متن نوحه های ترکی و فارسی

زبانحال حضرت رقیه (س)

منزلیم ویرانه دور ، هر چند ظلمتدور بابا

دائما" تشریفون اولسا ، رشکِ جنتّدور بابا

بولمدیم تشریفوی ای خسروِ مُلکِ حجاز

یوخسا بینِ راهه دین ، روحیم ایدردی پیشواز

غفلتا" اولدی ورودون گر چه اولدوم سرفراز

لیک بو غفلت منه ، معناده خجلتدور بابا

میزبان مهمانینی لازمدی دوتسون محترم

میهمان سن تک خصوصا" بیر شه اولسون محتشم

سربلند اولّام اگر قویسان گوزوم اوسته قدم

ایلرم هر آن تشکر ، جانه منتّدور بابا

عالی تشریفاته منده یوخ بولورسن اقتدار

کربلا دشتینده اولموش عزّ و جاهیم تار و مار

بیر قوری جانیم قالور ، قوی باشوه ایلوم نثار

چوخ حساب ایله اگر چه جزئی خدمتدور بابا

بو محقّر منزلیم ، گر چه دگول لایق سنه

سن وقاروندان گچوب بیر لطف دور ایتدون منه

دستِ کوتاهیم عجب یتدی بو عالی دامنه

بولمورم من یتمیشم بو نه سعاتدور بابا

من بابا سندن صورا عزّت لباسین سویموشام

جانوه اولسون قسم دنیاده جاندان دویموشام

کربلادن شامه دین سندن اوتور جان قویموشام

ظلمِ شمره دوزموشم یولّاردا مدّتدور بابا

دوشمیوب وصلون بابا آسان طریقیله اله

گلمیوب اوز باشینه باشون خرابه منزله

گلمیشم صبح و مسا ویرانه ده نی تک دله

چکمیشم الحق او کی رنج و ریاضتدور بابا

چوخ گلایم وار گرک دلده چوخون پنهان ایدم

سن عزیزیم سن منیم ، باغرون نه لازم قان ایدم

ایمدی که وصله یتیشدیم جانیمی قربان ایدم

قورتولوم اندوه و غمدن بو نه حالتدور بابا

من بابا مطلق دیردیم چوخ سوورسن سن منی

بولمورم نولدی سبب گوزدن بیله سالدون منی

چوخ دُگوب چوخ اینجدوب سندن صورا دشمن منی

قولّاریم چگنیم اگر باخسان جراحتدور بابا

عمّمه بیر لطفِ مخصوص ایله ، آل حالین خبر

چوخ اذیّت لر چکوب شامه کیمی شام و سحر

هر قیزی دشمن ووراندا قولّارین ایلوب سپر

ایلیوب هر آن او که سانسیز حمایتدور بابا

من بابا نچه گجیدی صبحه تک بیداریدیم

گوزلریم گیتمزدی خوابه دمبدم خونباریدیم

بو گجه بیر هوش آپاردی هوشیده تا واریدیم

محضروندیدیم دییردیم یاخشی ساعتدور بابا

بولمدیم رویادی آچدیم بوینووا بیر قول سالوم

بیر اُپوم بیر ایگلیوم گُل تک بابا عطرون آلوم

اضطرابیله اویاندیم قویمادون حسرت قالوم

گوگلومی گتدون اله ، بو عینِ رأفتدور بابا

حمدالله گوردوقوم رویانی گوردوم آشکار

قویمادی حسرت منی دیداروه پروردگار

جان ویرن وقتیمده گلدون قالمادیم من انتظار

نیلیوم چارم که یوخدی دم غنیمتدور بابا

هانسی کافر قانیله الوان ایدوب گوز قاشیوی؟

دوندروب قانه منیم تک ظلمیلن گوز یاشیوی

چوخ سووردیم باغریما جان تک باسیدیم باشیوی

ویر اجازه کام آلوم من ، یاخشی فرصتدور بابا

سن گلیردون ایمدی که ویرانیه تاجِ سریم

گلمه دی آیا سبب نولدی سنیله اکبریم

نچه مدّتدی یولون گوزلر بو آغلار گوزلریم

گُل جمالین گورماقا گوگلوم چوخ حسرتدور بابا

نه منی ویرانه ده عبّاس عموم یاده سالور

گوگلومی نه بیر گلور غربت ولایتده آلور

شاهزاده قارداشیم اکبر صاغدی قالور

ایلیوب مندن بو مدّتده نه غفلتدور بابا

شیر خواره اصغریم نولموش بابا گلمور سسی؟

اولموشام بلبل تک اول غنچه گُلون آوره سی

هاردادور بولمم اوزی؟ یا هاردادور گهواره سی

سو ایچوب خوابه گیدوب یوخسا که راحتدور بابا

نوکریم دور چون (شهاب) ایستر بابا مندن صله

بیر امیدیله آلوبدور خامه و دفتر اله

ایسترم اوز قبریمه اوز سوودوقی بیر جمعیله

دلده منظوری اونون بوللم زیارتدور بابا.

مرحوم شهاب تبریزی

منبع مجموعه کانالهای مدح و مرثیه