متن نوحه های ترکی و فارسی

در مدح و میلاد امام حسن مجتبی (ع)

ایشیقلاندی جهان ، دنیایه نور کبریا گلدی

صفات الله مظهر ،  آیت حسن خدا گلدی

بشارت  اهل ایمانه  ، شرفلی مقتدا گلدی

نماز  شکر  قیل  شیعه   امیر اتقیا گلدی

عزیز  حضرت  زهرا ،  امام مجتبی گلدی

چاتور صوت مبارکباد فرشه عرش اعلادن

ملائک بیت مولانی طواف ایلور تولادن

زیارت ائتماقا اذن دخول ایستورله طاهادن

عزیز مصطفانی گورماقا اهل سما گلدی

عزیز حضرت زهرا ، امام مجتبی گلدی

عنایت ایلیوب الله،گوزل دردانه طاهایه

وئروب ذات علیدن بیر اوغول،ام ابیهایه

زلیخا سهلیدی عالم دوروب یکسر تماشایه

که یوسف دن گوزل بیر مه جبین و مه لقا گلدی

عزیز حضرت زهرا ، امام مجتبی گلدی

اولوبدور شهره عالم ملاحتده،وجاهتده

آلوبدور رتبه ی ارزنده،صبر و استقامتده

حسن سرو دل آرادی گلستان امامتده

مشامه باغ جنتدن شمیم جان فزا گلدی

عزیز حضرت زهرا ، امام مجتبی گلدی

گوزللیک اولسا انگشتر،حسن قیمتلی بیر قاشدی

عجب گولدور،بهشتین گوللریندن حسنوده باشدی

مبارک مقدمیندن چشمه ی رحمت آشوب داشدی

گلوبدور جوشه زمزم،مروه سسلندی صفا گلدی

عزیز حضرت زهرا ، امام مجتبی گلدی

حسن طینت،حسن خصلت،حسن صورت،حسن سیرت

گوزل نقشینده غوغا ایلیوب صورتگر خلقت

علینین نایبی اولسون آلوب حقدن صلاحیت

تعالی الله بو مولوده وصی مرتضی گلدی

عزیز حضرت زهرا ، امام مجتبی گلدی

حسن یعنی شرف،یعنی حیا،مصداق حیثیت

حسن،اللهه مخلص بنده دی فخر ربوبیت

ریاضتله وئروبدی عالمه درس عبودیت

رواج دین اسلامه ایکیمجی پیشوا گلدی

عزیز حضرت زهرا ، امام مجتبی گلدی

صله بو شعریوه(فرهادی)اللهدان عطا ایسته

کریم آل طاهادن برات کربلا ایسته

مریض عشق سن دارالشفاسیندن شفا ایسته

ایله عالم لره اعلان شه مشکل گشا گلدی

عزیز حضرت زهرا ، امام مجتبی گلدی

 فرهادی مراغه ای