قدی غمدن اولموشدی دوتا

 

سنده بو طبع رسا یوخدور (عتیقا) گر سنه

ویرمسیدی دم (زکی) اولمازدی فعل پر بها

 

جناب استاد طهمورثی (عتیق) و جناب حامد زکی

منبع مجموعه کانالهای مدح و مرثیه

ورود به شام 6059

ورود به شام

 

چاووش چکدی جار ، گلور خارجی اسیر

اولموش بناتِ شیرِ خدا شمره دستگیر

 

جلب ِتوجّه ایلدی نامِ شهِ نجف

شام اهلی یوز قویوب هامی دروازیه طرف

 

بدر انتقامین آلماقا گلمیشدی اهلِ شام

توهین ایدردی باشلارا اول ملّتِ عوام

 

داملاردان اود توکردیله آلِ پیمبره

گه ناسزا دیردیله اولادِ حیدره

 

گه قیزلارا کنیز گوزونده باخاردیلار

گاهی گولوب خانیملارا گه کف چالاردیلار

 

بازارِ شام ، عترتِ خیرالانام ، عجب...

دوتموشدی قلبِ سیّدِ سجّادی تاب و تب

 

آت اویناداردی شمر و سَنان اللرینده باش

قیزلار باخاردی دلده فغان ،گوزده قانلی یاش

 

لیکن جدا باشیندا سرِ شاهِ اولیا

کهف آیه سین اوخوردی او سلطان ِماسوا

 

دوتموشدی گرچه گوزلرینی لخته لخته قان

امّا باخاردی قیزلارا اول میرِ انس و جان

 

محمل لریله ناقه لر اولموشدی روبرو

باشلار گزردی نیزه ده شاماتی کو به کو

 

باشلار ایچینده واریدی بیر سودامر باشی

هر کیم باخاردی عارضه باغلاردی گوز یاشی

 

مشغول ایدوبدی ذهنیمی بیر سِرّ جانشکار

آتش سالوب نهادیمه بو نکته آشکار

 

بیر باش خیالی خانه ی فکری ایدوب خراب

باشلار ایچینده یوخدی سرِ پورِ بوتراب

 

باب المراد ، ساقی بی دستِ کربلا

سینسین قلم بو سِرّی اگر ایتسه برملا

 

شرمنده دور بو خجلتینون واردی علّتی

چوخ یاندیریب او غمزه ده نی بیر سو صحبتی

 

بیر مشک سو خجالت ایدوب اول دلاوری

لابد بودور جداده دگول راس ِانوری

 

هر دم باخور گوز آلتی گینه رأس اصغره....

معناده آهی اوج ایلیور عرشِ داوره

 

دلدن یانور او قانه باتان زلف و کاکله

معناده بو زبانیله گویا گلور دله

 

ای آسمانِ عشقیده رخشنده ماهتاب

قربان او خسته گوزلره ای غنچه ی رباب

 

وار علّتی علی بور قدر غرقِ مِحنتم

حشره کیمی رباب آناندان خجالتم

 

 

ایله (زکی) بو چامه ی پُر محنتی تمام

قورتولماز هر قدر یازیلا ماجرای شام

 

بسدور دایان بو قصه ی جانسوزی ختم اِله

آغلا او قدر حاجتِ قلبون گله اَله.

 

جناب آقای  حامد محمدی  (زکی)

منبع مجموعه کانالهای مدح و مرثیه